ഇടുക്കി: അന്തരിച്ച തൃക്കാക്കര എംഎല്‍എ പിടി തോമസ് ദ്രോഹിയായിരുന്നെന്ന് മുന്‍ മന്ത്രി എംഎം മണി. സിപിഐഎമ്മിനെ ഏറ്റവും കൂടുതല്‍ ദ്രോഹിച്ച വ്യക്തിയാണ് പിടി തോമസ്. തനിക്കെതിരെ കള്ളക്കേസുണ്ടാക്കാന്‍ മുന്നില്‍ നിന്നയാളായിരുന്നു പിടി തോമസെന്നും എംഎം മണി ആരോപിച്ചു. ഇടുക്കി ജില്ലാ സമ്മേളനത്തിന്റെ സമാപന ചടങ്ങിലാണ് പരാമര്‍ശം.
പിടി തോമസ് മരിച്ചു. മരിക്കുമ്ബോള്‍ ആരും ഖേദം പ്രകടിപ്പിക്കും. അക്കാര്യത്തില്‍ തര്‍ക്കമില്ല. അതൊരു മര്യാദ മാത്രമാണ്. എറണാകുളത്ത് വെച്ച്‌ സൈമണ്‍ ബ്രിട്ടോ അടക്കമുള്ളവരെ ദ്രോഹിച്ചതിലെല്ലാം പിന്നില്‍ തോമസിന് പങ്കുണ്ട്. മരിച്ച്‌ കിടന്നാലും ഞങ്ങള്‍ക്ക് പറയാനുള്ളത് പറയും. ഉമ്മന്‍ചാണ്ടിയും തിരുവഞ്ചൂർ രാധാകൃഷ്ണനും പിടി തോമസുമെല്ലാം ചേര്‍ന്നാണ് തനിക്കെതിരെ കള്ളക്കേസുണ്ടാക്കിയത്. എന്നിട്ടിപ്പോള്‍ മരിച്ചപ്പോള്‍ പുണ്യാളനാണെന്ന് പറ‍ഞ്ഞാല്‍ ഞാന്‍ അംഗീകരിക്കില്ല. പൊതുപ്രവര്‍ത്തകനാവുമ്പോൾ മരിച്ചാലും ജീവിച്ചിരിച്ചപ്പോള്‍ ചെയ്ത ദ്രോഹം ചര്‍ച്ചയാവും, എംഎ മണി പറഞ്ഞു.മാധവ് ഗാഡ്ഗിലും കസ്തൂരി രംഗനും കൊണ്ട് വന്ന് ഇടുക്കിയെ ദ്രോഹിച്ചയാളാണ് പിടി തോമസെന്നും എംഎം മണി ആരോപിച്ചു.
