VM Sudheeran | Starvision News Malayalam

ഇന്ത്യൻ മാധ്യമ ലോകത്തിന് കേരളം നൽകിയ പ്രതിഭയാണ് ബി.ആർ.പി : വി.എം.സുധീരൻ

Starvision News Desk — Fri, 07 Jun 2024 15:01:28 +0000

തിരുവനന്തപുരം: ഇന്ത്യൻ മാധ്യമ ലോകത്തിന് കേരളം നൽകിയ വിലപ്പെട്ട പ്രതിഭകളിൽ ഒരാളാണ് കഴിഞ്ഞ ദിവസം അന്തരിച്ച ബി.ആർ.പി. ഭാസ്കറെന്ന് കെ.പി.സി.സി മുൻ പ്രസിഡൻ്റ് വി.എം. സുധീരൻ പറഞ്ഞു. ധീരമായ നിലപാടുകൾ കൊണ്ടും സവിശേഷതയാർന്ന സ്കൂപ്പ് വാർത്തകൾ കൊണ്ടും മാധ്യമ ലോകത്ത് വ്യക്തിമുദ്ര പതിച്ച പത്രപ്രവർത്തകനായിരുന്നു അദ്ദേഹം. മനുഷ്യാവകാശത്തിനായും നീതിക്കായും ഉറച്ച നിലപാടെടുത്ത ബി.ആർ.പി സമരഭൂമികളിൽ പാർശ്വവത്കരിക്കപ്പെട്ടവരോടൊപ്പം നിറസാന്നിദ്ധ്യമായെന്നും സുധീരൻ പറഞ്ഞു. തിരുവനന്തപുരം പ്രസ് ക്ലബ് സംഘടിപ്പിച്ച ബി ആർ പി അനുസ്മരണ യോഗത്തിൽ മുഖ്യ പ്രഭാഷണം നടത്തുകയായിരുന്നു അദ്ദഹം.

പ്രസ് ക്ലബ് പ്രസിഡൻ്റ് എം. രാധാകൃഷ്ണൻ്റെ അദ്ധ്യക്ഷതയിൽ ചേർന്ന യോഗത്തിൽ മുൻ സ്പീക്കർ എം. വിജയകുമാർ, ബി ജെ പി സംസ്ഥാന വക്താവ് ജെ.ആർ.പത്മകുമാർ, ആർക്കിടെക്ട് ജി.ശങ്കർ, മുതിർന്ന മാദ്ധ്യമപ്രവർത്തകരായ കെ.പി. മോഹനൻ, മലയിൻകീഴ് ഗോപാലകൃഷ്ണൻ, എം.ജി. രാധാകൃഷ്ണൻ, ജോൺ മുണ്ടക്കയം, എസ്. ബിജു തുടങ്ങിയവർ സംസാരിച്ചു.

തിരുവനന്തപുരം പ്രസ് ക്ലബ് സംഘടിപ്പിച്ച ബി.ആർ.പി. ഭാസ്കർ അനുസ്മരണ യോഗത്തിൽ കെ പി സി സി മുൻ പ്രസിഡൻ്റ് വി.എം. സുധീരൻ മുഖ്യപ്രഭാഷണം നടത്തുന്നു. പ്രസ് ക്ലബ് പ്രസിഡൻ്റ് എം.രാധാകൃഷ്ണൻ, മുൻ സ്പീക്കർ എം. വിജയകുമാർ, കെ.പി.മോഹനൻ, ജെ.ആർ. പത്മകുമാർ, എം.ജി.രാധാകൃഷ്ണൻ, ജോൺ മുണ്ടക്കയം, ജി.ശങ്കർ, എസ്.ബിജു, മലയിൻകീഴ് ഗോപാലകൃഷ്ണൻ എന്നിവർ സമീപം.

The post ഇന്ത്യൻ മാധ്യമ ലോകത്തിന് കേരളം നൽകിയ പ്രതിഭയാണ് ബി.ആർ.പി : വി.എം.സുധീരൻ appeared first on Starvision News Malayalam.

‘ബാബറി മസ്ജിദ് തകർത്ത് രാമക്ഷേത്രമുണ്ടാക്കി ഉദ്ഘാടനം ചെയ്യുന്ന ചടങ്ങിൽ കോൺഗ്രസ് പങ്കെടുക്കരുത്’: വി എം സുധീരൻ

News Desk — Thu, 28 Dec 2023 09:46:17 +0000

കൊല്ലം: ബാബറി മസ്ജിദ് തകർത്ത് രാമക്ഷേത്രം നിർമ്മിച്ച് ഉദ്ഘാടനം ചെയുന്ന ചടങ്ങിൽ കോൺഗ്രസ് പങ്കെടുക്കരുതെന്ന് മുതിർന്ന കോൺഗ്രസ് നേതാവ് വി എം സുധീരൻ. രാമക്ഷേത്ര പ്രതിഷ്ഠാ ചടങ്ങിൽ കോൺഗ്രസ് പങ്കെടുക്കരുതെന്നും ക്ഷണം കോൺഗ്രസ് പൂർണമായി നിരാകരിക്കണമെന്നും വിഎം സുധീരൻ പറഞ്ഞു. നെഹ്റുവിന്റെ നയങ്ങളിൽ നിന്നും കോൺഗ്രസിന് വ്യതിചലനം ഉണ്ടായി. അത് ഗുണം ചെയ്‌തില്ല എന്നാണ് വ്യകതമാകുന്നത്. നെഹ്റുവും ഇന്ദിരയും മതേതര മൂല്യങ്ങൾ ഉയർത്തിപ്പിടിച്ചവരാണെന്നും മതേതര മൂല്യങ്ങൾ കൂടുതൽ ശക്തിപ്പെടുത്തി വേണം കോൺഗ്രസ് മുന്നോട്ടു പോകാനാണെന്നും വിഎം സുധീരൻ പറഞ്ഞു. രാമക്ഷേത്ര പ്രതിഷ്ഠാ ചടങ്ങിൽ പങ്കെടുക്കുമെന്ന കോണ്‍ഗ്രസ് നിലപാട് വിവാദമായ പശ്ചാത്തലത്തിലാണ് സുധീരൻ്റെ പ്രതികരണം.

ബിജെപിയുടെ തീവ്ര ഹിന്ദുത്വത്തിനെതിരെ മതേതര മൂല്യങ്ങൾ കോൺഗ്രസ് ഉയർത്തിപ്പിടിക്കണം. ഒരു കാരണവശാലും പങ്കെടുക്കരുത്. ജനാധിപത്യം മതേതര മൂല്യങ്ങളിൽ വിശ്വസിക്കുന്ന ഒരു പാർട്ടിയും ചടങ്ങിൽ പങ്കെടുക്കരുത്. നെഹ്റുവിന്റെ സാമ്പത്തിക നയങ്ങളിലേക്ക് രാജ്യം മടങ്ങി പോണം. കോൺഗ്രസ് പഴയ മതേതര മൂല്യങ്ങളിലേക്ക് മടങ്ങിപ്പോകണമെന്നും സുധീരൻ കൂട്ടിച്ചേർത്തു.

The post ‘ബാബറി മസ്ജിദ് തകർത്ത് രാമക്ഷേത്രമുണ്ടാക്കി ഉദ്ഘാടനം ചെയ്യുന്ന ചടങ്ങിൽ കോൺഗ്രസ് പങ്കെടുക്കരുത്’: വി എം സുധീരൻ appeared first on Starvision News Malayalam.

യൂത്ത് കോൺഗ്രസ് സംഘടനാ തെരഞ്ഞെടുപ്പ്; തെറ്റ് തിരുത്താൻ ദേശീയ നേതൃത്വം തയാറാകണം; വി എം സുധീരൻ

Starvision News Desk — Sat, 25 Nov 2023 08:37:22 +0000

യൂത്ത് കോൺഗ്രസ് സംഘടനാ തെരഞ്ഞെടുപ്പിനെ രൂക്ഷമായി വിമർശിച്ച് മുതിർന്ന കോൺഗ്രസ് നേതാവ് വിഎം സുധീരൻ. തെരഞ്ഞെടുപ്പ് രീതി ശരിയല്ലെന്ന് കേരളത്തിലെ നേതാക്കൾ ഒറ്റക്കെട്ടായി പറയണമായിരുന്നെന്ന് സുധീരൻ പറ‍ഞ്ഞു. ഏജൻസിയുടെ താത്പര്യം മറ്റൊന്നാണെന്നും പാകപ്പിഴ സംഭവിച്ചിരിക്കുന്നത് ഓൾ ഇന്ത്യ യൂത്ത് കോൺഗ്രസിനാണെന്നും സുധീരൻ പറഞ്ഞു. യാഥാർഥ്യബോധത്തോടുകൂടി കാര്യങ്ങൾ മനസിലാക്കി മുന്നോട്ടു പോയില്ലെന്നും ഈ തെരഞ്ഞെടുപ്പ് രീതി ഗുണകരമല്ലെന്നും സുധീരൻ മാധ്യമങ്ങളോട് പ്രതികരിച്ചു. മൂന്നു മാസം മുൻപ് യൂത്ത് കോൺഗ്രസിന്റെ സംസ്ഥാന സമ്മേളനം നടന്ന വേളയിൽ‌ തെരഞ്ഞെടുപ്പിലെ പിഴവ് ചൂണ്ടിക്കാണിച്ചിരുന്നെന്നും എന്നാൽ‌ പിഴവ് തിരുത്താൻ തയാറായില്ലെന്നും സുധീരൻ വിശദീകരിച്ചു. മെമ്പർഷിപ്പ് അടിസ്ഥാനത്തിലുള്ള തെരഞ്ഞെടുപ്പ് നടത്താതാണ് പിഴിവിന് കാരണമെന്ന് സുധീരൻ വിമർ‌ശിച്ചു.

വിഷയത്തിൽ സംസ്ഥാന നേതൃത്വത്തെയോ നേതാക്കളെ കുറ്റം പറഞ്ഞിട്ട് കാര്യമില്ലെന്നും പിഴവ് അഖിലേന്ത്യ നേതൃത്വത്തിന്റെ പിഴവാണെന്നും സുധീരൻ വ്യക്തമാക്കി. തെറ്റ് തിരുത്താൻ ദേശീയ നേതൃത്വ തയാറാകണമെന്ന് അദ്ദേഹം ആവശ്യപ്പെട്ടു. തെരഞ്ഞെടുപ്പ് സ്വകാര്യ ഏജൻസിയെ ഏൽപ്പിക്കുകയെന്നത് ഗുരുതര പിഴവാണ്. സ്വകാര്യ ഏജൻസിയുടെ താത്പര്യങ്ങൾ പോലും പ്രതിഫലിച്ചിട്ടുണ്ടാകാമെന്നും അദ്ദേഹം കൂട്ടിച്ചേർത്തു.

The post യൂത്ത് കോൺഗ്രസ് സംഘടനാ തെരഞ്ഞെടുപ്പ്; തെറ്റ് തിരുത്താൻ ദേശീയ നേതൃത്വം തയാറാകണം; വി എം സുധീരൻ appeared first on Starvision News Malayalam.

കേരളത്തിന്റെ ഭൂപ്രകൃതി കെ-റെയിൽ സിൽവർലൈൻ പദ്ധതിക്ക് അനുയോജ്യമല്ല: വി.എം. സുധീരൻ

staradmin — Sat, 15 Jan 2022 12:06:43 +0000

തിരുവനന്തപുരം: ഒരുതരത്തിലുമുള്ള ശാസ്ത്രീയതയും പ്രായോഗികതയും അവകാശപ്പെടുവാൻ കഴിയുന്നതല്ല കെ-റെയിൽ സിൽവർലൈൻ പദ്ധതിയെന്നും പദ്ധതി കേരളത്തിന്റെ ഭൂപ്രകൃതിയെ കീറിമുറിക്കുമെന്നും കൂടിയാലോചനകളില്ലാതെ മുന്നോട്ട് പോകുന്ന സർക്കാരിന്റെ സമീപനത്തിനെതിരെ ശക്തമായ ജനകീയ പ്രക്ഷോഭം ഉയർന്നു വരുന്നുവെന്നും അതുകൊണ്ട് തന്നെ പദ്ധതിക്കെതിരെയുള്ള ജനകീയ മുന്നേറ്റങ്ങളെ നമ്മൾ പൂർണമായും പിന്തുണയ്ക്കണമെന്നും കെപിസിസിയുടെ മുൻ പ്രസിഡന്റ് വി.എം.സുധീരൻ പറഞ്ഞു.

കേരള സർവ്വോദയ മണ്ഡലം തിരുവനന്തപുരം ജില്ലാ കമ്മിറ്റി തൈക്കാട് ഗാന്ധി ഭവനിൽ സംഘടിപ്പിച്ച ‘കെ- റെയിൽ സിൽവർലൈൻ പഠന കൺവെൻഷൻ’ ഉദ്ഘാടനം ചെയ്തു ചെയ്തു സംസാരിക്കുകയായിരുന്നു അദ്ദേഹം. സർക്കാരിന്റെ ഏകപക്ഷീയമായ തീരുമാനം കേരളത്തെ ‘മനുഷ്യനിർമ്മിത ദുരന്തം’ എന്നതിലേക്ക് സർക്കാർ തന്നെ കൊണ്ടെത്തിക്കുമെന്നും ജനങ്ങളെ തെറ്റിദ്ധരിപ്പിക്കുന്ന പ്രചാരണങ്ങൾ പൊതുസമൂഹം തിരിച്ചറിഞ്ഞിട്ടുണ്ടെന്നും സുധീരൻ കൂട്ടിച്ചേർത്തു…

കേരള സർവ്വോദയ മണ്ഡലം ജില്ലാ പ്രസിഡന്റ് ഡോ. എഫ്എം. ലാസർ അധ്യക്ഷത വഹിച്ചു. കേരള ഗാന്ധി സ്മാരക നിധി ചെയർമാൻ ഡോ. എൻ. രാധാകൃഷ്ണൻ മുഖ്യപ്രഭാഷണം നടത്തി. ഈ പദ്ധതി അപകടകരമാണെന്നും ജനങ്ങളെ സേവിക്കേണ്ട സർക്കാർതന്നെ ജനവിരുദ്ധ കെ- റെയിൽ പദ്ധതിക്കു വേണ്ടി മുറവിളി കൂട്ടുന്നത് സംശയാസ്പദമാണെന്നും സർക്കാർ അതിൽ നിന്നും പിന്മാറണമെന്നും അദ്ദേഹം ആവശ്യപ്പെട്ടു.

ഏകാധിപത്യ പ്രവണതകളിൽ നിന്നും ജനാധിപത്യം തിരിച്ചു പിടിക്കാനുള്ള സഹനസമരമാണ് ഇപ്പോൽ കേരളത്തിൽ നടക്കുന്നതെന്നും കെ-റെയിൽ കേരളത്തിന് വൻബാധ്യത ആകുമെന്നും ജനജീവിതം ദുസ്സഹമാക്കുമെന്നും സാമ്പത്തിക അടിത്തറ തകർത്തെറിയുമെന്നും “കെ- റെയിൽ സിൽവർ ലൈൻ പദ്ധതി കേരളത്തിനു വേണമോ..?” എന്നതിൽ നടന്ന പഠന കൺവെൻഷനിൽ വിഷയങ്ങൾ അവതരിപ്പിച്ച വിദഗ്ദ്ധർ പറഞ്ഞു.

പഠന കൺവെൻഷനിലെ വിഷയാവതരണങ്ങളുടെ മോഡറേറ്റർ ഏകതാ പരിഷത്ത് സംസ്ഥാന വൈസ് പ്രസിഡന്റ് അനിൽകുമാർ പി.വൈ ആയിരുന്നു. ‘സാമ്പത്തികാഘാതവും രാഷ്ട്രീയവും’ എന്നതിൽ സാമൂഹിക രാഷ്ട്രീയ നിരീക്ഷകൻ ജോസഫ് സി. മാത്യുവും ‘സാമൂഹികാഘാതം’ എന്നതിൽ സംസ്ഥാന കെ- റെയിൽ സിൽവർലൈൻ വിരുദ്ധ ജനകീയ സമിതി ജെനറൽ കൺവീനർ എസ്. രാജീവനും ‘പാരിസ്ഥിതികാഘാതം’ എന്നതിൽ കേരള പരിസ്ഥിതി ഐക്യവേദി സംസ്ഥാന കൺവീനർ ശ്രീധർ രാധാകൃഷ്ണനും വിഷയങ്ങൾ അവതരിപ്പിക്കുകയും ചർച്ചകൾ നടത്തുകയും ചെയ്തു.

ഗാന്ധി സെന്റർ ചെയർമാൻ അഡ്വ. വിഎസ്. ഹരീന്ദ്രനാഥ്, കേരള സർവ്വോദയ മണ്ഡലം സംസ്ഥാന ജനറൽ സെക്രട്ടറി കാട്ടായിക്കോണം ശശിധരൻ, മുൻ സംസ്ഥാന വൈസ് പ്രസിഡന്റ് ജി. സദാനന്ദൻ, അഡ്വ. എസ്. ഉദയകുമാർ, ജോൺ വിൽസൺ, ബി. ശശികുമാരൻ നായർ, എസ്. മോഹനകുമാരിയമ്മ, ശ്രീലത ടീച്ചർ എന്നിവർ പ്രസംഗിച്ചു. തുടർന്ന് നടന്ന ചർച്ചയും സംവാദവും കെ-റെയിൽ സിൽവർ ലൈൻ പദ്ധതി കേരളത്തിന് അനുയോജ്യമല്ലെന്ന പ്രഖ്യാപനത്തോടെ കെ- റെയിൽ വിരുദ്ധ ജനകീയ മുന്നേറ്റങ്ങളെ പിന്തുണയ്ക്കണയ്ക്കണമെന്നും അവയ്ക്ക് നേതൃത്വം നല്കണമെന്നും തീരുമാനിച്ചു.

The post കേരളത്തിന്റെ ഭൂപ്രകൃതി കെ-റെയിൽ സിൽവർലൈൻ പദ്ധതിക്ക് അനുയോജ്യമല്ല: വി.എം. സുധീരൻ appeared first on Starvision News Malayalam.

‘കേരളം ഭരിക്കുന്നയാള്‍ സര്‍ സിപി അല്ലെന്ന് മുഖ്യമന്ത്രിക്ക് ഓര്‍മ്മ വേണം’; വി എം സുധീരന്‍

staradmin — Mon, 10 Jan 2022 07:45:06 +0000

തിരുവനന്തപുരം: കേരളം ഭരിക്കുന്നയാള്‍ സര്‍ സിപി അല്ലെന്ന് മുഖ്യമന്ത്രിക്ക് ഓര്‍മ്മ വേണമെന്ന് കോണ്‍ഗ്രസ് നേതാവ് വി എം സുധീരന്‍. എല്ലാം ശരിയെന്ന് സ്വയം തൃപ്തിയടയുന്നരീതി മുഖ്യമന്ത്രി ഉപേക്ഷിക്കണമെന്നും കെ റെയിലിനെതിരായ കോണ്‍ഗ്രസിന്റെ സമരം ജനാധിപത്യരീതിയിലായിരിക്കുമെന്നും സുധീരന്‍ കൂട്ടിച്ചേര്‍ത്തു.

വിവരാവകാശ കമ്മീഷണറുടെ നിലപാട് പരിഹാസ്യമായിപ്പോയെന്നും പൗരപ്രമുഖന്‍മാരുമായുള്ളത് തട്ടിക്കൂട്ട് റെഡിമെയ്ഡ് യോഗമാണെന്നും അദ്ദേഹം വിമര്‍ശിച്ചു. സില്‍വര്‍ ലൈന്‍ പദ്ധതിക്ക് എതിരായ പ്രതിഷേധത്തിന്റെ ഭാഗമായി കല്ല് പിഴുതെറിഞ്ഞ് സംസ്ഥാന വ്യാപക പ്രക്ഷോഭത്തിനാണ് യുഡിഎഫ് ആഹ്വാനം ചെയ്തിരിക്കുന്നത്. എന്നാല്‍ സര്‍വ്വേ കല്ലുകള്‍ പിഴുതെറിഞ്ഞാലും സില്‍വര്‍ ലൈന്‍ പദ്ധതി നടപ്പാക്കുമെന്ന് മുഖ്യമന്ത്രി വ്യക്തമാക്കിയിരുന്നു.

കെ റെയില്‍ അതിരടയാളക്കല്ല് പറിക്കാന്‍ വരുന്നവര്‍ സ്വന്തം പല്ല് സൂക്ഷിക്കണമെന്നായിരുന്നു സിപിഎം കണ്ണൂര്‍ ജില്ലാ സെക്രട്ടറി എം വി ജയരാജന്‍ ഇന്നലെ പറഞ്ഞത്. സര്‍വ്വേ കല്ല് പറിച്ചെറിയാന്‍ ആഹ്വാനം ചെയ്ത നേതാവിന്റെ അനുയായികളോട് സ്വന്തം പല്ല് സുരക്ഷിതമാണെന്ന് ഉറപ്പ് വരുത്തൂയെന്ന് മാത്രമേ പറയാനുള്ളു എന്നായിരുന്നു ജയരാജന്‍ ഫേസ്ബുക്കില്‍ കുറിച്ചത്. യുഡിഎഫ് ഭരണകാലത്ത് അവരുടെ മാനിഫെസ്റ്റോയില്‍ ഈ പദ്ധതി ഉണ്ടായിരുന്നു. അതിനാലാണ് ഉമ്മന്‍ചാണ്ടിയും രമേശ് ചെന്നിത്തലയും ഇപ്പോള്‍ മൗനം പാലിക്കുന്നതെന്നും ജയരാജന്‍ കുറ്റപ്പെടുത്തിയിരുന്നു.

The post ‘കേരളം ഭരിക്കുന്നയാള്‍ സര്‍ സിപി അല്ലെന്ന് മുഖ്യമന്ത്രിക്ക് ഓര്‍മ്മ വേണം’; വി എം സുധീരന്‍ appeared first on Starvision News Malayalam.

സുധാകരന്റെ നേതൃത്വം ഗുണം ചെയ്യില്ല – വി എം സുധീരൻ

News Desk — Sun, 07 Nov 2021 13:30:29 +0000

തിരുവനന്തപുരം: കെപിസിസി പ്രസിഡന്റ് കെ സുധാകരനും മുന്‍ പ്രസിഡന്റ് വി എം സുധീരനും തമ്മിലുള്ള പോര് മൂര്‍ച്ഛിക്കുന്നു. സുധാകരന്റെ പേരിലുള്ള ‘കെ എസ് ബ്രിഗേഡി’ന് ഫാസിസ്റ്റ് ശൈലിയാണെന്ന് സുധീരന്‍ തുറന്നടിച്ചു. സുധാകരനോട് വിയോജിപ്പുള്ളവരെ തേജോവധം ചെയ്യുകയാണ് ആരാധകവൃന്ദം. കെപിസിസി പ്രസിഡന്റ് ഈ തരത്തിലുള്ള ഫാസിസ്റ്റ് ശൈലി വെച്ചുപുലര്‍ത്തുന്നത് എതിര്‍ക്കപ്പെടേണ്ടത് തന്നെയാണെന്നും സുധീരന്‍ പറഞ്ഞു. മനോരമ ന്യൂസിന് നല്‍കിയ അഭിമുഖത്തിലായിരുന്നു സുധീരന്റെ വിമര്‍ശനം.

വിയോജിപ്പുണ്ടെങ്കില്‍ മുഖത്ത് നോക്കി സംസാരിക്കുന്നതാണ് തന്റെ ശൈലി. വൈരാഗ്യബുദ്ധിയോടെ ആരോടും പെരുമാറിയിട്ടില്ല. സുധാകരന്റെ ശൈലി കണ്ണൂര്‍ രാഷ്ട്രീയത്തില്‍ പോലും ഗുണമല്ല. അവിടെ നാല് എംഎല്‍എമാരുണ്ടായിരുന്നത് രണ്ടായി ചുരുങ്ങി. പരസ്യപ്രസ്താവന നടത്താന്‍ പാടില്ലെന്ന് ആഹ്വാനം ചെയ്ത സുധാകരന്‍ തന്നെ നേതാക്കളെക്കുറിച്ചും സഹപ്രവര്‍ത്തകരെക്കുറിച്ചും പരസ്യമായി പറഞ്ഞുകൊണ്ടിരിക്കുകയാണെന്നും സുധീരന്‍ പറഞ്ഞു.