Coimbatore blast case | Starvision News Malayalam

ജമേഷ മുബിന്‍ സ്ഫോടക വസ്തുക്കൾ സൂക്ഷിച്ചത് ഭാര്യയെ തെറ്റിദ്ധരിപ്പിച്ച്

News Desk — Sat, 05 Nov 2022 11:58:16 +0000

കോയമ്പത്തൂർ: കോയമ്പത്തൂർ കാർ സ്ഫോടനക്കേസിൽ കൊല്ലപ്പെട്ട ജമേഷ മുബിൻ വീട്ടിൽ സ്ഫോടക വസ്തുക്കൾ ശേഖരിച്ചത് ഭാര്യയെ തെറ്റിദ്ധരിപ്പിച്ചെന്ന് കണ്ടെത്തൽ. ജമേഷ മുബിൻ തന്‍റെ ബധിരയും മൂകയുമായ ഭാര്യ നസ്റത്തിനെ സ്ഫോടകവസ്തുക്കൾ നിറച്ച പെട്ടികളിൽ പഴയ വസ്ത്രങ്ങൾ ആണെന്നാണ് വിശ്വസിപ്പിച്ചിരുന്നത്. അന്വേഷണ സംഘം ഭാര്യയെ ചോദ്യം ചെയ്തിരുന്നു. എന്നാൽ ഭർത്താവിന്റെ ഇത്തരം കാര്യങ്ങളെക്കുറിച്ച് കാര്യമായ വിവരങ്ങൾ ഇവർക്ക് അറിയില്ലെന്നാണ് അന്വേഷണ സംഘത്തിന്‍റെ നിഗമനം.

ഇയാൾ ഒരു അന്തർമുഖനായിരുന്നു, മറ്റുള്ളവരുമായി വളരെക്കുറച്ചു മാത്രമേ ഇടപഴകിയിരുന്നുള്ളൂ. സ്ഫോടനം നടന്ന സ്ഥലത്ത് നിന്ന് കണ്ടെടുത്ത മൃതദേഹം ഷേവ് ചെയ്ത് മുടി നീക്കം ചെയ്ത നിലയിൽ ആയിരുന്നു. ചാവേറാക്രമണം നടത്താൻ തീരുമാനിച്ചവർ ഇങ്ങനെ ചെയ്യാറുണ്ടെന്ന് അന്വേഷണ ഉദ്യോഗസ്ഥർ പറയുന്നു. കോയമ്പത്തൂർ മെഡിക്കൽ കോളേജ് അധികൃതർ പോസ്റ്റ്മോർട്ടം റിപ്പോർട്ട് കോടതിക്കും അന്വേഷണ ഉദ്യോഗസ്ഥർക്കും കൈമാറി.

ഒക്ടോബർ 23ന് പുലർച്ചെ കോട്ടേമേട് സംഗമേശ്വര ക്ഷേത്രത്തിന് മുന്നിൽ നടന്ന സ്ഫോടനത്തിലാണ് ജമേഷ മുബിൻ കൊല്ലപ്പെട്ടത്. മണിക്കൂറുകൾക്കകം കോയമ്പത്തൂർ പൊലീസ് ഇയാളുടെ വീട്ടിൽ തിരച്ചിൽ നടത്തി. 75 കിലോ സ്ഫോടക വസ്തുക്കൾ ഉൾപ്പെടെ നിരവധി വസ്തുക്കൾ പിടിച്ചെടുത്തു. ഇതിൽ നിന്ന് ഐഎസ് പതാകയിലെ അറബി എഴുത്തിനോടു സാമ്യമുള്ള എഴുത്തുകളും കണ്ടെടുത്തു. ജിഹാദ് കുട്ടികൾക്കും മുതിർന്നവർക്കും വേണ്ടിയല്ല, യുവാക്കൾക്ക് വേണ്ടിയാണെന്ന് മറ്റൊരു പേപ്പറില്‍ പറയുന്നു. ആരാധനാലയത്തിൽ തൊട്ടവരെ വേരോടെ പിഴുതെറിയുമെന്ന് ഭീഷണിപ്പെടുത്തുന്ന കുറിപ്പും കണ്ടെടുത്തിട്ടുണ്ട്.

The post ജമേഷ മുബിന്‍ സ്ഫോടക വസ്തുക്കൾ സൂക്ഷിച്ചത് ഭാര്യയെ തെറ്റിദ്ധരിപ്പിച്ച് appeared first on Starvision News Malayalam.

കോയമ്പത്തൂർ സ്ഫോടനം; മുബീൻ്റെ വീട്ടിൽ നിന്ന് ഡയറികൾ കണ്ടെടുത്തു

News Desk — Sun, 30 Oct 2022 13:54:13 +0000

കോയമ്പത്തൂർ: കോയമ്പത്തൂരിൽ ഉക്കടം സ്ഫോടനത്തിൽ മരിച്ച ജമേഷ മുബീന്‍റെ വീട്ടിൽ നിന്ന് പിടിച്ചെടുത്ത വസ്തുക്കളിൽ 4 ഡയറികളും. കേസന്വേഷണത്തിൽ നിർണായകമായ നിരവധി സൂചനകളാണ് ഡയറിക്കുറിപ്പുകളിൽ നിന്ന് അന്വേഷണ സംഘത്തിന് ലഭിച്ചത്. മറ്റ് മതങ്ങളെക്കുറിച്ചുള്ള മുബീന്‍റെ കാഴ്ചപ്പാടുകളും സമീപകാലത്തായി രാജ്യത്ത് നടന്ന വിവിധ രാഷ്ട്രീയ പ്രശ്നങ്ങളെക്കുറിച്ചുള്ള കുറിപ്പുകളും ഡയറിയിലുണ്ട്.

ജമേഷ മുബീന്‍റെ വീട്ടിൽ നിന്ന് പിടിച്ചെടുത്ത വസ്തുക്കളിൽ 76.5 കിലോഗ്രാം സ്ഫോടക വസ്തുക്കൾ, ഇലക്ട്രോണിക് സർക്യൂട്ടുകൾ, ഗ്യാസ് സിലിണ്ടറുകൾ എന്നിവ ഉണ്ടായിരുന്നതായി എൻഐഎ പറയുന്നു. എന്നാൽ ഇതിന് പുറമേ, മതതീവ്രവാദ നിലപാടുകൾ കാണിക്കുന്ന ലഘുലേഖകളും ഡയറികളും ഉണ്ടെന്ന് ഇപ്പോൾ റിപ്പോർട്ടുണ്ട്. രാജ്യത്തെ സമീപകാല സംഭവവികാസങ്ങളെക്കുറിച്ചുള്ള കുറിപ്പുകൾ അടങ്ങിയ നാല് ഡയറികൾ കണ്ടെടുത്തു. പൗരത്വ ഭേദഗതി നിയമത്തോടും ഹിജാബ് നിരോധനത്തോടും കടുത്ത പ്രതികരണങ്ങളാണ് ഇതിൽ ഉള്ളതെന്നാണ് സൂചന. മറ്റ് മതവിശ്വാസങ്ങളെക്കുറിച്ചുള്ള കുറിപ്പുകൾ, ഇവയെ പരസ്പരം ബന്ധിപ്പിക്കുന്ന ഫ്ലോ ചാർട്ടുകൾ മുതലായവയും ഉണ്ട്. ഇവയെല്ലാം പൊലീസ് എൻ.ഐ.എയ്ക്ക് കൈമാറി.

ശ്രീലങ്കയിലെ ഈസ്റ്റർ ദിന സ്ഫോടനങ്ങളുടെ സൂത്രധാരൻ സഫ്റൻ ഹാഷിമിനെ മുബീൻ മാതൃകയായി കണ്ടിരുന്നു. നിലവിൽ ഇയാളുമായി നേരിട്ട് ബന്ധപ്പെട്ടിരുന്നതായി സൂചനകളൊന്നുമില്ല. എന്നിരുന്നാലും, സഫ്റൻ ഹാഷിമുമായി ബന്ധപ്പെട്ട ആളുകളുമായി ബന്ധപ്പെടാൻ മുബീൻ ശ്രമിച്ചിരുന്നു.

The post കോയമ്പത്തൂർ സ്ഫോടനം; മുബീൻ്റെ വീട്ടിൽ നിന്ന് ഡയറികൾ കണ്ടെടുത്തു appeared first on Starvision News Malayalam.

കോയമ്പത്തൂര്‍ സ്ഫോടനക്കേസ് അന്വേഷണം എന്‍ഐഎ ഏറ്റെടുത്തു

News Desk — Thu, 27 Oct 2022 11:51:16 +0000

ന്യൂഡൽഹി: കോയമ്പത്തൂർ സ്ഫോടനക്കേസിൽ എൻ.ഐ.എ അന്വേഷണത്തിന് കേന്ദ്ര സർക്കാർ ഉത്തരവ്. എൻ.ഐ.എ അന്വേഷണത്തിന് തമിഴ്നാട് സർക്കാർ ശുപാർശ ചെയ്തിരുന്നു. 23ന് കാറിനുള്ളിൽ ഗ്യാസ് സിലിണ്ടർ പൊട്ടിത്തെറിച്ചാണ് സ്ഫോടനം നടന്നത്. സംഭവത്തിന് തീവ്രവാദ ബന്ധമുണ്ടെന്ന് സംശയിക്കുന്ന തെളിവുകൾ ലഭിച്ചതിനെ തുടർന്നാണ് എൻഐഎ അന്വേഷണം ഏറ്റെടുത്തത്. സംഭവത്തിൽ എഫ്.ഐ.ആർ രജിസ്റ്റർ ചെയ്തിട്ടുണ്ട്.

പ്രതികളിലൊരാളുടെ ഐഎസ് ബന്ധത്തെയും ചാവേറാക്രമണം നടന്നുവെന്ന സംശയത്തെയും സാധൂകരിക്കുന്ന തെളിവുകൾ പോലീസിന് ലഭിച്ചിരുന്നു. എൻഐഎ സംഘം കോയമ്പത്തൂരിലെത്തി പ്രാഥമിക വിവരങ്ങൾ ശേഖരിക്കാൻ തുടങ്ങി. അതേസമയം, കോയമ്പത്തൂർ ഉക്കടം സ്ഫോടനത്തിന്‍റെ സൂത്രധാരൻ ജമേഷ മുബീന്‍റെ ബന്ധു അഫ്സ്ഖർ ഖാൻ അറസ്റ്റിലായി. ഓൺലൈനിൽ സ്ഫോടക വസ്തുക്കൾ ഓർഡർ ചെയ്തെന്ന് സംശയിക്കുന്ന ലാപ്ടോപ്പ് അഫ്സ്ഖർ ഖാന്‍റെ വീട്ടിൽ നിന്ന് പോലീസ് പിടിച്ചെടുത്തു. ജമേഷ മുബീന്‍റെ വീട്ടിൽ നിന്ന് പിടിച്ചെടുത്ത 76.5 കിലോ സ്ഫോടക വസ്തു ചേരുവകൾ ഓൺലൈനായി വാങ്ങിയതാണെന്നാണ് വിവരം. ഇതുവരെ ആറുപേരെ പൊലീസ് അറസ്റ്റ് ചെയ്തിട്ടുണ്ട്.

ഉക്കടം എച്ച്.എം.പി.ആർ സ്ട്രീറ്റിൽ താമസിക്കുന്ന ജമേഷ മുബിൻ (29) ആണ് ഞായറാഴ്ച പുലർച്ചെ ടൗൺ ഹാളിന് സമീപം കോട്ടമേട് സംഗമേശ്വർ ക്ഷേത്രത്തിന് മുന്നിൽ കാറിലുണ്ടായ സ്ഫോടനത്തിൽ മരിച്ചത്. മരിച്ച ജമേഷ മുബിനെയും ചില പ്രതികളെയും 2019ൽ എൻ.ഐ.എ ചോദ്യം ചെയ്തിരുന്നു. ശ്രീലങ്കയിൽ ഈസ്റ്റർ ദിനത്തിൽ നടന്ന ഭീകരാക്രമണത്തിന്‍റെ സൂത്രധാരൻ സഹ്റൻ ഹാഷിമുമായി ബന്ധമുണ്ടെന്ന വിവരത്തിന്‍റെ അടിസ്ഥാനത്തിലായിരുന്നു ചോദ്യം ചെയ്യൽ.

The post കോയമ്പത്തൂര്‍ സ്ഫോടനക്കേസ് അന്വേഷണം എന്‍ഐഎ ഏറ്റെടുത്തു appeared first on Starvision News Malayalam.