Malala Yousafzai | Starvision News Malayalam

പാകിസ്ഥാനിലെത്തി മലാല യൂസഫ്‍സായി; സന്ദർശനം 10 വർഷത്തിന് ശേഷം

News Desk — Tue, 11 Oct 2022 11:44:24 +0000

കറാച്ചി: താലിബാന്‍റെ വധശ്രമം നടന്ന് 10 വർഷത്തിനിപ്പുറം മലാല യൂസഫ്‍സായി പാകിസ്ഥാനിലെത്തി. ചരിത്രത്തിലെ ഏറ്റവും വലിയ വെള്ളപ്പൊക്കത്തെ അഭിമുഖീകരിക്കുന്ന പാകിസ്ഥാനിലെ മഹാപ്രളയത്തിന്‍റെ ഇരകളെ കാണാനാണ് മലാല സ്വന്തം രാജ്യത്തേക്ക് മടങ്ങിയത്. 10 വർഷം മുമ്പ് താലിബാൻ തീവ്രവാദികൾ വെടിയുതിർക്കുമ്പോൾ അവർക്ക് 15 വയസായിരുന്നു പ്രായം. പെണ്‍കുട്ടികളുടെ വിദ്യാഭ്യാസത്തിന് വേണ്ടി വാദിച്ചതിനാണ് മലാലയെ താലിബാൻ വെടിവച്ചത്. സ്ത്രീകൾക്ക് വിദ്യാഭ്യാസം നൽകുന്നതിന് താലിബാൻ എതിരാണ്.

വെടിവെപ്പിൽ ഗുരുതരമായി പരിക്കേറ്റ മലാലയെ വിദഗ്ധ ചികിത്സയ്ക്കായി യുകെയിലേക്ക് മാറ്റിയിരുന്നു. തുടർച്ചയായ ശസ്ത്രക്രിയകൾക്കും നീണ്ട ചികിത്സകൾക്കും ശേഷം ജീവിതത്തിലേക്ക് മടങ്ങിയെത്തിയ മലാല, ആഗോള വിദ്യാഭ്യാസ വക്താവായും പിന്നീട് സമാധാനത്തിനുള്ള നോബൽ സമ്മാനം നേടുന്ന ഏറ്റവും പ്രായം കുറഞ്ഞ വ്യക്തിയായും മാറി. ആക്രമണത്തിന്‍റെ പത്താം വാർഷികത്തിന്റെ രണ്ട് ദിവസത്തിന് ശേഷമാണ് മലാല കറാച്ചിയിലെത്തിയത്. പ്രളയം മൂലം പാകിസ്ഥാന് 40 മില്യണ്‍ ഡോളറിന്‍റെ നഷ്ടമുണ്ടായതായി ലോകബാങ്ക് റിപ്പോര്‍ട്ടുകള്‍ വന്നിരുന്നു. ഇത്രയും വലിയ നഷ്ടം നേരിട്ട പാകിസ്ഥാന് സഹായം നൽകാനുള്ള ശ്രമങ്ങളുടെ ഭാഗമായാണ് മലാല സ്വന്തം രാജ്യം സന്ദർശിക്കുന്നത്.

പാകിസ്ഥാനിലെ വെള്ളപ്പൊക്കത്തിന്‍റെ ആഘാതത്തിൽ അന്താരാഷ്ട്ര ശ്രദ്ധ കേന്ദ്രീകരിക്കുന്നതിനും നിർണായക മാനുഷിക സഹായത്തിന്‍റെ ആവശ്യകത ശക്തിപ്പെടുത്തുന്നതിനുമാണ് സന്ദർശനമെന്ന് മലാലയുടെ സന്നദ്ധ സംഘടനയായ മലാല ഫണ്ട് പ്രസ്താവനയിൽ പറഞ്ഞു. ഏകദേശം 8 ദശലക്ഷം ആളുകൾ വെള്ളപ്പൊക്കം മൂലം കുടിയൊഴിക്കപ്പെട്ടു. നിലവിൽ ഇവർ ഗുരുതരമായ ആരോഗ്യപ്രശ്നങ്ങൾ നേരിടുകയാണെന്നും റിപ്പോർട്ടുകൾ പറയുന്നു.

The post പാകിസ്ഥാനിലെത്തി മലാല യൂസഫ്‍സായി; സന്ദർശനം 10 വർഷത്തിന് ശേഷം appeared first on Starvision News Malayalam.

ഹിജാബ് വിവാദത്തില്‍ പ്രതികരണവുമായി മലാല യൂസഫ്‌സായ്

News Desk — Wed, 09 Feb 2022 08:27:41 +0000

ഇസ്ലാമബാദ്: കര്‍ണാടകയിലെ ഹിജാബ് വിവാദത്തില്‍ പ്രതികരണവുമായി നൊബേല്‍ സമ്മാന ജേതാവും പാകിസ്ഥാനി വനിത വിദ്യാഭ്യാസ പ്രവര്‍ത്തകയുമായ മലാല യൂസഫ്‌സായ്. പെണ്‍കുട്ടികളെ ഹിജാബ് ധരിച്ച്‌ സ്കൂളില്‍ പോകാന്‍ അനുവദിക്കാത്തത് ഭയാനകമാണെന്ന് മലാല യൂസഫ്‌സായ് പറഞ്ഞു. ട്വിറ്ററിലൂടെയായിരുന്നു മലാലയുടെ പ്രതികരണം.

‘പെണ്‍കുട്ടികളെ ഹിജാബ് ധരിച്ച്‌ സ്കൂളില്‍ പോകാന്‍ അനുവദിക്കാത്തത് ഭയാനകം. എന്ത് ധരിക്കണം എന്നതിന്റെ പേരില്‍ സ്ത്രീകളെ വസ്തുവല്‍ക്കരിക്കുന്നത് നിലനില്‍ക്കുന്നു. ഇന്ത്യന്‍ നേതാക്കള്‍ മുസ്ലീം സ്ത്രീകളെ പാര്‍ശ്വവല്‍ക്കരിക്കുന്നത് അവസാനിപ്പിക്കണം’- മലാല ട്വിറ്ററില്‍ കുറിച്ചു.

The post ഹിജാബ് വിവാദത്തില്‍ പ്രതികരണവുമായി മലാല യൂസഫ്‌സായ് appeared first on Starvision News Malayalam.

നൊബേൽ പുരസ്‌കാര ജേതാവ് മലാല യൂസഫ് സായി വിവാഹിതയായി

News Desk — Wed, 10 Nov 2021 07:29:10 +0000

ന്യൂയോർക്: നൊബേൽ പുരസ്‌കാര ജേതാവും പാകിസ്ഥാൻ സാമൂഹ്യ പ്രവർത്തകയുമായ മലാല യൂസഫ്‌ സായി(24)വിവാഹിതയായി. ബർമിംഗ്ഹാമിലെ വീട്ടിൽ അടുത്ത ബന്ധുക്കൾ മാത്രം പങ്കെടുത്ത സ്വകാര്യ ചടങ്ങിലായിരുന്നു നിക്കാഹ് നടന്നത്. പാകിസ്ഥാൻ ക്രിക്കറ്റ് ബോര്‍ഡിന്‍റെ ഹൈ പെര്‍ഫോമന്‍സ് സെന്‍റര്‍ ജനറല്‍ മാനേജര്‍ അസര്‍ മാലികാണ് വരന്‍. പെൺകുട്ടികളുടെ വിദ്യാഭ്യാസത്തിനായി ശബ്‌ദമുയർത്തുന്ന മലാല ട്വിറ്ററിലൂടെയാണ് തന്‍റെ വിവാഹക്കാര്യം ലോകത്തെ അറിയിച്ചത്.
എന്‍റെ ജീവിതത്തിലെ സുപ്രധാന ദിവസമാണ് ഇന്ന്. അസറും താനും ജീവിതത്തിൽ പങ്കാളികളാകാൻ പോകുന്നു. നിങ്ങളുടെ പ്രാർഥനകൾ ഒപ്പം വേണം.’ മലാല ട്വിറ്ററിൽ കുറിച്ചു.

പാകിസ്ഥാനിൽ വച്ച് പെൺകുട്ടികളുടെ വിദ്യാഭ്യാസത്തിനായി ശബ്‌ദമുയർത്തിയതിനെ തുടർന്ന് താലിബാൻ മലാലക്ക് നേരെ നിറയൊഴിക്കുകയായിരുന്നു. 2012ൽ സ്‌കൂളിൽ നിന്ന് വീട്ടിലേക്ക് സ്‌കൂൾ ബസിൽ പോകുമ്പോഴായിരുന്നു താലിബാൻ ആക്രമണം നടത്തിയത്. തുടർന്ന് ചികിത്സക്കായി ഇംഗ്ലണ്ടിലെ ബിർമിൻഹാമിലെത്തിയ മലാലക്കൊപ്പം കുടുംബവും എത്തുകയായിരുന്നു. തുടർന്ന് അവിടെ നിന്ന് സ്‌കൂൾ വിദ്യാഭ്യാസം പൂർത്തിയാക്കിയ മലാല ഓക്‌സ്‌ഫോർഡ് സർവകലാശാലയിൽ നിന്ന് ബിരുദവും നേടിയിട്ടുണ്ട്. നൊബേൽ സമ്മാനം നേടുന്ന ഏറ്റവും പ്രായം കുറഞ്ഞ വ്യക്തിയാണ് മലാല.

The post നൊബേൽ പുരസ്‌കാര ജേതാവ് മലാല യൂസഫ് സായി വിവാഹിതയായി appeared first on Starvision News Malayalam.