ന്യൂഡല്‍ഹി: ഐക്യരാഷട്രസഭയുടെ സമാധാനസേനയുടെ ഭാഗമായ ഇന്ത്യന്‍ വനിതാ അംഗത്തിന് മിലിറ്ററി ജെന്‍ഡര്‍ അഡ്വക്കേറ്റ് പുരസ്‌കാരം. യു.എന്‍. ദൗത്യത്തിന്റെ ഭാഗമായി കോംഗോയില്‍ സേവനമനുഷ്ടിച്ച മേജര്‍ രാധികാ സെന്‍ ആണ് പുരസ്‌കാരത്തിന് അര്‍ഹയായത്. യു.എന്‍. സമാധാനസേനാംഗങ്ങള്‍ക്കായുള്ള അന്താരാഷ്ട്രദിനമായ മേയ് 30-ന് സെക്രട്ടറി ജനറല്‍ അന്റോണിയോ ഗുട്ടറസ് രാധികയ്ക്ക് പുരസ്‌കാരം സമ്മാനിക്കും.

മിലിറ്ററി ജെന്‍ഡര്‍ അഡ്വക്കേറ്റ് പുരസ്‌കാരം നേടിയ മേജര്‍ രാധികാ സെന്നിനെ അന്റോണിയോ ഗുട്ടറസ് അഭിനന്ദിച്ചു. രാധികാ സെന്‍ എല്ലാവര്‍ക്കും മാതൃകയാണെന്നും അവരുടെ സേവനം ഐക്യരാഷ്ട്രസഭയ്ക്ക് വിലമതിക്കാനാകാത്തതായിരുന്നെന്നും അദ്ദേഹം കൂട്ടിച്ചേര്‍ത്തു.

ഈ പുരസ്‌കാരം തനിക്ക് പ്രത്യേക മൂല്യമുള്ളതാണെന്ന് മേജര്‍ രാധികാ സെന്‍ പറഞ്ഞു. കോംഗോയിലെ വെല്ലുവിളി നിറഞ്ഞ സാഹചര്യത്തില്‍ കഠിനമായി ജോലിചെയ്യുന്ന എല്ലാ സമാധാനസേനാംഗങ്ങള്‍ക്കുമുള്ള അംഗീകാരമാണ് പുരസ്‌കാരമെന്നും അവര്‍ പറഞ്ഞു. ലിംസമത്വത്തില്‍ ഊന്നിയുള്ള സമാധാനപാലനം എല്ലാവരുടേയും കടമയാണ്, സ്ത്രീകളുടേത് മാത്രമല്ല. നമ്മുടെ മനോഹരമായ വൈവിധ്യങ്ങളില്‍നിന്നാണ് സമാധാനം ആരംഭിക്കുന്നതെന്നും മേജര്‍ രാധിക കൂട്ടിച്ചേര്‍ത്തു.

2023 മാര്‍ച്ച് മുതല്‍ 2024 ഏപ്രില്‍വരെയാണ് മേജര്‍ രാധികാ സെന്‍ സമാധാനദൗത്യത്തിന്റെ ഭാഗമായി കോംഗോ റിപ്പബ്ലിക്കില്‍ സേവനമനുഷ്ടിച്ചത്. ദൗത്യത്തിലെ ഇന്ത്യന്‍ റാപ്പിഡ് ഡിപ്ലോയ്‌മെന്റ് ബറ്റാലിയന്റെ കമാന്‍ഡറായിരുന്നു രാധിക. മേജര്‍ സുമന്‍ ഗവാനിയ്ക്കുശേഷം മിലിറ്ററി ജെന്‍ഡര്‍ അഡ്വക്കേറ്റ് പുരസ്‌കാരം ലഭിക്കുന്ന രണ്ടാമത്തെ ഇന്ത്യക്കാരിയാണ് മേജര്‍ രാധിക. ദക്ഷിണ സുഡാനിലെ സമാധാനദൗത്യത്തിന്റെ ഭാഗമായിരുന്നു 2019-ല്‍ പുരസ്‌കാരം ലഭിച്ച സുമന്‍ ഗവാനി.

The post അഭിമാനമായി മേജർ രാധിക; മിലിറ്ററി ജെന്‍ഡർ അഡ്വക്കേറ്റ് പുരസ്‌കാരം നേടി UN സമാധാനസേനയിലെ ഇന്ത്യൻ വനിത appeared first on Starvision News Malayalam.