ദോഹ: ഫാസ്റ്റ് ട്രാക്ക് റോഡുകളിലൂടെ വാഹനം സാവധാനം ഓടിച്ചാൽ പിഴ ഈടാക്കേണ്ടി വരുമെന്ന് വ്യക്‌തമാക്കി ഖത്തർ. കുറഞ്ഞത് 500 റിയാലാണ് പിഴയായി ഈടാക്കേണ്ടി വരിക. ഗതാഗത നിയമത്തിലെ 53ആം വകുപ്പ് പ്രകാരം നിയമ ലംഘനമായി കണക്കാക്കിയാണ് പിഴ ഈടാക്കുന്നതെന്ന് ഗതാഗത ജനറൽ ഡയറക്‌ടറേറ്റ് ബോധവൽക്കരണ വിഭാഗം അസി. ഡയറക്‌ടർ ലഫ്. കേണൽ ജാബിർ മുഹമ്മദ് ഉദൈബ വ്യക്‌തമാക്കി.
ഫാസ്റ്റ് ട്രാക്ക് റോഡുകളിലൂടെ അനുവദനീയ പരിധിയിൽ കുറഞ്ഞ വേഗത്തിൽ വാഹനം ഓടിക്കുന്ന സാഹചര്യത്തിലാണ് പിഴ ഈടാക്കുക. പ്രധാന പാതകളിൽ ഇടതുവശത്തെ ലൈനുകളാണ് ഫാസ്റ്റ് ട്രാക്ക് റോഡുകൾ. ഇവിടെ വേഗത കുറച്ചു വാഹനങ്ങൾ ഓടിക്കുന്നത് ഗതാഗത തടസം സൃഷ്‌ടിക്കുമെന്ന് മാത്രമല്ല, അപകടങ്ങളും ഉണ്ടാക്കുമെന്നും അധികൃതർ വ്യക്‌തമാക്കി.
