വിഴിഞ്ഞം: കടലില്‍ നങ്കൂരമിട്ടിരുന്ന വള്ളത്തെ കരയിലടുപ്പിക്കതിനായി നീന്തിപോയ തൊഴിലാളി മുങ്ങിമരിച്ചു. പുല്ലുവിള പണിക്കത്തി വിളാകം പുരയിടത്തില്‍ ശബരിയപ്പന്റെയും ഫോര്‍ജിയ ലില്ലിക്കുട്ടിയുടെയും മകനായ എസ്. ഷാജു (39) ആണ് മരിച്ചത്. വ്യാഴാഴ്ച രാവിലെ 10 മണിയോടെ വിഴിഞ്ഞം ഹാര്‍ബറിലാണ് അപകടമുണ്ടായത്.

സുഹൃത്തുക്കളായ ലോറന്‍സ്, ജോസ്, ഷിബു എന്നിവര്‍ക്കൊപ്പം ബുധനാഴ്ച വൈകീട്ടോടെ സുഹൃത്ത് പത്രോസിന്റെ വള്ളത്തില്‍ ഷാജു മീന്‍പിടിത്തത്തിന് പോയിരുന്നു. തുടര്‍ന്ന് വ്യാഴാഴ്ച പുലര്‍ച്ചെ 4.30-ഓടെ വിഴിഞ്ഞത്ത് തിരികെ എത്തി. വളളം നങ്കൂരമിട്ടശേഷം വീട്ടിലേക്ക് മടങ്ങിയ ഷാജു മൊബൈല്‍ ഫോണ്‍ വള്ളത്തില്‍ മറന്നുവെച്ചിരുന്നു.

ഇത് തിരികെ എടുക്കുന്നതിനും വലയുടെ അറ്റകുറ്റപ്പണി തീര്‍ക്കുന്നതിനുമായി നങ്കൂരമിട്ട വള്ളത്തെ കരയില്‍ അടുപ്പിക്കുന്നതിനാണ് ഷാജു രാവിലെ 9.30-ഓടെ വിഴിഞ്ഞത്ത് വീണ്ടുമെത്തിയത്. വള്ളമുടമയും സുഹൃത്തുമായ പത്രോസുമായാണ് എത്തിയത്. പത്രോസിനെ കരയില്‍ നിര്‍ത്തിയശേഷം ഷാജു വള്ളത്തിനടുത്തേക്ക് നീന്തി പോകുന്നതിനിടയില്‍ അവശനായി മുങ്ങിത്താഴുകയായിരുന്നു. കരയില്‍ നിന്ന് സംഭവം കണ്ട പത്രോസ് പെട്ടെന്ന് തന്നെ കട്ടമരമെടുത്തെത്തി അന്വേഷിച്ചെങ്കിലും ആളെ കണ്ടെത്താനായിരുന്നില്ല.

തുടര്‍ന്ന് വിഴിഞ്ഞം കോസ്റ്റല്‍ പോലീസിലും മറൈന്‍ എന്‍ഫോഴ്സമെന്റിലും വിവരമറിയിച്ചു. വളളങ്ങള്‍ കെട്ടിയിടുന്ന ഹാര്‍ബര്‍ ആഴമുള്ളയിടമാണ്. ഇതിനാല്‍ ആളെ കണ്ടെടുക്കാന്‍ കഴിയാത്ത സാഹചര്യമുണ്ടായി. ഇതേ തുടര്‍ന്ന് വിഴിഞ്ഞം കൗണ്‍സിലര്‍ എം. നിസാമുദീന്‍, തെക്കുംഭാഗം മുസ്ലീം ജമാഅത്ത് പ്രസിഡന്റ് മുഹമ്മദ് ഷാഫി എന്നിവര്‍ രക്ഷാപ്രവര്‍ത്തനത്തിന് മുങ്ങല്‍ വിദഗ്ധരെ എത്തിച്ചു.

ചിപ്പിത്തൊഴിലാളികളും മുങ്ങല്‍ വിദഗ്ധരുമായ തൊഴിലാളികളെത്തി 15 മീറ്ററോളം താഴ്ചയില്‍ മുങ്ങി നടത്തിയ തിരച്ചിലില്‍ ചെളിയ പുതഞ്ഞ നിലയില്‍ ഷാജുവിന്റെ മൃതദേഹം കണ്ടെത്തുകയായിരുന്നു. തുടര്‍ന്ന് പോലീസെത്തി മൃതദേഹം മെഡിക്കല്‍ കോളേജ് ആശുപത്രിയിലെ മോര്‍ച്ചറിയിലേയ്ക്ക് മാറ്റി.

കോസ്റ്റല്‍ പോലീസ് കേസെടുത്തു. അവിവാഹതിനാണ് ഷാജു. സഹോദരങ്ങള്‍ സോണിയ, മറിയം, ഡെന്‍സി, അല്‍ഫോണ്‍സിയ, മേരിക്കുട്ടി. സംസ്‌കാരം വെള്ളിയാഴ്ച വൈകീട്ട് പുല്ലുവിള സെന്റ് ജേക്കബ് ഫൊറോ പളളിയില്‍ നടക്കും.

The post വിഴിഞ്ഞത്ത് വള്ളം കരയിലടുപ്പിക്കുന്നതിന് നീന്തിപ്പോയ മത്സ്യതൊഴിലാളി മുങ്ങിമരിച്ചു appeared first on Starvision News Malayalam.