കൊച്ചി: സിനിമാപ്രചാരണത്തിന്റെ പേരിൽ ഡിജിറ്റൽ പ്രമോഷൻ സംഘങ്ങൾ നടത്തുന്ന ലക്ഷങ്ങളുടെ തട്ടിപ്പ് പുറത്ത്. ഓൺലൈൻ മാധ്യമങ്ങൾക്ക് പണം കൊടുത്തതായുള്ള രേഖയുണ്ടാക്കി നടത്തിയ വെട്ടിപ്പാണ് ഫെഫ്കയുടെയും പ്രൊഡ്യൂസേഴ്‌സ് അസോസിയേഷന്റെയും നേതൃത്വത്തിൽ നടന്ന യോഗത്തിനിടെ പുറത്തായത്. ഇതേത്തുടർന്ന് മലയാളത്തിലെ ഒരു നടന്റെ നേതൃത്വത്തിലുള്ള നിർമാണക്കമ്പനി ഡിജിറ്റൽ പ്രമോഷൻ സംഘങ്ങളെ ഒഴിവാക്കി നേരിട്ട് പ്രചാരണം നടത്താൻ തീരുമാനിച്ചു. റിവ്യൂകളുടെ പേരിലുള്ള അധിക്ഷേപവും നവമാധ്യമപ്രചാരണത്തിന്റെ പേരിൽ നിർമാതാക്കളെ ഭീഷണിപ്പെടുത്തുന്നുവെന്ന പരാതിയും ചർച്ചയായപ്പോഴാണ് ഇരുസംഘടനകളും ചൊവ്വാഴ്ച ഓൺലൈൻ മാധ്യമങ്ങളുടെ യോഗം വിളിച്ചത്. പണം നൽകിയിട്ടും എന്തുകൊണ്ട് മോശം അഭിപ്രായം പറയുന്നുവെന്ന ചോദ്യം മുൻനിര ഓൺലൈൻ മാധ്യമത്തിനുനേർക്ക് ഉയർത്തി. തങ്ങൾക്ക് പണമൊന്നും ലഭിച്ചിട്ടില്ലെന്നായിരുന്നു അവരുടെ പ്രതിനിധിയുടെ മറുപടി. അപ്പോഴാണ് ആ ഓൺലൈൻ മാധ്യമത്തിന് പണം നൽകിയതായി കാണിച്ച് ഡിജിറ്റൽ പ്രമോഷൻ സംഘങ്ങൾ നിർമാതാവിന് നൽകിയ രേഖകൾ സിനിമാസംഘടനകൾ പ്രദർശിപ്പിച്ചത്.

ഒരു സിനിമയ്ക്ക് ഒരുലക്ഷം രൂപവരെ നൽകിയതായിട്ടായിരുന്നു കണക്ക്. മറ്റുചില പ്രധാനമാധ്യമങ്ങളുടെ പേരിലും പണംതട്ടിപ്പ് നടത്തിയെന്നാണ് നിർമാതാക്കൾ വെളിപ്പെടുത്തിയത്. യോഗത്തിൽ ഡിജിറ്റൽ പ്രമോഷൻ സംഘങ്ങളുടെ പ്രതിനിധികൾ എതിർപ്പുയർത്തിയപ്പോൾ ഇത് ബഹളത്തിൽ കലാശിച്ചു. ക്ഷണമില്ലാതിരുന്നിട്ടും ഡിജിറ്റൽ പ്രമോഷൻ സംഘങ്ങളുടെ പ്രതിനിധികൾ യോഗത്തിനെത്തുകയായിരുന്നുവെന്നാണ് ഒരു ഓൺലൈൻ മാധ്യമത്തിന്റെ പ്രതിനിധി പറഞ്ഞത്. യോഗത്തിന്റെ വിശദാംശങ്ങൾ അറിയിച്ച് ഫെഫ്ക പുറത്തിറക്കിയ പത്രക്കുറിപ്പിൽ ഡിജിറ്റൽ കോ-ഓർഡിനേറ്റർമാർ പങ്കെടുത്തുവെന്ന് പറയുന്നുണ്ട്. ഇതുവരെ ഒന്നിലധികം ഡിജിറ്റൽ പ്രമോഷൻ സംഘങ്ങളെയാണ് നടന്റെ നേതൃത്വത്തിലുള്ള കമ്പനി നവമാധ്യമപ്രചാരണം ഏല്പിച്ചിരുന്നത്. പണംചോരുന്ന വഴികൾ പുറത്തായതോടെ ഇവരെയെല്ലാം ഒഴിവാക്കാൻ തീരുമാനിച്ചു.

The post സോഷ്യൽ മീഡിയയിൽ സിനിമകളുടെ പ്രചാരണം; ഡിജിറ്റൽ പ്രമോഷൻ സംഘങ്ങൾ നടത്തുന്ന ലക്ഷങ്ങളുടെ തട്ടിപ്പ് പുറത്ത് appeared first on Starvision News Malayalam.