മനാമ: ഭാരതത്തിന്റെ എഴുപത്തി രണ്ടാമത് റിപ്പബ്ലിക് ദിനത്തോടനുബന്ധിച്ച് ഇന്ത്യൻ എംബസിയെ പ്രതിനിധീകരിച്ച് വിവിധ ലേബർ ക്യാമ്പുകളിലേക്ക് ഡ്രൈ റേഷൻ കിറ്റുകൾ, പുനരുപയോഗിക്കാവുന്ന ഫെയ്സ് മാസ്കുകൾ, ആന്റി ബാക്ടീരിയൽ സോപ്പുകൾ, ടൂത്ത് പേസ്റ്റ്, ബോധവൽക്കരണ ഫ്ലയറുകൾ തുടങ്ങിയവയുടെ വിതരണത്തിന് ഇന്ത്യൻ കമ്മ്യൂണിറ്റി റിലീഫ് ഫണ്ട് ( ഐ.സി.ആർ.എഫ്.) ടീം തുടക്കം കുറിച്ചു .
200 ഓളം തൊഴിലാളികൾക്കുള്ള ആദ്യദിന വിതരണം തുബ്ലിയിലുള്ള ലേബർ ക്യാമ്പിലായിരുന്നു. ഐ.സി.ആർ.എഫ്. ചെയർമാൻ അരുൾ‌ദാസ് തോമസ്, ഐ.സി.ആർ.എഫ് ജനറൽ സെക്രട്ടറി ജോൺ ഫിലിപ്പ്, ഐ.സി.ആർ.എഫ് ഫേസ് മാസ്ക് വിതരണ കോർഡിനേറ്റർ സുരേഷ് ബാബു, ഐ.സി.ആർ.എഫ് വോളണ്ടിയർ മുരളികൃഷ്ണൻ എന്നിവർ വിതരണ വേളയിൽ പങ്കെടുത്തു. ഇതു പോലെ 28 വ്യാഴം, 29 വെള്ളി എന്നീ ദിവസങ്ങളിൽ മറ്റു ക്യാമ്പുകളിലും വിതരണം തുടരും എന്ന് ഐ. സി. ആർ. എഫ്. ടീം അറിയിച്ചു.
