മനാമ: ബഹ്റൈനിലെ കത്തോലിക്കാ സമൂഹത്തിന്റെ ക്ഷേമം ഉറപ്പാക്കുന്നതിനായി കിരീടാവകാശിയും പ്രധാനമന്ത്രിയുമായ സല്മാന് ബിന് ഹമദ് അല് ഖലീഫ രാജകുമാരന് അവാലിയിലെ ഔര് ലേഡി ഓഫ് അറേബ്യയിലെ കത്തീഡ്രലില് ക്രിസ്ത്യന് മതനേതാക്കളുമായി കൂടിക്കാഴ്ച നടത്തി.
കത്തീഡ്രലിലെത്തിയപ്പോള് വടക്കന് അറേബ്യയിലെ അപ്പസ്തോലിക് വികാരി ബിഷപ്പ് ആല്ഡോ ബെരാര്ഡി അദ്ദേഹത്തെ സ്വീകരിച്ചു. അവിടെ കിരീടാവകാശി നിരവധി ക്രിസ്ത്യന് മതനേതാക്കളുമായി കൂടിക്കാഴ്ച നടത്തി.
ബഹ്റൈന് സമൂഹം അതിന്റെ നീണ്ട ചരിത്രത്തിലുടനീളം വിവിധ മതങ്ങളുടെയും സംസ്കാരങ്ങളുടെയും സഹവര്ത്തിത്വത്തിന്റെ മാതൃകയാണെന്ന് കിരീടാവകാശി പറഞ്ഞു.
എല്ലാവര്ക്കും സംരക്ഷണവും പരിചരണവും നല്കുന്നതിനുള്ള ബഹ്റൈന്റെ പ്രതിബദ്ധത അദ്ദേഹം പരാമര്ശിച്ചു. രാജ്യം ജനങ്ങളുടെ സുരക്ഷയ്ക്ക് മുന്ഗണന നല്കുന്നു. പരസ്പര ബഹുമാനത്തിലും സഹവര്ത്തിത്വത്തിലും അധിഷ്ഠിതമായ ഒരു സാമൂഹിക അന്തരീക്ഷം കെട്ടിപ്പടുക്കുന്നതിനുള്ള രാജ്യത്തിന്റെ ദീര്ഘകാല ശ്രമങ്ങളെ ഈ പ്രതിബദ്ധത പ്രതിഫലിപ്പിക്കുന്നുവെന്നും കിരീടാവകാശി പറഞ്ഞു.
മതപരമായ ബഹുസ്വരതയോടുള്ള സഹവര്ത്തിത്വത്തിന്റെയും ആദരവിന്റെയും മൂല്യങ്ങള് ഏകീകരിക്കുന്നതില് രാജാവിന്റെ നേതൃത്വത്തില് രാജ്യം നല്കുന്ന അചഞ്ചലമായ പിന്തുണയ്ക്ക് ക്രിസ്ത്യന് മതനേതാക്കള് നന്ദി പറഞ്ഞു. ജനങ്ങളെ സ്വതന്ത്രമായി അവരുടെ വിശ്വാസം ആചരിക്കാന് പ്രോത്സാഹിപ്പിക്കുകയും അതിനെ സംരക്ഷിക്കുകയും ചെയ്യുന്ന അന്തരീക്ഷത്തെ അവര് അഭിനന്ദിച്ചു.
ആഭ്യന്തര മന്ത്രി ജനറല് ഷെയ്ഖ് റാഷിദ് ബിന് അബ്ദുല്ല അല് ഖലീഫ, ധനകാര്യ, ദേശീയ സാമ്പത്തിക മന്ത്രി ഷെയ്ഖ് സല്മാന് ബിന് ഖലീഫ അല് ഖലീഫ എന്നിവരും കിരീടാവകാശിയോടൊപ്പം ഉണ്ടായിരുന്നു.
