ന്യൂഡല്‍ഹി: രാജ്യത്ത് കഴിഞ്ഞ 24 മണിക്കൂറിനിടെ കൊവിഡ് സ്ഥിരീകരിച്ചവരുടെ എണ്ണത്തില്‍ കുറവ് രേഖപ്പെടുത്തി. 38,772 പേര്‍ക്കാണ് രോഗം സ്ഥിരീകരിച്ചത്. 443 പേര്‍ മരണമടഞ്ഞു. രാജ്യത്തെ കൊവിഡ് ബാധിതരുടെ എണ്ണം 94 ലക്ഷം കടന്നു. രാജ്യത്ത് ആകെ രോഗം സ്ഥിരീകരിച്ചവരുടെ എണ്ണം 94,31,691 ആയി. 1,37,139 പേര്‍ മരണമടഞ്ഞു.
രാജ്യത്തിന്റെ വിവിധ ഭാഗങ്ങളില്‍ ചികിത്സയില്‍ കഴിയുന്നത് 4,46,952 പേരാണ്. രാജ്യത്തെ മൊത്തം കോവിഡ് ബാധിതരിൽ 4.74 ശതമാനം മാത്രമാണ് നിലവിൽ ചികിത്സയിൽ കഴിയുന്നത്.
മിഡിൽ ഈസ്റ്റ് ഹോസ്‌പിറ്റൽ ചികിത്സക്കായി www.membh.com ക്ലിക്ക് ചെയ്യുക
ഇന്ത്യയിൽ രോഗമുക്തി നിരക്കിൽ വലിയ വർദ്ധനവുണ്ടാകുന്നുണ്ട്. നിലവിൽ രോഗ മുക്തി നേടിയവരുടെ എണ്ണം 88,46,313 ആണ്. ആകെ രോഗമുക്തി നിരക്ക് 93.80 ശതമാനമാണെന്നും രാജ്യത്ത് കൊവിഡ് മരണനിരക്ക് മറ്റ് രാജ്യങ്ങളിലെ കണക്കുമായി താരതമ്യപ്പെടുത്തുമ്പോൾ കുറവാണെന്നും കേന്ദ്ര ആരോഗ്യമന്ത്രാലയം വ്യക്തമാക്കി.
ഡല്‍ഹി, മഹാരാഷ്ട്ര,പശ്ചിമ ബംഗാള്‍,ഹരിയാന,പഞ്ചാബ്, കേരളം, ഉത്തര്‍പ്രദേശ്, രാജസ്ഥാന്‍ എന്നീ സംസ്ഥാനങ്ങളിലുളളവരാണ് മരണമടഞ്ഞവരില്‍ 71 ശതമാനവും. പ്രതിദിന കണക്കില്‍ മഹാരാഷ്ട്രയാണ് മുന്നില്‍ നിൽക്കുന്നത്. ഞായറാഴ്ച രോഗം സ്ഥിരീകരിച്ച സംസ്ഥാനങ്ങളില്‍ ഏറ്റവും മുന്നില്‍ കേരളമാണ്. 5643 ആണ് സംസ്ഥാനത്തെ പ്രതിദിന വര്‍ദ്ധന. കേരളത്തില്‍ രോഗ പോസിറ്റീവ് നിരക്ക് 11 ശതമാനത്തിന് മുകളിലാണ്.
