തിരുവനന്തപുരം: പ്രവാസി മലയാളികളുടെ കഴിവും വൈദഗ്ധ്യവും കേരളത്തിന്റെ എല്ലാ മേഖലകളിലും പ്രയോജനപ്പെടുത്താൻ സംസ്ഥാനത്തിനു കഴിയണമെന്ന് മുഖ്യമന്ത്രി പിണറായി വിജയൻ പറഞ്ഞു. നാലാമത് ലോക കേരള സഭയുടെ ഉദ്ഘാടനം നിയസഭയിലെ ശങ്കരനാരയണൻ തമ്പി ഹാളിൽ നിർവഹിച്ചു സംസാരിക്കുകയായിരുന്നു അദ്ദേഹം. കുവൈറ്റ് അപകടത്തിൽ ലോകകേരള സഭയുടെ അനുശോചനം മുഖ്യമന്ത്രി അറിയിച്ച ശേഷമായിരുന്നു ഉദ്ഘാടനം നിർവഹിച്ചത്. നമ്മുടെ സാമൂഹിക – സാമ്പത്തിക ഘടനയെ ഒന്നാകെ മുന്നോട്ടു ചലിപ്പിക്കാനുള്ള ഉപാധിയായി പ്രവാസത്തെ പ്രയോജനപ്പെടുത്താൻ സാധിക്കണം. പ്രവാസികളിൽ നിന്നുവരുന്ന പണത്തിന്റെ കാര്യത്തിൽ ഉണ്ടായ മുന്നേറ്റം പ്രവാസിശേഷിയും പ്രതിഭയും ഉപയോഗിക്കുന്ന കാര്യത്തിലും ഉണ്ടാകണമെന്ന് മുഖ്യമന്ത്രി പറഞ്ഞു.

ലോകത്തെമ്പാടുമായി പടർന്നു കിടക്കുന്ന മലയാളി സമൂഹത്തിന്റെ ഒരു പരിച്ഛേദമാണ് ലോക കേരളസഭ എന്ന വേദിയിൽ സമ്മേളിക്കുന്നത്. കേരളത്തെ ലോകത്തെമ്പാടും എത്തിച്ച കേരളീയരുടെ പ്രവാസ ചരിത്രത്തിന് ഒരു നൂറ്റാണ്ടിലധികം പഴക്കമുണ്ട്. എന്നാൽ, ലോകമാകെയുള്ള കേരളീയ പ്രവാസികളെ തിരികെ കേരളവുമായി ഔദ്യോഗികമായി ബന്ധിപ്പിക്കാൻ നമുക്കു കഴിഞ്ഞതിന് കഴിഞ്ഞ 7-8 വർഷത്തെ ചരിത്രമേയുള്ളൂ. അത് സാധ്യമാക്കിയ ലോക കേരള സഭയുടെ നാലാമത്തെ സമ്മേളനത്തോടനുബന്ധിച്ചുള്ള പ്രതിനിധി സമ്മേളനമാണ് ഇവിടെ ഉദ്ഘാടനം ചെയ്യപ്പെടുന്നത്. അതോടൊപ്പം ലോക കേരളസഭയുടെ സമീപന രേഖയും സമർപ്പിക്കപ്പെടുകയാണ്.

പത്തൊമ്പതാം നൂറ്റാണ്ടിന്റെ അവസാനത്തോടെയാണ് കേരളീയർ ലോകത്തിന്റെ പല ഭാഗങ്ങളിലേക്ക് ചേക്കേറി തുടങ്ങിയത്. ബർമ, സിങ്കപ്പൂർ, ശ്രീലങ്ക, മലേഷ്യ തുടങ്ങിയ രാജ്യങ്ങളിലേക്കായിരുന്നു മലയാളികളുടെ ആദ്യഘട്ട കുടിയേറ്റമെങ്കിൽ പിന്നീടത് ഇന്ത്യയുടെ മറ്റു മഹാനഗരങ്ങളിലേക്കുമായി. പല ഘട്ടങ്ങളിലായി നടന്ന കുടിയേറ്റ പരമ്പരകളിലൂടെ കേരളീയർ പ്രവാസികളുടെ വലിയ കൂട്ടമായി മാറുകയും പതിയെ ചെറിയ അതിരുകളെ ലംഘിച്ച് ലോകമെമ്പാടും പടർന്നുനിൽക്കുന്ന ഒരു വലിയ സമൂഹമായി രൂപാന്തരപ്പെടുകയും ചെയ്തു.

ലോകത്തെ മികവുറ്റ ഗവേഷണ കേന്ദ്രങ്ങളിൽ, മികവുറ്റ എൻജിനിയറിങ് കമ്പനികളിൽ, സേവന മേഖലകളിൽ എല്ലാം മലയാളിയുടെ വിരൽപ്പാട് പതിഞ്ഞിട്ടുണ്ടായിരുന്നു. എന്നാൽ, അത് നമ്മുടെ നാടിന്റെ മുന്നേറ്റത്തിന് ഉപയോഗിക്കാൻ കഴിഞ്ഞോ എന്നു ചോദിച്ചാൽ ഇല്ലെന്നു മറുപടി പറയേണ്ടിവരുന്ന കാലമുണ്ടായിരുന്നു. ഈ സാഹചര്യത്തിലാണ് പ്രവാസിസമൂഹത്തിൽ നിന്നുള്ള ആശയങ്ങളെയും പ്രതിഭകളെയും നമ്മുടെ സാമൂഹിക ഘടനയിലേക്കു സ്വാംശീകരിക്കുക എന്ന ലക്ഷ്യത്തോടെ ലോക കേരളസഭയ്ക്കു രൂപം നൽകിയത്.

വിദേശത്തുള്ളവരുടെ പ്രജ്ഞയെയും പ്രതിഭയെയും നമ്മുടെ വിജ്ഞാന സമൂഹത്തിനായി, പുതിയ തലമുറയ്ക്കായി ഉപയോഗപ്പെടുത്താൻ നടപടി എടുക്കുക, വിദേശത്തുള്ളവരുടെ വിഭവങ്ങൾ അവരുടെ കൂടി അഭിപ്രായങ്ങൾ കണക്കിലെടുത്ത് ഈ നാടിന്റെ വികസന പ്രവർത്തനങ്ങൾക്ക്  ഉപയോഗിക്കുക മടങ്ങിവരുന്ന പ്രവാസികളുടെ പുനരധിവാസ-ക്ഷേമ കാര്യങ്ങൾക്ക് പരിമിതികൾക്കുള്ളിൽ നിന്നു ചിലതു ചെയ്യുക എന്നിവയാണ് പ്രധാന ലക്ഷ്യങ്ങൾ. മറ്റ് സംസ്ഥാനങ്ങളിലും ലോകത്തിന്റെ നാനാഭാഗങ്ങളിലുമുള്ള പ്രവാസി കേരളീയരുടെ കൂട്ടായ്മയും സഹകരണവും പ്രോത്സാഹിപ്പിക്കുന്നതിനും, സംസ്ഥാനത്തിന്റെ സമഗ്ര വികസനത്തിനായി പ്രവാസിസമൂഹത്തെ കൂടെക്കൂട്ടുന്നതിനും അതോടൊപ്പം അവരുടെ പ്രശ്‌നങ്ങൾ ചർച്ച ചെയ്യുന്നതിനുമായുള്ള ഒരു പൊതുവേദിയാണ് ലോക കേരള സഭ. ലോക കേരള സഭ രൂപീകൃതമായതിനു ശേഷം 3 സമ്മേളനങ്ങളും മൂന്ന് മേഖലാ സമ്മേളനങ്ങളുമാണ് ഇതുവരെ നടന്നിട്ടുള്ളത്. അവയിൽ എടുത്ത തീരുമാനങ്ങൾ നല്ല നിലയിൽ നടപ്പാക്കാൻ കഴിഞ്ഞിട്ടുണ്ട് എന്ന് അഭിമാനത്തോടെ പറയാൻ കഴിയും.

ലോക കേരളസഭയുടെ സമ്മേളനങ്ങളിൽ ഉരുത്തിരിയുന്ന ആശയങ്ങളെ നിക്ഷേപം, ക്ഷേമം, നൈപുണ്യ വികസനം, സംസ്‌കാരം എന്നിങ്ങനെയുള്ള മുഖ്യ രംഗങ്ങളായി തരംതിരിച്ചു. അവയ്ക്ക് പ്രാവർത്തിക രൂപം നൽകാൻ ഏഴു മേഖലാ കേന്ദ്രിത സ്റ്റാൻഡിങ്ങ് കമ്മിറ്റികൾ രൂപീകരിച്ചു. എൽ കെ എസ് സെക്രട്ടേറിയറ്റ് അവയുടെ പ്രവർത്തനങ്ങൾ അവലോകനം ചെയ്തു. ഇതിന്റെയൊക്കെ ഫലമായാണ് ഓവർസീസ് കേരളൈറ്റ്‌സ് ഇൻവെസ്റ്റ്‌മെന്റ് ആൻഡ് ഹോൾഡിങ് ലിമിറ്റഡ്, എൻ ആർ ഐ നിർമ്മാണക്കമ്പനി, എൻ ആർ ഐ സഹകരണ സൊസൈറ്റി, നോർക്ക റൂട്ട്‌സിൽ ആരംഭിച്ച വിമൻസ് സെൽ, സി ഡി എസ്സിലെ അന്താരാഷ്ട്ര മൈഗ്രേഷൻ സെന്റർ, ലോക മലയാളം എന്ന പ്രസിദ്ധീകരണം തുടങ്ങിയവയൊക്കെ യാഥാർത്ഥ്യമായത്.

നോർക്കയുടെ ജോബ് പോർട്ടൽ, പ്രവാസികളാകാൻ താൽപര്യപ്പെടുന്നവർക്കുവേണ്ടി നടത്തുന്ന നൈപുണ്യ വികസന പരിപാടികൾ, മലയാളി നഴ്‌സുമാരെ ജർമനിയിൽ ജോലിക്കയക്കുന്ന ട്രിപ്പിൾ വിൻ പ്രൊജക്ട്, തൊഴിൽ റിക്രൂട്ട്‌മെന്റിനായി ജപ്പാൻ, ദക്ഷിണ കൊറിയ, നെതർലൻഡ്‌സ് എന്നീ രാജ്യങ്ങളുമായി ഏർപ്പെടുത്തിയിട്ടുള്ള കരാർ, പ്രവാസി ലീഗൽ എയ്ഡ് സെൽ, കോവിഡ് ഘട്ടത്തിൽ വിവിധ രാജ്യങ്ങളിൽ ആരംഭിച്ച ഹെൽപ് ഡെസ്‌ക്, സാന്ത്വനം പദ്ധതി, നോർക്ക ഡിപ്പാർട്ട്‌മെന്റ് പ്രൊജക്ട് ഫോർ റിട്ടേൺഡ് എമിഗ്രൻസ്, ബിസിനസ് ഫെസിലിറ്റേഷൻ സെന്റർ, പ്രവാസി ഡിവിഡന്റ് സ്‌കീം, എന്നിവയും ലോക കേരള സഭയുടെ നിർദ്ദേശങ്ങളെയും പ്രവാസികളുടെ പ്രശ്‌നങ്ങളെയും സംസ്ഥാന സർക്കാർ വളരെ ഗൗരവത്തോടെ കണ്ടതിന്റെ ഫലമായി യാഥാർത്ഥ്യമായവയാണ്.

മൂന്നാം ലോക കേരളസഭയുടെ ഭാഗമായി നിരവധി നിർദ്ദേശങ്ങൾ ഉയർന്നുവന്നിരുന്നു. അവയിൽ ഭൂരിഭാഗം നിർദ്ദേശങ്ങൾക്കുമേലും നടപടികൾ സ്വീകരിച്ചിട്ടുണ്ട്. ഒരു സുപ്രധാന നിർദേശമായിരുന്നു ലോകമെമ്പാടുമുള്ള മലയാളികൾക്കുവേണ്ടി ഒരു ഡിജിറ്റൽ ഓൺലൈൻ സ്‌പെയ്‌സ് എന്നത്.  പ്രവാസികളുടെ ആശയവിനിമയത്തിനും തൊഴിൽ അവസരങ്ങൾ ഉൾപ്പെടെയുള്ള വിവരങ്ങളുടെ കൈമാറ്റത്തിനും സാംസ്‌കാരിക വിനിമയത്തിനുമായി ‘ലോകകേരളം ഓൺലൈൻ’ എന്ന പേരിൽ വിപുലമായ ഒരു സംവിധാനം പ്രവർത്തനമാരംഭിച്ചിരിക്കുകയാണ്. നോർക്കാ റൂട്ട്‌സിന്റെ നേതൃത്വത്തിൽ ഡിജിറ്റൽ യൂണിവേഴ്‌സിറ്റിയാണ് ഇത് രൂപകല്പന ചെയ്തിരിക്കുന്നത്.രണ്ട് വർഷത്തിലധികമായി  മറ്റു സംസ്ഥാനങ്ങളിൽ ജീവിക്കുന്ന മലയാളികൾക്കും 6 മാസത്തിലധികമായി ഇന്ത്യയ്ക്ക് പുറത്ത് ജീവിക്കുന്ന മലയാളികൾക്കും  ഈ പോർട്ടൽ ഉപയോഗപ്പെടുത്താം. പ്രവാസികൾക്ക് അവരുടെ പ്രാഥമിക വിവരങ്ങൾ നൽകിയോ സാമൂഹിക മാധ്യമ അക്കൗണ്ടുകൾ ഉപയോഗിച്ചോ ഈ പ്ലാറ്റ്‌ഫോമിൽ രജിസ്റ്റർ ചെയ്യാം. സൂക്ഷ്മപരിശോധന നടത്തിയതിന് ശേഷം മാത്രമേ രജിസ്റ്റർ ചെയ്യുന്നവർക്ക് അംഗത്വം  നൽകൂ എന്നതിലൂടെ വ്യക്തികളുടെയും സംഘടനകളുടെയും വിശ്വാസ്യത ഉറപ്പാക്കാൻ സാധിക്കുന്നു. പ്രവാസി സംഘടനകൾ, ലോക കേരളസഭാംഗങ്ങൾ എന്നിവരുടെ സഹായത്തോടെ പരമാവധി പ്രവാസികളെ ഇതിന്റെ ഭാഗമാക്കാനാണ് ലക്ഷ്യമിടുന്നത്.

ലോക കേരളസഭയുടെ നിർദേശപ്രകാരം പ്രവാസികളുടെ വിപുലമായ വിവരശേഖരണം ലക്ഷ്യമിട്ടു കേരളമൈഗ്രേഷൻ സർവ്വേ 2023 സംഘടിപ്പിച്ചു. പ്രവാസികളെ സംബന്ധിക്കുന്ന വിവരങ്ങളിലെ വ്യക്തതക്കുറവ് പ്രവാസ നയരൂപീകരണത്തിലടക്കം വിലങ്ങുതടിയായിരുന്ന സാഹചര്യത്തിലാണ് കേരള മൈഗ്രേഷൻ സർവ്വേ റിപ്പോർട്ട് പുറത്തിറക്കിയത്. 1998 മുതൽ തന്നെ കൃത്യമായ ഇടവേളകളിൽ സർവ്വേ നടന്നിരുന്നു. എങ്കിലും പ്രവാസികളെ സംബന്ധിക്കുന്ന കൃത്യവും ആധികാരികവുമായ വിവരങ്ങളുടെ അപര്യാപ്തത ഒരു പ്രതിസന്ധിതന്നെയായിരുന്നു. ഈ സാഹചര്യത്തിലാണ് മൂന്നാം ലോക കേരള സഭയുടെ  ഭാഗമായി, ആധികാരികമായ ഒരു കേരള മൈഗ്രേഷൻ സർവ്വേ എന്ന ആശയം ഉയർന്നുവന്നത്. ആ നിർദ്ദേശമാണ് നടപ്പാക്കിയിരിക്കുന്നത്. പ്രവാസി സമൂഹത്തെ കുറിച്ച് ഇത്തരമൊരു ആധികാരിക രേഖ  പ്രസിദ്ധീകരിച്ചിരിക്കുന്നു എന്നതിൽ ലോക കേരളസഭയ്ക്ക് അഭിമാനിക്കാം.

20,000 കുടുംബങ്ങളിൽ നിന്ന് വിശദമായ വിവരശേഖരണം നടത്തി, തയ്യാറാക്കിയ സർവ്വേ റിപ്പോർട്ടാണ് പ്രസിദ്ധീകരിച്ചിരിക്കുന്നത്. ഇത്രയേറെ കുടുംബങ്ങളുടെ പങ്കാളിത്തം  സർവ്വേയുടെ ആധികാരികതയും കൃത്യതയും വർധിപ്പിക്കുമെന്നതിൽ തർക്കമില്ല. കേരളത്തിൽ നിന്നുള്ള കുടിയേറ്റം സംബന്ധിച്ച വിവരങ്ങൾ അതിലുണ്ട്. കോവിഡ് മഹാമാരി പ്രവാസികൾക്ക്  ഉണ്ടാക്കിയ പ്രതിസന്ധികളെ സംബന്ധിച്ചുള്ള അപഗ്രഥനവും അതിലുണ്ട്. കുടിയേറ്റം, മടങ്ങിവരവ്, വിദേശ നാണ്യത്തിന്റെ വരവ് എന്നിവയിലെ സമീപകാല പ്രവണതകൾ പരിശോധിക്കുന്നതിനും സർവ്വേയിലൂടെ കഴിഞ്ഞിട്ടുണ്ട്.

മാറിക്കൊണ്ടിരിക്കുന്ന ജനസംഖ്യാ വിതാനം, ആഗോള സാമ്പത്തിക പ്രതിസന്ധി, ഗൾഫ് നാടുകളിലെ സ്വദേശിവൽക്കരണം തൊഴിൽ വിപണിയിലെ മാറ്റങ്ങൾ എന്നിവയെല്ലാം പ്രവാസികളുടെ എണ്ണത്തിലുള്ള  കുറവിന് കാരണമായെന്നാണ് വിലയിരുത്തൽ. 2018ന് ശേഷമാകട്ടെ കോവിഡ് മഹാമാരിയും  ലോക്ക്ഡൗണുമെല്ലാം പ്രവാസികളുടെ വൻതോതിലുള്ള മടങ്ങിവരവിന് കാരണമായി. ഇക്കാലത്ത് 1.7 ദശലക്ഷം മലയാളികൾ തിരിച്ചുവന്നതിൽ ഏകദേശം 65 ശതമാനം പേർ മാത്രമാണ് തിരികെ പോയത്. കേരളത്തിൽ നിന്നുള്ള ഇപ്പോഴത്തെ കുടിയേറ്റ നിരക്ക് 2018 ലേതിന് സമാനമാണ്. അതായത് പ്രതികൂല സാഹചര്യത്തിലും മലയാളി പ്രവാസം പൂർവസ്ഥിതിയിലെത്തിയെന്ന് പറയാനാകും.

മൈഗ്രേഷൻ സർവ്വേ റിപ്പോർട്ട് വ്യക്തമാക്കുന്നത് കുടുംബത്തോടൊപ്പം വിദേശത്തേക്ക് ചേക്കേറിയവരുടെ എണ്ണം വർധിച്ചുവെന്നാണ്.  20 ലക്ഷത്തോളം കേരളീയർ വിദേശരാജ്യങ്ങളിൽ കുടുംബമായി ചേക്കേറുകയോ അതിന് ഒരുങ്ങുകയോ ചെയ്യുന്നുവെന്നാണ് സർവ്വേ വ്യക്തമാക്കുന്നത്.

കുടിയേറ്റവും കുടിയേറ്റക്കാരുടെ എണ്ണവും വർധിച്ചതിനൊപ്പം തന്നെ പ്രവാസിപ്പണത്തിലും വർധനയുണ്ടായി എന്നതാണ് എടുത്തുപറയേണ്ട മറ്റൊരു വസ്തുത. 2018ൽ 85,092 കോടി രൂപയായിരുന്നു കേരളത്തിൽ എത്തിയിരുന്ന പ്രവാസിപ്പണമെങ്കിൽ കഴിഞ്ഞ വർഷം അത് 2,16,893 കോടിയായി കുതിച്ചുയർന്നു. അതായത്, 5 വർഷത്തിനിടെ ഏകദേശം 155 ശതമാനത്തോളം വർധന.  കോവിഡ് മഹാമാരിക്ക് ശേഷം ഗൾഫിൽ മാത്രമായൊതുങ്ങാതെ  മറ്റനേകം രാജ്യങ്ങളിലേക്ക് കുടിയേറുന്ന പ്രവണത മലയാളികളിൽ വൻതോതിൽ വർധിച്ചതാണ് പ്രവാസി വരുമാനം കൂടുതലായെത്തുന്നതിന് വഴിയൊരുക്കിയത്.

മൂന്നാം ലോക കേരളസഭയുടെ നിർദ്ദേശങ്ങളിലൊന്നിന്റെ അടിസ്ഥാനത്തിൽ പ്രവാസി യുവസംരംഭകർക്ക് കേരള സ്റ്റാർട്ടപ്പ് മിഷനിലൂടെ പുതിയ സ്റ്റാർട്ടപ്പുകൾ ആരംഭിക്കാനായി സ്റ്റാർട്ടപ്പ് ഇൻഫിനിറ്റി എന്ന പദ്ധതി ആരംഭിച്ചു. വിദേശ മലയാളികളെ സംരംഭകത്വത്തിലേക്ക് ആകർഷിക്കുക, ഉയർന്ന സാമ്പത്തികശേഷിയുള്ള വിദേശ ഇന്ത്യക്കാരിൽ നിന്നും കേരളാടിസ്ഥാന സ്റ്റാർട്ടപ്പുകൾക്ക് നിക്ഷേപം ലഭ്യമാക്കുക, കേരളാടിസ്ഥാന സ്റ്റാർട്ടപ്പുകൾക്ക് അവരുടെ ബിസിനസ്സ് സംബന്ധമായ ആവശ്യങ്ങൾക്ക്  വിദേശ രാജ്യങ്ങൾ സന്ദർശിക്കുമ്പോൾ പ്രവർത്തന സ്ഥലവും ഉപഭോക്താക്കളെ ബന്ധപ്പെടുന്നതിനുള്ള സൗകര്യവും ലഭ്യമാക്കുക, തുടങ്ങിയ ഉദ്ദേശ്യ ലക്ഷ്യങ്ങളോടെയാണ് പദ്ധതി ആരംഭിച്ചിട്ടുള്ളത്.

പ്രവാസിക്ഷേമത്തിന് ആദ്യമായി ഒരു പ്രത്യേക വകുപ്പ് രൂപീകരിച്ചതുതന്നെ കേരളത്തിലാണ്, 1998 ൽ. 2008 ൽ ഇടതുപക്ഷ ജനാധിപത്യ മുന്നണി സർക്കാരാണ് പ്രവാസിക്ഷേമ നിയമം കൊണ്ടുവന്നത്. സുസ്ഥിര പുനരധിവാസം സംബന്ധിച്ച നൂതനമായ ആശയങ്ങൾ മുന്നോട്ടു വെക്കപ്പെടേണ്ടതുണ്ട്. പ്രവാസികൾ മടങ്ങിവരുന്നു, അവർക്ക് സംരംഭങ്ങൾ തുടങ്ങാൻ ധനസഹായം നൽകുന്നു എന്ന നിലയിലേക്കു പുനരധിവാസം ഒതുങ്ങരുത് എന്നാണ് സർക്കാർ ആഗ്രഹിക്കുന്നത്. ആ നിലയ്ക്ക് പുനരധിവാസത്തിനുള്ള തയ്യാറെടുപ്പുകൾ വിദേശത്ത് ആയിരിക്കുമ്പോഴേ ഉണ്ടാകേണ്ടതുണ്ട്. തിരിച്ചുവന്ന ശേഷം വിദേശത്തു നിന്ന് നിങ്ങൾ ആർജ്ജിച്ച അറിവും നൈപുണ്യവുമെല്ലാം നാട്ടിൽ ഉപയോഗിക്കാൻ കഴിയുന്ന രീതിയിലുള്ള ഒരു ഇക്കോ സിസ്റ്റം രൂപപ്പെടേണ്ടതുണ്ട്. അതിനുതകുന്ന ചർച്ചകൾ നടത്തി നമുക്കു മുന്നോട്ടുപോകാം.

നവകേരള നിർമ്മിതിയുമായും പ്രവാസിക്ഷേമവുമായും വിജ്ഞാന സമൂഹം, വിജ്ഞാന സമ്പദ്ഘടന എന്നിവയുമായും ബന്ധപ്പെട്ട് ഇനിയും ഏതെല്ലാം മേഖലകളിലാണ് സംസ്ഥാന സർക്കാരിന്റെ ശ്രദ്ധ പതിയേണ്ടതെന്ന് ലോക കേരള സഭ ചർച്ച ചെയ്യണം. കൂട്ടായി ചിന്തിച്ച് വരുംകാല പ്രവർത്തനങ്ങൾ ആസൂത്രണം ചെയ്യുന്നതിനുള്ള അവസരമാണ് ലോക കേരളസഭയുടെ ഈ നാലാം സമ്മേളനം. സഭയുടെ പ്രവർത്തനങ്ങൾ എങ്ങനെ കൂടുതൽ അർത്ഥപൂർണവും വ്യാപകവും സമഗ്രവും ആക്കാം എന്നതു സംബന്ധിച്ച ചർച്ചകൾ കൂടി അടുത്ത രണ്ടുദിവസങ്ങളിലായി ഇവിടെ നടക്കണം. നിങ്ങളുടെ ഓരോരുത്തരുടെയും അഭിപ്രായങ്ങൾക്കും നിർദ്ദേശങ്ങൾക്കുമായി ഈ സർക്കാർ കാത്തിരിക്കുന്നതായും ലോക കേരളസഭയുടെ സമീപന രേഖ സമർപ്പിച്ചതായും മുഖ്യമന്ത്രി അറിയിച്ചു.

ചീഫ് സെക്രട്ടറി ഡോ. വി. വേണുവിന്റെ ഔദ്യോഗിക പ്രഖ്യാപനത്തോടെയാണ് ലോകകേരള സഭ ആരംഭിച്ചത്. പ്രസീഡിയം അംഗങ്ങളെ സ്പീക്കർ എ. എൻ. ഷംസീർ വേദിയിലേക്ക് ക്ഷണിച്ചു. കേരള മൈഗ്രേഷൻ സർവേ റിപ്പോർട്ട് ഡോ. ഇരുദയ രാജൻ മുഖ്യമന്ത്രിക്ക് ചടങ്ങിൽ സമർപ്പിച്ചു. ഉദ്ഘാടന സമ്മേളനത്തിനു ശേഷം എട്ട് വിഷയാധിഷ്ഠിത ചർച്ചകളും ഏഴു മേഖലാ സമ്മേളനങ്ങളും നടന്നു.

The post ലോക കേരള സഭയ്ക്ക് തുടക്കമായി; പ്രവാസി ലോകത്തിന്റെ വിഭവശേഷി സംസ്ഥാനം പ്രയോജനപ്പെടുത്തണം: മുഖ്യമന്ത്രി appeared first on Starvision News Malayalam.

തിരുവനന്തപുരം: നാലാം ലോക കേരള സഭയുടെ ഉദ്ഘാടകനാകാനുള്ള സര്‍ക്കാര്‍ ക്ഷണം തള്ളി ഗവര്‍ണര്‍ ആരിഫ് മുഹമ്മദ് ഖാന്‍. ഉദ്ഘാടനത്തിന് ക്ഷണിക്കാന്‍ ചെന്ന ചീഫ് സെക്രട്ടറി വി വേണുവിനെ രൂക്ഷമായി വിമര്‍ശിച്ച് ഗവര്‍ണര്‍ മടക്കി അയച്ചു.

സംസ്ഥാന സര്‍ക്കാര്‍ നടപടികളിലെ കടുത്ത അതൃപ്തി ഗവര്‍ണര്‍ ചീഫ് സെക്രട്ടറിയെ അറിയിച്ചു. എസ്എഫ്‌ഐക്കാര്‍ തന്റെ കാര്‍ തടഞ്ഞതിലടക്കം സര്‍ക്കാര്‍ നടപടികളിലുണ്ടായ വീഴ്ചയടക്കം ഗവര്‍ണര്‍ പരാമര്‍ശിച്ചതായാണ് വിവരം. തിരുവനന്തപുരത്ത് ജൂണ്‍ 13 മുതല്‍ 15 വരെയാണ് കേരള സഭ നടക്കുന്നത്. 103 രാജ്യങ്ങളില്‍ നിന്നുളള പ്രവാസി പ്രതിനിധികള്‍ പങ്കെടുക്കും.

തിരുവനന്തപുരത്ത് ചേരുന്ന സഭയില്‍ 200-ഓളം പ്രത്യേക ക്ഷണിതാക്കളുമുണ്ടാകും. എമിഗ്രേഷന്‍ കരട് ബില്‍ 2021, വിദേശ റിക്രൂട്ട്‌മെന്റ് പ്രോഗ്രാമുകള്‍, സുസ്ഥിര പുനരധിവാസം നൂതന ആശയങ്ങള്‍, കുടിയേറ്റത്തിലെ ദുര്‍ബലകണ്ണികളും സുരക്ഷയും, നവ തൊഴില്‍ അവസരങ്ങളും നൈപുണ്യ വികസനവും, കേരള വികസനം നവ മാതൃകകള്‍, വിദേശ രാജ്യങ്ങളിലെ മാറുന്ന തൊഴില്‍-കുടിയേറ്റ നിയമങ്ങളും മലയാളി പ്രവാസവും, വിജ്ഞാന സമ്പദ്ഘടനയിലേക്കുള്ള പരിവര്‍ത്തനവും പ്രവാസികളും എന്നിങ്ങനെ എട്ട് വിഷയങ്ങളില്‍ അവതരണങ്ങള്‍ നടക്കും.

The post ലോക കേരള സഭയുടെ ഉദ്ഘാടകനാകാനില്ല; സര്‍ക്കാര്‍ ക്ഷണം തള്ളി ഗവര്‍ണര്‍ appeared first on Starvision News Malayalam.

അമേരിക്കയില്‍ സ്ഥിരതാമസമാക്കിയ മലയാളികളോ അമേരിക്കന്‍ കമ്പനികളോ കേരളത്തില്‍ നിക്ഷേപിക്കാന്‍ തയ്യാറായി വന്നാല്‍ 100 കോടി ഡോളര്‍ വരെ സാമ്പത്തിക സഹകരണം നല്‍കാമെന്നാണ് ഡോക്ടര്‍ രവി പിള്ളയുടെ പ്രഖ്യാപനം. ന്യൂയോര്‍ക്കില്‍ നടന്ന ലോക കേരള സഭയുടെ റീജണല്‍ കോണ്‍ഫറന്‍സില്‍ പങ്കെടുത്ത് സംസാരിക്കുമ്പോഴാണ്   ആര്‍ പി ഗ്രൂപ്പ് ചെയര്‍മാന്‍ പ്രഖ്യാപനം നടത്തിയത്.

മുഖ്യമന്ത്രി  പിണറായി വിജയന്റെ സാന്നിധ്യത്തില്‍ ആയിരുന്നു  രവി പിള്ളയുടെ  നിര്‍ണായക പ്രഖ്യാപനം. ഇന്ത്യയും അമേരിക്കയും തമ്മില്‍ വളരെ നല്ല ബന്ധമാണ് നിലവിലുള്ളത്. ഈ സാഹചര്യത്തില്‍  അമേരിക്കന്‍ പ്രവാസി മലയാളികള്‍ ഇന്ത്യയിലും കേരളത്തിലും കൂടുതല്‍ നിക്ഷേപങ്ങള്‍ നടത്തണമെന്നും അദ്ദേഹം ആവശ്യപ്പെട്ടു.

അമേരിക്കന്‍ കമ്പനികളെ ഇന്ത്യയിലേക്കും കേരളത്തിലേക്കും കൊണ്ടുവരുന്നതിന് വേണ്ടി മലയാളി സമൂഹം മുന്‍കൈയെടുക്കണമെന്നും ഡോക്ടര്‍ രവി പിള്ള കൂട്ടിച്ചേര്‍ത്തു. 1970 കളില്‍ അമേരിക്കയിലെ പ്രവാസി ചൈനക്കാര്‍, ചൈനയില്‍ വന്‍ തോതില്‍ നിക്ഷേപം നടത്തുകയും, പല വന്‍ അമേരിക്കന്‍ കമ്പനികളെ കൊണ്ട് ചൈനയില്‍ നിക്ഷേപം നടത്തിക്കുകയും  ചെയ്തതും ഡോക്ടര്‍ രവി പിള്ള സദസ്സിനെ ഓര്‍മിപ്പിച്ചു. ഈ നിക്ഷേപങ്ങളാണ്  ചൈനയെ  ലോക സാമ്പത്തിക ശക്തിയായി ഉയരാന്‍ സഹായിച്ചത്. അത്തരമൊരു പങ്കുവഹിക്കാന്‍ അമേരിക്കയിലെ ഇന്ത്യക്കാര്‍ തയ്യാറാകണമെന്നും അദ്ദേഹം ആവശ്യപ്പെട്ടു.

പ്രവാസികള്‍ കൊണ്ട വെയിലിന്റെ തണലാണ് ഇന്ന് കേരളത്തിലെ ഓരോ വികസനത്തിന്റെയും പിന്നിലുള്ളതെന്നും ഡോക്ടര്‍ രവി പിള്ള പറഞ്ഞു.പ്രവാസി ക്ഷേമത്തിനുവേണ്ടി ഏറ്റവുമധികം പദ്ധതികള്‍ നടപ്പിലാക്കിയ സര്‍ക്കാരാണ് പിണറായി വിജയന്റെതെന്നും അദ്ദേഹം വ്യക്തമാക്കി.

The post കേരളത്തില്‍ നിക്ഷേപം നടത്തുന്ന അമേരിക്കന്‍ മലയാളികള്‍ക്ക് 100 കോടി ഡോളർ വരെ സാമ്പത്തിക സഹകരണം വാഗ്ദാനം ചെയ്ത് പ്രമുഖ വ്യവസായി രവി പിള്ള appeared first on Starvision News Malayalam.

ആകെയുള്ള 182 അംഗങ്ങളില്‍ 117 പേരോളം വിവിധ മലയാളി സംഘടനകളുടെ പ്രതിനിധികളാണ്. ഇവരില്‍ 35 പേരോളം അവിദഗ്ദ-അര്‍ദ്ധ വിദഗ്ധ തൊഴിലുകളില്‍ ഏര്‍പ്പെടുന്നവരാണ്. കൂടാതെ എന്‍ എസ് മാധവന്‍,റസൂല്‍ പൂക്കുട്ടി,അജിത് ബാലകൃഷ്ണന്‍(റെഡിഫ്.കോം),ഡോ നന്ദിത മാത്യു, ബോസ്സ് കൃഷ്ണമചാരി തുടങ്ങിയ 36 അംഗങ്ങള്‍ സാമൂഹിക-സംസ്‌കാരിക-ശാസ്ത്ര- അക്കാദമിക് മേഖലകളുടെ പ്രതിനിധികളാണ്.
ഇതിനു പുറമെ വിവിധ കമ്പനികളുടെ സി.ഇ.ഒ തലത്തില്‍ പ്രവര്‍ത്തിക്കുന്ന പ്രൊഫഷണലുകളായ ഒമ്പതു പേരും അംഗങ്ങളുടെ പട്ടികയിലുണ്ട്. മറ്റുള്ള അംഗങ്ങളില്‍ ഭൂരിപക്ഷവും നോര്‍ക്ക റൂട്ട്‌സ്, പ്രവാസി ക്ഷേമനിധി ബോര്‍ഡ്, എന്‍.ആര്‍.ഐ കമ്മീഷന്‍ എന്നീ സ്ഥാപനങ്ങളുടെ ഔദ്യോഗിക സ്ഥാനങ്ങള്‍ വഹിക്കുന്നവരാണ്.

പ്രത്യേക ക്ഷണിതാക്കളിലും ഭൂരിപക്ഷവും സംഘടനാ പ്രതിനിധികളാണ്. 173 അംഗങ്ങളില്‍ 78പേര്‍ മലയാളി സംഘടനകളെ പ്രതിനിധീകരിച്ചു പങ്കെടുത്തവരാണ്. സംഘടനാ പ്രതിനിധികളില്‍ 30 പേരോളം ഒ.സി.ഐ (ഓവര്‍സീസ് സിറ്റിസണ്‍ ഓഫ് ഇന്ത്യ )കാര്‍ഡ് ഉള്ളവരാണ്. ക്ഷണിതാക്കളില്‍ 35 പേര്‍ വിവിധ കമ്പനികളുടെ സിഇഒ തലത്തില്‍ പ്രവര്‍ത്തിക്കുന്ന പ്രൊഫഷണലുകളും നിക്ഷേപകരുമാണ്. കൂടാതെ 27 പ്രത്യേക ക്ഷണിതാക്കള്‍ സാമൂഹിക-സംസ്‌കാരിക-ശാസ്ത്ര- അക്കാദമിക് മേഖലകളുടെ പ്രതിനിധികളായി പങ്കെടുത്തു. സംഘടനാ പ്രതിനിധികള്‍ ഉള്‍പ്പെടെ 30 പ്രത്യേക ക്ഷണിതാക്കള്‍ സാധാരണ തൊഴിലുകളില്‍ ഏര്‍പ്പെടുന്നവരാണെന്നും പി.ശ്രീരാമകൃഷ്ണന്‍ പ്രസ്താവനയില്‍ വ്യക്തമാക്കി.

62 വിദേശ രാജ്യങ്ങളില്‍ നിന്നും 21 ഇന്ത്യന്‍ സംസ്ഥാനങ്ങളില്‍ നിന്നും പ്രതിനിധികള്‍ എത്തിച്ചേര്‍ന്ന ഈ സമ്മേളനം ലോക മലയാളികളുടെ അഭിമാനകരമായ സംഗമവേദിയായിരുന്നു ഈ സഭ സമ്പന്നരുടെയും നിക്ഷേപകരുടെയും മാത്രം സഭയല്ല. കലാകാരന്‍മരുടെ, തൊഴിലാളികളുടെ, ഗദ്ദാമമാരുടെ, സാങ്കേതിക വിദഗ്ദ്ധരുടെ, ചിത്രകാരന്‍മാരുടെ, സംഗീതജ്ഞരുടെ, എഴുത്തുകാരുടെ എല്ലാം സഭയാണ്. ആഗോള മലയാളികളുടെ സര്‍ഗ്ഗ സൗഹൃദ കൂട്ടായ്മയെ അപഹസിക്കാനുള്ള ശ്രമത്തെ അര്‍ഹിക്കുന്ന അവജ്ഞയോടെ തള്ളിക്കളയണമെന്നും പി.ശ്രീരാമകൃഷ്ണന്‍ പ്രസ്താവനയില്‍ അഭ്യര്‍ഥിച്ചു.

The post ലോക കേരള സഭ വിശ്വകേരളത്തിന്റെ പരിഛേദം -പി.ശ്രീരാമകൃഷ്ണന്‍ appeared first on Starvision News Malayalam.

ജൂൺമാസം 16 17 18 തീയതികളിൽ തിരുവനന്തപുരം നിയമസഭാ മന്ദിരത്തിൽ നടന്ന മൂന്നാമത് ലോക കേരള സഭ സമ്മേളനം വിജയകരമായി പര്യവസാനിച്ചു. പുതുതായി പങ്കെടുത്ത ബഹറിൻ മീഡിയ സിറ്റി ചെയർമാനും മാനേജിംഗ് ഡയറക്ടറുമായ ഫ്രാൻസിസ് കൈതാരത്ത് ബഹ്റൈൻ പ്രവാസി പ്രതിനിധികളിലൊരാളായി ലോക കേരള സഭയിൽ പങ്കെടുക്കാൻ ലഭിച്ച അവസരം പരമാവധി പ്രയോജനപ്പെടുത്തിയതായി അറിയിച്ചു. പശ്ചിമേഷ്യൻ രാജ്യങ്ങൾക്കായി വിഷയാടിസ്ഥാനത്തിൽ നടന്ന ചർച്ചയിലാണ് ഫ്രാൻസിസ് കൈതാരത്ത് നിയമസഭയിൽ പ്രാധാന വിഷയങ്ങൾ സഭാഗംങ്ങളുടെ ശ്രദ്ധയിൽപ്പെടുത്തിയത്.

ഡിസ്ട്രസ്സ് മാനേജ്മെൻറ് കളക്ടീവ് എന്ന സംഘടനയുടെ ഗ്ലോബൽ കോർഡിനേറ്ററും ബഹറിനിലെ നിരവധി സംഘടനകളുടെ പ്രതിനിധിയും ആയ ഫ്രാൻസിസ് കൈതാരത്ത് സുപ്രധാനവും പ്രവാസികൾക്ക് ഏറെ ഉപകാരപ്രദവുമാകുന്ന ഏഴ് ആവശ്യങ്ങൾ അടങ്ങിയ നിവേദനം മുഖ്യമന്ത്രിയുടെ അസാന്നിധ്യത്തിൽ, കേരള ചീഫ് സെക്രട്ടറി വി പി ജോയ്, നോർക്ക റൂട്ട്‌സ്‌ വൈസ്‌ ചെയർമാൻ പി ശ്രീരാമകൃഷ്‌ണൻ ,എ.എ റഹീം എംപി, ബിനോയ്‌ വിശ്വം എംപി , ജോണ്‍ ബ്രിട്ടാസ് എംപി, വനം മന്ത്രി എകെ ശശീന്ദ്രൻ എന്നിവർക്ക് നേരിട്ട് സമർപ്പിക്കുകയും ചെയ്തു.

1) ഡ്രീം കേരള പദ്ധതിയിലുൾപ്പെടുത്തി, മുനിസിപ്പാലിറ്റി അടിസ്ഥാനത്തിൽ സർക്കാർ വക സ്ഥലം കണ്ടെത്തി പ്രവാസി ഫ്രീസോൺ , ഇൻഡസ്ട്രിയൽ പാർക്കുകൾ എന്ന പേരിൽ വഴിയും വെള്ളവും വെളിച്ചവും നൽകിക്കൊണ്ട് ഏകജാലക സംവിധാനത്തിലൂടെ പ്രവാസികൾക്ക് ചെറുകിട വ്യവസായങ്ങൾ സ്ഥാപിക്കുവാനും അവരുടെ പ്രവർത്തി പരിചയം നാടിന് മുതൽക്കൂട്ടാകുവാനും നടപടിയുണ്ടാകണം. തുടർന്ന് ഗൾഫ് രാജ്യങ്ങളിൽ പ്രവാസി സംരംഭക അദാലത്തുകൾ സംഘടിപ്പിച്ച് അവർക്ക് ആവശ്യമായ ക്ലിയറൻസ് നടത്തിക്കൊടുത്ത് ചെറുകിട വ്യവസായങ്ങളെ ആകർഷിക്കണം എന്നും.

2) മാറിയ സാഹചര്യത്തിൽ കുട്ടികൾക്ക് മാതാപിതാക്കളോടൊപ്പം നിന്നുകൊണ്ട് പഠനം തുടരുന്നതിന് ഉതകുന്ന വിധത്തിൽ ഗൾഫ് രാജ്യങ്ങളിൽ യൂണിവേഴ്സിറ്റി കോളേജുകൾ സ്ഥാപിക്കുന്നതിനുള്ള നടപടികൾ സ്വീകരിക്കുക കൂടാതെ

3) പ്രവാസി ക്ഷേമനിധി പെൻഷൻ നിലവിലെ 3500/= രൂപ എന്നുള്ളത്, വിവിധ സ്ലാബുകളിൽ ആയി 35,000/= രൂപ വരെ കിട്ടത്തക്ക വിധത്തിൽ വിപുലീകരിക്കുക. 350/= രൂപ മുതൽ 3500/= രൂപവരെ പ്രതിമാസ നിക്ഷേപം ക്രമീകരിക്കാവുന്നതാണെന്നും അദ്ദേഹം സഭയെ അറിയിച്ചു

4) ഒപ്പം തന്നെ പ്രവാസി ക്ഷേമനിധി പെൻഷൻ പദ്ധതിയിൽ അംഗമാകുന്നതിനുള്ള പ്രായപരിധി എടുത്തുകളയണമെന്നും അദ്ദേഹം പറഞ്ഞു

5) മാത്രമല്ല കേരളത്തിൽ നിന്ന് യൂറോപ്പിലേക്ക് കണക്ഷൻ വിമാനങ്ങളിൽ പോകുന്നവർ ഗൾഫ് രാജ്യങ്ങളിലുള്ള എയർലൈൻസിന് ആശ്രയിക്കുന്നുണ്ട്. ഇതുമൂലം ഈ റൂട്ടിലുള്ള തിരക്ക് ഒരുകാലത്തും കുറയുന്നില്ല എന്നുള്ളത് ഗൗരവമായി പരിഗണിച്ചുകൊണ്ട് കേരളത്തിൽ നിന്നും യൂറോപ്പിലെക്ക് നേരിട്ടുള്ള സർവീസുകൾ ആരംഭിക്കാനുള്ള സാധ്യത കണ്ടെത്തണം. ഇത് ടൂറിസം മേഖലയുടെ ഉയർത്തെഴുന്നേൽപ്പിന് ഇത് സഹായകമാകുമെന്ന് അദ്ദേഹം അറിയിച്ചു

6) മാത്രമല്ല കോവിഡ് മഹാമാരി മൂലം മരണപ്പെട്ട പ്രവാസികളുടെ കുടുംബങ്ങൾക്കും കൃത്യമായ നഷ്ടപരിഹാരം ലഭ്യമാക്കണം എന്നും അദ്ദേഹം പറഞ്ഞു.

7) കൂടാതെ ലോക കേരള സഭയുടെ സിറ്റിങ് രണ്ട് ദിവസം എന്നുള്ളത് ഏഴു ദിവസം ആക്കി വർദ്ധിപ്പിച്ചുകൊണ്ട് കൂടുതൽ ക്രിയാത്മകമായ ചർച്ചകൾക്കും നടപടികൾക്കും വഴിയൊരുക്കണം. അത് പോലെ ഓൺലൈൻ വഴി എല്ലാമാസവും തുടർ ചർച്ചകളും ഉണ്ടാകണം

കൂടാതെ ലോകമെമ്പാടുമുള്ള മലയാളി സംഘടനകൾ ഏകോപിപ്പിക്കാൻ കോർഡിനേഷൻ കമ്മിറ്റി നിലവിൽ വരണം എന്നും ഫ്രാൻസിസ് കൈതാരത്ത് മൂന്നാമത് ലോക കേരള സഭയിൽ ആവശ്യപ്പെട്ടു.

The post മൂന്നാമത് ലോകകേരളസഭ സമ്മേളനം സമാപിച്ചു appeared first on Starvision News Malayalam.

ഇതെല്ലാം അറിഞ്ഞിട്ടും പ്രവാസികള്‍ക്ക് ഭക്ഷണം നല്‍കുന്നതും താമസം ഒരുക്കുന്നതുമാണ് യു.ഡി.എഫ് എതിര്‍ക്കുന്നതെന്ന രീതിയില്‍ യൂസഫലി നടത്തിയ പരാമര്‍ശം നിര്‍ഭാഗ്യകരമാണ്. നിയമസഭയിലെ ശങ്കരനാരായണന്‍ തമ്പി ഹാളിന്റെ ഇന്റീരിയര്‍ നവീകരണം 16 കോടി രൂപയ്ക്ക് ഊരാളുങ്കലിനെ ഏല്‍പ്പിച്ചതിന് പിന്നില്‍ അഴിമതിയും ധൂര്‍ത്തുമുണ്ട്. അല്ലാതെ പ്രവാസികള്‍ക്ക് ഭക്ഷണം കൊടുക്കുന്നതോ താമസം നല്‍കുന്നതോ ധൂര്‍ത്തായി ഒരു പ്രതിപക്ഷ നേതാവും പറഞ്ഞിട്ടില്ല. ഇതിനെ ആ രീതിയിലേക്ക് വളച്ചൊടിക്കാന്‍ സി.പി.എം കേന്ദ്രങ്ങള്‍ ശ്രമിക്കുന്നുണ്ട്. യു.ഡി.എഫ് സംഘടനകളുമായി ബന്ധപ്പെട്ട് നില്‍ക്കുന്ന പ്രവാസി പ്രതിനിധികള്‍ സമ്മേളനത്തില്‍ പങ്കെടുക്കണമെന്ന നിര്‍ദ്ദേശം നല്‍കിയിരുന്നു. രണ്ട് ലോക കേരള സഭകള്‍ നടന്നിട്ടും എന്തൊക്കെ പ്രഖ്യാപനങ്ങള്‍ നടപ്പാക്കിയെന്നത് സംബന്ധിച്ച് പ്രോഗ്രസ് റിപ്പോര്‍ട്ട് ഇറക്കണമെന്ന് മുഖ്യമന്ത്രിയോട് ആവശ്യപ്പെട്ടിരുന്നു. ഇക്കാര്യത്തിലും സര്‍ക്കാരിന്റെ ഭാഗത്ത് നിന്നും നടപടിയുണ്ടായില്ല.

സംസ്ഥാനത്തെ തദ്ദേശ സ്വയംഭരണ സ്ഥാപനങ്ങളുടെ പ്രവര്‍ത്തനം അപകടകരമായ നിലയിലേക്ക് പോകുകയാണ്. മാര്‍ച്ച് 31-ന് മുന്‍പ് പദ്ധതികള്‍ക്ക് അംഗീകാരം കൊടുക്കേണ്ടതാണ്. എന്നാല്‍ പണമില്ലാത്തതിനെ തുടര്‍ന്ന് പദ്ധതികള്‍ക്ക് ഇതുവരെ അനുമതി നല്‍കിയിട്ടില്ല. ഇതേത്തുടര്‍ന്ന് എല്ലാ പഞ്ചായത്തുകളും പ്രതിസന്ധിയിലാണ്. തദ്ദേശ സ്വയംഭരണ വകുപ്പിന്റെ പ്രവര്‍ത്തനം തന്നെ സ്തംഭിച്ചിരിക്കുകയാണ്. ഒരു പദ്ധതിയും നടപ്പാകുന്നില്ല. ഇത് അപകടകരമായ സ്ഥിതിയാണ്. ഇത്തരത്തില്‍ ഭരണപരമായ പരാജയം മറച്ചുവയ്ക്കുന്നതിന്റെ ഭാഗമായാണ് സര്‍ക്കാര്‍ മറ്റു വിഷയങ്ങളുമായി മുന്നോട്ടു പോകുന്നത്. യു.ഡി.എഫ് സര്‍ക്കാരിന്റെ കാലത്താണ് നേരത്തെ തന്നെ പദ്ധതികള്‍ക്ക് അംഗീകാരം കൊടുക്കുന്ന രീതി ആരംഭിച്ചത്. ആ രീതിയാണ് ഈ സര്‍ക്കാര്‍ അപകടത്തിലാക്കിയത്. ഗുരുതരമായ സമ്പത്തിക പ്രതിസന്ധിയിലൂടെയാണ് കേരളം കടന്നു പോകുന്നത്. ശ്രീലങ്കയ്ക്ക് സമാനമായ സാമ്പത്തിക പ്രശ്‌നത്തിലേക്ക് സംസ്ഥാനം കൂപ്പ് കുത്തുകയാണ്. സംസ്ഥാനത്തിന്റെ അപകടകരമായ സാമ്പത്തിക സ്ഥിതിയെ കുറിച്ച് റിസര്‍വ് ബാങ്ക് കഴിഞ്ഞ ദിവസം പുറത്ത് വിട്ട റിപ്പോര്‍ട്ടിലും ഗൗരവതരമായ ഉത്കണ്ഠ പ്രകടിപ്പിച്ചിട്ടുണ്ട്. ഈ സാഹചര്യത്തില്‍ സംസ്ഥാനത്തിന്റെ സാമ്പത്തിക അവസ്ഥ വ്യക്തമാക്കുന്ന ധവളപത്രം ഇറക്കാന്‍ സര്‍ക്കാര്‍ തയാറാകണം.

The post പ്രവാസികള്‍ക്ക് ഭക്ഷണവും താമസവും നല്‍കുന്നതല്ല ധൂര്‍ത്ത്; യൂസഫലിയുടെ പരാമര്‍ശം അങ്ങേയറ്റം ദൗര്‍ഭാഗ്യകരം appeared first on Starvision News Malayalam.

എന്തു വിധത്തിലുള്ള അനാരോഗ്യം ആണ് മുഖ്യമന്ത്രിക്ക് എന്നതിനെ കുറിച്ച് കൃത്യമായ വിവരങ്ങൾ ലഭ്യമായിട്ടില്ല. അദ്ദേഹത്തിൻറെ രോഗം എന്താണെന്നതിനെക്കുറിച്ചും പൊതുസമൂഹത്തിന് കൃത്യമായ ധാരണകൾ ഇല്ല. മുഖ്യമന്ത്രി ആയതിനുശേഷം മൂന്നുവട്ടം അമേരിക്കയിൽ അദ്ദേഹം ചികിത്സാർത്ഥം പോയിട്ടുണ്ട്. അവസാന വട്ടം പോയപ്പോൾ തന്നെ സന്ദർശനം വെട്ടിച്ചുരുക്കി തൃക്കാക്കര തിരഞ്ഞെടുപ്പിന് പശ്ചാത്തലത്തിൽ അദ്ദേഹം തിരികെ വരികയായിരുന്നു.

The post മുഖ്യമന്ത്രിക്ക് അനാരോഗ്യം: ലോക കേരള സഭയുടെ സമ്മേളന ഉദ്ഘാടനത്തിന് പങ്കെടുത്തില്ല appeared first on Starvision News Malayalam.

സര്‍ക്കാരിന്റെ സംരക്ഷണമില്ലാതെ രാജ്യത്ത് മാധ്യമപ്രവര്‍ത്തനം സാധ്യമാകുന്ന ഏക സംസ്ഥാന കേരളമാണെന്ന് ചടങ്ങിൽ സംസാരിച്ച ജോണ്‍ ബ്രിട്ടാസ് എംപി അഭിപ്രായപ്പെട്ടു. കേരള മീഡിയ അക്കാഡമിയുടെ ഇന്ത്യന്‍ മീഡിയ പേഴ്‌സണ്‍ അവാര്‍ഡ് ബര്‍ഖാ ദത്തിന് മുഖ്യമന്ത്രി സമ്മാനിച്ചു. ഒരു ലക്ഷം രൂപയും പ്രശസ്തിപത്രവും ശില്പവും അടങ്ങിയതാണ് പുരസ്‌ക്കാരം. പ്രശസ്തി പത്രത്തിന്റെ അവതരണം ടൈംസ് ഓഫ് ഇന്ത്യ ഡല്‍ഹി ലേഖിക രമാ നാഗരാജന്‍ നിര്‍വ്വഹിച്ചു. പ്രവാസി മലയാളികളായ 15 മാധ്യമപ്രവര്‍ത്തകര്‍ക്ക് മുഖമന്ത്രി ഉപഹാരം സമര്‍പ്പിച്ചു. ശശികുമാറിന്റെ മാധ്യമജീവിതം അടയാളപ്പെടുത്തിയ, ടി.കെ.രാജീവ് കുമാര്‍ സംവിധാനം ചെയ്ത ഡോക്യുഫിലിമിന്റെ പ്രകാശനവും മുഖ്യമന്ത്രി നിര്‍വഹിച്ചു. കേരള മീഡിയ അക്കാഡമി ചെയര്‍മാന്‍ ആര്‍.എസ്. ബാബു ചടങ്ങില്‍ അധ്യക്ഷനായി. നോര്‍ക്ക റൂട്ട്‌സ് വൈസ് ചെയര്‍മാന്‍ പി. ശ്രീരാമകൃഷ്ണന്‍, മുതിര്‍ന്ന മാധ്യമപ്രവര്‍ത്തകന്‍ തോമസ് ജേക്കബ്, വെങ്കിടേഷ് രാമകൃഷ്ണന്‍, കേരള പത്രപ്രവര്‍ത്തക യൂണിയന്‍ സംസ്ഥാന പ്രസിഡന്റ് കെ.പി. റെജി എന്നിവര്‍ പങ്കെടുത്തു. കേരള മീഡിയ അക്കാഡമി സെക്രട്ടറി എന്‍.പി. സന്തോഷ് സ്വാഗതവും പത്രപ്രവര്‍ത്തക യൂണിയന്‍ തിരുവനന്തപുരം ജില്ല പ്രസിഡന്റ് സുരേഷ് വെള്ളിമംഗലം നന്ദിയും പറഞ്ഞു. ലോക കേരള മാധ്യമ സഭയോട് അനുബന്ധിച്ച് നവകേരള നിര്‍മ്മിതിയില്‍ പ്രവാസി മാധ്യമങ്ങളുടെ പങ്ക് എന്ന വിഷയത്തില്‍ ആശയസംവാദം നടന്നു. പ്രവാസികളായ മാധ്യമ പ്രവർത്തകരായ ഐസസക് ജോണ്‍ പട്ടാണിപ്പറമ്പില്‍, ജോസഫ് ജോണ്‍, ജോസി ജോസഫ്, ധന്യരാജേന്ദ്രന്‍, അരുണ്‍.ടി.കെ, ബിന്‍സാല്‍ അബ്ദുള്‍ഖാദര്‍ സരസ്വതി ചക്രബര്‍ത്തി, വി. നന്ദകുമാര്‍, ലീന രഘുനാഥ്, അരുണ്‍ റാം, സാം പൈലിമൂട്, അഫ്‌സല്‍, സിന്ധു ബിജു എന്നിവര്‍ സംവാദത്തില്‍ പങ്കെടുത്തു. പി.എം. മനോജ്, പി.പി. ശശീശീന്ദ്രന്‍ എന്നിവര്‍ മോഡറേറ്റര്‍മാരായിരുന്നു. നവകേരള നിര്‍മ്മിയതിയില്‍ കേരളത്തിനുവേണ്ടി നിരവധി ആശയങ്ങള്‍ സംവാദത്തില്‍ ഉയര്‍ന്നു വന്നു. ലോക കേരള മാധ്യമസഭയുടെ സമാപന സമ്മേളനം വ്യവസായ-നിയമവകുപ്പ് മന്ത്രി പി. രാജീവ് ഉദ്ഘാടനം ചെയ്തു. വികസന വാര്‍ത്തകള്‍ക്കപ്പുറം വിവാദ വാര്‍ത്തകളിലാണ് മാധ്യമങ്ങള്‍ക്ക് താത്പര്യമെന്ന് പി. രാജീവ് ഉദ്ഘാടന പ്രസംഗത്തില്‍ പറഞ്ഞു. പത്രങ്ങളുടെ എഡിറ്റോറിയയില്‍ പോലും ഇപ്പോള്‍ സത്യസന്ധമായ കാര്യങ്ങള്‍ ഉള്‍പ്പെടുത്തുന്നില്ലെന്നും അദ്ദേഹം പറഞ്ഞു. ചടങ്ങില്‍ കേരള മീഡിയ അക്കാഡി ചെയര്‍മാന്‍ ആര്‍.എസ്. ബാബു അധ്യക്ഷനായി. പ്രശസ്ത മാധ്യമപ്രവര്‍ത്തകന്‍ ശശികുമാറിനെക്കുറിച്ച കേരള മീഡിയ അക്കാഡമി നിര്‍മ്മിച്ച അണ്‍മീഡിയേറ്റ് എന്ന ഡോക്യുമെന്ററിയുടെ പ്രദര്‍ശനം സമാപന ചടങ്ങുകള്‍ക്കുശേഷം നടന്നു.

The post പ്രവാസികളും പ്രവാസി മാധ്യമ പ്രവര്‍ത്തകരും കേരളത്തിന്റെ അംബാസിഡര്‍മാരായി പ്രവര്‍ത്തിക്കണം: മുഖ്യമന്ത്രി appeared first on Starvision News Malayalam.

ലോകകേരള സഭയില്‍ 351 അംഗങ്ങളാണുള്ളത്. സംസ്ഥാനത്തെ നിലവിലെ നിയമസഭാംഗങ്ങളും പാര്‍ലമെന്റ് അംഗങ്ങളുമായി 169 പേരും പ്രവാസികളായി 182 പേരും അടങ്ങുന്നതാണ് ഈ സഭ. പ്രവാസികളില്‍ ഇന്ത്യക്ക് പറത്തുള്ളവര്‍ 104 പേരും ഇതരസംസ്ഥാനങ്ങളില്‍ നിന്ന് 36 പേരും തിരിച്ചെത്തിയവര്‍ 12 പേരും എമിനന്റ് പ്രവാസികളായി 30 പേരും ഉള്‍പ്പെടുന്നു. ഇവരെ കൂടാതെ വിവിധ പ്രവാസമേഖലയിലെ പ്രമുഖര്‍ അടങ്ങുന്ന ഒരു സംഘം ക്ഷണിതാക്കളും ഉണ്ടാവും.

നാളെ വൈകുന്നേരം അഞ്ചു മണിക്ക് തിരുവനന്തപുരം കനകക്കുന്ന് കൊട്ടാരവളപ്പിലെ നിശാഗന്ധിയില്‍ നടക്കുന്ന പൊതുസമ്മേളനം അകംകേരളത്തിന്റെയും അതിന്റെ നട്ടെല്ലായി നിലകൊള്ളുന്ന പുറംകേരളത്തിന്റെയും ഒരു സംഗമമായിരിക്കും. കേരളത്തിന്റെ വൈജ്ഞാനിക-സാംസ്‌കാരിക പ്രൗഢിയും തനിമയും വിളിച്ചോതുന്ന കലാസാംസ്‌കാരിക പരിപാടിയും അരങ്ങേറും. തുടര്‍ന്ന് രണ്ട് ദിവസങ്ങളിലായി നിയമസഭാ മന്ദിരത്തില്‍ എട്ട് വിഷയാധിഷ്ഠിത ചര്‍ച്ചകളാണ് നടക്കുന്നത്.

പ്രവാസികളോടുള്ള കേരളത്തിന്റെ പ്രതിബദ്ധതയുടെയും കടപ്പാടിന്റെ ഏറ്റവും മികച്ച ഉദാഹരണമാണ് ലോകകേരള സഭ എന്ന ആശയം. പതിറ്റാണ്ടുകളുടെ മലയാളി പ്രവാസാനുഭവം ഒരുപക്ഷെ ലോകത്തിലെ തന്നെ ഏറ്റവും വിലമതിക്കാനാവാത്ത സമ്പത്താണ്. കഴിവും വൈദഗ്ദ്ധ്യവും ആശയഗരിമയും എല്ലാം സമ്മേളിക്കുന്ന ആ വിഭവശേഷിയെ വേണ്ടവണ്ണം ഈ മണ്ണിലേക്ക് ആവാഹിച്ചാല്‍ അത്ഭുതങ്ങള്‍ സൃഷ്ടിക്കാന്‍ സാധിക്കുമെന്നതില്‍ സംശയമില്ല. അതുകൊണ്ടാണ് ലോകമെമ്പാടുമുള്ള പ്രവാസികള്‍ക്ക് അപേക്ഷിക്കാന്‍ അവസരം നല്‍കിക്കൊണ്ട് സര്‍ക്കാരിന്റെയും പ്രതിപക്ഷത്തിന്റെയും നാമനിര്‍ദ്ദേശത്തിലൂടെ ലോകേരളസഭയിലേക്ക് അംഗങ്ങളെ തിരഞ്ഞെടുത്തിരിക്കുന്നത്. രണ്ടു വര്‍ഷം കൂടുമ്പോള്‍ നാമനിര്‍ദ്ദേശം ചെയ്യപ്പെട്ട മൂന്നിലൊന്ന് പേര്‍ വിരമിക്കുകയും പുതിയ അംഗങ്ങള്‍ക്ക് കടന്നു വരാന്‍ അവസരം ഒരുങ്ങുകയും ചെയ്യും. ഇന്ത്യന്‍ പൗരന്‍മാരല്ലാത്ത കേരളീയരുടെ അഭിപ്രായങ്ങളും ആശയങ്ങളും പോലും നാം പ്രയോജനപ്പെടുത്തുന്നുണ്ട്. പൗരത്വമുള്ളവര്‍ക്ക് മാത്രമായി ലോകകേരള സഭാ അംഗത്വം പരിമിതപ്പെടുത്തിയിട്ടുണ്ടെങ്കിലും പൗരന്‍മാരല്ലാത്ത കേരളീയരെയും മറ്റു നിലകളില്‍ സഭയുടെ പ്രവര്‍ത്തനങ്ങളില്‍ ഭാഗഭാക്കാവാന്‍ സ്വാഗതം ചെയ്യുന്നുണ്ട്.

കേരളസഭാ നേതാവ് മുഖ്യമന്ത്രിയും ഉപനേതാവ് പ്രതിപക്ഷ നേതാവുമെന്ന നിലയില്‍ ജനാധിപത്യത്തിന് കൂടുതല്‍ തുറസ്സുകള്‍ സൃഷ്ടിച്ചുകൊണ്ട് ജനാധിപത്യപ്രക്രിയയെ ലോകകേരള സഭ കൂടുതല്‍ സമ്പന്നമാക്കുന്നു. ഒരുപക്ഷെ ലോകത്തില്‍ തന്നെ ഇത്തരമൊരു മാതൃക അപൂര്‍വമായിരിക്കും.

അകംകേരളവും പുറംകേരളവും കൈകോര്‍ത്തുകൊണ്ട് കൂടുതല്‍ ശോഭനമായ ഭാവിയിലേക്ക് ചുവുവയ്ക്കാനുള്ള മാര്‍ഗങ്ങളാണ് മൂന്നാം ലോകകേരള സഭ ചര്‍ച്ച ചെയ്യുന്നത്. എട്ട് വിഷയമേഖലകളെ വിലയിരുത്തുന്നവര്‍ക്ക് ഇത് വേഗത്തില്‍ ബോധ്യപ്പെടും. വൈജ്ഞാനിക സമ്പദ് വ്യവസ്ഥയുടെ രൂപീകരണത്തില്‍ പ്രവാസി ഇടപെടലിന്റെ സാധ്യതകള്‍, നവകേരള നിര്‍മാണത്തിന് സഹായകമാവുന്ന പ്രവാസിനിക്ഷേപസാധ്യതകള്‍ എന്നിവയാണ് ആദ്യ രണ്ട് വിഷയമേഖലകള്‍. പ്രവാസികളുടെ വൈദഗ്ദ്ധ്യത്തെയും സാധ്യതകളെയും കേരളത്തിന് എങ്ങനെ ഫലപ്രദമായി വിനിയോഗിക്കാന്‍ സാധിക്കുമെന്നതിനൊപ്പം പ്രവാസി നിക്ഷേപങ്ങള്‍ വിജയകരമാക്കാനുള്ള ആശയങ്ങളും ഈ ചര്‍ച്ചയില്‍ ഉരുത്തിരിയുമെന്നാണ് പ്രതീക്ഷിക്കുന്നത്.
ഭാവി പ്രവാസം-നൈപുണ്യ വികനസവും പുതിയ തൊഴിലിടങ്ങളും എന്നാതാണ് മൂന്നാമത്തെ വിഷയം. ആഗോളതൊഴില്‍ വിപണിയുടെ പുതിയ പ്രവണതകള്‍ വിശകലനം ചെയ്തുകൊണ്ട് ഗുണമേന്‍മയുള്ള പ്രവാസത്തെ പ്രോത്സാഹിപ്പിക്കാനുള്ള പദ്ധതികള്‍ ഇവിടെ ചര്‍ച്ചയാവും. പ്രവാസികള്‍ നേരിടുന്ന പ്രശ്നങ്ങള്‍ തീര്‍ച്ചയായും ഈ സമ്മേളനത്തിന്റെ മുഖ്യവിഷയമാണ്. സര്‍ക്കാരിന്റെ പ്രവാസികള്‍ക്കായുള്ള പദ്ധതികളുടെ വിലയിരുത്തല്‍-പ്രവാസി പുനരധിവാസം വെല്ലുവിളികളും നൂതനാശയങ്ങളും എന്ന വിഷയം ഈ മേഖലയെ കേന്ദ്രീകരിച്ചുള്ളതാണ്.

അതൊടൊപ്പം വിദേശത്ത് നാടുകളില്‍ പ്രവാസികള്‍ നേരിടുന്ന വ്യത്യസ്തങ്ങളായ സാഹചര്യങ്ങളും ചര്‍ച്ചയാവും. പ്രവാസവുമായി ബന്ധപ്പെട്ട് കേന്ദ്രസര്‍ക്കാരും അന്താരാഷ്ട്ര സംഘടനകളുമായി സഹകരണസാധ്യതകള്‍ എന്ന വിഷയം ആ മേഖലയെ അഭിസംബോധന ചെയ്യുന്നതാണ്. സ്ത്രീ കുടിയേറ്റത്തിന്റെ ഭാവി സാധ്യതള്‍ മൂന്നാം സഭയുടെ ഒരു പ്രധാന ചര്‍ച്ചാ കേന്ദ്രമാണ്. പ്രവാസവും സാംസ്‌കാരിക വിനിമയ സാധ്യതകളും, ഇതര സംസ്ഥാന മലയാളികളുടെ പ്രശ്നങ്ങള്‍ എന്നിവയും വിഷയമേഖലകളില്‍ ഉള്‍പ്പെടുന്നു.

ഒന്ന്, രണ്ട് ലോക കേരള സഭകള്‍

ലോകകേരള സഭയുടെ പ്രഥമ സമ്മേളനം 2018 ജനുവരി 12, 13 തീയിതകളാണ് ചേര്‍ന്നത്. ആ സമ്മേളന തീരുമാനങ്ങളില്‍ മുഖ്യമായതായിരുന്നു ലോക കേരള സഭ സെക്രട്ടറിയേറ്റ് രൂപീകരിക്കുക, ഏഴ് വിഷയ മേഖല സ്റ്റാന്റിംഗ് കമ്മിറ്റികള് രൂപീകരിക്കുക എന്നിവ. വിവിധ മേഖലകളിലെ വിദ്ഗധരെ ഉള്‍പ്പെടുത്തി വിവിധ വിഷയങ്ങളെക്കുറിച്ച് പഠനം നടത്തി കേരളത്തിന്റെ തനത് സാഹചര്യങ്ങള്‍ ക്കൂടി കണക്കിലെടുത്ത് പ്രവാസികള്‍ നേരിടുന്ന വിവിധ പ്രശ്‌നങ്ങള്ക്ക് പരിഹാരം കണ്ടെത്തുക എന്നതാണ് സ്റ്റാന്റിംഗ് കമ്മിറ്റികളുടെ ഉദ്ദേശം. ഇവ രണ്ടും നിലവില്‍ വന്നിട്ടുണ്ട്.

ലോക കേരള സഭ സെക്രട്ടറിയേറ്റിന്റെ ഒരു പ്രത്യേക ഓഫീസ് നോര്‍ക്ക സെന്ററില്‍ പ്രവര്‍ത്തിച്ചു വരുന്നു്. സ്റ്റാന്റിംഗ് കമ്മിറ്റി ചെയര്‍മാന്‍മാരുടെ വിശദമായ പഠനത്തിന്റെ അടിസ്ഥാനത്തില്‍ സമര്‍പ്പിച്ച ശുപാര്‍ശകളില്‍ താഴെ പറയുന്ന നടപടികള്‍ സ്വീകരിച്ചിട്ടുണ്ട്.

• ഓവര്‍സീസ് കേരളൈറ്റ്‌സ് ഇന്വെസ്റ്റ്‌മെന്റ് & ഹോള്ഡിങ് ലിമിറ്റഡ് എന്ന കമ്പനി രൂപവത്കരിച്ചു.

• കേരള സംസ്ഥാന പ്രവാസി ക്ഷേമ വികസന സഹകരണ സംഘം ക്ലിപ്തം 4499 പ്രവര്ത്തനം ആരംഭിച്ചു.

• വനിതകളുടെ സുരക്ഷിത കുടിയേറ്റത്തിനായി നോര്‍ക്ക റൂട്ട്‌സില്‍ എന്‍.ആര്‍.കെ വനിതാ സെല്‍ രൂപീകരിച്ചു.

• മനുഷ്യക്കടത്തും തൊഴില്‍ ചൂഷണവും തടയുന്നതിന് എയര്‍പ്പോര്‍ട്ടുകളില്‍ migration facilitation cetnre, പാസ്‌പ്പോര്‍ട്ട് ഓഫീസുകളില്‍ Pre embarkment orientation centers നിലവില്‍ വന്നു.

• കുടിയേറ്റവുമായി ബന്ധപ്പെട്ട് പഠനം നടത്തുന്നതിനും പ്രോത്സാഹിപ്പിക്കുന്നതിനും CENTRE FOR DEVELOPMENT STUDIES (CDS) ല്‍ അന്താരാഷ്ട്ര കുടിയേറ്റ കേന്ദ്രം സ്ഥാപിച്ചു.

• പ്രവാസി ആനുകാലിക പ്രസിദ്ധീകരണം ‘ലോക മലയാളം’ ആരംഭിച്ചു.

രണ്ടാം ലോക കേരള സഭ 2020 ജനുവരി 1,2,3 തീയതികളിലായി തിരുവനന്തപുരം നിയമസഭാ മന്ദിരത്തില്‍ നടന്നു. ഈ സമ്മേളനത്തില്‍ ജിസിസി , സാര്ക്ക്, ആഫ്രിക്ക, യൂറോപ്പ്, സൗത്ത് ഈസ്റ്റ് ഏഷ്യ, ഏഷ്യ, അമേരിക്ക, കാനഡ, മറ്റ് രാജ്യങ്ങളിലും 21 ഇന്ത്യന് സംസ്ഥാനങ്ങളില് നിന്നുമുള്ള പ്രതിനിധികളും പങ്കെടുത്തു.

പ്രസ്തുത സമ്മേളനത്തില്‍ കേന്ദ്ര സംസ്ഥാന സര്‍ക്കാരുകളുടെ പരിഗണയില്‍ വരത്തക്ക അകെ 209 ശുപാര്‍ശകള്‍ ഉരുത്തിരിഞ്ഞുവന്നിരുന്നു. പ്രായോഗികമല്ലാത്തതും ആവര്‍ത്തന സ്വഭാവമുള്ള ശുപാര്‍ശകളെ ഒഴിവാക്കി ശുപാര്‍ശകളെ 209 ല്‍ നിന്നും 156 ആയി പുനക്രമീകരിച്ചു. ശുപാര്‍ശകളി•േല്‍ തുടര്‍ നടപടികള്‍ ബന്ധപ്പെട്ട വകുപ്പുകള്‍ കൈക്കൊണ്ടുവരുന്നു.
ലോക കേരള സഭ ഒരു സ്ഥിരം സംവിധാനം എന്ന നിലയില്‍ രണ്ടാം ലോക കേരള സഭയില്‍ സംസ്ഥാന സര്‍ക്കാര്‍ ഒരു നിയമ നിര്‍മ്മാണം നടത്തണമെന്ന് ആവശ്യപ്പെട്ടുകൊണ്ടുളള ഒരു കരട് ബില് ചര്‍ച്ചചെയ്യ്തിരുന്നു. പ്രസ്തുത ബില് നിയമസഭയുടെ പരിഗണനക്ക് സമര്‍പ്പിക്കാനുള്ള നടപടി പുരോഗമിച്ചുവരുന്നു.

നോര്‍ക്കയുടെ കാല്‍ നൂറ്റാണ്ട്

പ്രവസികള്‍ക്ക് വേണ്ടി ഒരു ഇന്ത്യന്‍ സംസ്ഥാനത്തില്‍ ആദ്യമായി പ്രത്യേക വകുപ്പ് രൂപീകൃതമായത് കേരളത്തിലാണ്. 1996 ഡിസംബര്‍ ആറിന് നിലവില്‍ വന്ന നോര്‍ക്ക പ്രവര്‍ത്തന പാന്ഥാവില്‍ 25 വര്‍ഷം പിന്നിടുന്ന വേളയിലാണ് മൂന്നാം ലോകകേരള സഭ സമ്മേളിക്കുന്നത്.

നിലവിലുള്ള പദ്ധതികള്‍ സജീവായി മുന്നോട്ടു കൊണ്ടുപോകന്നതിനൊപ്പം കാലത്തിന്റെ മാറ്റങ്ങള്‍ ഉള്‍ക്കൊണ്ട് പുതിയ പല പദ്ധതികളും നോര്‍ക്ക ആവിഷ്‌കരിച്ചു വരുന്നുണ്ട്.

വ്യത്യസ്തമായ വിതാനങ്ങളിലേക്ക് ഇ്ന്ന് പ്രവാസം വിപുമായിക്കൊണ്ടിരിക്കുകയാണ്. പുതിയ കുടിയേറ്റ സംസ്‌കാരം ആഗോളതലത്തില്‍ തന്നെ രൂപപ്പെട്ടിരിക്കുന്നു. സവിശേഷമായ രീതികള്‍ മനസ്സിലാക്കാതെ ഇനി മുന്നോട്ടു പോകാന്‍ സാധിക്കില്ല.

പ്രവാസി സാന്ദ്രത കൂടിയ കേരളത്തില്‍ ആ മേഖലയിലെ പുതിയ പ്രവണതകള്‍ മനസിലാക്കാന്‍ കഴിയുന്ന ഒരു ദേശീയ മൈഗ്രേഷന്‍ കോണ്‍ഫറന്‍സ് സംഘടിപ്പിക്കാന്‍ ആലോചിക്കുന്നുണ്ട്. കേരളമാണ് ഇതിന് ഏറ്റവും ഉചിതമായ സ്ഥലമെന്ന് വിദേശകാര്യമന്ത്രാലയം പ്രതിനിധികള്‍ തന്നെ അറിയിച്ചിരിക്കുകയണ്. ഇത്തരമൊരു സമ്മേളനം വിളിച്ചു ചേര്‍ത്ത് ഈ മേഖലയിലെ വിശദാംശങ്ങള്‍ സമാഹരിക്കാനും പരാതികളും നിര്‍ദ്ദേശങ്ങളും മനസിലാക്കാനും ഒരു മൈഗ്രേഷന്‍ പോളിസി രൂപീകരിക്കാനും ശ്രമിക്കും.
കുറഞ്ഞ വരുമാനക്കാരായ പ്രവാസികളെ ലക്ഷ്യം വച്ച് ഒരു പരിരക്ഷാ ഇന്‍ഷുറന്‍സ് പദ്ധതി യും പരിഗണനയിലാണ്. കുടുംബത്തെ നാട്ടില്‍ വിട്ട് വിദേശത്ത് കഴിയുന്നവര്‍ക്കു വേണ്ടിയുള്ള ഇന്‍ഷുറന്‍സ് പദ്ധതിയാണിത്. പ്രവാസികളെയും കുടുംബാംഗങ്ങളെയും പരിരക്ഷയില്‍ കൊണ്ടുവരാനാണ് ഉദ്ദേശിക്കുന്നത്.

പ്രവാസികളുടെ വിവരങ്ങള്‍ ഉള്‍ക്കൊള്ളിച്ചുകൊണ്ടുള്ള ഗ്ലോബല്‍ ഡിജിറ്റല്‍ പ്ലാറ്റ്ഫോമാണ് മറ്റൊരു പ്രധാന ചുവടുവയ്പ്പ്. ലോകത്തിന്റെ ഏതു ഭാഗത്തുള്ള മലയാളിയുടെയും വിവരങ്ങള്‍ ഒരു ക്ലിക്കില്‍ ലഭ്യമാക്കാനുള്ള വലിയ സംരംഭമാണിത്. ലോകമലയാളികളുടെ ഏകീകരണം വെച്ചുകൊണ്ടുള്ള ഡിജിറ്റല്‍ പ്ലാറ്റ്ഫോം പുതിയ കാലത്തിന്റെ വെല്ലുവിളികള്‍ നേരിടാനുള്ള മികച്ച മുതല്‍ക്കൂട്ടായിരിക്കും.

നോര്‍ക്കയുടെയെും അതിന്റെ ഫീല്‍ഡ് ഏജന്‍സിയായ നോര്‍ക്ക റൂട്ട്‌സിന്റെയും പ്രവര്‍ത്തനങ്ങള്‍ കൂടുതല്‍ ഫലപ്രമാക്കുന്നതിന് ലോകകേരളസഭാംഗങ്ങളുടെ അഭിപ്രായങ്ങള്‍ പ്രയോജനപ്പെടുത്തുമെന്നു കൂടി ഈ അവസരത്തില്‍ ഉറപ്പു നല്‍കുന്നു.

The post ലോക കേരള സഭയുടെ മൂന്നാം സമ്മേളനത്തിന് നാളെ തിരിതെളിയും appeared first on Starvision News Malayalam.