കൊണ്ടോട്ടി: കരിപ്പൂർ വിമാനത്താവള റൺവേ വികസനത്തിന് 14.5 ഏക്കർ ഭൂമി എയർപോർട്ട് അതോറിറ്റിക്ക് ഏറ്റെടുത്ത് നൽകാൻ നിശ്ചയിച്ച സമയപരിധി ഇന്ന് അവസാനിക്കും. എന്നാൽ സർക്കാറിന് ഇതുവരെ സ്ഥലമേറ്റെടുക്കൽ നടപടി പൂർത്തിയാക്കാൻ സാധിച്ചിട്ടില്ല. ഭൂമി ഏറ്റെടുക്കലിന് സംസ്ഥാന സർക്കാർ ചട്ടം 391 പ്രകാരം അന്തിമ വിജ്ഞാപനം പുറത്തിറക്കി രേഖകൾ പരിശോധന ആരംഭിച്ചെങ്കിലും 50 പേരുടെ ഭൂമിയുടെ രേഖകൾ ഇതുവരേ ലഭ്യമായിട്ടില്ല. ഈ മാസം 15നകം ഭൂമി ഏറ്റെടുത്ത് നൽകിയിട്ടില്ലെങ്കിൽ റൺവേ നീളം കുറച്ച് റെസ വർധിപ്പിക്കുമെന്നാണ് അഥോറിറ്റി സർക്കാറിനെ അറിയിച്ചിരുന്നത്.
കരിപ്പൂർ വിമാനത്താവളത്തിൽ പ്രവർത്തിക്കുന്ന ഭൂമി ഏറ്റെടുക്കൽ ഓഫീസിൽ കഴിഞ്ഞ മാസം മുതലാണ് ഭൂവുടമകളുടെ രേഖകളുടെ പരിശോധന ആരംഭിച്ചത്.
പള്ളിക്കലിൽ നിന്ന് 26 പേരും നെടിയിരുപ്പിൽ നിന്ന് 56 പേരുമടക്കം ആകെ 80 ഭൂവുടമകളാണുള്ളത്. രേഖകളിൽ സാങ്കേതിക, നിയമ തടസ്സങ്ങളില്ലെങ്കിൽ അടുത്തഘട്ടമായി ഭൂവുടമകൾക്ക് നഷ്ടപരിഹാരം നൽകാനാണ് തീരുമാനം. വീടുകളുള്ളവർക്ക് പുനരധിവാസപാക്കേജിൽ ഉൾപ്പെടുത്തിയ 10 ലക്ഷം രൂപ നേരത്തെ ലഭിക്കും. വീടൊഴിഞ്ഞതിന് ശേഷം മറ്റു നഷ്ടപരിഹാരവും നൽകും.
റൺവേ എൻഡ് സേഫിറ്റി ഏരിയ (റെസ) നിർമിക്കാനാണ് 14.5 ഏക്കർ ഏറ്റെടുക്കാൻ തീരുമാനിച്ചത്. എന്നാൽ ഇത് അളന്ന് തിട്ടപ്പെടുത്തിയപ്പോൾ 13 ഏക്കറാണുള്ളത്. ഇത് വിമാനത്താവള വികസനത്തെ ബാധിക്കില്ലെന്നാണ് അധികൃതർ പറയുന്നത്. അതെ സമയം റെസ നിർമാണത്തിനുള്ള ടെൻഡർ വിളിച്ചിട്ടുണ്ട്. അടുത്ത മാസം 19നാണ് ടെൻഡർ നൽകുക. ഈ സമയത്തിനകം ഭൂമി ഏറ്റെടുത്ത് നൽകാനാകുമെന്നാണ് സർക്കാർ വിലയിരുത്തൽ. എന്നാൽ ഭൂമി വിട്ടു നൽകുന്നരുടെയും നാട്ടുകാരുടെയും ആശങ്കകൾ പരിഹരിക്കാൻ സർക്കാർ തയാറായിട്ടില്ലെന്നാണ് പ്രദേശവാസികൾ ആക്ഷേപം.