മസ്കത്ത്: ഒമാനിൽ നിന്ന് ഈ വർഷത്തെ ഹജ്ജ് തീർഥാടകരുടെ നറുക്കെടുപ്പ് അടുത്ത ഞായറാഴ്ച. 13,098 സ്വദേശികൾക്കും 500 വിദേശികൾക്കും ഒമാനിൽ നിന്ന് ഈ വർഷം അവസരം ലഭിക്കും. ഇവരെ കൂടാതെ 402 പേരും ഔദ്യോഗിക ഹജ്ജ് ഗ്രൂപ്പിന്റെ ഭാഗമാകുമെന്ന് ഔഖാഫ് മതകാര്യ മന്ത്രാലയം അറിയിച്ചു.
ഹജ്ജിനുള്ള ഓൺലൈൻ രജിസ്ട്രേഷൻ കഴിഞ്ഞ ദിവസം പൂർത്തിയായിരുന്നു. ആകെ 33,356 പേർ രജിസ്റ്റർ ചെയ്തിട്ടുണ്ട്. 14,000 ആണ് ഈ വർഷത്തെ ഒമാന്റെ ഹജ്ജ് ക്വാട്ട. നറുക്കെടുപ്പിലൂടെ അവസരം ലഭിക്കുന്നവർ അഞ്ച് ദിവസത്തിനകം ഹജ്ജ് കമ്പനികളുമായി കരാറിൽ ഏർപ്പെടണമെന്നും മന്ത്രാലയം നിർദ്ദേശിച്ചിട്ടുണ്ട്. ഇത്തവണ അപേക്ഷിച്ചവരിൽ 29,930 പേർ സ്വദേശികളും 3,606 പേർ വിദേശികളുമാണ്.
5,739 അപേക്ഷകരുള്ള ദാഖിലിയ ഗവർണറേറ്റിൽ നിന്നാണ് ഏറ്റവും കൂടുതൽ രജിസ്ട്രേഷൻ നടത്തിയത്. മസ്കറ്റ് (5,701), ദാഹിറ (1,704), അൽ വുസ്ത (240), ദോഫർ (3,277), മുസന്ദം (200), ബുറൈമി (485), വടക്കൻ ബാത്തിന (5,016), സൗത്ത് ബാത്തിന (3,055), വടക്കൻ ശർഖിയ (3,111), തെക്കൻ ശർഖിയ (2,3) എന്നിങ്ങനെയാണ് മറ്റ് ഗവര്ണറേറ്റുകളിലെ കണക്കുകൾ.