മനാമ: സ്റ്റാര്‍വിഷന്‍ ഇവന്റ്സും ഭാരതി അസോസിയേഷനും സഹകരിച്ച് ബഹ്‌റൈനിലെ സല്‍മാബാദില്‍ ഒക്ടോബര്‍ 17ന് ഗ്രാന്‍ഡ് ദീപാവലി ആഘോഷം സംഘടിപ്പിക്കും.
ഗോള്‍ഡന്‍ ഈഗിള്‍ ക്ലബ്ബില്‍ (പഴയ എയര്‍ ക്ലബ്ബ്) വൈകുന്നേരമായിരിക്കും പരിപാടിയെന്ന് സംഘാടകര്‍ ഉമ്മുല്‍ ഹസമിലെ ഭാരതി അസോസിയേഷന്‍ ആസ്ഥാനത്ത് നടത്തിയ പത്രസമ്മേളനത്തില്‍ അറിയിച്ചു.
സായാഹ്നത്തിന്റെ പ്രധാന ആകര്‍ഷണം പട്ടിമന്ത്രം ആയിരിക്കും. ബുദ്ധിശക്തി, നര്‍മ്മം, സാംസ്‌കാരിക സമ്പന്നത എന്നിവയുടെ മിശ്രിതത്തിന് പേരുകേട്ട പരമ്പരാഗത തമിഴ് സംവാദ രീതിയാണിത്. തമിഴ് പ്രവാസികള്‍ക്കിടയില്‍ നര്‍മ്മം, വിരോധാഭാസാഖ്യാനം, വ്യാഖ്യാനം എന്നിവയാല്‍ പരക്കെ പ്രശംസിക്കപ്പെടുന്ന പ്രശസ്ത തമിഴ് പ്രാസംഗികനും ഹാസ്യകാരനുമായ ദിണ്ടിഗല്‍ ലിയോണിയായിരിക്കും സെഷന്‍ മോഡറേറ്റര്‍.
‘തമിഴ് സിനിമ: പഴയ സിനിമകള്‍ പുതിയ സിനിമകളേക്കാള്‍ ശ്രേഷ്ഠമാണോ?’ എന്ന വിഷയം ചര്‍ച്ച ചെയ്യും. രണ്ട് ടീമുകള്‍ വാചാലമായ സാഹിത്യ തമിഴില്‍ വിരുദ്ധ വീക്ഷണങ്ങള്‍ അവതരിപ്പിക്കും.
മൂന്നു മണിക്കൂര്‍ നീണ്ടുനില്‍ക്കുന്ന പട്ടിമന്ത്രത്തില്‍ ആകര്‍ഷകമായ സംവാദം, മൂര്‍ച്ചയുള്ള നര്‍മ്മം, പ്രേക്ഷകര്‍ക്ക് ചിരിയുടെ ആഘോഷം സമ്മാനിക്കുന്ന ലഘുവായ വിനോദം എന്നിവയുണ്ടാകും. അസോസിയേഷന്‍ അംഗങ്ങളുടെ കുട്ടികള്‍ അവതരിപ്പിക്കുന്ന, നൃത്തകലാരത്‌ന ഹന്‍സുല്‍ ഗനി നൃത്തസംവിധാനം നിര്‍വഹിച്ച പരമ്പരാഗത നൃത്ത പ്രകടനത്തോടെയാണ് പരിപാടി ആരംഭിക്കുന്നത്. പ്രവേശനം സൗജന്യമാണ്. എല്ലാവര്‍ക്കും പങ്കെടുക്കാം. ആദ്യം വരുന്നവര്‍ക്ക് ആദ്യം എന്ന രീതിയില്‍ ഇരിപ്പിടങ്ങള്‍ലഭ്യമാകും.
ഭാരതി അസോസിയേഷന്‍ പ്രസിഡന്റ് വല്ലം ബഷീര്‍, ജനറല്‍ സെക്രട്ടറി അബ്ദുല്‍ ഖയ്യൂം, ഇവന്റ് കോ- ഓര്‍ഡിനേറ്റര്‍മാരായ മുത്തുവേല്‍ മുരുകന്‍, ബാബു സുന്ദരരാജ്, ട്രഷറര്‍ ഷെയ്ക്ക് മന്‍സൂര്‍, അസിസ്റ്റന്റ് ജനറല്‍ സെക്രട്ടറി സുബ്രഹ്‌മണ്യന്‍ സുഭാഷ്, സാഹിത്യ സെക്രട്ടറി ഇളയ്യ രാജ, മെമ്പര്‍ഷിപ്പ് സെക്രട്ടറി സബീഖ് മീരാന്‍, അസിസ്റ്റന്റ് ട്രഷറര്‍ യൂനസ് അബ്ദുസമദ്, സ്റ്റാര്‍ വിഷന്‍ ഇവന്റ്സ് ചെയര്‍മാന്‍ സേതുരാജ് കടയ്ക്കല്‍ എന്നിവര്‍ വാര്‍ത്താസമ്മേളനത്തില്‍ പങ്കെടുത്തു.
