തിരുവനന്തപുരം: സംസ്ഥാനത്തിന്റെ വികസനത്തിനും പുരോഗതിയ്ക്കും മേഖലാ അവലോകന യോഗങ്ങള്‍ പുതിയ ഊര്‍ജം പകര്‍ന്നതായി മുഖ്യമന്ത്രി പിണറായി വിജയന്‍. നിലവില്‍ പുരോഗമിക്കുന്ന പ്രശ്‌നപരിഹാര നടപടികള്‍ ബന്ധപ്പെട്ട മന്ത്രിമാരുടെ നേതൃത്വത്തില്‍ വിലയിരുത്തി സമയബന്ധിതമായി പൂര്‍ത്തിയാക്കുമെന്നും അദ്ദേഹം തിരുവനന്തപുരത്ത് വാര്‍ത്താ സമ്മേളനത്തില്‍ പറഞ്ഞു. അതിയായ ദാരിദ്ര്യം അനുഭവിക്കുന്നവരില്ലാത്ത നാടായി നമ്മുടെ സംസ്ഥാനത്തെ മാറ്റാനുള്ള നടപടി സ്വീകരിച്ചു വരികയാണ്. സര്‍ക്കാര്‍ നടത്തിയ സര്‍വേയില്‍ 64,000-ല്‍പരം കുടുംബങ്ങളാണ് ഈ ഗണത്തിലുള്ളത്. ആ കുടുംബങ്ങളെ അതിദാരിദ്യത്തില്‍നിന്ന് മോചിപ്പിക്കാന്‍ എടുത്ത നടപടികള്‍ യോഗം പരിശോധിച്ചെന്നും മുഖ്യമന്ത്രി പറഞ്ഞു. വ്യക്തമായ മൈക്രോപ്ലാന്‍ തയ്യാറാക്കി ഇവരെ അതിദരിദ്രാവസ്ഥയില്‍നിന്ന് മോചിപ്പിക്കാനുള്ള നടപടികളാണ് സ്വീകരിച്ചു വരുന്നതെന്നും മുഖ്യമന്ത്രി വിശദീകരിച്ചു. തദ്ദേശ സ്ഥാപനങ്ങളാണ് ഇതിനാവശ്യമായ നേതൃത്വം വഹിക്കുന്നത്.

അവകാശം അതിവേഗം പദ്ധതിയിലൂടെ വ്യക്തികള്‍ക്ക് തിരിച്ചറിയല്‍ കാര്‍ഡ് നല്‍കുന്നതിനുള്ള പ്രക്രിയ കാര്യക്ഷമമാക്കാനും ഇതിന്റെ ഭാഗമായി തീരുമാനം എടുത്തിട്ടുണ്ട്. അതിദാരിദ്ര്യ ബാധിതരായി കണ്ടെത്തിയ കുടുംബങ്ങളിലെ 93 ശതമാനത്തോളം കുടുംബങ്ങളെ 2024 നവംബര്‍ ഒന്നോടെ അതിദാരിദ്ര്യ മുക്തരാക്കാന്‍ കഴിയുമെന്നാണ് പ്രതീക്ഷിക്കുന്നതെന്നും മുഖ്യമന്ത്രി പറഞ്ഞു. 2025 നവംബര്‍ ഒന്നോടെയാണ് പൂര്‍ണമായും അതിദാരിദ്ര്യത്തില്‍നിന്ന് കുടുംബങ്ങളെ മുക്തരാക്കാന്‍ കഴിയുക എന്നാണ് കണ്ടത്. ഇക്കാര്യം നേരത്തെ പ്രഖ്യാപിച്ചതാണ്. എന്നാല്‍ ഈ വര്‍ഷവും അടുത്തവര്‍ഷവും കൊണ്ട് 2024 നവംബര്‍ ഒന്നോടെ 93 ശതമാനത്തോളം അതിദാരിദ്ര്യ കുടുംബങ്ങളെ അതില്‍നിന്ന് മോചിപ്പിക്കാനാവും എന്നാണ് വിലയിരുത്തലില്‍ കണ്ടെത്താനായത്. 2025 നവംബര്‍ ഒന്നോടെ ഇത് പൂര്‍ണമാക്കാനാകുമെന്നും അദ്ദേഹം പറഞ്ഞു. മാലിന്യമുക്ത നവകേരളം പദ്ധതിയുടെ വിവിധ ഘടകങ്ങളുടെ പുരോഗതി മേഖലാ അവലോകന യോഗങ്ങളില്‍ വിലയിരുത്തിയെന്നും മുഖ്യമന്ത്രി പറഞ്ഞു. ന്യൂനതകള്‍ കണ്ടെത്തി പദ്ധതി നടപ്പാക്കുന്നത് ത്വരിതപ്പെടുത്തുക എന്ന ലക്ഷ്യത്തോടെയാണ് പരിശോധന നടന്നത്. സംസ്‌കരണ യൂണിറ്റുകള്‍ വിവിധ സ്ഥലങ്ങളില്‍ സ്ഥാപിക്കണം. ചിലയിടത്ത് ഇക്കാര്യത്തില്‍ ചില തടസ്സങ്ങളുണ്ട്. ആ പ്രദേശങ്ങളില്‍ കളക്ടര്‍മാരുടെ നോതൃത്വത്തില്‍ യോഗം നടത്തി പ്രശ്‌നങ്ങള്‍ ചര്‍ച്ച ചെയ്ത് പരിഹരിക്കാന്‍ തീരുമാനമായിട്ടുണ്ടെന്നും മുഖ്യമന്ത്രി കൂട്ടിച്ചേര്‍ത്തു.

The post 93% കുടുംബങ്ങളെ അതിദാരിദ്ര്യാവസ്ഥയില്‍നിന്ന് 2024 നവംബര്‍ ഒന്നോടെ മോചിപ്പിക്കും; മുഖ്യമന്ത്രി appeared first on Starvision News Malayalam.