എരുമേലി: കാനന പാതവഴി കടത്തിവിടാത്തതില് ശബരിമല തീര്ഥാടകരുടെ പ്രതിഷേധം. എരുമേലി കാളകെട്ടി അഴുതക്കടവിന് സമീപം മുണ്ടക്കയം പമ്പാവാലി സംസ്ഥാന പാത ഉപരോധിച്ചുകൊണ്ടാണ് പ്രതിഷേധം നടക്കുന്നത്. മകരവിളക്കിനു മുന്നോടിയായി മണ്ഡലകാല പൂജകള്ക്കുശേഷം ശബരിമല നട അടച്ചതോടെ പെരിയാര് കടുവ സങ്കേതത്തിലൂടെയുള്ള കാനന പാത വനംവകുപ്പ് അടച്ചിരുന്നു. ഇതാണ് തീര്ഥാടകരുടെ പ്രതിഷേധത്തിന് കാരണം. സന്നിധാനത്തെ തിരക്കുകാരണം എരുമേലിയില്നിന്ന് പമ്പയിലേക്ക് വാഹനങ്ങള് കടത്തിവിടാത്തതിന്റെ പേരില് ദിവസങ്ങള്ക്കു മുമ്പ് തീര്ഥാടകര് എരുമേരി- റാന്നി പാത ഉപരോധിച്ചിരുന്നു.
