മനാമ: ബഹ്‌റൈൻ അന്താരാഷ്ട്ര വിമാനത്താവളത്തിലെ പുതിയ പാസഞ്ചർ ടെർമിനൽ ജനുവരി 28 മുതൽ പ്രവർത്തനം ആരംഭിക്കും. ബഹ്‌റൈൻ കിരീടാവകാശിയും പ്രധാനമന്ത്രിയുമായ പ്രിൻസ് സൽമാൻ ബിൻ ഹമദ് അൽ ഖലീഫ ഇന്ന് ബഹ്‌റൈൻ അന്താരാഷ്ട്ര വിമാനത്താവളം സന്ദർശിക്കുകയും വികസന പ്രവർത്തനങ്ങൾ വിലയിരുത്തുകയും ചെയ്തു. സന്ദർശന വേളയിൽ, രാജ്യത്തിന്റെ ദേശീയ സമ്പദ്‌വ്യവസ്ഥ വികസിപ്പിക്കുന്നതിനായി തന്ത്രപരമായ പ്രോജക്ടുകൾ നടപ്പിലാക്കുന്നതിന്റെ ഭാഗമായി പുതിയ പാസഞ്ചർ ടെർമിനൽ കെട്ടിടത്തിന്റെ പ്രവർത്തനങ്ങൾ ജനുവരി 28 ന് ആരംഭിക്കാൻ നിർദ്ദേശിച്ചു.
എയർപോർട്ട് വിപുലീകരണ പദ്ധതി രാജ്യത്തിന്റെ കണക്റ്റിവിറ്റി വർദ്ധിപ്പിക്കുമെന്നും കൂടുതൽ പ്രാധാന്യമുള്ള കേന്ദ്രമായി അതിന്റെ സ്ഥാനം കൂടുതൽ ശക്തിപ്പെടുത്തുമെന്നും അദ്ദേഹം അഭിപ്രായപ്പെട്ടു. കൂടാതെ ബഹ്‌റൈനിന്റെ വൈവിധ്യവൽക്കരണ സമ്പദ്‌വ്യവസ്ഥയുടെ പ്രധാന മുൻ‌ഗണനാ മേഖലയായ ലോജിസ്റ്റിക് മേഖലയിലെ പൗരന്മാർക്ക് ഗുണനിലവാരമുള്ള അവസരങ്ങൾ നൽകുന്നു. ഉപപ്രധാനമന്ത്രിയും വികസന പദ്ധതികൾക്കായുള്ള മിനിസ്റ്റീരിയൽ കമ്മിറ്റി ചെയർമാനുമായ ഷെയ്ഖ് ഖാലിദ് ബിൻ അബ്ദുള്ള അൽ ഖലീഫ, ധനകാര്യ ദേശീയ സാമ്പത്തിക മന്ത്രി ഷെയ്ഖ് സൽമാൻ ബിൻ ഖലീഫ അൽ ഖലീഫ തുടങ്ങിയവർ അദ്ദേഹത്തോടൊപ്പം വിമാനത്താവളം സന്ദർശിച്ചു.
പര്യടനത്തിനിടെ, പര്യടനത്തിനിടെ, വിമാനത്താവള വിപുലീകരണ പദ്ധതിയുടെ ഏറ്റവും പുതിയ സംഭവവികാസങ്ങളെക്കുറിച്ചും പുതിയ പാസഞ്ചർ ടെർമിനൽ കെട്ടിടത്തിന്റെ പൂർത്തീകരണത്തെക്കുറിച്ചും ഗതാഗത, ടെലികമ്മ്യൂണിക്കേഷൻ വകുപ്പ് മന്ത്രി കമൽ ബിൻ അഹ്മദ് വിശദീകരിച്ചു. ഏറ്റവും പുതിയ നൂതന സാങ്കേതികവിദ്യകൾ ഉപയോഗിച്ച് അന്തർ‌ദ്ദേശീയ മാനദണ്ഡങ്ങൾക്കും പരിസ്ഥിതിക്കും അനുസൃതമായിട്ടാണ് രൂപകൽപ്പന ചെയ്‌തിരിക്കുന്നത്.
കഴിഞ്ഞ ഇരുപത് വർഷത്തിനിടയിൽ വിമാന ഗതാഗതവുമായി ബന്ധപ്പെട്ട രാജ്യത്തിന്റെ ഏറ്റവും വലിയ വികസന പദ്ധതികളിലൊന്നാണ് എയർപോർട്ട് വിപുലീകരണ പദ്ധതി. നിലവിലെ കെട്ടിടത്തിന്റെ നാലിരട്ടി വലുപ്പമുള്ള പുതിയ പാസഞ്ചർ ടെർമിനൽ കെട്ടിടം ഈ പദ്ധതിയിൽ ഉൾപ്പെടുന്നു. പ്രതിവർഷം 14 ദശലക്ഷം സന്ദർശകരെ ഉൾക്കൊള്ളാൻ ടെർമിനലിന് സാധിക്കും.
ഈ ടെർമിനൽ കെട്ടിടത്തിൽ യൂട്ടിലിറ്റി കോംപ്ലക്സ്, 5,500 പാർക്കിംഗ് സ്ഥലങ്ങൾ, ഡ്യൂട്ടി ഫ്രീ ഷോപ്പിംഗ് ഏരിയ, ഫസ്റ്റ് ക്ലാസ്, ബിസിനസ് ക്ലാസ് യാത്രക്കാർക്ക് രണ്ട് റിസപ്ഷനുകൾ, ഹോസ്പിറ്റാലിറ്റി ലോഞ്ചുകൾ, സ്വകാര്യ ജെറ്റ് ഉടമകൾക്കും യാത്രക്കാർക്കും സേവനങ്ങൾ നൽകുന്ന ഒരു സ്വകാര്യ ഏവിയേഷൻ കെട്ടിടം, കേന്ദ്രീകൃത സുരക്ഷാ ഗേറ്റ്, രക്ഷാപ്രവർത്തനത്തിനും അഗ്നിശമന സേനയ്ക്കും വേണ്ടിയുള്ള കെട്ടിടം, വിമാന ഇന്ധന ഫീൽഡ് എന്നിവ ഉൾപ്പെടുന്നു.
രാജ്യത്തിന്റെ ലോജിസ്റ്റിക് മേഖലയോടുള്ള പ്രധാനമന്ത്രിയുടെ പ്രതിബദ്ധതയ്ക്ക് മന്ത്രി കമൽ ബിൻ അഹമ്മദ് നന്ദി അറിയിച്ചു. ഈ മേഖലയിലെ വികസനങ്ങൾ ബഹ്‌റൈനിന്റെ ഇക്കണോമിക് വിഷൻ- 2030 കൈവരിക്കുന്നതിനും സുസ്ഥിരവും വൈവിധ്യപൂർണ്ണവുമായ വികസനത്തിന് സഹായകമാകുമെന്നും അദ്ദേഹം പറഞ്ഞു. രാജ്യത്തിന്റെ വ്യാപാരം, ടൂറിസം, യാത്രാ മേഖലകൾക്കുള്ള പ്രധാന പ്രേരകശക്തിയായി ഈ പദ്ധതി പ്രവർത്തിക്കുമെന്നും മന്ത്രി കമൽ അഹമ്മദ് കൂട്ടിച്ചേർത്തു.
