സർട്ടിഫിക്കറ്റ് വ്യാജമെന്ന് പൊലീസിനോട് സ്ഥിരീകരിച്ച് കലിംഗ സർവകലാശാല.നിഖിൽ തോമസിനെതിരെ വ്യാജരേഖ ചമയ്ക്കൽ,​ വഞ്ചനാക്കുറ്റം എന്നിവ ചുമത്തി

റായ്‌പൂർ : വ്യാജ സ‌ർട്ടിഫിക്കറ്റ് ഹാജരാക്കി എം.കോമിന് പ്രവേശനം നേടിയ എസ്.എഫ്.ഐ മുൻ നേതാവ് നിഖിൽ തോമസിനെതിരെ കായംകുളം പൊലീസ് കേസെടുത്തു. വ്യാജരേഖ ചമയ്ക്കൽ,​ വഞ്ചനാക്കുറ്റം എന്നിവ ചുമത്തിയാണ് കേസെടുത്തത്. അന്വേഷണത്തിന്റെ ഭാഗമായി റായ്പൂരിലെ കലിംഗ സർവകലാശാലയിലെത്തിയ കായംകുളം പൊലീസിനോട് നിഖിലിന്റെ ഡിഗ്രി സർട്ടിഫിക്കറ്റ് വ്യാജമാണെന്ന് അധികൃതർ മൊഴി നൽകി. സർവകലാശാലയിലെത്തി നിഖിലിന്റെ സർട്ടിഫിക്കറ്റുകൾ പൊലീസ് കാണിച്ചിരുന്നു. സർട്ടിഫിക്കറ്റുകൾ വ്യാജമാണെന്നും അങ്ങനെയൊരു വിദ്യാർത്ഥി കലിംഗയിൽ പഠിച്ചിട്ടില്ലെന്നും സർവകലാശാല വ്യക്തമാക്കി.കലിംഗ സർവകലാശാലയിലെത്തിയ കായംകുളം പൊലീസ് രജിസ്ട്രാർ,​ വി.സി എന്നിവരെ കണ്ട് വിവരങ്ങൾ തേടിയിരുന്നു. കായംകുളം എം.എസ്.എം അധികൃതർ നൽകിയ പ്രാഥമിക വിവരത്തിന്റെ അടിസ്ഥാനത്തിലാണ് പൊലീസ് കലിംഗയിലെത്തിയത്. കോളേജ് പ്രിൻസിപ്പിലിനെ കൂടാതെ ആരോപണ വിധേയരായ അദ്ധ്യാപകരിൽ നിന്നും പൊലീസ് മൊഴിയെടുക്കും,​അതേസമയം നിഖിലിനെ പ്രാഥമികാംഗത്വത്തിൽ നിന്നും പുറത്താക്കിയതായി എസ് എഫ് ഐ നേതൃത്വം അറിയിച്ചു. ഒരിക്കലും ഒരു എസ് എഫ് ഐ പ്രവർത്തകൻ ചെയ്യാൻപാടില്ലാത്ത കാര്യമാണ് നിഖിൽ തോമസ് ചെയ്‌തത്. സംഘടനയെ നിഖിൽ തെറ്റിദ്ധരിപ്പിച്ചതായും എസ്‌ എഫ് ഐ നേതൃത്വം പ്രസ്‌താവനയിലൂടെ ചൂണ്ടിക്കാട്ടി.