മനാമ: ഗൾഫ് കപ്പ് ജേതാക്കളായി തിരിച്ചെത്തിയ ബഹ്റൈൻ ദേശീയ ടീമിന് രാജാവ് ഹമദ് ബിൻ ഈസ അൽ ഖലീഫ സ്വീകരണം നൽകി.
ബഹ്റൈൻ നാഷണൽ സ്‌റ്റേഡിയത്തിൽ നടന്ന സ്വീകരണച്ചടങ്ങിൽ ടീമിലെ കളിക്കാരെയും അഡ്മിനിസ്ട്രേറ്റീവ്, ടെക്നിക്കൽ സ്റ്റാഫിനെയും രാജാവ് അഭിനന്ദിച്ചു.
സ്വീകരണച്ചടങ്ങിൽ രാജാവിന്റെ ജീവകാരുണ്യ, യുവജന കാര്യ പ്രതിനിധി ഷെയ്ഖ് നാസർ ബിൻ ഹമദ് അൽ ഖലീഫ, സുപ്രീം കൗൺസിൽ ഫോർ യൂത്ത് ആന്റ് സ്പോർട്സ് (എസ്.സി.വൈ.എസ്) ഫസ്റ്റ് ഡെപ്യൂട്ടി ചെയർമാനും ജനറൽ സ്പോർട്സ് അതോറിറ്റി പ്രസിഡൻ്റും ബഹ്റൈൻ ഒളിമ്പിക് കമ്മിറ്റി പ്രസിഡൻ്റുമായ ഷെയ്ഖ് ഖാലിദ് ബിൻ ഹമദ് അൽ ഖലീഫ എന്നിവർ പങ്കെടുത്തു.
ടീം കളിക്കാരും അഡ്മിനിസ്ട്രേറ്റീവ്, ടെക്നിക്കൽ സ്റ്റാഫിലെ അംഗങ്ങളും രാജാവിനെ അഭിവാദ്യം ചെയ്തു. തുടർന്ന് ആഘോഷം ആരംഭിച്ചു. ടീം കളിക്കാർക്കൊപ്പം രാജാവ് സ്മരണിക ഫോട്ടോ എടുത്തു. കരിമരുന്ന് പ്രയോഗവും നടന്നു. ഈ ചരിത്ര നേട്ടത്തെത്തുടർന്ന് ദേശീയ ടീം ചാമ്പ്യന്മാരെയും അവരുടെ അഡ്മിനിസ്ട്രേറ്റീവ്, ടെക്നിക്കൽ സ്റ്റാഫിനെയും സ്വീകരിച്ചതിൽ രാജാവ് അളവറ്റ സന്തോഷം പ്രകടിപ്പിച്ചു.
ദേശീയ ടീമിൻ്റെ ഈ നേട്ടം ബഹ്റൈൻ ഫുട്‌ബോളിൻ്റെ വാഗ്ദാനമായ ഭാവിയിലേക്കുള്ള ഒരു സുപ്രധാന ചുവടുവെപ്പിനെ പ്രതിനിധീകരിക്കുന്നുവെന്ന് അദ്ദേഹം പറഞ്ഞു. കളിക്കാർ കാണിച്ച നിശ്ചയദാർഢ്യത്തെയും ടൂർണമെൻ്റിലുടനീളം അവർ പ്രകടിപ്പിച്ച മികച്ച പ്രകടനത്തെയും രാജാവ് പ്രശംസിച്ചു. അവർ പ്രകടമാക്കിയ സാങ്കേതിക വൈദഗ്ധ്യത്തെയും ഉയർന്ന മത്സര കഴിവുകളെയും രാജാവ് അഭിനന്ദിച്ചു.
ബഹ്‌റൈനോടുള്ള സ്‌നേഹത്തിൻ്റെയും സമർപ്പണത്തിൻ്റെയും ഏറ്റവും മികച്ച മാതൃകകൾ സൃഷ്ടിച്ചുകൊണ്ട് ടൂർണമെൻ്റിൻ്റെ തുടക്കം മുതൽ ടീമിനെ പിന്തുണച്ച രാജ്യത്തെ ജനങ്ങളെയും ആരാധകരെയും രാജാവ് അഭിനന്ദിച്ചു. ഗൾഫ് കായികമേളയുടെ വിജയത്തിൽ കുവൈത്ത് ഭരണകൂടവും അതിൻ്റെ നേതൃത്വവും സർക്കാരും ജനങ്ങളും വഹിച്ച പ്രധാന പങ്കിനെ അദ്ദേഹം പ്രകീർത്തിച്ചു.
