മനാമ: ബഹ്‌റൈന്റെ ജൂൺ മാസത്തെ ദേശീയ ഉൽപന്ന കയറ്റുമതിയിൽ അലുമിനിയം, ഇരുമ്പ്, സ്റ്റീൽ മേഖലകൾക്ക് ആധിപത്യം. ആകെ 259 ദശലക്ഷം ദിനാറിന്റെ കയറ്റുമതിയിൽ 77 ശതമാനവും ഈ മേഖലകളിൽ നിന്നാണെന്ന് ഇൻഫർമേഷൻ ആൻഡ് ഇ-ഗവൺമെന്റ് അതോറിറ്റിയുടെ കണക്കുകൾ വ്യക്തമാക്കുന്നു. ഇവയുടെ സംയുക്ത കയറ്റുമതി മൂല്യം 199.5 ദശലക്ഷം ദിനാറാണ്.

അലുമിനിയവും അനുബന്ധ ഉൽപന്നങ്ങളും 116.2 ദശലക്ഷം ദിനാറിന്റെ കയറ്റുമതി നേടി. ഇരുമ്പും സ്റ്റീലും 50.2 ദശലക്ഷം ദിനാറും ഇവ ഉപയോഗിച്ച് നിർമിച്ച ഉൽപന്നങ്ങൾ 33.1 ദശലക്ഷം ദിനാറും സംഭാവന ചെയ്തു.

അലോയ് അലുമിനിയം വയറുകളുടെ കയറ്റുമതിയിലാണ് ശ്രദ്ധേയമായ വർധന രേഖപ്പെടുത്തിയത്. മാർച്ചിൽ 1.3 ദശലക്ഷം ദിനാറായിരുന്ന കയറ്റുമതി ഏപ്രിലിൽ 6.3 ദശലക്ഷമായും മേയിൽ 12.1 ദശലക്ഷമായും ഉയർന്നു. ജൂണിൽ ഇത് 19.1 ദശലക്ഷം ദിനാറിലെത്തി. വർഷത്തിലെ ആദ്യ രണ്ടു മാസങ്ങളിലെ ശരാശരിയെക്കാൾ 219.7 ശതമാനം കൂടുതലാണിത്.

അമേരിക്കയും സൗദി അറേബ്യയുമാണ് അലുമിനിയം വയറുകളുടെ പ്രധാന വിപണികൾ. അമേരിക്കയിലേക്ക് 10.1 ദശലക്ഷം ദിനാറിന്റെയും സൗദിയിലേക്ക് 4.7 ദശലക്ഷം ദിനാറിന്റെയും കയറ്റുമതി നടന്നു. ചെമ്പ് പൈപ്പുകളുടെ കയറ്റുമതിയും ജൂണിൽ 4.7 ദശലക്ഷം ദിനാറിലെത്തി. ആകെ 859 ടൺ ചെമ്പ് പൈപ്പുകളാണ് കയറ്റി അയച്ചത്. യു.എ.ഇയും സൗദിയുമാണ് പ്രധാന ഉപഭോക്താക്കൾ.

അതേസമയം, ജൂണിലെ ആകെ ഇറക്കുമതി 372.5 ദശലക്ഷം ദിനാറായിരുന്നു. പ്രധാന ഇറക്കുമതി ഇനമായ തങ്കക്കട്ടികളുടെ മൂല്യം 32.6 ദശലക്ഷം ദിനാറാണ്. ആകെ 677.8 കിലോഗ്രാം തങ്കക്കട്ടികൾ രാജ്യത്തെത്തി. ഓസ്ട്രേലിയ, വിയറ്റ്നാം, ചൈന എന്നിവിടങ്ങളിൽ നിന്നായി 31 ദശലക്ഷം ദിനാറിന്റെ അലുമിനയും ഇറക്കുമതി ചെയ്തു.

യു.കെയിൽ നിന്നുള്ള ജെറ്റ് എൻജിനുകൾ, യു.എ.ഇയിൽ നിന്നുള്ള ഗോതമ്പ് മാവ്, വിവിധ മരുന്നുകൾ എന്നിവയും പ്രധാന ഇറക്കുമതി ഇനങ്ങളിൽ ഉൾപ്പെട്ടു.

പുനർകയറ്റുമതി മേഖലയിൽ ജൂണിൽ 53.8 ദശലക്ഷം ദിനാറിന്റെ വ്യാപാരം രേഖപ്പെടുത്തി. 7.6 ദശലക്ഷം ദിനാറിന്റെ സ്വർണക്കട്ടികളും അഞ്ച് ദശലക്ഷം ദിനാറിന്റെ വിമാന എൻജിനുകളും വിമാനഭാഗങ്ങളും പ്രധാന പുനർകയറ്റുമതി ഇനങ്ങളായിരുന്നു.

The post ബഹ്‌റൈൻ കയറ്റുമതിയിൽ ലോഹമേഖലയുടെ കരുത്ത്; ജൂണിൽ 259 ദശലക്ഷം ദിനാറിന്റെ ദേശീയ ഉൽപന്നങ്ങൾ വിദേശത്തേക്ക് appeared first on Starvision News Malayalam.

ന്യൂഡൽഹി: റഷ്യൻ ക്രൂഡ് ഓയിൽ വാങ്ങിയ തീരുമാനത്തെ ശക്തമായി ന്യായീകരിച്ച് വിദേശകാര്യമന്ത്രി എസ് ജയ് ശങ്കർ. റഷ്യൻ എണ്ണ വാങ്ങുന്നതിനെ ചോദ്യം ചെയ്യുന്ന യൂറോപ്യൻ രാജ്യങ്ങളുടെ ആയുധങ്ങൾ വർഷങ്ങളായി ഇന്ത്യയ്ക്കെതിരായ ആക്രമണങ്ങൾക്ക് ഉപയോഗിക്കപ്പെടുന്നുണ്ടെന്ന് കേന്ദ്രമന്ത്രി പറഞ്ഞു. എന്നാൽ ഇന്ത്യ ഇതുവരെ യൂറോപ്പിന്റെ സുരക്ഷയെ ബാധിക്കുന്ന ഒന്നും ചെയ്തിട്ടില്ലെന്നും കേന്ദ്രമന്ത്രി ജയ്ശങ്കർ വ്യക്തമാക്കി.

എമർജിംഗ് പവേഴ്‌സ് ആന്റ് പുതിയ ജിയോപൊളിറ്റിക്കൽ കോമ്പറ്റീഷൻ’ എന്ന സെഷനിൽ ഫിൻലൻഡിൽ നടന്ന കുൽതരാന്ത ടോക്‌സിൽ സംസാരിക്കുകയായിരുന്നു അദ്ദേഹം. “റഷ്യയോട് ഇന്ത്യ വളരെയധികം താൽപ്പര്യം കാണിക്കുന്നു” എന്നും ഒരു മാധ്യമപ്രവർത്തകൻ അഭിപ്രായപ്പെട്ടതിനോട് പ്രതികരിക്കുകയായിരുന്നു കേന്ദ്രമന്ത്രി ജയ്ശങ്കർ.

താങ്ങാനാവുന്ന വിലയും വിതരണ യാഥാർത്ഥ്യങ്ങളും അനുസരിച്ചാണെന്ന് ഇന്ത്യയുടെ ഊർജ്ജ തീരുമാനങ്ങൾ എന്നും കേന്ദ്രമന്ത്രി പറഞ്ഞു. ഇന്ത്യ എണ്ണ വാങ്ങുന്നത് വിലയും ലഭ്യതയും അടിസ്ഥാനമാക്കിയാണ്. ആ സമയത്ത്, വിപണിയിൽ ലഭ്യമായ എണ്ണയുടെ ഭൂരിഭാഗവും റഷ്യൻ ആയിരുന്നു. മന്ത്രി ജയ്ശങ്കർ വിശദീകരിച്ചു. യൂറോപ്പിന്റെ വിമർശനങ്ങൾക്കും കേന്ദ്രമന്ത്രി ശക്തമായ മറുപടി നൽകി.

യൂറോപ്പ് കയറ്റുമതി ചെയ്യുന്ന ആയുധങ്ങൾ വർഷങ്ങളായി ഇന്ത്യയുടെ സുരക്ഷയ്ക്ക് ഭീഷണിയാകുന്ന രീതിയിൽ ഉപയോഗിക്കപ്പെടുന്നുണ്ട്. എന്നാൽ ഇന്ത്യ ഇതുവരെ യൂറോപ്പിന്റെ സുരക്ഷയെ ബാധിക്കുന്ന ഒന്നും ചെയ്തിട്ടില്ല. യൂറോപ്യൻ ആയുധ കയറ്റുമതി പതിറ്റാണ്ടുകളായി ഇന്ത്യയുടെ സുരക്ഷാ താൽപ്പര്യങ്ങളെ ബാധിച്ചിട്ടുണ്ടെന്നും ജയ്ശങ്കർ കൂട്ടിച്ചേർത്തു.

2022-ൽ റഷ്യക്കെതിരെ ഉപരോധം ഏർപ്പെടുത്തിയ സമയത്ത്, ആഗോള എണ്ണ വിപണിയിൽ വില നിയന്ത്രിക്കാനായി റഷ്യൻ എണ്ണ വാങ്ങാൻ അമേരിക്ക തന്നെ ഇന്ത്യയോട് ആവശ്യപ്പെട്ടിരുന്നുവെന്നും കേന്ദ്രമന്ത്രി വ്യക്തമാക്കി. ആഗോള ഊർജ വിപണിയിൽ വലിയ രീതിയിലുള്ള തടസ്സങ്ങൾ ഉണ്ടാകാതിരിക്കാൻ ഇന്ത്യ റഷ്യൻ എണ്ണ വാങ്ങുന്നത് തുടരണമെന്ന് വാഷിംഗ്ടൺ നേരിട്ട് ആവശ്യപ്പെടുകയായിരുന്നുവെന്ന് കേന്ദ്രമന്ത്രി ജയ്ശങ്കർ പറഞ്ഞു.

The post ‘യൂറോപ്പിന്റെ ആയുധങ്ങൾ ഇന്ത്യക്കെതിരെ ഉപയോഗിക്കുന്നു’; റഷ്യയിൽ നിന്നും എണ്ണ വാങ്ങിയതിനെ ന്യായീകരിച്ച് ജയ്ശങ്കർ appeared first on Starvision News Malayalam.