തിരുവനന്തപുരം: ‘കള്ളന്‍ വിജയന്‍’ എന്ന തലക്കെട്ടിനെ ചൊല്ലിയുണ്ടായ വിവാദവുമായി ബന്ധപ്പെട്ട് ദേശാഭിമാനി വാരാന്തപ്പതിപ്പ് എഡിറ്റര്‍ കെ.ആര്‍. അജയന് കാരണം കാണിക്കല്‍ നോട്ടീസ് നല്‍കി. തലക്കെട്ട് മാറ്റാതിരുന്നതും, വിഷയം മാധ്യമങ്ങളിലേക്ക് ചോര്‍ന്ന് അനാവശ്യ വിവാദത്തിന് ഇടയാക്കിയെന്നുമുള്ള ആരോപണങ്ങളാണ് നോട്ടീസിലുള്ളത്. ഇന്ന് വൈകിട്ട് നാല് മണിക്ക് മുമ്പായി സംഭവത്തില്‍ വിശദീകരണം നല്‍കണമെന്നാണ് കെ.ആര്‍. അജയന് നല്‍കിയ നോട്ടീസില്‍ ആവശ്യപ്പെട്ടിരിക്കുന്നത്.

വി.എസ്. അച്യുതാനന്ദന്റെ അനുസ്മരണ പതിപ്പായാണ് ഈ ആഴ്ചത്തെ ദേശാഭിമാനി വാരാന്തപ്പതിപ്പ് തയ്യാറാക്കിയത്. അതില്‍ ഉള്‍പ്പെടുത്താനിരുന്ന ‘കള്ളന്‍ വിജയന്‍’ എന്ന തലക്കെട്ടോടുകൂടിയ ലേഖനമാണ് പിന്നീട് വിവാദത്തിന് വഴിവെച്ചത്. തലക്കെട്ടിനെച്ചൊല്ലി സ്ഥാപനത്തിനുള്ളില്‍ അഭിപ്രായവ്യത്യാസം ഉണ്ടായതിനെ തുടര്‍ന്ന് വാരാന്തപ്പതിപ്പിന്റെ വിതരണം ഞായറാഴ്ചയ്ക്ക് പകരം തിങ്കളാഴ്ചത്തേക്ക് മാറ്റുകയായിരുന്നു.

വിതരണം വൈകിയത് സാങ്കേതിക കാരണങ്ങളാലാണെന്നായിരുന്നു ദേശാഭിമാനി എഡിറ്റര്‍ എം. സ്വരാജ് വിശദീകരിച്ചത്. എന്നാല്‍, ലേഖകന്‍ നല്‍കിയ ‘കള്ളന്‍ വിജയന്‍’ എന്ന തലക്കെട്ട് മാറ്റാതെയാണ് ലേഖനം അച്ചടിക്കാനായി പ്രസിലേക്ക് വിട്ടതെന്നും, സ്ഥാപനത്തിനുള്ളിലെ തര്‍ക്കം പുറത്തറിയിച്ച് വിവാദമാക്കിയെന്നുമാണ് കെ.ആര്‍. അജയനെതിരായ പ്രധാന ആരോപണങ്ങള്‍. തിങ്കളാഴ്ച പുറത്തിറങ്ങിയ വി.എസ്. അച്യുതാനന്ദന്റെ അനുസ്മരണ വാരാന്തപ്പതിപ്പില്‍ നിന്ന് വിവാദമായ ‘കള്ളന്‍ വിജയന്‍’ ലേഖനം ഒഴിവാക്കിയിരുന്നു. സംഭവവുമായി ബന്ധപ്പെട്ട തുടര്‍നടപടികളാണ് ഇപ്പോള്‍ ശ്രദ്ധേയമാകുന്നത്.

The post ‘കള്ളന്‍ വിജയന്‍’ തലക്കെട്ട് വിവാദം; ദേശാഭിമാനി വാരാന്തപ്പതിപ്പ് എഡിറ്റര്‍ കെ.ആര്‍. അജയന് കാരണം കാണിക്കല്‍ നോട്ടീസ് appeared first on Starvision News Malayalam.