മനാമ: ഇന്ത്യൻ സ്‌കൂൾ മെഗാ ഫെയറിന്റെ ഭാഗമായ വർണശബളമായ തരംഗ് ഫിനാലെ ഇന്ന് (നവംബർ 23) അരങ്ങേറും. കഴിഞ്ഞ ഒരാഴ്ചയായി നടന്നു വന്ന ഇന്ത്യൻ സ്‌കൂൾ യുവജനോത്സവമായ തരംഗിന്റെ പര്യവസാനമാണ് ഇന്ന് അരങ്ങേറുന്നത്. ഇസ ടൗണിലെ സ്‌കൂൾ ഗ്രൗണ്ടിലെ ഉജ്വലമായ വേദിയിലാണ് തരംഗ് ഫിനാലെ അരങ്ങേറുക. വൈകീട്ട് 5 മുതൽ 11 മണി വരെയാണ് പരിപാടികൾ അരങ്ങേറുക.

യുവജനോത്സവത്തിലെ ഏറ്റവും മികച്ച നൃത്ത ഇനങ്ങൾ ഫിനാലെയിൽ വീണ്ടും അവതരിപ്പിക്കും. നേരത്തെ സമ്മാനാർഹമായ അറബിക് ഡാൻസ്,ഫോക് ഡാൻസ്,സിനിമാറ്റിക് ഡാൻസ്‌, വെസ്റ്റേൺ ഡാൻസ് എന്നിവയാണ് അരങ്ങേറുക. തരംഗ് യുവജനോത്സവത്തിൽ ഓവറോൾ ചാമ്പ്യൻഷിപ്പ് നേടിയ ഹൗസിനും കലാപ്രതിഭകൾക്കും സമ്മാനദാനവും നടക്കും. നവംബർ 24നും 25 നും നടക്കുന്ന സംഗീത പരിപാടിയിൽ പ്രവേശനം ടിക്കറ്റ് മുഖേന ആയിരിക്കും. 24ന് സിദ്ധാർഥ് മേനോനും മൃദുല വാര്യരും സംഘവും അവതരിപ്പിക്കുന്ന സംഗീത പരിപാടിയാണ് മുഖ്യ ആകർഷണം.

സച്ചിൻ വാര്യർ, ആവണി, വിഷ്ണു ശിവ, അബ്ദുൽ സമദ് എന്നീ ഗായകരും സംഘത്തിൽ ഉൾപ്പെടും. 25നു ബോളിവുഡ്‌ ഗായിക ഭൂമി ത്രിവേദിയും സംഘവും നയിക്കുന്ന സംഗീത നിശ അരങ്ങേറും. നാഷണൽ സ്റ്റേഡിയത്തിനു സമീപം പാർക്കിങ് സൗകര്യം ഉണ്ടായിരിക്കും. നാഷണൽ സ്റ്റേഡിയത്തിൽ നിന്നും സ്‌കൂളിലേക്ക് ഷട്ടിൽ ബസ് സൗകര്യം ഏർപ്പെടുത്തിയിട്ടുണ്ട്. ഫെയർ ടിക്കറ്റുകൾ സ്‌കൂളിലും ലഭ്യമായിരിക്കും. സയാനി മോട്ടോഴ്‌സ് അവതരിപ്പിക്കുന്ന ഇന്ത്യൻ സ്‌കൂൾ മെഗാ മേളയുടെയും ഫുഡ് ഫെസ്റ്റിവലിന്റെയും ഇവന്റ്സ് പാർട്ണർ സ്റ്റാർ വിഷനാണ്. സ്‌കൂളിലും പരിസരങ്ങളിലും സി.സി.ടി.വി നിരീക്ഷണം ഉൾപ്പെടെ സുരക്ഷാ ക്രമീകരണങ്ങൾ ഏർപ്പെടുത്തിയതായി ഇന്ത്യൻ സ്‌കൂൾ അധികൃതർ അറിയിച്ചു.

The post ഇന്ത്യൻ സ്‌കൂൾ തരംഗ് ഫിനാലെ ഇന്ന് അരങ്ങേറും appeared first on Starvision News Malayalam.

മനാമ: ഇന്ത്യൻ സ്‌കൂൾ യൂത്ത് ഫെസ്റ്റിവൽ ‘തരംഗ് 2022’  സ്റ്റേജ് മത്സരങ്ങൾക്ക്   ഇസ  ടൗൺ കാമ്പസിൽ വർണാഭമായ തുടക്കം. സ്‌കൂൾ  ചെയർമാൻ പ്രിൻസ് എസ് നടരാജൻ ദീപം  തെളിയിച്ചു.  സെക്രട്ടറി സജി ആന്റണി, നിർവാഹക സമിതി അംഗം രാജേഷ് എം എൻ, പ്രിൻസിപ്പൽ വി ആർ പളനിസ്വാമി, സ്റ്റാഫ് പ്രതിനിധി ജോൺസൺ കെ ദേവസി, അധ്യാപകർ , വിദ്യാർഥികൾ എന്നിവർ ചടങ്ങിൽ പങ്കെടുത്തു. വൈസ് പ്രിൻസിപ്പൽ ആനന്ദ്  നായർ സ്വാഗതം പറഞ്ഞു.

നാടോടിനൃത്തം, മിമിക്രി, മോണോ ആക്ട് എന്നിവആദ്യ ദിനത്തിൽ അരങ്ങേറി. 
120 ഇനങ്ങളിലായി നാലായിരത്തിലധികം  വിദ്യാർത്ഥികൾ പങ്കെടുക്കുന്ന ഇന്ത്യൻ സ്‌കൂൾ യുവജനോത്സവം ഗൾഫ് രാജ്യങ്ങളിലെ ഏറ്റവും വലിയ സ്കൂൾ യുവജനോത്സവങ്ങളിലൊന്നാണ്. സ്റ്റേജ് പരിപാടികൾ നവംബർ 19 വരെ തുടരും. നവംബർ 23 ന് ഇന്ത്യൻ സ്‌കൂൾ മെഗാ ഫെയർ വേദിയിൽ ഗ്രാൻഡ് ഫിനാലെ നടക്കും.  കലാശ്രീ, കലാപ്രതിഭ അവാർഡുകളും ഹൗസ് ചാമ്പ്യൻ അവാർഡുകളും ഗ്രാൻഡ് ഫിനാലെയിൽ വിതരണം ചെയ്യും.

രണ്ടാഴ്ചയായി സ്റ്റേജിതര ഇനങ്ങളിലും ഗ്രൂപ്പ് ഇനങ്ങളുടെ പ്രാഥമിക മത്സരങ്ങളിലും വിദ്യാർഥികൾ പങ്കെടുക്കുകയായിരുന്നു.ഇസ ടൗൺ കാമ്പസിലെ എല്ലാ വിദ്യാർത്ഥികളും ഈയിടെ നടന്ന   ഉപന്യാസ രചനാ മത്സരത്തിൽ പങ്കെടുത്തു. കോവിഡ് -19 നിയന്ത്രണങ്ങൾ കാരണം, കഴിഞ്ഞ രണ്ട് വർഷമായി സ്കൂൾ യുവജനോത്സവം ഓൺലൈനായാണ് നടത്തിയിരുന്നത്. ആര്യഭട്ട , വിക്രം സാരാഭായ്, ജെ.സി. ബോസ്, സി.വി. രാമൻ എന്നിങ്ങനെ വിവിധ ഹൗസുകളായി  തിരിച്ചാണ് മത്സരം.സ്റ്റേജ്, സ്റ്റേജ് ഇതര ഇനങ്ങളിൽ ഏറ്റവും കൂടുതൽ പോയിന്റ് നേടുന്ന വിദ്യാർത്ഥികൾക്ക്  കലാശ്രീ , കലാപ്രതിഭ അവാർഡുകൾക്ക്അ സമ്മാനിക്കും. കുറ്റമറ്റതും വേഗത്തിലുള്ളതുമായ ഫലപ്രഖ്യാപനത്തിനായി ഇന്ത്യൻ സ്കൂൾ പ്രത്യേക സോഫ്റ്റ്വെയർ  തയ്യാറാക്കിയിട്ടുണ്ട്.

ഗ്രാൻഡ് ഫിനാലെയിൽ വിജയികൾക്ക് സമ്മാനങ്ങൾ വിതരണം ചെയ്യും. പരിപാടിയിൽ സജീവമായി പങ്കെടുക്കുന്ന വിദ്യാർത്ഥികളെയും അധ്യാപകരെയും ചെയർമാൻ പ്രിൻസ് എസ് നടരാജൻ,സെക്രട്ടറി സജി ആന്റണി, പ്രിൻസിപ്പൽ വി ആർ പളനിസ്വാമി എന്നിവർ അഭിനന്ദിച്ചു. 

The post ഇന്ത്യൻ സ്കൂൾ യുവജനോത്സവത്തിന് വർണാഭമായ തുടക്കം appeared first on Starvision News Malayalam.

മനാമ:  ഗൾഫ് രാജ്യങ്ങളിലെ ഏറ്റവും വലിയ സ്‌കൂൾ കലോത്സവത്തിന് ഞായറാഴ്ച  ഇന്ത്യൻ സ്‌കൂളിൽ തിരി തെളിയും. ഇനി ഏതാനും നാളുകൾ  കലയുടെ രാപ്പകലുകൾ സമ്മാനിക്കുന്ന ഇന്ത്യൻ സ്‌കൂൾ യുവജനോത്സത്തിലെ സ്റ്റേജ് ഇനങ്ങൾക്കാണ് നാളെ തുടക്കമാവുന്നത്. 120ഓളം ഇനങ്ങളിലായി നാലായിയിരത്തിലേറെ വിദ്യാർത്ഥികൾ പങ്കെടുക്കുന്ന  ഈ കലോത്സവം ഗൾഫ് രാജ്യങ്ങളിലെ ഏറ്റവും വലിയ സ്‌കൂൾ കലോത്സവമായി വിലയിരുത്തപ്പെടുന്നു.   ഞായറാഴ്ച വൈകുന്നേരം  ആറുമണിക്ക്  ഇസ ടൗണിലെ ജഷന്മാൾ ഓഡിറ്റോറിയത്തിൽ  സ്റ്റേജ് ഇനങ്ങളുടെ ഔപചാരിക ഉദ്ഘാടനം നടക്കും. തുടർന്ന് നാടോടി നൃത്തം, മൈം, മോണോ ആക്ട് എന്നിവ  അരങ്ങേറും. 

വിവിധ  വേദികളിയായി നടക്കുന്ന  കലോത്സവത്തിന്റെ ഗ്രാൻഡ് ഫിനാലെ നവംബർ 23നു ഇന്ത്യൻ സ്‌കൂൾ ഗ്രൗണ്ടിലാണ്   നടക്കുക. ഗ്രാൻഡ് ഫിനാലെയിൽ കലാശ്രീ, കലാപ്രതിഭ പുരസ്കാരങ്ങൾ സമ്മാനിക്കും. കൊറോണ ഭീതി വിട്ടൊഴിഞ്ഞ ശേഷം നടക്കുന്ന കലോത്സവത്തിൽ കഴിഞ്ഞ രണ്ടാഴ്ചയായി വിദ്യാർത്ഥികൾ സ്റ്റേജ് ഇതര രചനാ മത്സരങ്ങളിലും ഗ്രൂപ് ഇനങ്ങളിലേക്കുള്ള പ്രാഥമിക മത്സരങ്ങളിലും ഏർപ്പെട്ടു വരികയായിരുന്നു. വിദ്യാർഥികളിൽ  കലാ നൈപുണ്യവും നേതൃപാടവവും വളർത്തുന്നുന്നതിന്റെ ഭാഗമായി ഈ കലോത്സവത്തിൽ  ഹൗസ്   സമ്പ്രദായമാണ് ഇന്ത്യൻ സ്‌കൂൾ  പിന്തുടരുന്നത്.

വിദ്യാർത്ഥികളെ നാല് ഹൗസുകളായി തിരിച്ചാണ് മത്സരം. ആര്യഭട്ട,വിക്രം സാരാഭായ്,ജെ.സി ബോസ് , സി.വി രാമൻ എന്നീ ഗ്രൂപ്പുകളാണ് കലോത്സവത്തിൽ കിരീടം ചൂടാൻ മത്സരിക്കുന്നത്. ആറു മുതൽ 17 വയസു വരെയുള്ള വിദ്യാർത്ഥികളെ  നാല് പ്രായ വിഭാഗങ്ങളിലായി  തിരിച്ചാണ് മത്സരം. സ്റ്റേജ്, നോൺ സ്റ്റേജ് ഇനങ്ങളിലായി ഏറ്റവും കൂടുതൽ പോയന്റ് നേടുന്ന വിദ്യാർത്ഥികളാണ്  കലാശ്രീ, കലാപ്രതിഭ പുരസ്കാരങ്ങൾക്ക്  അർഹരാവുക.  

കുറ്റമറ്റ രീതിയിലും വേഗത്തിലും ഫലപ്രഖ്യാപനം നടത്താനായി പ്രത്യേക സോഫ്ട്‍വെയർ ഇന്ത്യൻ സ്‌കൂൾ തയ്യാറാക്കിയിട്ടുണ്ട് .   ഏകദേശം 800 ഓളം ട്രോഫികളാണ് കൗമാര പ്രതിഭകളെ  കാത്തിരിക്കുന്നത്.   യാതൊരു പരാതികൾക്കും ഇട നൽകാതെ അടുക്കും ചിട്ടയോടെയും കലോത്സവം നടത്താൻ സ്‌കൂൾ പ്രതിജ്ഞാബദ്ധമാണെന്ന്  സ്‌കൂൾ  ചെയർമാൻ പ്രിൻസ് എസ് നടരാജൻ പറഞ്ഞു.

രണ്ടു കാമ്പസുകളിലായി 12000  വിദ്യാർത്ഥികൾ പഠിക്കുന്ന   ഇന്ത്യൻ സ്‌കൂളിന്റെ  കലണ്ടറിൽ ഏവരും ഉറ്റുനോക്കുന്ന കലാ മാമാങ്കമാണ് തരംഗ് എന്ന യുവജനോത്സവമെന്ന് സ്‌കൂൾ സെക്രട്ടറി സജി ആന്റണി പറഞ്ഞു.  ഇയ്യിടെ സമാപിച്ച സ്റ്റേജ് ഇതര മത്സരങ്ങളിൽ ആവേശജനകമായ പങ്കാളിത്തമാണ് വിദ്യാർത്ഥികളിൽ നിന്നും ഉണ്ടായതെന്ന് പ്രിൻസിപ്പൽ വി ആർ പളനിസ്വാമി പറഞ്ഞു.

The post ഇന്ത്യൻ സ്‌കൂളിൽ തരംഗ് കലോത്സവത്തിന് നാളെ തുടക്കമാവും appeared first on Starvision News Malayalam.