മനാമ: കേരള നിയമസഭ ഡെപ്യൂട്ടി സ്പീക്കർ ശ്രീമതി ഷാനിമോൾ ഉസ്മാൻ ബഹ്‌റൈനിലെ ഗുരുദേവ സോഷ്യൽ സൊസൈറ്റി സന്ദർശിച്ചു. സൽമാനിയ കാനൂ ഗാർഡനിൽ പ്രവർത്തിക്കുന്ന ജി.എസ്.എസ് ആസ്ഥാനത്തായിരുന്നു സന്ദർശനം. ജി.എസ്.എസ് ഡയറക്ടർ ബോർഡ് അംഗങ്ങൾ, ലേഡീസ് വിങ് സെക്രട്ടറി സിന്ധു റോയ്, ജി.എസ്.എസ് കുടുംബാംഗങ്ങൾ എന്നിവർ പങ്കെടുത്ത ചടങ്ങിൽ ജി.എസ്.എസ് ചെയർമാൻ സനീഷ് കൂറുമുള്ളിൽ പൊന്നാട അണിയിച്ച് ഡെപ്യൂട്ടി സ്പീക്കറെ ആദരിച്ചു.

വിദേശത്ത് പ്രവർത്തിക്കുന്ന മലയാളി സമൂഹം കേരളത്തിന്റെ സാംസ്കാരിക പാരമ്പര്യവും സാമൂഹിക മൂല്യങ്ങളും ലോകത്തിന് മുന്നിൽ ഉയർത്തിക്കാട്ടുന്നുവെന്ന് ഷാനിമോൾ ഉസ്മാൻ പറഞ്ഞു. ഗുരുദേവ സോഷ്യൽ സൊസൈറ്റിയുടെ പ്രവർത്തനങ്ങൾ മാതൃകാപരമാണെന്നും സമൂഹത്തിന്റെ ഐക്യവും സേവനമനോഭാവവും അഭിനന്ദനാർഹമാണെന്നും അവർ കൂട്ടിച്ചേർത്തു.

ചടങ്ങിൽ അസിസ്റ്റന്റ് സെക്രട്ടറി ദേവദത്തൻ എ.ഡി., മെമ്പർഷിപ്പ് സെക്രട്ടറി രഞ്ജിത് വാസപ്പൻ, ഇന്ത്യൻ സ്കൂൾ ഡയറക്ടർ ബോർഡ് അംഗവും ജി.എസ്.എസ് കുടുംബാംഗവുമായ മിഥുൻ മോഹൻ എന്നിവരും പങ്കെടുത്തു.

പാലക്കാട് അസോസിയേഷൻ പ്രതിനിധികളായ അശോക് കുമാർ, സൽമാനുൾ ഫാരിസ് എന്നിവരും ഒ.ഐ.സി.സി നേതാക്കളായ ഗഫൂർ ഉണ്ണിക്കുളം, ബിനു കുന്നന്താനം, ബോബി പാറയിൽ, ബിബിൻ ഫിലിപ്പ്, റംഷാദ് അയിലക്കാട്, നിസാർ കുന്നുംകുളത്തിങ്കൽ, നൈസാം, വിൻസു കൂത്തപ്പള്ളി എന്നിവരും ഡെപ്യൂട്ടി സ്പീക്കർക്കൊപ്പം ജി.എസ്.എസ് സന്ദർശിച്ചു.

The post ഡെപ്യൂട്ടി സ്പീക്കർ ഷാനിമോൾ ഉസ്മാൻ ഗുരുദേവ സോഷ്യൽ സൊസൈറ്റി സന്ദർശിച്ചു appeared first on Starvision News Malayalam.

മനാമ: പാക്ടിന്റെ രണ്ട് ദിവസത്തെ ഓണാഘോഷങ്ങളിൽ പങ്കെടുക്കുന്നതിനായി ബഹ്‌റൈനിലെത്തിയ കേരള ഡെപ്യൂട്ടി സ്പീക്കർ ഷാനിമോൾ ഉസ്മാനുമായി ഇന്ത്യൻ ഓവർസീസ് കോൺഗ്രസ് ബഹ്‌റൈൻ ഭാരവാഹികൾ ചർച്ച നടത്തി. യു.ഡി.എഫ് സംഘടനാ കൂട്ടായ്മകളുടെ സ്വീകരണങ്ങൾക്കിടെയാണ് ഐഒസി ബഹ്‌റൈൻ പ്രതിനിധികൾ ഡെപ്യൂട്ടി സ്പീക്കറുമായി കൂടിക്കാഴ്ച നടത്തിയത്.

പ്രവാസികൾ നേരിടുന്ന പ്രധാന വിഷയങ്ങളായ വിമാന ടിക്കറ്റ് നിരക്ക് വർധന, പാസ്പോർട്ട് പുതുക്കി ലഭിക്കുന്നതിലെ കാലതാമസം, പ്രവാസി പുനരധിവാസം തുടങ്ങിയ വിഷയങ്ങൾ ചർച്ചയിൽ അവതരിപ്പിച്ചു. ഐഒസി ബഹ്‌റൈൻ പ്രസിഡന്റ് മുഹമ്മദ് മൻസൂർ, ജനറൽ സെക്രട്ടറി ബഷീർ അമ്പലായി, ലേഡീസ് വിംഗ് ഭാരവാഹി ഇസ്രത്ത്, ഒഐസിസി ഭാരവാഹി സൽമാനുൽ ഫാരിസ്, ഐഒസി കേരള വിംഗ് അംഗങ്ങളായ ഷമീർ പൊട്ടച്ചോല, റമീസ്, തസ്ലീം, ലിജോൺ മാത്യു തോമസ് എന്നിവർ സ്വീകരണത്തിലും ചർച്ചയിലും പങ്കെടുത്തു.

The post ഐഒസി ബഹ്‌റൈൻ ഭാരവാഹികൾ ഡെപ്യൂട്ടി സ്പീക്കർ ഷാനിമോൾ ഉസ്മാനുമായി ചർച്ച നടത്തി appeared first on Starvision News Malayalam.

തിരുവനന്തപുരം: കോൺഗ്രസ് നേതാവ് ഷാനിമോൾ ഉസ്മാനെ പതിനാറാം കേരള നിയമസഭയുടെ ഡെപ്യൂട്ടി സ്പീക്കറായി തിരഞ്ഞെടുത്തു. 35 വർഷങ്ങൾക്ക് ശേഷമാണ് കേരള നിയമസഭയിൽ ഒരു വനിത ഡെപ്യൂട്ടി സ്പീക്കർ ആകുന്നത്. സിപിഐ നേതാവായിരുന്ന ഭാർഗവി തങ്കപ്പൻ 1987 മുതൽ 1991 കേരള നിയമസഭയുടെ ഡെപ്യൂട്ടി സ്പീക്കറായിരുന്നതിനു ശേഷം ഇതാദ്യമായാണ് വനിത ഡെപ്യൂട്ടി സ്പീക്കർ ആകുന്നത്. കേരള നിയമസഭയുടെ നാലാമത്തെ വനിതാ ഡെപ്യൂട്ടി സ്പീക്കറാണ് ഷാനിമോൾ. മുമ്പ് സിപിഐ നേതാവ് കെ ഒ ആയിഷ ബീവി, കോൺഗ്രസ് നേതാവ് നഫീസത്ത് ബീവി എന്നിവരും ഡെപ്യൂട്ടി സ്പീക്കർമാർ ആയിരുന്നു.

ഷാനിമോൾ ഉസ്മാന് 99 വോട്ടുകൾ ലഭിച്ചപ്പോൾ എതിർസ്ഥാനാർഥി സിപിഐ യിലെ മുഹമ്മദ് മുഹസിന് 34 വോട്ടുകളാണ് ലഭിച്ചത്. സ്പീക്കർ തിരുവഞ്ചൂർ രാധാകൃഷ്ണൻ വോട്ട് രേഖപ്പെടുത്തിയില്ല. 35 എൽഡിഎഫ് അംഗങ്ങളിൽ സിപിഎം എം എൽ എ സി.കെ ഹരീന്ദ്രനും യുഡിഎഫ് എംഎൽഎമാരായ ആബിദ് ഹുസൈൻ തങ്ങൾ, സന്ദീപ് വാര്യർ എന്നിവരും സഭയിൽ ഹാജരായില്ല. എൻഡിഎയുടെ മൂന്ന് എംഎൽഎമാർ വോട്ടെടുപ്പിൽ നിന്ന് വിട്ടുനിന്നു.

The post 35 വർഷത്തിന് ശേഷം വീണ്ടും വനിത; ഷാനിമോൾ ഉസ്മാൻ കേരള നിയമസഭാ ഡെപ്യൂട്ടി സ്പീക്കർ appeared first on Starvision News Malayalam.