കോഴിക്കോട്: ലഹരിമരുന്ന് കടത്തിയ കേസില്‍ പ്രതിയായ യുവാവിന്റെ വീടും സ്ഥലവും വാഹനവും പോലീസ് കണ്ടുകെട്ടി്. ഇയാളുടെയും മാതാവിന്റെയും പേരിലുള്ള ബാങ്ക് അക്കൗണ്ടുകള്‍ മരവിപ്പിക്കുകയും ചെയ്തു.
മലപ്പുറം പേങ്ങാട് വെമ്പോയില്‍ കണ്ണനാരിപ്പറമ്പില്‍ സിറാജിന്റെ (30) വീടും സ്ഥലവുമാണ് കോഴിക്കോട് ടൗണ്‍ പോലീസ് കണ്ടുകെട്ടിയത്. മലപ്പുറം ജില്ലയിലെ ചെറുകാവില്‍ പ്രതിയും കുടുംബവും താമസിക്കുന്ന വീട്, 4.5 സെന്റ് സ്ഥലം, സ്‌കൂട്ടര്‍ എന്നിവ കണ്ടുകെട്ടുകയും ആക്‌സിസ് ബാങ്കിന്റെ മലാപ്പറമ്പ് ശാഖയില്‍ പ്രതിയുടെ പേരിലുള്ള അക്കൗണ്ടിലെ 15,085 രൂപയും പ്രതിയുടെ മാതാവിന്റെ അക്കൗണ്ടിലെ 33,935 രൂപയും ഉള്‍പ്പെടുന്ന അക്കൗണ്ടുകള്‍ മരവിപ്പിക്കുകയും ചെയ്തു. ചെന്നൈ ആസ്ഥാനമായ സ്മഗ്ലേഴ്‌സ് ആന്റ് ഫോറിന്‍ എക്‌സ്‌ചേഞ്ച് മാനിപ്പുലേറ്റേഴ്‌സ് അതോറിറ്റിയുടെ ഉത്തരവ് പ്രകാരമാണ് സ്വത്ത് കണ്ടുകെട്ടിയത്.
കോഴിക്കോട് റെയില്‍വേ സ്റ്റേഷന്‍ പരിസരത്ത് ആനിഹാള്‍ റോഡില്‍ ടൗണ്‍ പോലീസും സിറ്റി ഡാന്‍സാഫും ചേര്‍ന്ന് നടത്തിയ പരിശോധനയില്‍ 778 ഗ്രാം എം.ഡി.എം.എയുമായി സിറാജ് പിടിയിലാകുകയായിരുന്നു. മുംബൈയില്‍നിന്നും ഡല്‍ഹിയില്‍നിന്നും വസ്ത്രങ്ങള്‍ കൊണ്ടുവന്ന് വിവിധ കടകളില്‍ വില്‍ക്കുന്നതിന്റെ മറവിലാണ് സിറാജ് എം.ഡി.എം.എ. കേരളത്തിലേക്ക് കടത്തിയത്. 2020ല്‍ ഹിമാചല്‍ പ്രദേശിലെ ബോന്തര്‍ പോലീസ് സ്റ്റേഷനില്‍ എല്‍.എസ്.ഡി, എം.ഡി.എം.എ, ലഹരി ഗുളികള്‍ എന്നിവയുമായി അറസ്റ്റിലായ പ്രതി 10 മാസത്തോളം ജുഡീഷ്യല്‍ കസ്റ്റഡിയിലായിരുന്നു. ഈ കേസില്‍ ജാമ്യത്തിലിറങ്ങി വീണ്ടും ലഹരിമരുന്ന് വ്യാപാരം തുടങ്ങിയപ്പോഴാണ് കോഴിക്കോട്ട് എം.ഡി.എം.എയുമായി പിടിയിലായത്.
ഡല്‍ഹിയും ഗോവയും കേന്ദ്രീകരിച്ച് പ്രവര്‍ത്തിക്കുന്ന ലഹരി മാഫിയാസംഘത്തിലെ മുഖ്യകണ്ണിയാണ് പ്രതിയെന്നും അന്വേഷണത്തില്‍ പോലീസ് കണ്ടെത്തി. ആഡംബര ജീവിതം നയിച്ചിരുന്ന പ്രതി ഇപ്പോള്‍ കോഴിക്കോട് ജില്ലാ ജയിലിലാണ്.
