മനാമ: റോയല് മെഡിക്കല് സര്വീസസ് (ആര്.എം.എസ്) ഫെബ്രുവരി 10മുതല് 12 വരെ ക്രൗണ് പ്രിന്സ് സെന്റര് ഫോര് ട്രെയിനിംഗ് ആന്റ് മെഡിക്കല് റിസര്ച്ചില് ‘ചികിത്സയ്ക്കപ്പുറം പരിചരണം: ഒരുമിച്ച് കുട്ടികളുടെ മികച്ച ആരോഗ്യത്തിലേക്ക്’ എന്ന വിഷയത്തില് രണ്ടാം അന്താരാഷ്ട്ര പീഡിയാട്രിക്സ് സമ്മേളനം സംഘടിപ്പിച്ചു.
സുപ്രീം കൗണ്സില് ഓഫ് ഹെല്ത്ത് (എസ്.സി.എച്ച്) പ്രസിഡന്റ് ലെഫ്റ്റനന്റ് ജനറല് ഡോ. ഷെയ്ഖ് മുഹമ്മദ് ബിന് അബ്ദുല്ല അല് ഖലീഫ സമ്മേളനം ഉദ്ഘാടനം ചെയ്തു. ആരോഗ്യ മന്ത്രി ഡോ. ജലീല ബിന്ത് അല് സയ്യിദ് ജവാദ് ഹസ്സന്, ആര്.എം.എസുമായി അഫിലിയേറ്റ് ചെയ്ത ആശുപത്രികളുടെയും മെഡിക്കല് സെന്ററുകളുടെയും മേധാവികള്, ബഹ്റൈനകത്തും പുറത്തുമുള്ള വിദഗ്ദ്ധര്, കണ്സള്ട്ടന്റുകള്, പീഡിയാട്രിക്സിലെ വിദഗ്ദ്ധര് എന്നിവര് പങ്കെടുത്തു.
വളര്ച്ച, വികസനം, പ്രതിരോധം, കുടുംബങ്ങളുമായുള്ള പങ്കാളിത്തം എന്നിവയില് അധിഷ്ഠിതമായ ഒരു സവിശേഷ സ്വഭാവമാണ് പീഡിയാട്രിക്സിനുള്ളതെന്ന് കിംഗ് ഹമദ് യൂണിവേഴ്സിറ്റി ഹോസ്പിറ്റല് കമാന്ഡറും കോണ്ഫറന്സ് ചെയര്മാനുമായ കേണല് ഡോ. ഷെയ്ഖ് സല്മാന് ബിന് മുഹമ്മദ് ബിന് അബ്ദുല്ല അല് ഖലീഫ ഉദ്ഘാടന ചടങ്ങില് പറഞ്ഞു. കുട്ടികളെ പരിപാലിക്കുന്നത് അടിയന്തര സാഹചര്യങ്ങളെ ചികിത്സിക്കുന്നതിനപ്പുറം സമഗ്രമായ ഒരു ജീവിത പാത രൂപപ്പെടുത്തുന്നതുവരെ വ്യാപിക്കുന്നുവെന്നും അദ്ദേഹം പറഞ്ഞു.
കുട്ടികളെ വികസനത്തിന്റെ കേന്ദ്രബിന്ദുവില് നിര്ത്തുന്ന സമഗ്രമായ മാനുഷിക ദര്ശനമാണ് സമ്മേളനത്തിന്റെ പ്രമേയം പ്രതിഫലിപ്പിക്കുന്നതെന്ന് മിലിട്ടറി ഹോസ്പിറ്റലിലെ പീഡിയാട്രിക് എന്ഡോക്രൈനോളജി ആന്റ് ഡയബറ്റിസ് കണ്സള്ട്ടന്റും സംഘാടക സമിതി അദ്ധ്യക്ഷയുമായ ഡോ. ഹയ മുഹമ്മദ് അല് ഖയാത്ത് പറഞ്ഞു.
