മനാമ: ഇന്ത്യൻ സ്‌കൂൾ റിഫ കാമ്പസിൽ  ശിശുദിനം വിവിധ പരിപാടികളോടെ  ആഘോഷിച്ചു. അതിരുകൾക്കതീതമായ  ഐക്യം  വളർത്തുക എന്ന ആശയത്തെ കേന്ദ്രീകരിച്ചായിരുന്നു ആഘോഷങ്ങൾ. ഇന്ത്യയുടെ പ്രഥമ പ്രധാനമന്ത്രി പണ്ഡിറ്റ് ജവഹർലാൽ നെഹ്‌റുവിന്റെ ജന്മവാർഷികത്തെ അനുസ്മരിച്ചുകൊണ്ടുള്ള ശിശുദിന പരിപാടികൾ വൈവിധ്യമാർന്നതും വർണ്ണശബളവുമായിരുന്നു. ഒന്നും രണ്ടും മൂന്നും ക്‌ളാസുകളിലെ  വിദ്യാർഥികൾ വേദിയിൽ അവരുടെ കഴിവുകൾ പ്രദർശിപ്പിച്ചു.  ആഫ്രിക്കൻ നൃത്ത ചുവടുകളും   ലാറ്റിനോ സൽസയുടെ താളാത്മകമായ വശീകരണവും ഏഷ്യൻ ആയോധനകലകളുടെ   മികവും  കാണികൾക്കു അനുഭവവേദ്യമായി.

ഉപഭൂഖണ്ഡത്തിന്റെ സമ്പന്നമായ പൈതൃകവും  സാംസ്കാരിക വൈവിധ്യത്തിന്റെ ഊർജ്ജസ്വലമായ മുദ്രകളും കുരുന്നുകൾ പ്രദർശിപ്പിച്ചു.  കിഡ്ഡീസ് ഫിയസ്റ്റയ്‌ക്കായി ആവേശപൂർവം  അവർ  പരിശീലനം നടത്തിയിരുന്നു.   ഓരോ വിദ്യാർത്ഥിയുടെയും  നേട്ടങ്ങളെ പ്രിൻസിപ്പൽ പമേല സേവ്യർ അനുമോദിച്ചു.  പ്രത്യേക അസംബ്ലി, കഥപറച്ചിൽ സെഷനുകൾ, ഗ്രീറ്റിംഗ് കാർഡ് ഡിസൈനിംഗ്, ഫെയ്‌സ് പെയിന്റിംഗ് എന്നിവ ആവേശം   പകർന്നു. സ്‌കൂൾ  ചെയർമാൻ പ്രിൻസ് എസ് നടരാജൻ,   സെക്രട്ടറി സജി ആന്റണി, എക്‌സിക്യൂട്ടീവ് കമ്മിറ്റി അംഗങ്ങൾ എന്നിവർ   ഉജ്ജ്വല കലാപ്രകടനം കാഴ്ചവെച്ച വിദ്യാർത്ഥികൾക്ക് ഹൃദയം നിറഞ്ഞ അഭിനന്ദനങ്ങൾ അറിയിച്ചു.

കുട്ടികളുടെ കഴിവുകളെ പ്രോത്സാഹിപ്പിക്കുന്നതിനൊപ്പം  ‘ഒരു ലോകം ഒരു കുടുംബം’ എന്ന കാഴ്ചപ്പാടിനെ ഉൾക്കൊള്ളുന്ന ഐക്യവും സൗഹൃദവും വളർത്താൻ പരിപാടി ഉപകരിച്ചു. ഐഎസ്‌ബി റിഫ കാമ്പസിൽ നടന്ന ശിശുദിനാഘോഷം ആഗോള വീക്ഷണത്തോടെ നല്ലവരായ വ്യക്തികളെ വളർത്തിയെടുക്കാനുള്ള സ്കൂളിന്റെ പ്രതിബദ്ധതയുടെ സാക്ഷ്യമായിരുന്നു.

The post ഇന്ത്യൻ സ്‌കൂൾ റിഫ കാമ്പസ് ശിശുദിനം ആഘോഷിച്ചു appeared first on Starvision News Malayalam.

മനാമ: മുഹറഖ് മലയാളി സമാജം മഞ്ചാടി ബാലവേദി നേതൃത്വത്തിൽ മുൻ പ്രധാനമന്ത്രി ജവഹർലാൽ നെഹ്‌റുവിന്റെ ജന്മദിന ആഘോഷ ഭാഗമായി ശിശുദിനാഘോഷം സംഘടിപ്പിച്ചു,എം എം എസ് ഓഫീസിൽ നടന്ന ആഘോഷ പരിപാടി പ്രസിഡന്റ് ശിഹാബ് കറുകപുത്തൂർ ഉദ്‌ഘാടനം ചെയ്തു, മഞ്ചാടി കൺവീനർ മൊയ്തീൻ ഷിസാൻ സ്വാഗതം ആശംസിച്ചു, ചിത്ര രചന മത്സരം, കളറിങ് മത്സരം, നെഹ്‌റു ചരിത്ര ക്വിസ് മത്സരം തുടങ്ങിയ മത്സരങ്ങളിൽ മുപ്പതോളം കുട്ടികൾ പങ്കാളികൾ ആയി, കുട്ടികളുടെ കലാ പരിപാടികളും അരങ്ങേറി, അനസ് റഹിം, ആനന്ദ് വേണുഗോപാൽ, ലത്തീഫ് കെ എന്നിവർആശംസകൾ അർപ്പിച്ചു, ജോയ്ന്റ ട്രഷറർ തങ്കച്ചൻ നന്ദി പറഞ്ഞു, കളറിങ് മത്സരത്തിൽ അദ്വൈദ് ശങ്കർ ഒന്നാം സ്ഥാനവും അന്നപൂർണ്ണ ഷിബു രണ്ടാം സ്ഥാനവും, ഹയാ ഫാത്തിമ മൂന്നാം സ്ഥാനവും നേടി, ചിത്ര രചന മത്സരത്തിൽ അനാമികാ ബൈജു ഒന്നാം സ്ഥാനവും നസ്രിയ നൗഫൽ രണ്ടാം സ്ഥാനവും ആര്യ നന്ദ ഷിബു മൂന്നാം സ്ഥാനവും നേടി, ക്വിസ് മത്സരത്തിൽ അനാമിക ബൈജു ഒന്നാം സ്ഥാനവും, റസ്വിൻ രണ്ടാം സ്ഥാനവും നേടി.

The post MMS മഞ്ചാടി ബാലവേദി ശിശുദിനാഘോഷം സംഘടിപ്പിച്ചു appeared first on Starvision News Malayalam.