മനാമ: സാധാരണ പ്രവാസികൾക്ക് കാര്യമായ നേട്ടം നൽകാൻ കഴിയാത്ത ലോക കേരളസഭ പിരിച്ചുവിട്ട സർക്കാർ തീരുമാനം സ്വാഗതാർഹമാണെന്ന് ബഹ്‌റൈൻ കെഎംസിസി വൈസ് പ്രസിഡന്റ് എ.പി. ഫൈസൽ. പകരം ബഹ്‌റൈൻ ഉൾപ്പെടെയുള്ള ഗൾഫ് രാജ്യങ്ങളിൽ പ്രവാസി സഭകൾ രൂപീകരിക്കണമെന്നും അദ്ദേഹം ആവശ്യപ്പെട്ടു.

2018ൽ ലോക കേരളസഭ ആരംഭിക്കുമ്പോൾ പ്രവാസികളെ ഏകോപിപ്പിച്ച് കേരളത്തിലേക്ക് നിക്ഷേപം ആകർഷിക്കാനും പ്രവാസികളുടെ പ്രശ്നങ്ങളിൽ ഇടപെടാനുമായിരുന്നു ലക്ഷ്യമിട്ടത്. ഇതിനായി ഏഴ് സ്റ്റാൻഡിങ് കമ്മിറ്റികളും 48 ശുപാർശകളും രൂപീകരിച്ചെങ്കിലും ഭൂരിഭാഗവും നടപ്പായില്ലെന്ന് എ.പി. ഫൈസൽ ആരോപിച്ചു.

അഞ്ച് സമ്മേളനങ്ങൾക്കായി 5.24 കോടി രൂപ ചെലവായതല്ലാതെ പ്രവാസികൾക്ക് കാര്യമായ പ്രയോജനം ലഭിച്ചില്ലെന്നും, സഭയ്ക്ക് നിയമപരമായ ഉറപ്പ് നൽകുമെന്ന പ്രഖ്യാപനം അഞ്ച് വർഷമായിട്ടും നടപ്പായില്ലെന്നും അദ്ദേഹം പറഞ്ഞു.

ലോക കേരളസഭയിലെ അംഗത്വത്തിൽ യഥാർത്ഥ ഗൾഫ് തൊഴിലാളികൾക്ക് മതിയായ പ്രാതിനിധ്യം ലഭിച്ചില്ലെന്നും അംഗങ്ങളെ തെരഞ്ഞെടുത്ത മാനദണ്ഡം വ്യക്തമല്ലെന്നും ഫൈസൽ വിമർശിച്ചു. പെൻഷൻ വർധന, വിമാനക്കൂലി, പുനരധിവാസം, തൊഴിൽ ചൂഷണം തുടങ്ങിയ പ്രവാസികളുടെ പ്രധാന പ്രശ്നങ്ങൾക്കും പരിഹാരം ഉണ്ടായില്ലെന്നാണ് അദ്ദേഹത്തിന്റെ ആരോപണം.

നോർക്ക ഉദ്യോഗസ്ഥർ ഗൾഫ് രാജ്യങ്ങൾ നേരിട്ട് സന്ദർശിച്ച് പ്രവാസികളുടെ പ്രശ്നങ്ങൾ കേൾക്കുന്നതിനുള്ള സംവിധാനം വേണമെന്നും, പ്രഹസന സഭകൾക്ക് പകരം പ്രവാസികൾക്ക് പ്രയോജനപ്പെടുന്ന പദ്ധതികളാണ് നടപ്പാക്കേണ്ടതെന്നും എ.പി. ഫൈസൽ ആവശ്യപ്പെട്ടു.

The post ലോക കേരളസഭ പിരിച്ചുവിട്ട തീരുമാനം സ്വാഗതാർഹം; ഗൾഫ് രാജ്യങ്ങളിൽ പ്രവാസി സഭകൾ വേണമെന്ന് ബഹ്‌റൈൻ കെഎംസിസി appeared first on Starvision News Malayalam.

മനാമ: ലോക കേരളസഭ പിരിച്ചുവിട്ട സർക്കാർ തീരുമാനത്തെ സ്വാഗതം ചെയ്ത് ഇന്ത്യൻ ഓവർസീസ് കോൺഗ്രസ് (ഐ.ഒ.സി.) ബഹ്റൈൻ ജനറൽ സെക്രട്ടറി ബഷീർ അമ്പലായി. പ്രവാസി മലയാളികൾക്ക് കാര്യമായ നേട്ടമുണ്ടാക്കാതെ, ഖജനാവിന് അധിക ബാധ്യത സൃഷ്ടിച്ച ‘ധൂർത്ത് സഭ’യായി ലോക കേരളസഭ മാറിയെന്നായിരുന്നു അദ്ദേഹത്തിന്റെ വിമർശനം.

ഇടതുസർക്കാരിന്റെ പിടിപ്പുകേടിന്റെ ഭാഗമായി രൂപീകരിച്ച ലോക കേരളസഭ സാധാരണ പ്രവാസികൾക്ക് പ്രയോജനപ്പെട്ടില്ലെന്നും അദ്ദേഹം മുഖ്യമന്ത്രിക്ക് അയച്ച സന്ദേശത്തിൽ ആരോപിച്ചു. സഭ പിരിച്ചുവിടാനുള്ള തീരുമാനം സ്വാഗതാർഹമാണെന്നും ഇതിലൂടെ സാധാരണ പ്രവാസികളുടെ നന്ദി മുഖ്യമന്ത്രിയെ അറിയിക്കുന്നതായും ബഷീർ അമ്പലായി പറഞ്ഞു.

അതേസമയം, സാധാരണ പ്രവാസികൾക്ക് ലഭിക്കേണ്ട ക്ഷേമപദ്ധതികളും ആനുകൂല്യങ്ങളും ഭാവിയിൽ കൂടുതൽ കാര്യക്ഷമമായി നടപ്പാക്കുന്ന നടപടികളെ സ്വാഗതം ചെയ്യുമെന്നും അദ്ദേഹം വ്യക്തമാക്കി. ബഷീർ അമ്പലായി ഗൾഫ് മലയാളി ഫെഡറേഷൻ ജി.സി.സി. പ്രസിഡന്റുമാണ്.

The post ലോക കേരളസഭ പിരിച്ചുവിട്ടതിൽ മുഖ്യമന്ത്രിക്ക് നന്ദി; ‘ധൂർത്ത് സഭയായി മാറി’യെന്ന് ബഷീർ അമ്പലായി appeared first on Starvision News Malayalam.

മനാമ : ലോകകേരള സഭ പിരിച്ചുവിടാനെടുത്ത മന്ത്രി സഭാ തീരുമാനത്തെ സ്വാഗതം ചെയ്യുന്നതായി ബേസിൽ നെല്ലിമറ്റം. 2018 ൽ ആരംഭിച്ച ലോക കേരള സഭകൊണ്ട് പ്രവാസികൾക്ക് യാതൊരു പ്രയോജനവും ഉണ്ടായിട്ടില്ല, സർക്കാർ ഖജനാവിലെ പണം ദൂർത്ത് അടിക്കാനുള്ള ഒരു ഉപാധി ആയിട്ടാണ് എൽ ഡി എഫ് സർക്കാർ ഇതിനെ കണ്ടിരുന്നത്.

പല തവണകളായി സംഘടിപ്പിച്ച ലോക കേരള സഭയിലെടുത്ത തീരുമാനങ്ങൾ ഇതുവരെ ഒന്നും നടപ്പിലായിട്ടില്ല. പ്രവാസികളുടെ പണം ഉപയോഗിച്ച് പുതിയ പദ്ധതികൾ ആവിഷ്കരിക്കുവാൻ മന്ത്രിസഭാ ഉപസമതി പ്രഖ്യാപിച്ച യുഡിഎഫ് മന്ത്രിസഭാ തീരുമാനം സ്വാഹാധാർഹമാണെന്നും ബേസിൽ അഭിപ്രായപ്പെട്ടു.

The post ലോക കേരള സഭ പിരിച്ചു വിട്ട നടപടി സ്വാഗതാർഹം, യുഡിഎഫ് സർക്കാരിന് അഭിനന്ദനങ്ങൾ : ബേസിൽ നെല്ലിമറ്റം appeared first on Starvision News Malayalam.

മനാമ : ലോക കേരളസഭ പിരിച്ചുവിട്ട സർക്കാർ തീരുമാനത്തെ സ്വാഗതം ചെയ്യുന്നതായി ഒഐസിസി മിഡിൽ ഈസ്റ്റ്‌ ജനറൽ കൺവീനർ രാജു കല്ലുംപുറം അറിയിച്ചു .ലോകം മുഴുവൻ ഉള്ള മലയാളി പ്രവാസികളെ സംരക്ഷിക്കാനും, അവരുടെ ആവശ്യങ്ങളും, പരാതികളും പരിഹരിക്കുന്നതിന് വേണ്ടി മുൻ സർക്കാർ ആരംഭിച്ച ലോക കേരളസഭ, പ്രവാസികളുടെ പേര് പറഞ്ഞു നടത്തിയ വലിയ തട്ടിപ്പ് ആയിരുന്നു. വിവിധ സമ്മേളനങ്ങൾ ചേരുകയും, കാതലായ നല്ല നിർദേശങ്ങൾ സമ്മേളനത്തിൽ വരികയും ചെയ്തിരുന്നു, അവ പരിശോധിക്കാനും, നിയമനിർമാണം വേണ്ടവ കണ്ടെത്തി സർക്കാരിന് സമർപ്പിക്കാൻ വേണ്ടി സ്റ്റാൻഡിങ് കമ്മറ്റികൾ രൂപീകരിക്കുകയും ചെയ്തു എങ്കിലും, ഒരു കാര്യത്തിന് പോലും തുടർ പ്രവർത്തനങ്ങൾ നടത്തുകയോ ചെയ്തിരുന്നില്ല. വിവിധ പേരുകളിൽ കോടി കണക്കിന് രൂപ ചിലവഴിച്ചു എങ്കിലും, പ്രവാസികൾക്ക് യാതൊരു പ്രയോജനവും ലഭിച്ചില്ല എന്നും രാജു കല്ലുംപുറം ആരോപിച്ചു.

The post ലോക കേരള സഭ – സർക്കാർ തീരുമാനം സ്വാഗതം ചെയ്യുന്നു – രാജു കല്ലുംപുറം appeared first on Starvision News Malayalam.

പ്രവാസി സമൂഹത്തിന് സംസ്ഥാന സർക്കാരുമായി നേരിട്ട് ആശയവിനിമയം നടത്താനും അവരുടെ പ്രശ്നങ്ങൾ ഔദ്യോഗികമായി ഭരണാധികാരികളുടെ ശ്രദ്ധയിൽപ്പെടുത്താനും സാധിച്ചിരുന്ന സുപ്രധാന സംവിധാനമാണ് ലോക കേരളസഭയെന്ന് പ്രതിഭ വാർത്താക്കുറിപ്പിൽ വ്യക്തമാക്കി.

2018ൽ രൂപീകൃതമായ ലോക കേരളസഭ, ലോകത്തിന്റെ വിവിധ ഭാഗങ്ങളിലുള്ള മലയാളി പ്രവാസികളുടെ സാംസ്കാരിക, സാമൂഹിക, സാമ്പത്തിക ശേഷിയെ കേരളത്തിന്റെ വികസനവുമായി കൂട്ടിയിണക്കുന്നതിൽ മികച്ച പങ്ക് വഹിച്ചിട്ടുണ്ട്. നിയമസഭാംഗങ്ങളും പ്രവാസി പ്രതിനിധികളും ഉൾപ്പെടുന്ന ജനാധിപത്യ വേദിയെ ഉപേക്ഷിക്കുന്നത് പ്രവാസികളോടുള്ള കടുത്ത അവഗണനയാണെന്ന് സംഘടന ചൂണ്ടിക്കാട്ടി.

കേരളത്തിന്റെ സമ്പദ്‌വ്യവസ്ഥയുടെ നട്ടെല്ലായ പ്രവാസികളുടെ ക്ഷേമത്തിനും സർക്കാരുമായുള്ള നിരന്തര ആശയവിനിമയത്തിനും ശക്തമായ ഔദ്യോഗിക സംവിധാനം അനിവാര്യമാണ്. പ്രവാസി പ്രാതിനിധ്യം ഇല്ലാതാക്കുന്നത് ദൂരവ്യാപകമായ പ്രത്യാഘാതങ്ങൾ സൃഷ്ടിക്കുമെന്നും പ്രതിഭ അഭിപ്രായപ്പെട്ടു.

ലോക കേരളസഭ പിരിച്ചുവിടാനുള്ള തീരുമാനം സർക്കാർ പുനഃപരിശോധിക്കണം. പ്രവാസി സമൂഹത്തിന്റെ വികസന പങ്കാളിത്തവും ക്ഷേമവും ഉറപ്പാക്കിക്കൊണ്ട് ഈ സംവിധാനം കൂടുതൽ കരുത്തോടെ മുന്നോട്ട് കൊണ്ടുപോകണമെന്നും ബഹ്‌റൈൻ പ്രതിഭ ജനറൽ സെക്രട്ടറി വി.കെ. സുലേഷും പ്രസിഡന്റ് കെ.വി. മഹേഷും വാർത്താക്കുറിപ്പിലൂടെ ആവശ്യപ്പെട്ടു.

The post ലോക കേരളസഭ നിർത്തിവെക്കാനുള്ള നീക്കം പ്രതിഷേധാർഹം: ബഹ്‌റൈൻ പ്രതിഭ appeared first on Starvision News Malayalam.

ലോകമെമ്പാടുമുള്ള പ്രവാസി മലയാളികളുടെ പ്രശ്നങ്ങളും അഭിപ്രായങ്ങളും കേരളത്തിന്റെ വികസന ചർച്ചകളിൽ നേരിട്ട് അവതരിപ്പിക്കാൻ അവസരം നൽകിയ പ്രധാന വേദിയാണ് ലോക കേരളസഭ. 2018ൽ ആരംഭിച്ച ഈ വേദി പ്രവാസി ക്ഷേമം, തൊഴിൽ, നിക്ഷേപം, പുനരധിവാസം തുടങ്ങിയ വിഷയങ്ങളിൽ ഗൗരവമായ ചർച്ചകൾക്ക് വഴിയൊരുക്കിയതായും സംഘടന വാർത്താക്കുറിപ്പിൽ വ്യക്തമാക്കി.

ലോക കേരളസഭയിലെ തീരുമാനങ്ങളിൽ ചിലത് നടപ്പാക്കുന്നതിൽ വീഴ്ചകളുണ്ടെങ്കിൽ അവ പരിഹരിക്കുകയാണ് വേണ്ടത്. പോരായ്മകൾ ചൂണ്ടിക്കാട്ടി വേദി തന്നെ ഇല്ലാതാക്കുന്നത് പരിഹാരമല്ലെന്നും, പകരം പ്രവാസികളുടെ പങ്കാളിത്തം ശക്തിപ്പെടുത്തി സഭയെ കൂടുതൽ സുതാര്യവും കാര്യക്ഷമവുമാക്കണമെന്നും ബഹ്‌റൈൻ നവകേരള ആവശ്യപ്പെട്ടു.

കേരളത്തിന്റെ സമ്പദ്‌വ്യവസ്ഥയിൽ നിർണായക പങ്കുവഹിക്കുന്ന പ്രവാസി സമൂഹത്തിന്റെ അഭിപ്രായങ്ങൾ കേൾക്കാനും അവരുടെ പ്രശ്നങ്ങൾ ഉന്നയിക്കാനും നയരൂപീകരണത്തിൽ പങ്കാളികളാകാനും കഴിയുന്ന ജനാധിപത്യ വേദി അനിവാര്യമാണ്. പ്രവാസികളുടെ സാമ്പത്തിക സംഭാവന മാത്രം ലക്ഷ്യമിടാതെ അവരുടെ അവകാശങ്ങൾ, ക്ഷേമം, സാമൂഹിക സുരക്ഷ എന്നിവയ്ക്കും പ്രാധാന്യം നൽകണമെന്ന് സംഘടന ചൂണ്ടിക്കാട്ടി.

ലോക കേരളസഭയുടെ പ്രവർത്തനങ്ങളിൽ ആവശ്യമെങ്കിൽ പരിഷ്കാരങ്ങൾ വരുത്തി അത് തുടരണമെന്നും, പ്രവാസി സംഘടനകളുമായും പ്രതിനിധികളുമായും ചർച്ച നടത്തി മാത്രമേ ഇത്തരത്തിലുള്ള തീരുമാനങ്ങൾ കൈക്കൊള്ളാവൂ എന്നും ബഹ്‌റൈൻ നവകേരള വാർത്താക്കുറിപ്പിൽ ആവശ്യപ്പെട്ടു.

The post ലോക കേരളസഭ സംരക്ഷിക്കണം; പിരിച്ചുവിടാനുള്ള തീരുമാനം പ്രതിഷേധാർഹം: ബഹ്‌റൈൻ നവകേരള appeared first on Starvision News Malayalam.