മനാമ: ബഹ്റൈനും മറ്റു ഗള്ഫ് സഹകരണ കൗണ്സില് (ജി.സി.സി) അംഗരാഷ്ട്രങ്ങള്ക്കും നേരെ നടന്ന ഇറാന്റെ ആക്രമണങ്ങളെ ബഹ്റൈന് ശൂറ കൗണ്സിലിലെ നിരവധി അംഗങ്ങള് അപലപിച്ചു. അന്താരാഷ്ട്ര നിയമങ്ങളുടെയും നല്ല അയല്പക്ക തത്വങ്ങളുടെയും ലംഘനമാണെന്നും പ്രാദേശിക സുരക്ഷയ്ക്കും സ്ഥിരതയ്ക്കും ഭീഷണിയാണെന്നും അവര് പറഞ്ഞു.
രാജ്യങ്ങളെയും സുപ്രധാന സൗകര്യങ്ങളെയും ലക്ഷ്യമിടുന്നത് അംഗീകരിക്കാനാവില്ലെന്ന് ബഹ്റൈന് വാര്ത്താ ഏജന്സിക്ക് (ബി.എന്.എ) നല്കിയ പ്രസ്താവനയില് അംഗങ്ങള് പറഞ്ഞു. ബഹ്റൈന് പ്രതിരോധ സേനയെയും ആഭ്യന്തര മന്ത്രാലയത്തെയും അവര് അഭിനന്ദിച്ചു.
രാജ്യത്തിന്റെ സുരക്ഷയും സ്ഥിരതയും സംരക്ഷിക്കാനുള്ള ഒരു മാര്ഗമായി ദേശീയ ഐക്യം ശക്തിപ്പെടുത്തേണ്ടത് പ്രാദേശിക സാഹചര്യത്തിന്റെ ആവശ്യമാണെന്ന് ശൂറ കൗണ്സിലിലെ വിദേശകാര്യ, പ്രതിരോധ, ദേശീയ സുരക്ഷാ സമിതി ഡെപ്യൂട്ടി ചെയര്മാന് ഷെയ്ഖ് അഹമ്മദ് ബിന് മുഹമ്മദ് ബിന് അലി അല് ഖലീഫ പറഞ്ഞു.
അന്താരാഷ്ട്ര നിയമങ്ങളെയും നല്ല അയല്പക്ക തത്വങ്ങളെയും ലംഘിക്കുന്ന ഗുരുതരമായ ഒരു ആക്രമണമാണിതെന്ന് ശൂറ കൗണ്സിലിലെ യുവജനകാര്യ സമിതി ചെയര്മാന് റെദ ഇബ്രാഹിം മോണ്ഫറേദി പറഞ്ഞു.
ഔദ്യോഗിക അധികാരികള് നല്കുന്ന മാര്ഗനിര്ദേശങ്ങള് പാലിക്കാനും സ്ഥിരീകരിച്ച ഉറവിടങ്ങളില്നിന്ന് വിവരങ്ങള് നേടാനും ശൂറ കൗണ്സിലിലെ യുവജനകാര്യ സമിതി ഡെപ്യൂട്ടി ചെയര്മാന് ഹിഷാം ഹാഷിം അല് ഖസ്സബ് പൊതുജനങ്ങളോട് ആഹ്വാനം ചെയ്തു.
ഇത്തരം ആക്രമണങ്ങള് പ്രാദേശിക സുരക്ഷയ്ക്കും സ്ഥിരതയ്ക്കും ഭീഷണിയാണെന്ന് ശൂറ കൗണ്സിലിലെ വിദേശകാര്യ, പ്രതിരോധ, ദേശീയ സുരക്ഷാ സമിതി അംഗം അബ്ദുല്ല അലി അല് നുഐമി പറഞ്ഞു.
നിലവിലെ സംഭവവികാസങ്ങള് ദേശീയ ഐക്യത്തിന്റെയും പൊതു ഐക്യദാര്ഢ്യത്തിന്റെയും പ്രാധാന്യത്തെ എടുത്തുകാണിക്കുന്നുവെന്ന് ശൂറ കൗണ്സില് അംഗം സാദിഖ് ഈദ് അല് റഹ്മ പറഞ്ഞു.
സുരക്ഷയും സ്ഥിരതയും നിലനിര്ത്തുന്നതിന് ദേശീയ ഐക്യവും സ്ഥാപനങ്ങളും സമൂഹവും തമ്മിലുള്ള സഹകരണവും ആവശ്യമാണെന്ന് ശൂറ കൗണ്സില് അംഗം ഡോ. ഹാനി അലി അല് സാത്തി പറഞ്ഞു.
രാജ്യത്തിന്റെ സുരക്ഷ സംരക്ഷിക്കുന്നതിനായി ഔദ്യോഗിക മാര്ഗനിര്ദ്ദേശങ്ങള് പാലിക്കേണ്ടതിന്റെയും ദേശീയ ശ്രമങ്ങളെ പിന്തുണയ്ക്കേണ്ടതിന്റെയും പ്രാധാന്യം ശൂറ കൗണ്സില് അംഗം അബ്ദുല് അസീസ് അബ്ദുല്ല അല് അജ്മാന് എടുത്തുപറഞ്ഞു.
