മലപ്പുറം: വേങ്ങരയില്‍ ഒന്നരം വര്‍ഷം മുമ്പ് വിവാഹിതയായ യുവതിയെ ഭര്‍ത്താവ് മൊബൈല്‍ ഫോണിലൂടെ മുത്തലാഖ് ചൊല്ലിയതായി പരാതി.
ഭര്‍ത്താവും കൊണ്ടോട്ടി തറയട്ടാല്‍ ചാലില്‍ സ്വദേശിയുമായ വീരാന്‍കുട്ടി യുവതിയുടെ പിതാവിനോട് സംസാരിക്കുന്ന ഓഡിയോ പുറത്തുവന്നിട്ടുണ്ട്. ‘അന്റെ മോളെ ഞാന്‍ ഒന്നും രണ്ടും മൂന്നും തലാഖ് ചൊല്ലി, തീര്‍ത്തോ, തീര്‍ത്ത് പോ, ഒപ്പിടാനുള്ളിടത്തൊക്കെ ഒപ്പിടാം’ എന്നാണ് ഓഡിയോയില്‍ പറയുന്നത്.
2023 ജൂലൈ 9നായിരുന്നു ഇവരുടെ വിവാഹം. യുവതി 40 ദിവസമാണ് ഭര്‍ത്താവിന്റെ തറയട്ടാലിലെ വീട്ടില്‍ താമസിച്ചത്. ഗര്‍ഭിണിയായതിനെ തുടര്‍ന്നുണ്ടായ ശാരീരിക അവശതകള്‍ കാരണം വേങ്ങരയിലെ വീട്ടിലേക്കു പോന്ന യുവതിയെ ഫോണില്‍ പോലും ഭര്‍ത്താവ് ബന്ധപ്പെട്ടിരുന്നില്ല. തുടര്‍ന്ന് യുവതി പെണ്‍കുഞ്ഞിന് ജന്മം നല്‍കി. 11 മാസമായി യുവതിയെ തിരിഞ്ഞുനോക്കാതിരുന്ന ഭര്‍ത്താവാണ് യുവതിയുടെ പിതാവുമായി ഫോണില്‍ തര്‍ക്കിച്ച ശേഷം മുത്തലാഖ് ചൊല്ലിയത്. യുവതിക്ക് കുടുംബം നല്‍കിയ 30 പവന്‍ സ്വര്‍ണാഭരണങ്ങള്‍ ഇയാള്‍ മടക്കിനല്‍കിയിട്ടില്ല.
യുവതി വനിതാ കമ്മീഷനില്‍ പരാതി നല്‍കിയിട്ടുണ്ട്. ഭര്‍ത്താവിനെതിരെ ശക്തമായ നടപടി വേണമെന്നാണ് യുവതിയുടെ ആവശ്യം.
