ന്യൂഡൽഹി∙ ലോട്ടറിപോലെയാണ് എക്സിറ്റ്പോളും! സമ്മാനം ഒരിക്കലും അടിക്കാത്തവർക്ക് പോലും നറുക്കെടുപ്പുവരെ ടിക്കറ്റ് പ്രതീക്ഷ നൽകും. എക്സിറ്റ്പോളും അങ്ങനെതന്നെ, അവസാനം വരെ പ്രതീക്ഷ നൽകും. ഫലമുണ്ടാകണമെന്നില്ല. കഴിഞ്ഞ ലോക്സഭാ തിരഞ്ഞെടുപ്പിലെ എക്സിറ്റ്പോൾ പ്രവചനങ്ങൾ തെറ്റിയതിനെ തുടർന്ന് ആക്സിസ് മൈ ഇന്ത്യ ചെയർമാനും മാനേജിങ് ഡയറക്ടറുമായ പ്രദീപ് ഗുപ്ത ചാനൽ അഭിമുഖത്തിനിടെ പൊട്ടിക്കരഞ്ഞ സാഹചര്യമുണ്ടായി.

കൊട്ടിഘോഷിക്കപ്പെടുന്ന എക്സിറ്റ്പോളുകളുടെ ‘ഗുണം’ കുറയുന്നതായാണ് സമീപകാല തിരഞ്ഞെടുപ്പ് ഫലങ്ങൾ തെളിയിക്കുന്നത്. ബിജെപിയുടെ നേതൃത്വത്തിലുള്ള എൻ‌ഡിഎ സഖ്യത്തിന് 350ന് മുകളിൽ സീറ്റുകൾ ലഭിക്കുമെന്നായിരുന്നു മിക്ക എക്സിറ്റ് പോളുകളും പ്രവചിച്ചത്. ഇന്ത്യാ സഖ്യത്തിന് 120–150 സീറ്റുകൾ ലഭിക്കുമെന്നും പ്രവചിച്ചു. എൻഡിഎ സഖ്യം 292ൽ ഒതുങ്ങി. ഇന്ത്യാ സഖ്യത്തിന് 234 സീറ്റുകൾ ലഭിച്ചു. മൂന്നാം തവണയും കേന്ദ്രത്തിൽ അധികാരത്തിലെത്തിയെങ്കിലും ഒറ്റയ്ക്ക് ഭരിക്കാനുള്ള ഭൂരിപക്ഷം ബിജെപിക്ക് ലഭിച്ചില്ല. ലഭിച്ചത് 240 സീറ്റ്.

ഹരിയാന നിയമസഭയിൽ ഹാട്രിക് വിജയം ലക്ഷ്യമിടുന്ന ബിജെപിയെ കോൺഗ്രസ് പരാജയപ്പെടുത്തുമെന്നായിരുന്നു എല്ലാ എക്സിറ്റ് പോളുകളും. 44 മുതൽ 65 സീറ്റുവരെയാണ് കോൺഗ്രസിന് കണക്കാക്കിയത്. ബിജെപിക്ക് 18 മുതൽ 35 സീറ്റുകൾവരെയും. ഈ പ്രവചനങ്ങൾ പിഴച്ചു. ബിജെപി മുന്നേറി. ബിജെപിക്ക് 48 സീറ്റ് ലഭിച്ചപ്പോൾ കോണ്‍ഗ്രസിന് ലഭിച്ചത് 37 സീറ്റുകൾ മാത്രം. കശ്മീരിലെ പ്രവചനങ്ങൾ ഒരു പരിധിവരെ യാഥാർഥ്യമായി. കോൺഗ്രസും നാഷനൽ കോൺഗ്രസും ഉൾപ്പെടുന്ന സഖ്യത്തിനാണ് നേരിയ മുൻതൂക്കം എല്ലാ എക്സിറ്റ് പോളുകളും പ്രവചിച്ചത്. 31 മുതൽ 50 സീറ്റുവരെ. നാഷനൽ കോൺഫറൻസിന് 42 സീറ്റും കോൺഗ്രസിന് 6 സീറ്റും ലഭിച്ചു. 20 മുതൽ 32വരെ സീറ്റുകളാണ് ബിജെപിക്ക് പ്രവചിച്ചത്. 29 സീറ്റുകൾ ലഭിച്ചു. എക്സിറ്റ് പോളുകളിൽ 4 മുതൽ 12 വരെ സീറ്റുകളാണ് പിഡിപിക്ക് പ്രവചിച്ചത്. ഒരളവുവരെ ഈ പ്രവചനവും ഫലിച്ചു. പിഡിപിക്ക് ലഭിച്ചത് 3 സീറ്റുകൾ. മറ്റുള്ള പാർട്ടികൾ 4 മുതൽ 18 വരെ സീറ്റുകൾ വരെ നേടുമെന്നായിരുന്നു പ്രവചനം. ലഭിച്ചത് 7 സീറ്റുകൾ.

ദൈനിക് ഭാസ്കർ, പീപ്പിൾസ് പൾസ്, ഇന്ത്യാ ടുഡെ–സിവോട്ടർ, ആക്സിസ് മൈ ഇന്ത്യ, റിപ്പബ്ലിക്–പി മാർക്ക് അടക്കമുള്ളവ ഹരിയാനയിൽ കോൺഗ്രസിനാണ് മുൻതൂക്കം കൽപിച്ചത്. ഒരു സർവേപോലും ബിജെപിക്ക് 35 സീറ്റിനു മുകളിൽ പ്രവചിച്ചില്ല. കോൺഗ്രസിന് 44 സീറ്റിനു മുകളിൽ ലഭിക്കുമെന്നാണ് എല്ലാവരും പ്രവചിച്ചത്. രണ്ടും യാഥാർഥ്യമായില്ല. ജമ്മു കശ്മീരിൽ 31 സീറ്റിന് മുകളിൽ കോൺഗ്രസ്–എൻസി സഖ്യം നേടുമെന്ന പ്രവചനങ്ങൾ യാഥാർഥ്യമായി. എൻഡിഎയ്ക്ക് 20 സീറ്റിനു മുകളിൽ ലഭിക്കുമെന്ന പ്രവചനങ്ങളും സത്യമായി.

കഴിഞ്ഞ ലോക്സഭാ തിരഞ്ഞെടുപ്പിൽ കേരളത്തെ സംബന്ധിച്ച ചില പ്രവനങ്ങളും പാളി. എൽഡിഎഫിന് ഒരു സീറ്റ് ലഭിക്കുമെന്ന ഇന്ത്യാ ടുഡേ പ്രവചനം ഫലിച്ചു. നാല് സീറ്റ് ലഭിക്കുമെന്ന ടൈംസ് നൗ, രണ്ട് മുതൽ അഞ്ചുവരെ സീറ്റ് ലഭിക്കുമെന്ന സിഎൻഎൻ–ന്യൂസ് 18, മൂന്നു മുതൽ അഞ്ച് സീറ്റുകൾവരെ ലഭിക്കുമെന്ന ഇന്ത്യടിവി എക്സിറ്റ് പോളുകൾ ഫലിച്ചില്ല. എന്‍ഡിഎയ്ക്ക് 3 സീറ്റുകൾവരെ പ്രവചിച്ച ചില പോളുകളും തെറ്റായി. യുഡിഎഫിന് രണ്ടോ അതിലധികമോ സീറ്റുകൾ നഷ്ടപ്പെടുമെന്നായിരുന്നു എല്ലാ സർവേകളും. അഞ്ചിലധികം സീറ്റുകൾ വരെ നഷ്ടപ്പെടുമെന്ന് പ്രവചനമുണ്ടായി. എന്നാൽ ഒരു സീറ്റ് മാത്രമാണ് യുഡിഎഫിന് നഷ്ടമായത്. ബിജെപി ആദ്യമായി സീറ്റ് നേടുമെന്ന പ്രവചനം യാഥാർഥ്യമായി.

The post പ്രവചനങ്ങൾ പാളി; ഹരിയാനയിൽ ഹാട്രിക് വിജയവുമായി ബിജെപി appeared first on Starvision News Malayalam.

തിരുവനന്തപുരം: ലോക്സഭാ തിരഞ്ഞെടുപ്പില്‍ പാര്‍ട്ടിക്കേറ്റ കനത്ത പ്രഹരത്തിന്റെ പേരില്‍ സി.പി.എം. സംസ്ഥാന കമ്മിറ്റിയില്‍ ധനമന്ത്രി കെ.എന്‍. ബാലഗോപാലിന് രൂക്ഷ വിമര്‍ശനം. ജനങ്ങള്‍ക്കിടയിലുള്ള ഭരണവിരുദ്ധ വികാരം ചൂണ്ടിക്കാട്ടി ചില അംഗങ്ങള്‍ മുഖ്യമന്ത്രി പിണറായി വിജയനെതിരെ മൃദുവിമര്‍ശനവും ഉയര്‍ത്തി.

തോല്‍വിക്കു പ്രധാന കാരണം ധനവിനിയോഗത്തിലെ പാളിച്ചയാണെന്നു ചൂണ്ടിക്കാട്ടിയാണ് ചിലര്‍ ബാലഗോപാലിനെതിരെ വിമര്‍ശനമുന്നയിച്ചത്. ക്ഷേമ പെന്‍ഷന്‍ വിതരണമുള്‍പ്പെടെ അടിസ്ഥാനവര്‍ഗത്തെ ബാധിക്കുന്ന വിഷയങ്ങളില്‍ കൂടുതല്‍ ജാഗ്രതയോടെ ഇടപെടല്‍ നടത്തിയില്ല. മുന്‍മന്ത്രിമാരുള്‍പ്പെടെയുള്ള മുതിര്‍ന്ന നേതാക്കളുമായി ചര്‍ച്ച നടത്തി ഫലപ്രദമായ നടപടികള്‍ സ്വീകരിക്കുന്നതില്‍ വീഴ്ചയുണ്ടായെന്നും അംഗങ്ങള്‍ പറഞ്ഞു.
കേന്ദ്രം അര്‍ഹമായ ആനൂകൂല്യങ്ങള്‍ തരാത്തതു മൂലമാണ് സാമ്പത്തിക പ്രതിസന്ധിയുണ്ടായതെങ്കിലും അതു ജനങ്ങളെ വേണ്ടവിധം ബോധ്യപ്പെടുത്താനായില്ലെന്നും ചിലര്‍ ചൂണ്ടിക്കാട്ടി.

ഭരണവിരുദ്ധ വികാരം സംബന്ധിച്ച വിമര്‍ശനങ്ങളുടെ മുന മുഖ്യമന്ത്രിയിലേക്കു നീളുന്നതിനിടെയാണ് ധനമന്ത്രിക്കെതിരെയും വിമര്‍ശനമുയരുന്നത്. സംസ്ഥാനത്തെ പ്രശ്നങ്ങള്‍ സംബന്ധിച്ച് പല പരാതികളും തനിക്കു ലഭിച്ചിരുന്നതായി പാര്‍ട്ടി ജനറല്‍ സെക്രട്ടറി സീതാറാം യെച്ചൂരി പറഞ്ഞു. തെരഞ്ഞെടുപ്പില്‍ വന്‍ തിരിച്ചടിക്കിടയാക്കിയ വെല്ലുവിളികള്‍ തിരിച്ചറിയാനും ഫലപ്രദമായി ചെറുക്കാനും സംസ്ഥാന നേതൃത്വത്തിനു കഴിഞ്ഞില്ല. നിരാശാജനകമായ തോല്‍വിയില്‍ ഭരണപരമായ പോരായ്മകളും പരിശോധിക്കണമെന്നും യെച്ചൂരി പറഞ്ഞു.

തദ്ദേശ സ്വയംഭരണ, നിയമസഭാ തെരഞ്ഞെടുപ്പുകള്‍ ലക്ഷ്യംവെച്ച് ഭരണത്തിന്റെ കടിഞ്ഞാണ്‍ കൂടുതല്‍ പാര്‍ട്ടിയുടെ കൈകളില്‍ വേണമെന്ന നിലപാട് പല നേതാക്കളും സ്വീകരിച്ചു. ജനങ്ങളെ നേരിട്ടു ബാധിക്കുന്ന വിഷയങ്ങളില്‍ നയപരമായ തീരുമാനമെടുക്കുന്നതില്‍ മുഖ്യമന്ത്രിയും സര്‍ക്കാരും കൂടുതല്‍ ജാഗ്രത പാലിക്കേണ്ടിയിരുന്നെന്നും അവര്‍ പറഞ്ഞു.

പലയിടങ്ങളിലും പാര്‍ട്ടിയുടെ അടിത്തറയായിരുന്ന ഈഴവ വോട്ടുകള്‍ ഗണ്യമായ തോതില്‍ നഷ്ടമായതായി സംസ്ഥാന സെക്രട്ടറി എം.വി. ഗോവിന്ദന്‍ അവതരിപ്പിച്ച റിപ്പോര്‍ട്ടില്‍ പറയുന്നുണ്ട്. ഇതു സംബന്ധിച്ച ചര്‍ച്ചയില്‍, ന്യൂനപക്ഷ പ്രീണനമെന്നു തോന്നിക്കുന്ന ചില നടപടികള്‍ തിരിച്ചടിയുണ്ടാക്കിയതായി വിമര്‍ശനമുയര്‍ന്നു. മുസ്ലിം ലീഗിനെ കൂടെ കൊണ്ടുവരാന്‍ സംസ്ഥാന സെക്രട്ടറി ശ്രമിച്ചതും അതു പരാജയപ്പെട്ടപ്പോള്‍ സമസ്ത വിഭാഗം സുന്നികളിലെ ഒരു വിഭാഗത്തെ കൂടെ കൂട്ടാന്‍ ശ്രമിച്ചതും തിരിച്ചടിക്ക് കാരണമായി. ഇതു ചൂണ്ടിക്കാട്ടി ബി.ജെ.പി. ഉന്നയിച്ച മുസ്ലിം പ്രീണനമെന്ന ആരോപണം ഹൈന്ദവ വോട്ടുകള്‍ വലിയ തോതില്‍ നഷ്ടമാവാനിടയാക്കിയതായി ചില നേതാക്കള്‍ പറഞ്ഞു.

The post സി.പി.എം സംസ്ഥാന കമ്മിറ്റിയില്‍ ബാലഗോപാലിന് രൂക്ഷ വിമര്‍ശനം; പിണറായിക്കെതിരെ മൃദുവിമര്‍ശനം appeared first on Starvision News Malayalam.

തിരുവനന്തപുരം: ലോക്‌സഭാ തെരഞ്ഞെടുപ്പ് തോല്‍വിയുടെ പേരില്‍ രാജി ചോദിച്ച് വരേണ്ടെന്ന് മുഖ്യമന്ത്രി പിണറായി വിജയന്‍. രാജിവെക്കണമെന്ന് ഉപദേശിക്കുന്ന കോണ്‍ഗ്രസ്, അവര്‍ ഭരിക്കുന്ന എത്ര സംസ്ഥാനങ്ങളിലെ മുഖ്യമന്ത്രിമാര്‍ രാജിവെച്ചുവെന്ന് വ്യക്തമാക്കണമെന്നും അദ്ദേഹം നിയമസഭയില്‍ പറഞ്ഞു. പ്രധാനമന്ത്രി സ്ഥാനത്തു നിന്ന് നരേന്ദ്ര മോദിയെ മാറ്റി നിര്‍ത്താനാണ് ജനം വോട്ടുചെയ്തത്. അത് ഇടതുപക്ഷ വിരോധമായി കാണേണ്ടതില്ല. മഹാവിജയം നേടിയെന്ന് പറയുന്ന യുഡിഎഫിന് എങ്ങനെ വോട്ടുകുറഞ്ഞുവെന്ന് അന്വേഷിക്കണമെന്നും പിണറായി പറഞ്ഞു. ധനാഭ്യര്‍ഥന ചര്‍ച്ചയ്ക്ക് മറുപടി പറയുകയായിരുന്നു മുഖ്യമന്ത്രി

തോല്‍വിയുടെ ഉത്തരവാദിത്വം ഏറ്റെടുത്ത് മുഖ്യമന്ത്രി രാജിവെക്കണം എന്ന് പ്രതിപക്ഷം പറയുന്നു. എന്നാല്‍ എന്തുകൊണ്ട് ഹിമാചലിലും കര്‍ണാടകയിലും മുഖ്യമന്ത്രിമാര്‍ രാജിവെക്കുന്നില്ല. മുഖ്യമന്ത്രി രാജിവെക്കണം എന്ന കോണ്‍ഗ്രസ് ഉപദേശം ആ സംസ്ഥാനങ്ങളിലെ മുഖ്യമന്ത്രിമാര്‍ക്ക് കൊടുക്കാമായിരുന്നില്ലേ? കോണ്‍ഗ്രസ് ഭരിക്കുന്ന എത്ര സംസ്ഥാനങ്ങളിലെ മുഖ്യമന്ത്രിമാര്‍ രാജിവെച്ചുവെന്നും പിണറായി വിജയന്‍ ചോദിച്ചു. ലോക്‌സഭാ – നിയമസഭാ തെരഞ്ഞെടുപ്പുകള്‍ വ്യത്യസ്തമാണെന്നും മുഖ്യമന്ത്രി പറഞ്ഞു.

ലോക്‌സഭാ തെരഞ്ഞെടുപ്പില്‍ സീറ്റുകള്‍ കുറഞ്ഞുപോയതിനാല്‍ സംസ്ഥാന സര്‍ക്കാര്‍ രാജിവെക്കണം എന്ന് പറയുന്നത് എന്ത് യുക്തിയുടെ അടിസ്ഥാനത്തിലാണ്. 2004-ല്‍ എകെ ആന്റണി മുഖ്യമന്ത്രി പദം രാജിവെച്ചത് സീറ്റ് കുറഞ്ഞത് കൊണ്ടല്ല, കോണ്‍ഗ്രസിനകത്തുള്ള സംഘടനാ പ്രശ്‌നം കൊണ്ടായിരുന്നു. അതുവച്ച് രാജി ചോദിക്കാന്‍ വരേണ്ടെന്നും പിണറായി വിജയന്‍ പറഞ്ഞു.

എല്‍ഡിഎഫിന് 4.92 ലക്ഷം വോട്ടാണ് കുറഞ്ഞത്, പ്രതിപക്ഷത്തിന് 6.11 ലക്ഷം വോട്ട് കുറഞ്ഞു. മഹാവിജയം നേടിയ നിങ്ങള്‍ ഈ കുറവ് പരിശോധിക്കണം. ബി.ജെ.പിയുടെ തൃശൂരിലെ ജയം ഗൗരവമായി കാണണമെന്നും മുഖ്യമന്ത്രി പറഞ്ഞു. സംസാരത്തിനിടെ ബഹമുണ്ടാക്കിയ പ്രതിപക്ഷത്തോട് മുഖ്യമന്ത്രി കയര്‍ത്തു. പറയുന്ന കാര്യങ്ങളില്‍ വസ്തുതയുണ്ടോയെന്ന് ആലോചിക്കണം, അല്ലാതെ ബ ബ ബ്ബ പറയരുത്. വിജയത്തില്‍ അഹങ്കരിക്കരുത്. ഇത് ആത്യന്തിക പരാജയമല്ല, ജനപിന്തുണയോടെ ഞങ്ങള്‍ ഇവിടെ ഉണ്ടാകുമെന്നും മുഖ്യമന്ത്രി പറഞ്ഞു.

യുഡിഎഫ് ജയിച്ചതില്‍ തല്‍ക്കാലം വേവലാതിയില്ലെന്നും ബിജെപി ഒരു മണ്ഡലത്തില്‍ ജയിച്ചതിലാണ് വേവലാതി. ബിജെപിയുടെ തൃശൂരിലെ ജയം ഗൗരവമായി കാണണം. പലയിടത്തും യുഡിഎഫിനൊപ്പം നിന്ന ശക്തികള്‍ തൃശൂരില്‍ ഒപ്പംനിന്നില്ലെന്നും പിണറായി പറഞ്ഞു.

The post ‘ബ ബ ബ്ബ പറയരുത്; വിജയത്തില്‍ വല്ലാതെ അഹങ്കരിക്കണ്ട; തോല്‍വിയുടെ പേരില്‍ രാജി ചോദിച്ച് വരേണ്ടെന്ന് മുഖ്യമന്ത്രി appeared first on Starvision News Malayalam.

ന്യൂഡൽഹി: ലോക്സഭാ തിരഞ്ഞെടുപ്പ് പ്രവചനത്തിൽ തെറ്റുപറ്റിപ്പോയെന്ന് രാഷ്ട്രീയ തന്ത്രജ്ഞൻ പ്രശാന്ത് കിഷോർ. തിരഞ്ഞെടുപ്പിലെ സീറ്റുകളുടെ എണ്ണം ഇനി പ്രവചിക്കില്ലെന്നും ഒരു ദേശീയ മാധ്യമത്തിന് നൽകിയ അഭിമുഖത്തിൽ പ്രശാന്ത് വ്യക്തമാക്കി. ‘‘എന്റെ വിലയിരുത്തൽ ഞാൻ നിങ്ങളുടെ മുന്നിൽ പറഞ്ഞിരുന്നു. എന്നാൽ സീറ്റുകളുടെ എണ്ണത്തിൽ അത് തെറ്റായിരുന്നെന്ന് സമ്മതിക്കുന്നു. ബിജെപി 300 സീറ്റിലെത്തുമെന്ന് പറഞ്ഞെങ്കിലും 240 സീറ്റുകൾ മാത്രമാണ് ലഭിച്ചത്. എന്നാൽ നരേന്ദ്ര മോദിയോട് ജനങ്ങൾക്ക് നേരിയ അതൃപ്തിയുണ്ടെന്ന് ഞാൻ പറഞ്ഞിരുന്നു.

ഒരു തന്ത്രജ്ഞൻ എന്ന നിലയിൽ ഇനി സീറ്റുകളുടെ എണ്ണം പ്രവചിക്കാൻ പാടില്ലെന്ന് മനസ്സിലാക്കുന്നു. കഴിഞ്ഞ രണ്ടു വർഷത്തിനിടെ ബംഗാൾ നിയമസഭാ തിരഞ്ഞെടുപ്പിലും ഇക്കഴിഞ്ഞ ലോക്സഭാ തിരഞ്ഞെടുപ്പിലും മാത്രമാണ് സീറ്റുകളുടെ എണ്ണം പറഞ്ഞുള്ള പ്രവചനം നടത്തിയത്’’– അദ്ദേഹം പറഞ്ഞു. സംഖ്യകൾ മാറ്റിവച്ചാൽ താൻ പറഞ്ഞതെല്ലാം ശരിയായെന്നും ദേശീയ മാധ്യമത്തിന് നൽകിയ അഭിമുഖത്തിൽ പ്രശാന്ത് കിഷോർ വ്യക്തമാക്കി.

The post തിരഞ്ഞെടുപ്പിൽ സീറ്റുകളുടെ എണ്ണം ഇനി പ്രവചിക്കില്ല; തെറ്റുപറ്റിപോയി: പ്രശാന്ത് കിഷോർ appeared first on Starvision News Malayalam.

തിരുവനന്തപുരം: ലോക്‌സഭാ തെരഞ്ഞെടുപ്പു ഫലം ജനാധിപത്യ സമൂഹത്തിന് പ്രതീക്ഷ നല്‍കുന്നതാണെന്ന് എസ്.ഡി.പി.ഐ സംസ്ഥാന സെക്രട്ടറിയേറ്റ്. ജനാധിപത്യവും ഭരണഘടനാമൂല്യങ്ങളും അട്ടിമറിക്കാനും ഏകാധിപത്യം അടിച്ചേല്‍പ്പിക്കാനുമുള്ള ഫാസിസ്റ്റ് ശ്രമങ്ങള്‍ക്കേറ്റ കനത്ത തിരിച്ചടിയാണിതെന്നും സെക്രട്ടറിയേറ്റ് വിലയിരുത്തി.

എസ്.ഡി.പി.ഐ സ്വീകരിച്ച രാഷ്ട്രീയ നിലപാട് ശരിയാണെന്ന് ബോധ്യപ്പെട്ടു. പ്രവര്‍ത്തകരെ ആശയാടിത്തറയുള്ളവരാക്കി മാറ്റാന്‍ ഇടതു- വലതു മുന്നണികള്‍ക്ക് കഴിയാത്തതാണ് തൃശൂരിലെ ബി.ജെ.പി. വിജയത്തിന് അനുകൂല സാഹചര്യമൊരുക്കിയത്. തൃശൂരില്‍ മാത്രമല്ല സംസ്ഥാനത്തെ ഭൂരിപക്ഷം മണ്ഡലങ്ങളിലും ഇരു മുന്നണികളുടെയും വോട്ട് ബി.ജെ.പിക്ക് ലഭിച്ചിട്ടുണ്ട്.

ഫാസിസത്തിന് ഇന്ത്യന്‍ മണ്ണ് പാകപ്പെടില്ലെന്ന് ഒരിക്കൽക്കൂടി വ്യക്തമാക്കുന്നതാണ് തിരഞ്ഞെടുപ്പ് ഫലം. രാജ്യത്തെ ഭൂരിപക്ഷം ജനത മതേതര ചേരിക്കൊപ്പമാണെന്ന് വീണ്ടും തെളിയിച്ചിരിക്കുന്നു. ഭരണ സംവിധാനങ്ങളെയും കേന്ദ്ര ഏജന്‍സികളെയും ദുരുപയോഗം ചെയ്തും മാധ്യമങ്ങളില്‍ ചിലരെ ആജ്ഞാനുവര്‍ത്തികളാക്കി നുണപ്രചാരണങ്ങളും വിദ്വേഷ പ്രചാരണങ്ങളും നടത്തി ജനങ്ങളെ വിഭജിച്ച് നേട്ടം കൊയ്യാനുള്ള സംഘ്പരിവാര ശ്രമമാണ് പൊളിഞ്ഞിരിക്കുന്നത്.

സംസ്ഥാന സര്‍ക്കാരിന്റെ ജനവിരുദ്ധ നയനിലപാടുകള്‍ക്കെതിരേയും ആഭ്യന്തര വകുപ്പിനെ സംഘ്പരിവാര്‍ അജണ്ടയ്ക്കനുസരിച്ച് പ്രവര്‍ത്തിക്കാന്‍ മൗനാനുവാദം നല്‍കുന്നതിനെതിരേയുമുള്ള ജനവിധി മാനിച്ച് തിരുത്തല്‍ നടപടികള്‍ സ്വീകരിക്കാന്‍ ഇടതു സര്‍ക്കാര്‍ തയ്യാറാവണമെന്ന് സംസ്ഥാന സെക്രട്ടറിയേറ്റ് യോഗം ആവശ്യപ്പെട്ടു. യോഗത്തില്‍ സംസ്ഥാന പ്രസിഡന്റ് മൂവാറ്റുപുഴ അഷ്‌റഫ് മൗലവി അധ്യക്ഷത വഹിച്ചു.

The post ലോക്‌സഭാ തെരഞ്ഞെടുപ്പ് ഫലം ജനാധിപത്യ സമൂഹത്തിന് പ്രതീക്ഷ നല്‍കുന്നത്: എസ്.ഡി.പി.ഐ appeared first on Starvision News Malayalam.

ന്യൂഡല്‍ഹി: ലോക്‌സഭ തെരഞ്ഞെടുപ്പിലെ വോട്ടെണ്ണലിനുള്ള ഒരുക്കങ്ങള്‍ പൂര്‍ത്തിയായതായി മുഖ്യ തെരഞ്ഞെടുപ്പ് കമ്മീഷണര്‍ രാജീവ് കുമാര്‍. വോട്ടെണ്ണലിൽ വീഴ്ച ഉണ്ടാകില്ല. ശക്തമായ സംവിധാനമാണ് ഒരുക്കിയിട്ടുള്ളതെന്നും ചീഫ് ഇലക്ഷൻ കമ്മീഷണർ പറഞ്ഞു. ലോക്‌സഭ തെരഞ്ഞെടുപ്പില്‍ 64.2 കോടി പേര്‍ വോട്ടു ചെയ്തു. ഇത് ലോക റെക്കോര്‍ഡാണ്. വനിതാ പങ്കാളിത്തത്തിലും റെക്കോര്‍ഡാണെന്ന് തെരഞ്ഞെടുപ്പ് കമ്മീഷന്‍ വാര്‍ത്താസമ്മേളനത്തില്‍ പറഞ്ഞു.

ജമ്മുകശ്മീരില്‍ ഉള്‍പ്പെടെ ഉയര്‍ന്ന പോളിങ്ങാണ് രേഖപ്പെടുത്തിയത്. ഇത് എല്ലാ ജി 7 രാജ്യങ്ങളിലെയും 1.5 ഇരട്ടി വോട്ടര്‍മാരും യൂറോപ്യന്‍ യൂണിയനിലെ 27 രാജ്യങ്ങളിലെ 2.5 ഇരട്ടി വോട്ടര്‍മാരുമാണ്. വോട്ടെടുപ്പിലെ വനിതാ പങ്കാളിത്തത്തെയും തെരഞ്ഞെടുപ്പ് കമ്മീഷന്‍ അഭിനന്ദിച്ചു.

ലോക്‌സഭ തെരഞ്ഞെടുപ്പില്‍ 31.2 കോടി വനിതകള്‍ വോട്ടു ചെയ്തു. വനിതാ പങ്കാളിത്തത്തിലും റെക്കോര്‍ഡാണ്. വോട്ടു രേഖപ്പെടുത്തിയ എല്ലാവര്‍ക്കും തെരഞ്ഞെടുപ്പ് കമ്മീഷന്‍ സല്യൂട്ട് നല്‍കുന്നു. സംഭവബഹുലമായ വോട്ടെടുപ്പ് കാലം കഴിഞ്ഞു. സംതൃപ്തമായ ദൗത്യമായിരുന്നുവെന്ന് മുഖ്യ തെരഞ്ഞെടുപ്പ് കമ്മീഷണര്‍ രാജീവ് കുമാര്‍ പറഞ്ഞു.

ജനങ്ങള്‍ വോട്ടു ചെയ്യാന്‍ ഉത്സാഹം കാട്ടിയതിന്റെ തെളിവാണിത്. ചില ആരോപണങ്ങള്‍ വേദനിപ്പിച്ചു. മണിപ്പൂരിലടക്കം വലിയ സംഘര്‍ഷങ്ങളില്ലാതെ തെരഞ്ഞെടുപ്പ് നടന്നു. 1054 കോടി രൂപ, 2198 കോടിയുടെ സൗജന്യ വസ്തുക്കള്‍, 868 കോടിയുടെ മദ്യം എന്നിവ പിടിച്ചെടുത്തു. ജമ്മുകശ്മീരില്‍ നിയമസഭ തെരഞ്ഞെടുപ്പ് നടത്താന്‍ സജ്ജമായതായും തെരഞ്ഞെടുപ്പ് കമ്മീഷന്‍ അറിയിച്ചു.

The post ലോകറെക്കോര്‍ഡ്; വോട്ടുചെയ്തത് 64.2 കോടി പേര്‍, 31.2 കോടി വനിതകള്‍; ഫലപ്രഖ്യാപനത്തിന് പൂര്‍ണ സജ്ജമെന്ന് കമ്മീഷന്‍ appeared first on Starvision News Malayalam.

പ്രധാനമന്ത്രി നരേന്ദ്ര മോദി തുടർച്ചയായി മൂന്നാം തവണയും ജനവിധി തേടുന്ന വാരാണസി ഉൾപ്പെടെ ഏഴ് സംസ്ഥാനങ്ങളിലും കേന്ദ്രഭരണ പ്രദേശമായ ചണ്ഡീഗഡിലുമുള്ള 57 സീറ്റുകളിലേക്ക് ലോക്‌സഭാ തെരഞ്ഞെടുപ്പിൻ്റെ ഏഴാമത്തെയും അവസാനത്തെയും ഘട്ട വോട്ടെടുപ്പ് നടക്കും. പഞ്ചാബിലെ 13 സീറ്റുകളിലും ഹിമാചൽ പ്രദേശിലെ നാല് സീറ്റുകളിലും യുപിയിലെ 13 മണ്ഡലങ്ങളിലും പശ്ചിമ ബംഗാളിലെ ഒമ്പത് മണ്ഡലങ്ങളിലും ബീഹാറിലെ എട്ട് മണ്ഡലങ്ങളിലും ഒഡീഷയിലെ ആറ് സീറ്റുകളിലും ഛണ്ഡീഗഡിന് പുറമെ ജാർഖണ്ഡിലെ മൂന്ന് സീറ്റുകളിലുമാണ് വോട്ടെടുപ്പ്.

ഒഡീഷയിലെ ശേഷിക്കുന്ന 42 നിയമസഭാ മണ്ഡലങ്ങളിലേക്കും ഹിമാചൽ പ്രദേശിലെ ആറ് നിയമസഭാ സീറ്റുകളിലേക്കുമുള്ള ഉപതെരഞ്ഞെടുപ്പും ഒരേസമയം നടക്കും. കേന്ദ്രമന്ത്രി അനുരാഗ് താക്കൂർ, മമതാ ബാനർജിയുടെ അനന്തരവൻ അഭിഷേക് ബാനർജി, ലാലു പ്രസാദിൻ്റെ മകൾ മിസാ ഭാരതി, നടി കങ്കണ റണൗത്ത് എന്നിവരാണ് മത്സരരംഗത്തുള്ള 904 മത്സരാർത്ഥികളിൽ മറ്റ് പ്രമുഖ സ്ഥാനാർത്ഥികൾ. ഈ ഘട്ടത്തിൽ 10.06 കോടി പൗരന്മാർക്ക് വോട്ട് ചെയ്യാൻ അർഹതയുണ്ട്.

ഇന്ത്യൻ തിരഞ്ഞെടുപ്പ് കമ്മീഷൻ വോട്ടർമാരോട് തെരഞ്ഞെടുപ്പിൽ പങ്കെടുക്കാനും ഉത്തരവാദിത്തത്തോടും അഭിമാനത്തോടും കൂടി വോട്ട് ചെയ്യാനും ആഹ്വാനം ചെയ്തു. ആദ്യ ആറ് ഘട്ടങ്ങളിൽ യഥാക്രമം 66.14 ശതമാനം, 66.71, 65.68, 69.16, 62.2, 63.36 ശതമാനം എന്നിങ്ങനെയാണ് പോളിങ്.

ഏപ്രിൽ 19 ന് ആരംഭിച്ച പോളിംഗ് പ്രക്രിയയ്ക്ക് ശനിയാഴ്ചയോടെ അവസാനമാകും. ഇതിനകം 28 സംസ്ഥാനങ്ങളിലെയും കേന്ദ്ര ഭരണ പ്രദേശങ്ങളിലെയും 486 ലോക്‌സഭാ സീറ്റുകൾ പൂർത്തിയാക്കി. തിരഞ്ഞെടുപ്പ് കമ്മീഷൻ മാർഗ്ഗനിർദ്ദേശങ്ങൾ അനുസരിച്ച്, ടെലിവിഷൻ ചാനലുകൾക്കും വാർത്താ മാധ്യമങ്ങൾക്കും ജൂൺ 1 ന് വൈകുന്നേരം 6.30 ന് ശേഷം എക്സിറ്റ് പോൾ ഡാറ്റയും അതിൻ്റെ ഫലങ്ങളും പുറത്തുവിടാം.

The post ലോക്സഭാ തെരഞ്ഞെടുപ്പിന്റെ അവസാനഘട്ടം ഇന്ന് appeared first on Starvision News Malayalam.

ദില്ലി:ആറാം ഘട്ട തെരഞ്ഞെടുപ്പില്‍ രേഖപ്പെടുത്തിയത് ഇതുവരെയുള്ളതില്‍  ഏറ്റവും കുറഞ്ഞ പോളിംഗ് ശതമാനം.  തെരഞ്ഞെടുപ്പ് കമ്മീഷന്‍ ഒടുവില്‍ പുറത്ത് വിട്ട കണക്കനുസരിച്ച് 61.76 ശതമാനം പോളിംഗാണ് ഇന്നലെ നടന്നത്. ഉഷ്ണ തരംഗം തിരിച്ചടിയായെന്നാണ് തെരഞ്ഞെടുപ്പ് കമ്മീഷന്‍റെ പ്രതികരണം. ഒന്നാം ഘട്ടത്തില്‍ 66. 14 ശതമാനം. രണ്ടാംഘട്ടത്തില് 66.71, മൂന്നാം ഘട്ടത്തില്‍ 65.58 ശതമാനം, നാലാം ഘട്ടത്തില്‍ 69.16 ശതമാനം,അഞ്ചാംഘട്ടത്തില്‍ 62.20 ശതമാനം ഇങ്ങനെയായിരുന്നു കഴിഞ്ഞ ഘട്ടങ്ങളിലെ പോളിംഗ് നിരക്ക്.

ആറാം ഘട്ടത്തിലും ബംഗാളില്‍ 80 ശതമാനം കടന്നു.  യുപിയിലാണ് ഏറ്റവും കുറവ്. 54 ശതമാനം മാത്രമാണ് പോളിംഗ്.  ജാര്‍ഖണ്ഡിലും ഹരിയാനയിലും മാത്രം 60 ശതമാനം കടന്നു. വോട്ടിംഗ് മെഷിനെതിരായ വ്യജ പ്രചാരണം വോട്ടര്‍മാരെ പിന്നോട്ടടിച്ചെങ്കില്‍, പ്രതികൂല കാലവസ്ഥയും തിരിച്ചടിയായി. ദില്ലിയിലും , മറ്റ് സംസ്ഥാനങ്ങളിലും നാല്‍പത്തിയഞ്ചും അതിന് മുകളിലുമായിരുന്നു താപനില. ആറാം ഘട്ടവും മോദി സര്‍ക്കാര്‍ തന്നെയെന്ന സൂചനയാണ് നല്‍കുന്നതെന്ന് പ്രധാനമന്ത്രി നരേന്ദ്രമോദി ആവര്‍ത്തിച്ചു.

ബിജെപി വീണ്ടും അധികാരത്തിലെത്തുന്നത് അപകടമാണെന്നും, ജനാധിപത്യം തകര്‍ന്ന് കഴിഞ്ഞെന്നും ശശി തരൂര്‍ എംപി പ്രതികരിച്ചു. ഇതിനിടെ വോട്ടിംഗ് മെഷീനല്‍ കൃത്രിമം നടക്കുന്നില്ലെന്ന് തെരഞ്ഞെടുപ്പ് കമ്മീഷന്‍ ഉറപ്പ് വരുത്തണമെന്ന് കപില്‍ സിബല്‍ ആവശ്യപ്പെട്ടു. വോട്ടിംഗ് മെഷീനെതിരെ ഇന്നലെ ദില്ലിയിലും, ബംഗാളിലും ഉയര്‍ന്ന പരാതികള്‍ പരിശോധിക്കുമെന്ന് തെരഞ്ഞെടുപ്പ് കമ്മീഷന്‍ വ്യക്തമാക്കി. ബംഗാളില്‍ നടന്ന അക്രമസംഭവങ്ങളില്‍  അന്വേഷണത്തിനും നിര്‍ദ്ദശം നല്‍കിയിട്ടുണ്ട്.

The post ഉഷ്ണതരംഗം തിരിച്ചടിയായെന്ന് തെരഞ്ഞെടുപ്പ് കമ്മീഷന്‍റെ വിലയിരുത്തല്‍; ആറാംഘട്ടം പോളിംഗ് 61.76 ശതമാനം മാത്രം appeared first on Starvision News Malayalam.

കണ്ണൂർ: കള്ളവോട്ട് തടയാൻ ബൂത്തുകളിലും പുറത്തുമായി മൂവായിരത്തോളം ക്യാമറകൾ സ്ഥാപിച്ചും ഇതു നിരീക്ഷിക്കാൻ കലക്ടറേറ്റ് ഓഡിറ്റോറിയം കൺട്രോൾ റൂമായി മാറ്റിയും പഴുതടച്ച ക്രമീകരണമൊരുക്കി കണ്ണൂർ. രാജ്യത്തെ ഏറ്റവും വിപുലമായ വെബ്കാസ്റ്റിങ് സംവിധാനമാണ് കണ്ണൂരിൽ ഒരുക്കിയിട്ടുള്ളത്. ജില്ലയിലെ മുഴുവൻ പോളിങ് ബൂത്തുകളിലും വെബ് കാസ്റ്റിങ് സംവിധാനം സജ്ജമായിക്കഴിഞ്ഞു. കണ്ണൂർ പാർലമെന്റ് മണ്ഡലത്തിലെ കൂടാതെ കല്യാശ്ശേരി, പയ്യന്നൂർ, കൂത്തുപറമ്പ്, തലശ്ശേരി എന്നിവിടങ്ങളിലെ പോളിങ് സ്റ്റേഷനുകളും കൺട്രോൾ റൂമിൽ നിന്ന് നിരീക്ഷിക്കാം.

1866 ബൂത്തുകളിലായി 2664 ക്യാമറകളാണ് സജ്ജമാക്കിയത്. ഇവ കലക്ടറേറ്റിലെ കൺട്രോൾ റൂമിൽനിന്ന് നിരീക്ഷിക്കും. ഇതിനായി 43 ഇഞ്ച് വലിപ്പമുള്ള നൂറോളം സ്ക്രീനുകളും ലാപ്ടോപ്പുകളും സജ്ജമാക്കി വിപുലമായ കൺട്രോൾ റൂമും ക്രമീകരിച്ചിട്ടുണ്ട്. വെബ്കാസ്റ്റിങ് തടസ്സപ്പെടുന്നില്ല എന്നുറപ്പാക്കാൻ 115 ഉദ്യോഗസ്ഥരും തിരഞ്ഞെടുപ്പ് കഴിയുന്നതുവരെ കൺട്രോൾ റൂമിൽ ഉണ്ടാകും. 16 ബൂത്തുകളിലെ ദൃശ്യങ്ങളാണ് ഒരാൾ നിരീക്ഷിക്കുക. 90 മോണിറ്ററിങ് ഉദ്യോഗസ്ഥരും 15 സൂപ്പർവൈസർമാരും സാങ്കേതിക സഹായത്തിനായി 15 പേരടങ്ങിയ ടെക്‌നിക്കൽ സംഘവുമാണ് കൺട്രോൾ റൂമിലുള്ളത്.

ഇന്റർനെറ്റ് സഹായത്തോടെ ശബ്ദം ഉൾപ്പെടെ റെക്കോർഡ് ചെയ്യുന്ന ഫോർ ജി ക്യാമറകളാണ് സ്ഥാപിച്ചിട്ടുള്ളത്. പകർത്തുന്ന ദൃശ്യങ്ങൾ സെർവറിൽ റെക്കോർഡ് ചെയ്യപ്പെടും. ഓഫാക്കാൻ ആകാത്ത വിധം സീൽ ചെയ്യുന്ന ക്യാമറ കേടുപാട് വരുത്തിയാലും ദ്യശ്യങ്ങൾ സുരക്ഷിതമായിരിക്കും. ക്യാമറ നിലച്ചാൽ ഉടൻ പരിഹരിക്കും. ഇതിനു പുറമേ 33 വീതം സ്റ്റാറ്റിക് സർവൈലൻസ് ടീമുകളും ഫ്ലയിങ് സ്‌ക്വാഡുകളും 360 ഡിഗ്രി കറങ്ങുന്ന വൈഫൈ ക്യാമറയുടെ സംവിധാനത്തോടെ 24 മണിക്കൂറും ജില്ലയിലാകെ പരിശോധന നടത്തുന്നുണ്ട്.

കള്ളവോട്ട്, ക്രമസമാധാന പ്രശ്‌നം, പോളിങ് ഉദ്യോഗസ്ഥരുടെയും ബൂത്ത് ഏജന്റുമാരുടെയും പ്രവർത്തനം, ബാഹ്യ ഇടപെടൽ, അനുവദനീയമല്ലാതെ ബൂത്തുകളിലേക്ക് ആളുകൾ പ്രവേശിക്കുന്നത്, അനാവശ്യ മൊബൈൽ ഫോൺ ഉപയോഗം തുടങ്ങി ബൂത്തിലെ മുഴുവൻ കാര്യങ്ങളും നിരീക്ഷിക്കും. പ്രശ്‌ന സാധ്യതാ ബൂത്തുകളിൽ അകത്തും പുറത്തും ക്യാമറകളുണ്ട്. അസാധാരണമായ കാര്യങ്ങൾ കണ്ടാൽ മോണിറ്ററിങ് ഉദ്യോഗസ്ഥർ സൂപ്പർവൈസറുടെ ശ്രദ്ധയിൽപ്പെടുത്തും. സൂപ്പർവൈസർ ബുത്തിലെ പ്രിസൈഡിങ് ഓഫിസറെ അറിയിക്കുകയും ആവശ്യമായ നടപടി സ്വീകരിക്കുകയും ചെയ്യും. ഇത്തരം കാര്യങ്ങൾക്കായി മുതിർന്ന ഉദ്യോഗസ്ഥരും കൺട്രോൾ റൂമിലുണ്ടാകും. രാവിലെ മോക്‌പോൾ ആരംഭിക്കുന്ന സമയം മുതൽ വോട്ടിങ് അവസാനിക്കുന്നതുവരെ ഇവർ സമാന രീതിയിലാണ് പ്രവർത്തിക്കുക. തിരുവനന്തപുരത്ത് മുഖ്യ തിരഞ്ഞെടുപ്പ് ഓഫിസറുടെ നേതൃത്വത്തിലും ദൃശ്യങ്ങൾ നിരീക്ഷിക്കും. കൺട്രോൾ റൂം ഇന്നലെ വൈകിട്ട് ജില്ലാ വരണാധികാരികൂടിയായ കലക്ടർ അരുൺ കെ.വിജയൻ പരിശോധിച്ചു. വെബ്കാസ്റ്റിങ് നോഡൽ ഓഫിസർ ടോമി തോമസ്, ജില്ലാ ഇൻഫർമാറ്റിക് ഓഫിസർ കെ.രാജൻ, ഐടി മിഷൻ ജില്ലാ പ്രൊജക്ട് മാനേജർ മിഥുൻ കൃഷ്ണ എന്നിവരും ഒപ്പമുണ്ടായികുന്നു. കണ്‍ട്രോള്‍ റൂമിലെ ഫോണ്‍: 0497 2764645, 2763745.
വെബ്കാസ്റ്റിങ് തുടങ്ങിയത് കണ്ണൂരിൽ നിന്ന്

2014ൽ ലോക്സഭയിലേക്ക് നടന്ന തിരഞ്ഞെടുപ്പിൽ കണ്ണൂരിലാണ് രാജ്യത്ത് ആദ്യമായി വെബ്കാസ്റ്റിങ് സംവിധാനം ഏർപ്പെടുത്തിയത്. പ്രശ്നബാധിതമായ 173 പോളിങ് ബൂത്തുകളിലായിരുന്നു അന്ന് വെബ്ക്യാമറകൾ സ്ഥാപിച്ച് നിരീക്ഷിക്കാൻ സംവിധാനം ഒരുക്കിയത്. തിരഞ്ഞെടുപ്പിൽ ഡിജിറ്റൽ മാർഗങ്ങളിലൂടെ സുതാര്യത ഉറപ്പാക്കാൻ ചെയ്ത കാര്യങ്ങൾ കണക്കിലെടുത്ത്, കേന്ദ്ര തിരഞ്ഞെടുപ്പ് കമ്മിഷൻ രാജ്യത്തെ മികച്ച കലക്ടർക്കുള്ള പുരസ്കാരം അന്നത്തെ കണ്ണൂർ കലക്ടർ പി.ബാലകിരണിനു സമ്മാനിക്കുകയും ചെയ്തു. 2015ൽ നടന്ന തദ്ദേശ തിരഞ്ഞെടുപ്പിൽ വെബ്കാസ്റ്റിങ് സംവിധാനം മുഴുവൻ ബൂത്തുകളിലേക്കും വ്യാപിപ്പിക്കാനും ബാലകിരണിനു കഴിഞ്ഞു.

വെബ് ക്യാമറകൾ തലതിരിച്ചുവച്ചും മറ്റും ക്യാമറയിലെ റെക്കോർഡിങ് തടസ്സപ്പെടുത്താൻ അക്കാലത്ത് ചില രാഷ്ട്രീയ പാർട്ടി പ്രവർത്തകർ ഇടപെട്ടത് ശ്രദ്ധയിൽപ്പെട്ടതോടെ പിന്നീട് കൺട്രോൾ റൂം സംവിധാനമൊരുക്കി ഇത് നിരീക്ഷിക്കാൻ തുടങ്ങി. 2019 ലോക്സഭാ തിരഞ്ഞെടുപ്പിൽ അന്ന് കലക്ടറായിരുന്ന മിർ മുഹമ്മദ് അലിയാണ് ഈ പരിഷ്കാരം നടപ്പാക്കിയത്. അക്ഷയ കേന്ദ്രത്തിലെയും മറ്റും ജീവനക്കാരെ ബൂത്തുകളിൽ നിയോഗിച്ച് ക്യാമറകൾ കൃത്യമായി പ്രവർത്തിക്കുന്നു എന്ന് ഉറപ്പാക്കാനും കഴിഞ്ഞു.

The post കള്ളവോട്ട് തടയാന്‍ ക്യാമറ നിരീക്ഷണം; രാജ്യത്തെ ഏറ്റവും വിപുലമായ ക്രമീകരണം കണ്ണൂരിൽ appeared first on Starvision News Malayalam.

കല്‍പ്പറ്റ: ലോക്സഭാ തെരഞ്ഞെടുപ്പ് പ്രചാരണത്തിനായി രാഹുല്‍ വീണ്ടും വയനാട്ടിലേക്ക്. ഈ മാസം 15, 16 തിയതികളില്‍ മണ്ഡലത്തില്‍ സ്ഥാനാര്‍ഥി തെരഞ്ഞെടുപ്പ് പ്രചാരണം നടത്തും. 15ന് രാവിലെ കണ്ണൂര്‍ വിമാനത്താവളത്തില്‍ എത്തുന്ന രാഹുല്‍ ഗാന്ധി അന്ന് സുല്‍ത്താന്‍ ബത്തേരി, മാനന്തവാടി, കല്‍പ്പറ്റ നിയോജകമണ്ഡലങ്ങളില്‍ പര്യടനം നടത്തും.

പുല്‍പ്പള്ളിയില്‍ കര്‍ഷക സംഗമത്തിലും കല്‍പ്പറ്റയില്‍ തൊഴിലാളി സംഗമത്തിലും രാഹുല്‍ ഗാന്ധി പങ്കെടുക്കും. അന്ന് വൈകിട്ട് കോഴിക്കോട് കടപ്പുറത്ത് നടക്കുന്ന യുഡിഎഫ് റാലിയിലും പൊതുസമ്മേളനത്തിലും പങ്കെടുക്കുന്ന രാഹുല്‍ ഗാന്ധി 16ന് രാവിലെ 9.30 മുതല്‍ തിരുവമ്പാടി, ഏറനാട്, വണ്ടൂര്‍, നിലമ്പൂര്‍ നിയോജക മണ്ഡലങ്ങളില്‍ പര്യടനം നടത്തും.

ഈ മാസം ആദ്യം നാമനിര്‍ദേശ പത്രിക സമര്‍പ്പിക്കാനെത്തിയ രാഹുല്‍ അന്നേദിവസം വയനാട്ടില്‍ റോഡ് ഷോയും നടത്തിയിരുന്നു. എല്‍ഡിഎഫ് സ്ഥാനാര്‍ത്ഥി ആനി രാജ മണ്ഡലത്തില്‍ ശക്തമായ പ്രചാരണവുമായി സജീവമായി കഴിഞ്ഞു. ബിജെപി സ്ഥാനാര്‍ഥിയായി സംസ്ഥാന അധ്യക്ഷന്‍ കെ സുരേന്ദ്രനും എത്തിയതോടെ മത്സരം ഏറെ ശ്രദ്ധേയമായി.

ത്രികോണ പോരാട്ടം ശക്തമായതോട രാഹുലിന് കഴിഞ്ഞ ഭൂരിപക്ഷം നേടാനാവില്ലെന്നാണ് പൊതുവെയുള്ള വിലയിരുത്തല്‍.

The post പ്രചാരണം കൊഴുപ്പിക്കാന്‍ രാഹുല്‍ ഗാന്ധി വീണ്ടും വയനാട്ടിലേക്ക് appeared first on Starvision News Malayalam.