മനാമ: നിക്ഷേപങ്ങളുടെ പ്രോത്സാഹനത്തിനും സംരക്ഷണത്തിനുമായി ബഹ്റൈന്‍, യു.എ.ഇ. സര്‍ക്കാരുകള്‍ ഒപ്പുവച്ച കരാര്‍ മെയ് 8 മുതല്‍ പ്രാബല്യത്തില്‍ വന്നു. കരാറിലെ വ്യവസ്ഥകള്‍ പാലിച്ച് ഇരുപക്ഷവും ആവശ്യമായ നിയമ നടപടിക്രമങ്ങള്‍ പൂര്‍ത്തിയാക്കിയതിനെ തുടര്‍ന്നാണ് പ്രഖ്യാപനമുണ്ടായത്.
നിക്ഷേപങ്ങള്‍ക്ക് പൂര്‍ണ്ണ സംരക്ഷണം ഉറപ്പുനല്‍കുന്നതും ന്യായവും നീതിയുക്തവുമായ പരിഗണന ഉറപ്പാക്കുന്നതിലൂടെയും തര്‍ക്കപരിഹാരത്തിന് വ്യക്തമായ സംവിധാനങ്ങള്‍ നല്‍കുന്നതിലൂടെയും നിക്ഷേപകരില്‍ ആത്മവിശ്വാസം വളര്‍ത്തുന്നതുമായ ഒരു സമഗ്ര നിയമ ചട്ടക്കൂട് ഈ കരാറിലുണ്ട്.
യു.എ.ഇയുമായുള്ള സഹകരണം വര്‍ദ്ധിപ്പിക്കുന്നതിന് ബഹ്റൈന്‍ വലിയ പ്രാധാന്യം നല്‍കുന്നുവെന്ന് ധനകാര്യ ദേശീയ സാമ്പത്തിക മന്ത്രി ഷെയ്ഖ് സല്‍മാന്‍ ബിന്‍ ഖലീഫ അല്‍ ഖലീഫ പറഞ്ഞു. യു.എ.ഇ. പ്രസിഡന്റ് ഷെയ്ഖ് മുഹമ്മദ് ബിന്‍ സായിദ് അല്‍ നഹ്യാന്റെയും ബഹ്‌റൈന്‍ രാജാവ് ഹമദ് ബിന്‍ ഈസ അല്‍ ഖലീഫയുടെയും ദര്‍ശനങ്ങള്‍ക്ക് അനുസൃതമായി സഹകരണം മുന്നോട്ട് കൊണ്ടുപോകുന്നതില്‍ ഉഭയകക്ഷി കരാറുകള്‍ക്ക് വലിയ പങ്കുണ്ടെന്നും അദ്ദേഹം പറഞ്ഞു.
ഉഭയകക്ഷി സാമ്പത്തിക ബന്ധങ്ങള്‍ ശക്തിപ്പെടുത്തുന്നതിനുള്ള ഇരുരാജ്യങ്ങളുടെയും പ്രതിബദ്ധതയാണ് കരാര്‍ പ്രാബല്യത്തില്‍ വരുന്നത് പ്രതിഫലിപ്പിക്കുന്നതെന്ന് യു.എ.ഇ. ധനകാര്യ സഹമന്ത്രി മുഹമ്മദ് ബിന്‍ ഹാദി അല്‍ ഹുസൈനി പറഞ്ഞു.

The post ബഹ്റൈന്‍- യു.എ.ഇ. നിക്ഷേപ പ്രോത്സാഹന, സംരക്ഷണ കരാര്‍ പ്രാബല്യത്തില്‍ appeared first on Starvision News Malayalam.