ചെന്നൈ: തമിഴ് സിനിമയും രാഷ്ട്രീയവും വീണ്ടും ചരിത്രനിമിഷത്തിന് സാക്ഷിയാകുന്നു. തമിഴ്‌നാട് മുഖ്യമന്ത്രിയായിരിക്കെ സി. ജോസഫ് വിജയ് നായകനായി അഭിനയിച്ച ‘ജനനായകൻ’ വൻ ആരാധകാഘോഷങ്ങളോടെ വ്യാഴാഴ്ച തിയേറ്ററുകളിലെത്തി. മുഖ്യമന്ത്രിപദം ഏറ്റെടുത്തശേഷം തിയേറ്ററുകളിലെത്തുന്ന വിജയ് ചിത്രം എന്ന പ്രത്യേകതയും ‘ജനനായകനുണ്ട്’.

1977-ൽ എം.ജി. രാമചന്ദ്രൻ തമിഴ്‌നാട് മുഖ്യമന്ത്രിയായി അധികാരമേറ്റതിന് പിന്നാലെ അദ്ദേഹം നായകനായ ‘മീനവ നൻബൻ’ റിലീസ് ചെയ്തിരുന്നു. അതിനുശേഷം ഏകദേശം അഞ്ച് പതിറ്റാണ്ടുകൾ പിന്നിടുമ്പോഴാണ് തമിഴകത്തിന്റെ മുഖ്യമന്ത്രി കേന്ദ്രകഥാപാത്രത്തെ അവതരിപ്പിച്ച മറ്റൊരു ചിത്രം പ്രദർശനത്തിനെത്തുന്നത്. വിജയ് മുഖ്യമന്ത്രിയായി ചുമതലയേറ്റ് രണ്ടുമാസത്തിലേറെ പിന്നിടുമ്പോഴാണ് ‘ജനനായകന്റെ’ റിലീസ്.

വിജയ്‌യുടെ അവസാന സിനിമയെന്ന നിലയിൽ പ്രഖ്യാപിക്കപ്പെട്ട ചിത്രം നേരത്തേ ജനുവരിയിൽ റിലീസ് ചെയ്യാനായിരുന്നു തീരുമാനം. എന്നാൽ സെൻട്രൽ ബോർഡ് ഓഫ് ഫിലിം സർട്ടിഫിക്കേഷനുമായി ബന്ധപ്പെട്ട നടപടികളും തുടർന്നുണ്ടായ നിയമപോരാട്ടങ്ങളും കാരണം റിലീസ് മാസങ്ങളോളം വൈകുകയായിരുന്നു. ആവശ്യപ്പെട്ട മാറ്റങ്ങൾ വരുത്തിയതിനെത്തുടർന്ന് ചിത്രം ‘എ’ സർട്ടിഫിക്കറ്റോടെയാണ് പ്രദർശനാനുമതി നേടിയത്.

എച്ച്. വിനോദ് സംവിധാനം ചെയ്ത പൊളിറ്റിക്കൽ ആക്ഷൻ ചിത്രത്തിൽ വിരമിച്ച പൊലീസ് ഉദ്യോഗസ്ഥനായാണ് വിജയ് എത്തുന്നത്. സാമൂഹികനീതിയും സാധാരണക്കാരുടെ സംരക്ഷണവും ഉൾപ്പെടെയുള്ള വിഷയങ്ങളാണ് ചിത്രത്തിന്റെ പ്രമേയമെന്നാണ് പുറത്തുവരുന്ന വിവരം. പൂജ ഹെഗ്‌ഡെ, ബോബി ഡിയോൾ, മമിത ബൈജു, പ്രകാശ് രാജ് തുടങ്ങിയവരും പ്രധാന വേഷങ്ങളിലുണ്ട്.

റിലീസിന് മുമ്പുതന്നെ ചിത്രത്തിന് വൻതോതിൽ ടിക്കറ്റ് ബുക്കിങ് ലഭിച്ചു. ആദ്യഘട്ട കണക്കുകൾ പ്രകാരം 6.45 ലക്ഷത്തിലധികം ടിക്കറ്റുകൾ മുൻകൂട്ടി വിറ്റഴിഞ്ഞപ്പോൾ, റിലീസ് ദിനത്തോടെ വിൽപ്പന ഏഴുലക്ഷം പിന്നിട്ടതായാണ് റിപ്പോർട്ടുകൾ. ആദ്യദിന ആഗോള കളക്ഷൻ 100 കോടി രൂപയിലെത്തുമെന്ന പ്രതീക്ഷയിലാണ് സിനിമാ വ്യാപാരലോകം.

തമിഴ്‌നാടിന് പുറമെ കേരളം, കർണാടക തുടങ്ങിയ സംസ്ഥാനങ്ങളിലും വിദേശരാജ്യങ്ങളിലും വിപുലമായ റിലീസാണ് ചിത്രത്തിന് ലഭിച്ചിരിക്കുന്നത്. കേരളത്തിൽ പുലർച്ചെ മുതൽ പ്രദർശനങ്ങൾ ആരംഭിച്ചു. തമിഴ്‌നാട്ടിൽ രാവിലെ ഒമ്പതിനായിരുന്നു ആദ്യ ഷോ. പുതുച്ചേരിയിൽ നിശ്ചയിച്ചിരുന്ന ചില പ്രഭാതപ്രദർശനങ്ങൾ ടിക്കറ്റ് വിതരണവുമായി ബന്ധപ്പെട്ട പ്രശ്നങ്ങളെ തുടർന്ന് റദ്ദാക്കിയതായും റിപ്പോർട്ടുണ്ട്.

മുഖ്യമന്ത്രിയായിരിക്കെ വിജയ്‌യുടെ ചിത്രം തിയേറ്ററുകളിലെത്തിയതോടെ സിനിമാ-രാഷ്ട്രീയ രംഗങ്ങളിൽ ‘ജനനായകൻ’ വലിയ ചർച്ചയായി മാറിയിരിക്കുകയാണ്. ആരാധകരെ സംബന്ധിച്ചിടത്തോളം ഇത് ആഘോഷ റിലീസ് മാത്രമല്ല, വിജയ്‌യുടെ ദീർഘമായ സിനിമാ ജീവിതത്തിനുള്ള വികാരനിർഭരമായ വിടവാങ്ങൽ കൂടിയാണ്.

The post എം.ജി.ആറിന് ശേഷം വിജയ്; അഞ്ച് പതിറ്റാണ്ടിനിപ്പുറം തമിഴകത്ത് ചരിത്രമെഴുതി ‘ജനനായകൻ’ appeared first on Starvision News Malayalam.

മെയ് 10 രാവിലെ പത്ത് മണിക്ക് ചെന്നൈ ജവഹർലാൽ നെഹ്റു ഇൻഡോർ സ്റ്റേഡിയത്തിലാണ് 10 അംഗ മന്ത്രിസഭയുടെ സത്യപ്രതിജ്ഞാ ചടങ്ങ് നടന്നത്. ഗവർണർ രാജേന്ദ്ര ആർലേക്കർ സത്യവാചകം ചൊല്ലിക്കൊടുത്തു. വിജയ്ക്ക് ഒപ്പം അദ്ദേഹത്തിന് കക്ഷിയിലെ 9 മന്ത്രിമാരും സത്യപ്രതിജ്ഞ ചെയ്ത് അധികാരമേറ്റു. സംസ്ഥാനത്തിന്റെ എല്ലായിടത്തും വിജയ് ആരാധകർ ഉത്സവ തിമിർപ്പിലാണ്. 59 വർഷത്തിനുശേഷം കോൺഗ്രസ് ഉൾപ്പെടുന്ന തമിഴ്നാട് മന്ത്രിസഭയുടെ സത്യപ്രതിജ്ഞയ്ക്ക് സാക്ഷ്യം വഹിക്കാൻ ലോക്സഭാ പ്രതിപക്ഷ നേതാവ് രാഹുൽ​ഗാന്ധി എത്തി.

The post “സി ജോസഫ് വിജയ് എന്ന ഞാൻ” – സിനിമ സ്റ്റൈലിൽ തമിഴകത്ത് വിജയ് സർക്കാർ അധികാരമേറ്റു appeared first on Starvision News Malayalam.

ദില്ലി: കേരളമുൾപ്പെടെയുള്ള 4 സംസ്ഥാനങ്ങളിലും ഒരു കേന്ദ്രഭരണ പ്രദേശത്തും നിയസഭാ തെരഞ്ഞെടുപ്പ് അടുത്ത് വരികയാണ്. കേരളം, തമിഴ്നാട്, പശ്ചിമ ബംഗാൾ, അസം എന്നീ സംസ്ഥാനങ്ങളും കേന്ദ്രഭരണ പ്രദേശമായ പുതുച്ചേരിയുമാണ് തെരഞ്ഞെടുപ്പ് ചൂടിലേക്ക് അടുക്കുന്നത്. തെരഞ്ഞെടുപ്പ് സംബന്ധിച്ച വി‍ജ്ഞാപനം മാർച്ച് പകുതിയോടെ തെരഞ്ഞെടുപ്പ് കമ്മീഷൻ പ്രഖ്യാപിച്ചേക്കുമെന്ന് ഉദ്യോഗസ്ഥർ പറയുന്നു. ഏപ്രിൽ മാസത്തിൽ വിവിധ തീയതികളിൽ വോട്ടെടുപ്പ് നടക്കാനാണ് സാധ്യത. സംസ്ഥാനങ്ങളിലെ സാഹചര്യങ്ങൾ അനുസരിച്ച് ഒന്നിലധികം ഘട്ടങ്ങളിലായി തെരഞ്ഞെടുപ്പ് നടത്താനും സാധ്യതയുണ്ടെന്ന് ഉദ്യോഗസ്ഥർ അഭിപ്രായപ്പെടുന്നു. തെരഞ്ഞെടുപ്പ് അടുക്കുന്ന അഞ്ച് നിയമസഭകളുടെയും കാലാവധി മെയ്, ജൂൺ എന്നീ മാസങ്ങളിൽ വ്യത്യസ്ത ദിവസങ്ങളിൽ അവസാനിക്കും.

കേരള നിയമസഭയുടെ കാലാവധി മെയ് 23നാണ് അവസാനിക്കുന്നത്. പുതുച്ചേരി നിയമസഭയുടെ കാലാവധി ജൂൺ 15ന് അവസാനിക്കും. അസം നിയമസഭയുടെ കാലാവധി മെയ് 20ന് അവസാനിക്കും. തമിഴ്നാട് നിയമസഭയുടെ കാലാവധി മെയ് 10നും, പശ്ചിമ ബംഗാൾ നിയമസഭയുടെ കാലാവധി മെയ് 7നും അവസാനിക്കും. തെരഞ്ഞെടുപ്പുമായി ബന്ധപ്പെട്ട ഒരുക്കങ്ങൾ ആരംഭിച്ചിട്ടുണ്ടെന്നും, തിരഞ്ഞെടുപ്പ് നടക്കുന്ന സംസ്ഥാനങ്ങളിൽ സന്ദർശനം നടത്തി സാഹചര്യം വിലയിരുത്തി വരികയാണെന്നും പിടിഐ റിപ്പോർട്ട് ചെയ്യുന്നു. തെരഞ്ഞെടുപ്പ് കമ്മീഷൻ സംഘം നിലവിൽ അസമിൽ ഔദ്യോഗിക സന്ദർശനത്തിലാണ്.

മുൻ നിയമസഭാ തിരഞ്ഞെടുപ്പിൽ പശ്ചിമ ബംഗാളിൽ എട്ട് ഘട്ടങ്ങളിലായിരുന്നു വോട്ടെടുപ്പ് നടന്നത്. ചരിത്രത്തിൽത്തന്നെ ഏറ്റവും കൂടുതൽ ഘട്ടങ്ങളിലായി നടന്ന വോട്ടെടുപ്പായിരുന്നു ഇത്. അസം രണ്ട് ഘട്ടങ്ങളിലായി വോട്ടെടുപ്പ് നടത്തി. അതേ സമയം കേരളം,തമിഴ്നാട്, പുതുച്ചേരി എന്നിവിടങ്ങളിൽ ഒറ്റ ഘട്ടമായിട്ടായിരുന്നു വോട്ടെടുപ്പ് നടന്നത്.

അതേ സമയം, സംസ്ഥാനങ്ങളിൽ എസ്ഐആർ നടപടികളും പുരോഗമിക്കുകയാണ്. കേരളം ഫെബ്രുവരി 21ന് അന്തിമ പട്ടിക പുറത്തിറക്കും. പുതുച്ചേരിയിൽ ഫെബ്രുവരി 14ന് അന്തിമ വോട്ടർ പട്ടിക പ്രസിദ്ധീകരിച്ചിരുന്നു. തമിഴ്നാട് ചൊവ്വാഴ്ച അന്തിമ പട്ടിക 23 ന് പ്രസിദ്ധീകരിക്കും. പശ്ചിമ ബംഗാളിന്റെ അന്തിമ പട്ടിക ഫെബ്രുവരി 28 ന് പ്രസിദ്ധീകരിക്കും.

The post കേരളത്തോടൊപ്പം തെരഞ്ഞെടുപ്പ് കാത്തിരിക്കുന്നത് മറ്റ് 3 സംസ്ഥാനങ്ങളും പുതുച്ചേരിയും; വിജ്ഞാപനം മാർച്ച് പകുതിയോടെ appeared first on Starvision News Malayalam.

ചെന്നൈ : നിയമസഭാ തെരഞ്ഞെടുപ്പ് അടുത്ത വേളയിൽ പുതിയ പാർട്ടി രൂപീകരിക്കാൻ ജയലളിതയുടെ തോഴിയായിരുന്ന വി.കെ. ശശികല. ഇത് സംബന്ധിച്ച് അനുയായികളുമായി ചർച്ച നടത്തി. ജയലളിതയുടെ ജന്മദിനമായ ഫെബ്രുവരി 24 ന് രാമനാഥപുരത്ത് പ്രഖ്യാപനം നടത്തിയേക്കും. പൊതുയോഗത്തിനായി പന്തൽ നിർമാണം തുടങ്ങി. നിയമസഭ തെരഞ്ഞെടുപ്പിൽ ശശികല രൂപീകരിക്കുന്ന പാർട്ടി 40 മണ്ഡലങ്ങളിൽ മത്സരിച്ചേക്കും. എഐഎഡിഎംകെയിൽ തിരിച്ചെത്താനുള്ള ശ്രമങ്ങൾ പാളിയതോടെയാണ് പുത്തൻ നീക്കമെന്നാണ് വിലയിരുത്തൽ. 2027 ജനുവരി 27 വരെ തെരഞ്ഞെടുപ്പിൽ മത്സരിക്കുന്നതിൽ ശശികലക്ക് അയോഗ്യതയുണ്ട്‌.  

ശശികലയുടെ പാർട്ടി മത്സരിച്ചാൽ തെക്കൻ തമിഴ്നാട്ടിൽ എൻഡിഎയ്ക്ക് തിരിച്ചടി നേരിടും. അതിനാൽ പാർട്ടി പ്രഖ്യാപന നീക്കം ശശികലയുടെ സമ്മർദ്ദതന്ത്രം എന്ന സംശയത്തിലാണ് ഇപിഎസ് പക്ഷം.  ഐഎഡിഎംകെ നിലവിൽ എൻഡിഎ മുന്നണിയ്ക്ക് ഒപ്പമാണ്. പുതിയ പാർട്ടി രൂപീകരിച്ച് മത്സരിച്ച് മത്സരത്തിനിറങ്ങിയാൽ ഐഎഡിഎംകെ വോട്ട് ബാങ്കിൽ വിള്ളലുണ്ടായേക്കും. ഇത് എൻഡിഎക്ക് തിരിച്ചടിയാകും. ശശികലയുടേത് സമ്മർദ്ദതന്ത്രമാണെന്നാണ് ഇപിഎസ് പക്ഷം സംശയിക്കുന്നത്.  പ്രധാനമന്ത്രി മോദിക്ക് ശശികലയോട് നീരസമുണ്ടെന്നാണ് എൻഡിഎയിലെ സംസാരം

The post എൻഡിഎ മുന്നണിക്ക് തിരിച്ചടി, പുതിയ നീക്കവുമായി വി.കെ ശശികല, അനുയായികളുമായി ചർച്ച, തമിഴ്നാട്ടിൽ പുതിയ പാർട്ടി രൂപീകരിക്കാൻ തീരുമാനം appeared first on Starvision News Malayalam.

മനാമ: ബഹ്‌റൈനിലെ അൽ അഹ്ലിയ സർവകലാശാലയുമായി ഏകോപനത്തോടെയുള്ള ഓവർസീസ് എക്‌സ്‌പോഷർ പ്രോഗ്രാമിന്റെ ഭാഗമായി തമിഴ്‌നാട്ടിലെ വിവിധ കോളേജുകളിലുള്ള 20 എഞ്ചിനീയറിംഗ് വിദ്യാർത്ഥികൾ ബഹ്‌റൈനിലെത്തി.

തമിഴ്‌നാട് സർക്കാരിന്റെ ‘നാൻ മുതൽവൻ’ പദ്ധതിയുടെ കീഴിലാണ് ഈ സന്ദർശനം സംഘടിപ്പിച്ചിരിക്കുന്നത്.

വ്യവസായ പ്രസക്തമായ കഴിവുകൾ വർധിപ്പിച്ച് ഘടനാപരമായ കരിയർ മാർഗ്ഗനിർദ്ദേശം നൽകുന്നതിലൂടെ സംസ്ഥാനത്തെ യുവാക്കളെ ശാക്തീകരിക്കുക എന്ന ലക്ഷ്യത്തോടെയാണിത്. പ്രത്യേക പരിശീലനത്തിലൂടെയും ചലനാത്മകമായ പഠന അവസരങ്ങളിലൂടെയും ശക്തമായ കരിയർ പാതകൾ കെട്ടിപ്പടുക്കുന്നതിലും അവരുടെ ഭാവി സുരക്ഷിതമാക്കുന്നതിലും ഈ പദ്ധതി വിദ്യാർത്ഥികളെ പിന്തുണയ്ക്കുന്നു.

7,000ത്തിലധികം അപേക്ഷകരിൽനിന്ന് കർശനമായ ഒരു സ്കൗട്ടിംഗ് പ്രക്രിയയിലൂടെയാണ് ഗ്രാമീണ പശ്ചാത്തലങ്ങളിൽനിന്നുള്ള ഈ വിദ്യാർത്ഥികളെ തിരഞ്ഞെടുത്തത്. ബഹ്‌റൈനിലെ ഭാരതി അസോസിയേഷൻ അൽ അഹ്ലിയ സർവകലാശാലാ വളപ്പിൽ ഈ വിദ്യാർത്ഥികൾക്കായി ഒരു സംവേദന ഒത്തുചേരൽ സംഘടിപ്പിച്ചു.

ഭാരതി അസോസിയേഷൻ ഭാരവാഹികളും അൽ അഹ്ലിയ സർവകലാശാല പ്രതിനിധികളും വിദ്യാർത്ഥികളുമായി പാനൽ ചർച്ചയിൽ പങ്കെടുത്തു.
ഭാരതി അസോസിയേഷൻ പ്രസിഡന്റ് വല്ലം ബഷീർ, ജനറൽ സെക്രട്ടറി അബ്ദുൽ ഖയ്യൂം, വിനോദ സെക്രട്ടറി ഹൻസുൾ ഗനി, ഇന്റേണൽ ഓഡിറ്റർ മുത്തുവേൽ എന്നിവരുടെ പ്രസംഗങ്ങളും മാർഗ്ഗനിർദ്ദേശങ്ങളും പരിപാടിയിലുണ്ടായിരുന്നു.

ആൽബ സുരേഷ് സാങ്കേതിക പിന്തുണയെയും വ്യവസായ സന്നദ്ധതയെയും കുറിച്ച് പ്രഭാഷണം നടത്തി. അൽ അഹ്ലിയ സർവകലാശാല ഉദ്യോഗസ്ഥരായ ഗൗരി ശങ്കർ, പ്രൊഫ. സുരേഷ് എന്നിവരും യോഗത്തിൽ പങ്കെടുത്തു.

The post ഓവർസീസ് എക്‌സ്‌പോഷർ പ്രോഗ്രാം: തമിഴ്നാട്ടിലെ 20 എഞ്ചിനീയറിംഗ് വിദ്യാർത്ഥികൾ ബഹ്റൈനിലെത്തി appeared first on Starvision News Malayalam.

ചെന്നൈ: വനിതാ ശാക്തീകരണം ലക്ഷ്യമിട്ട് വിവിധ മേഖലകളില്‍ സംഭാവന നല്‍കി സമൂഹ മുന്നേറ്റത്തിന് മാതൃകയായ തമിഴ് നാട്ടിലെ 12 സ്ത്രീ രത്നങ്ങള്‍ക്ക് ദി ന്യൂ ഇന്ത്യന്‍ എക്സ്പ്രസിന്റെ ആദരം. ചെന്നൈയിലെ ഐടിസി ഗ്രാന്‍ഡ് ചോളയില്‍ നടന്ന ചടങ്ങില്‍ ടാഫെ ലിമിറ്റഡിന്റെ ചെയര്‍മാനും മാനേജിങ് ഡയറക്ടറുമായ മല്ലിക ശ്രീനിവാസന്‍ അവാര്‍ഡുകള്‍ സമ്മാനിച്ചു.

പരിസ്ഥിതി പ്രവര്‍ത്തക ജയശ്രീ വെങ്കടേശന്‍, തിയേറ്റര്‍ പ്രാക്ടീഷണര്‍ ആയിഷ റാവു, മ്യൂസിയോളജിസ്റ്റ് ഡെബോറ ത്യാഗരാജന്‍, ശിശുരോഗ വിദഗ്ധന്‍ ഡോ. സൗമ്യ സ്വാമിനാഥന്‍, മനോരോഗ വിദഗ്ധ ഡോ. താര ശ്രീനിവാസന്‍, അധ്യാപിക മേരി സൂസന്ന ടര്‍ക്കോട്ട്, ബാഡ്മിന്റണ്‍ താരം തുളസിമതി മുരുഗേശന്‍, ഓട്ടോ ഡ്രൈവര്‍ മോഹന സുന്ദരി, ചെന്നൈയിലെ ഇന്‍സ്റ്റിറ്റ്യൂട്ട് ഓഫ് ചൈല്‍ഡ് ഹെല്‍ത്തിലെ സ്റ്റാഫ് നഴ്സ് ജി ശാന്തി, പര്‍വതാരോഹക മുത്തമില്‍സെല്‍വി നാരായണന്‍, നടി സുഹാസിനി, ഡിസൈനര്‍ വിനോ സുപ്രജ എന്നിവര്‍ പുരസ്‌കാരം ഏറ്റുവാങ്ങി.

ന്യൂ ഇന്ത്യന്‍ എക്സ്പ്രസ് സിഇഒ ലക്ഷ്മി മേനോന്‍ ചടങ്ങ് ഉദ്ഘാടനം ചെയ്തു. സമൂഹത്തിന്റെ ശ്രദ്ധനേടാത്ത യാഥാര്‍ഥ സ്ത്രീ ശക്തിയെയാണ് ദേവി അവാര്‍ഡ്‌സിലൂടെ ആദരിക്കുന്നതെന്ന് ലക്ഷ്മി മേനോന്‍ ഉദ്ഘാടന പ്രസംഗത്തില്‍ ചൂണ്ടിക്കാട്ടി. ‘ഇത് ശക്തിയുടെ നാടാണ്,’ ‘ദേവതകളില്‍ നിന്ന് മുത്തശ്ശിമാരിലേക്കും ക്ലാസ് മുറികളില്‍ നിന്ന്അധ്യാപകരിലേക്കും കൃഷിയിടങ്ങളില്‍ നിന്ന് ഫാക്ടറികളിലേക്കും ആ ശക്തി സഞ്ചരിച്ചു. എന്നാല്‍, യഥാര്‍ത്ഥ ശക്തി, ശ്രദ്ധ തേടുന്നില്ല. അത് സ്വയം പ്രഖ്യാപനങ്ങള്‍ക്ക് മുതിരുന്നില്ല, അത് ഫലങ്ങള്‍ നല്‍കുകയാണ് ചെയ്യുന്നത്. അവരുടെ യാത്രകളില്‍ വിജയം പല രൂപങ്ങളില്‍ വരും. ‘നിശ്ചയദാര്‍ഢ്യം, ധൈര്യം, സത്യസന്ധത എന്നിവയാണ് ഇവരുടെ വിജയത്തിന്റെ അടിസ്ഥാനം. ഇതാണ് പുരസ്‌കാരം ഓര്‍മ്മപ്പെടുത്തുന്നതെന്നും ന്യൂ ഇന്ത്യന്‍ എക്സ്പ്രസ് സിഇഒ ചൂണ്ടിക്കാട്ടി.

മൂലധനത്തിലേക്കുള്ള പ്രവേശനമാണ് സ്ത്രീകള്‍ നേരിടുന്ന വലിയ വെല്ലുവിളികളില്‍ പ്രധാനമെന്ന് പുരസ്‌കാരങ്ങള്‍ വിതരണം ചെയ്ത ശേഷം ചടങ്ങിനെ അഭിസംബോധന ചെയ്ത സംസാരിക്കവെ മല്ലിക ശ്രീനിവാസന്‍ പറഞ്ഞു. സ്ത്രീകള്‍ക്ക് സംരംഭകത്വ ശേഷി കുറവല്ല, സ്വയം സഹായ സംഘങ്ങളുടെയും ഗ്രാമീണ സംരംഭങ്ങളുടെയും വിജയം ഇതിന് ഉദാഹരണമാണ്. എന്നാല്‍, മേഖല ഇനിയും വളരേണ്ടതുണ്ട്. സര്‍ക്കാര്‍ സ്ത്രീകള്‍ക്ക് നല്‍കുന്ന പിന്തുണ വര്‍ധിപ്പിക്കണം. കാതലായ മാറ്റത്തിന് സാമൂഹത്തിന്റെ കാഴ്ചപ്പാടുകള്‍ മാറേണ്ടത് അത്യാവശ്യമാണെന്നും മല്ലിക ശ്രീനിവാസന്‍ പറഞ്ഞു.

ഇത്തവണത്തെ പുരസ്‌കാര ജേതാക്കളുടെ പട്ടികയും വിവിധ മേഖലകളില്‍ മികവ് തെളിയിച്ച സ്ത്രീകളുടെ വൈവിധ്യം അടയാളപ്പെടുത്തുന്നതായിരുന്നു. തണ്ണീര്‍ത്തട സംരക്ഷണത്തിലെ അക്ഷീണ പ്രവര്‍ത്തനത്തിനായിരുന്നു പരിസ്ഥിതി പ്രവര്‍ത്തക ജയശ്രീ വെങ്കടേശന്‍ പുരസ്‌കാരം നേടിയത്. കലാ മേഖലയിലെ പ്രവര്‍ത്തനങ്ങള്‍ക്ക് നാടക പ്രവര്‍ത്തകയായ ആയിഷ റാവു, ദക്ഷിണചിത്ര സ്ഥാപകയും മ്യൂസിയോളജിസ്റ്റുമായ ഡെബോറ ത്യാഗരാജന്‍ എന്നിവര്‍ പുരസ്‌കാരം നേടി.

പൊതുജനാരോഗ്യത്തിന് നല്‍കിയ ആഗോള സംഭാവനകള്‍ക്ക് പ്രശസ്ത ശിശുരോഗ വിദഗ്ദ്ധ ഡോ. സൗമ്യ സ്വാമിനാഥന്‍, മാനസികാരോഗ്യ സംരക്ഷണത്തിലെ പ്രവര്‍ത്തനത്തിന് സൈക്യാട്രിസ്റ്റ് ഡോ. താര ശ്രീനിവാസന്‍ എന്നിവര്‍ക്ക് അവാര്‍ഡ് ലഭിച്ചു. കോര്‍ട്ടിലും പുറത്തും മനക്കരുത്തും ദൃഢനിശ്ചയവുമായിരുന്നു ബാഡ്മിന്റണ്‍ പാരാലിമ്പിക് താരം തുളസിമതി മുരുകേശനെ അവാര്‍ഡിന് അര്‍ഹയാക്കിയത്. ചെന്നൈയിലെ ഇന്‍സ്റ്റിറ്റ്യൂട്ട് ഓഫ് ചൈല്‍ഡ് ഹെല്‍ത്തിലെ സ്റ്റാഫ് നഴ്സാണ് ജി ശാന്തി. പൊതുഗതാഗത മേഖലയിലെ പുരുഷാധിപത്യത്തെ മറികടന്ന വ്യക്തിത്വം എന്ന നിലയില്‍ , ഓട്ടോ ഡ്രൈവറായ മോഹന സുന്ദരി പുരസ്‌കാരം നേടി. കൊടുമുടികള്‍ കീഴടക്കിയ പര്‍വതാരോഹക മുത്തമില്‍സെല്‍വി നാരായണനും ആദരിക്കപ്പെട്ടു. സിനിമ – സാംസ്‌കാരിക മേഖലയില്‍ സ്വാധീനം സുഹാസിനിയെ ദേവി ഓഫ് ട്രാന്‍സ്ഫോര്‍മേഷന്‍ അവാര്‍ഡിന് അര്‍ഹയാക്കി. ഡിസൈനര്‍ വിനോ സുപ്രജയ്ക്ക് ദേവി ഓഫ് സ്‌റ്റൈല്‍ അവാര്‍ഡും, സാമൂഹിക പ്രവര്‍ത്തക മേരി സുസന്ന ടര്‍കോട്ടിന് പാര്‍ശ്വവല്‍ക്കരിക്കപ്പെട്ടവരുടെ ശബ്ദമായതിനും അംഗീകാരം നേടി.

The post തമിഴ്‌നാടിന്റെ 12 വനിതാ രത്‌നങ്ങള്‍, 37-ാമത് ദേവി അവാര്‍ഡുകള്‍ സമ്മാനിച്ചു appeared first on Starvision News Malayalam.

ചെന്നൈ: തമിഴ്‌നാട് നിയമസഭയില്‍ നാടകീയ രം​ഗങ്ങൾ. ഡിഎംകെ സർക്കാർ തയ്യാറാക്കിയ നയപ്രഖ്യാപനത്തിൽ നിറയെ പിഴവുകളുണ്ടെന്നും, അതു വായിക്കാനാകില്ലെന്നും ​ഗവർണർ ആര്‍ എന്‍ രവി പറഞ്ഞു. സമ്മേളനത്തിന്റെ തുടക്കത്തിൽ ദേശീയ ​ഗാനം ആലപിക്കാത്തതിനെയും ​ഗവർണർ വിമർശിച്ചു. വിമർശനത്തിനിടെ ​ഗവർണറുടെ മൈക്ക് സ്പീക്കർ ഓഫ് ചെയ്തു. ഇതിൽ പ്രതിഷേധിച്ച് ​ഗവർണർ ആർ എൻ രവി നിയമസഭയിൽ നിന്നും ഇറങ്ങിപ്പോയി.

നയപ്രഖ്യാപന പ്രസംഗം വായിക്കാതെയാണ് ഗവർണർ ആർ എൻ രവി നിയമസഭയില്‍ നിന്നും ഇറങ്ങിപ്പോയത്. തുടര്‍ന്ന് സ്പീക്കര്‍ എന്‍ അപ്പാവു നയപ്രഖ്യാപനം നിയമസഭ പാസ്സാക്കിയതായി പ്രഖ്യാപിച്ചു. നയപ്രഖ്യാപന പ്രസംഗം ഇനി മുതല്‍ വേണ്ടെന്ന് മുഖ്യമന്ത്രി സ്റ്റാലിന്‍ അഭിപ്രായപ്പെട്ടു. ഇതിനായി ഭരണഘടനാ ഭേദഗതി കൊണ്ടു വരണമെന്നും സ്റ്റാലിന്‍ നിര്‍ദേശിച്ചു.

രാവിലെ 9.30 നാണ് തമിഴ്‌നാട് നിയമസഭയുടെ 2026ലെ ആദ്യ സമ്മേളനത്തിന് തുടക്കമായത്. തമിഴ് തായ് ആശംസകളോടെയാണ് തുടക്കം. തുടര്‍ന്ന് ദേശീയ ഗാനം ആലപിക്കാന്‍ ഗവര്‍ണര്‍ രവി ആവശ്യപ്പെട്ടു. എന്നാല്‍ തമിഴ് തായ് ആശംസ മാത്രമാണ് ആദ്യമെന്നും, ദേശീയഗാനം ആദ്യം ആലപിക്കുന്നില്ലെന്നും സ്പീക്കര്‍ അറിയിച്ചു. ദേശീയഗാനത്തെ അപമാനിക്കാനാവില്ലെന്നും, ആലപിക്കണമെന്നും ഗവര്‍ണര്‍ ശഠിച്ചു.

നിയമസഭയുടെ ചട്ടങ്ങളും നിയമങ്ങളും ഗവര്‍ണര്‍ പാലിക്കണമെന്നും, നയപ്രഖ്യാപന പ്രസംഗം വായിക്കാനും സ്പീക്കര്‍ നിര്‍ദേശിച്ചു. തന്റെ ഉത്തരവാദിത്തങ്ങള്‍ തനിക്കറിയാമെന്ന് ഗവര്‍ണറും പ്രതികരിച്ചു. തുടര്‍ന്ന് നിയമസഭയില്‍ അംഗങ്ങള്‍ക്ക് മാത്രമാണ് അഭിപ്രായം പറയാനാവൂ എന്നും, മറ്റൊരാള്‍ക്കും അതിനവകാശമില്ലെന്നും സ്പീക്കര്‍ മറുപടി നല്‍കി. ഇതിനിടെ ഗവര്‍ണറുടെ മൈക്ക് ഓഫ് ചെയ്യുകയും ചെയ്തു. ഇതില്‍ പ്രതിഷേധിച്ച് ഗവര്‍ണര്‍ രവി സഭ വിട്ടിറങ്ങുകയുമായിരുന്നു.

നയപ്രഖ്യാപന പ്രസംഗത്തെ ലോക്ഭവന്‍ അംഗീകരിച്ചിരുന്നതാണെന്ന് സ്പീക്കര്‍ നിയമസഭയെ അറിയിച്ചു. മൈക്ക് ഓഫ് ചെയ്തതില്‍ ഞെട്ടിപ്പോയെന്നും, ഗവര്‍ണര്‍ പദവിയെയാണ് അപമാനിച്ചതെന്നും ആര്‍ എന്‍ രവി കുറ്റപ്പെടുത്തി. ദേശീയഗാനത്തെ ആദരിക്കാത്ത നടപടിയോട് യോജിക്കാനാകില്ലെന്നും അദ്ദേഹം പറഞ്ഞു. ഗവര്‍ണര്‍ ആര്‍ എന്‍ രവി ജനങ്ങളുടെ സഭയെയും അതിന്റെ മഹത്വത്തെയും അപമാനിച്ചുവെന്ന് മുഖ്യമന്ത്രി എം കെ സ്റ്റാലിന്‍ പറഞ്ഞു.

മുമ്പത്തെപ്പോലെ തന്നെയാണ് ഗവര്‍ണര്‍ ഇന്നും പെരുമാറിയത്. ഗവര്‍ണര്‍ മനഃപൂര്‍വ്വം ഭരണഘടന ലംഘിച്ചു. ദീര്‍ഘകാല പാരമ്പര്യമുള്ള ഈ സഭയെ അപമാനിക്കുന്ന പ്രവൃത്തിയായിട്ടാണ് ഗവര്‍ണറുടെ നടപടിയെ കണക്കാക്കുന്നത്. രാജ്യത്തിന് ഗവര്‍ണറെ ആവശ്യമില്ല. ആ പദവിയോട് ആര്‍ എന്‍ രവി ഒരിക്കലും നീതി പുലര്‍ത്തിയിട്ടില്ലെന്നും മുഖ്യമന്ത്രി സ്റ്റാലിന്‍ കുറ്റപ്പെടുത്തി. നേരത്തെയും ദേശീയഗാനത്തെച്ചൊല്ലി ഗവര്‍ണര്‍ രവി സഭയില്‍ നിന്നും ഇറങ്ങിപ്പോയിട്ടുണ്ട്.

നയപ്രഖ്യാപനം കൃത്യതയില്ലാത്തത്: ലോക്ഭവന്‍

ഡിഎംകെ സര്‍ക്കാര്‍ തയ്യാറാക്കിയ നയപ്രഖ്യാപന പ്രസംഗത്തില്‍ തെറ്റുകളുണ്ടെന്നും കൃത്യതയില്ലാത്തതാണെന്നും ലോക്ഭവന്‍ വിശദീകരിച്ചു. ദലിതര്‍ക്കെതിരായ അതിക്രമങ്ങളും സ്ത്രീകള്‍ക്കെതിരായ ലൈംഗിക അതിക്രമങ്ങളും വന്‍തോതില്‍ വര്‍ദ്ധിക്കുകയാണ്. എന്നാല്‍ നയപ്രഖ്യാപനപ്രസംഗത്തില്‍ അത് പൂര്‍ണ്ണമായും ഒഴിവാക്കി. ദേശീയഗാനം വീണ്ടും അപമാനിക്കപ്പെട്ടു. അടിസ്ഥാന ഭരണഘടനാ കടമ അവഗണിക്കപ്പെടുകയാണ്. ഗവര്‍ണര്‍ ഇറങ്ങിപ്പോയതിന്റെ കാരണങ്ങള്‍ വിശദീകരിച്ചുകൊണ്ട് ലോക്‌സഭവന്‍ പുറത്തിറക്കിയ വാര്‍ത്താക്കുറിപ്പില്‍ വിശദീകരിക്കുന്നു.

The post ‘നയപ്രഖ്യാപനത്തില്‍ നിറയെ പിഴവ്’, വായിക്കാതെ ഗവര്‍ണര്‍ ഇറങ്ങിപ്പോയി; തമിഴ്‌നാട് നിയമസഭയില്‍ നാടകീയ രംഗങ്ങള്‍ appeared first on Starvision News Malayalam.