കുന്ദമംഗലം: നിരവധി കേസുകളില്‍ പ്രതിയായ പിടികിട്ടാപ്പുള്ളി ടിങ്കുവിനെ പിടികൂടാനെത്തിയ പൊലീസുകാര്‍ക്കുനേരെ പ്രതിയുടെ നേതൃത്വത്തില്‍ പരാക്രമം. ആറ് പൊലീസുകാര്‍ക്ക് പരിക്കേറ്റു. ഒരാളുടെ മുട്ടുകാലിന് ഗുരുതരമായി പരിക്കേറ്റു.
കുന്ദമംഗലത്തിനടുത്ത കട്ടാങ്ങല്‍ ഏരിമലയില്‍ പട്ടാപ്പകലാണ് സംഭവം. പിടികിട്ടാപ്പുള്ളിയായ ടിങ്കുവിനെ പിടികൂടാനായി പോയ പൊലീസുകാര്‍ക്ക് നേരെയായിരുന്നു ആക്രമണം. പ്രതിയും കൂട്ടാളികളും സിനിമാ സ്റ്റൈലിലായിരുന്നു പൊലീസ് സംഘത്തെ നേരിട്ടത്. നടുറോഡില്‍ നിര്‍ത്തിയിട്ട വാഹനത്തിനുമുകളില്‍ കയറിയ പ്രതികളെ സാഹസികമായാണ് പിടികൂടിയത്.
ടിങ്കുവിനെതിരെ വിവിധ ജില്ലകളില്‍ കേസുകളുള്ളതായി പൊലീസ് പറഞ്ഞു. ഡെന്‍സാഫ് സ്ക്വാഡ് അംഗം ജോമോന്‍റെ കാലിന്‍റെ മുട്ടിനാണ് ഗുരുതര പരിക്കേറ്റത്. ഇദ്ദേഹത്തെ അടിയന്തിര ശസ്ത്രക്രിയക്ക് വിധേയനാക്കി. സുനോജ്, അര്‍ജ്ജുന്‍, സായൂജ്, ജിനീഷ്, മിഥുന്‍ എന്നിവരാണ് പരിക്കേറ്റ മറ്റ് സ്ക്വാഡ് അംഗങ്ങള്‍.
