ന്യൂഡല്‍ഹി: മുഖ്യ തിരഞ്ഞെടുപ്പ് കമ്മിഷണര്‍ രാജീവ് കുമാറിന് ഇസഡ് (Z) കാറ്റഗറി വി.ഐ.പി. സുരക്ഷയൊരുക്കി കേന്ദ്ര ആഭ്യന്തര മന്ത്രാലയം. ഗൗരവതരമായ സുരക്ഷാ ഭീഷണിയുള്ളതിനാലാണ് അദ്ദേഹത്തിന് സായുധ കമാന്‍ഡോകളുടെ സുരക്ഷ നല്‍കുന്നത്. 40 മുതല്‍ 45 വരെ സി.ആര്‍.പി.എഫ്. ജവാന്മാരാണ് രാജീവ് കുമാറിന്റെ സുരക്ഷയ്ക്കായി ഉണ്ടാകുകയെന്ന് വാര്‍ത്താ ഏജന്‍സിയായ പി.ടി.ഐ. റിപ്പോര്‍ട്ട് ചെയ്തു. കേന്ദ്ര സുരക്ഷാ ഏജന്‍സികളുടെ റിപ്പോര്‍ട്ടിലാണ് മുഖ്യ തിരഞ്ഞെടുപ്പ് കമ്മിഷണര്‍ക്ക് ഭീഷണിയുണ്ടെന്ന് പറയുന്നത്. അദ്ദേഹത്തിന് ശക്തമായ സുരക്ഷയൊരുക്കണമെന്ന നിര്‍ദേശവും റിപ്പോര്‍ട്ടിലുണ്ട്. ഇതനുസരിച്ചാണ് രാജീവ് കുമാറിന് ഇസഡ് കാറ്റഗറി സുരക്ഷ നല്‍കിയത്. ഏഴ് ഘട്ടങ്ങളായി നടനക്കുന്ന ഇന്ത്യയിലെ പൊതുതിരഞ്ഞെടുപ്പ് ഏപ്രില്‍ 19-ന് ആരംഭിക്കാനിരിക്കെയാണ് തിരഞ്ഞെടുപ്പ് കമ്മീഷണറുടെ സുരക്ഷ വര്‍ധിപ്പിച്ചത്.

നിലവില്‍ ഡല്‍ഹി പോലീസിനാണ് മുഖ്യ തിരഞ്ഞെടുപ്പ് കമ്മീഷണറുടേയും മറ്റ് രണ്ട് തിരഞ്ഞെടുപ്പ് കമ്മീഷണര്‍മാരുടേയും സുരക്ഷാ ചുമതല. ഡല്‍ഹി പോലീസിന്റെ സായുധസംഘമാണ് ഇവര്‍ക്ക് സുരക്ഷയൊരുക്കുന്നത്. തിരഞ്ഞെടുപ്പ് കമ്മിഷണര്‍ക്ക് കേന്ദ്രസേനയുടെ സുരക്ഷ നല്‍കുന്നത് അത്യപൂര്‍വ്വ സംഭവമാണ്. നേരത്തേ തിരഞ്ഞെടുപ്പ് കമ്മീഷണറായിരുന്ന ടി.എന്‍. ശേഷന് ഒരുതവണ കേന്ദ്ര സേനയുടെ സുരക്ഷ ഉണ്ടായിരുന്നു.

തിരഞ്ഞെടുപ്പ് കമ്മിഷന്‍ ആസ്ഥാനമായ നിര്‍വചന്‍ സദനിലും വസതിയിലും മാത്രമല്ല രാജ്യത്തെവിടെ സഞ്ചരിക്കുമ്പോഴും മുഖ്യ തിരഞ്ഞെടുപ്പ് കമ്മിഷണര്‍ക്ക് ഇസഡ് കാറ്റഗറി സുരക്ഷ ഉണ്ടാകുമെന്ന് ആഭ്യന്തര വകുപ്പിലെ വൃത്തങ്ങള്‍ അറിയിച്ചു. അതേസമയം സുരക്ഷ വര്‍ധിപ്പിച്ചത് സംബന്ധിച്ച് കമ്മിഷനോ കമ്മിഷന്റെ വക്താക്കളോ ഇതുവരെ ഔദ്യോഗികമായി പ്രതികരിച്ചിട്ടില്ല.

The post മുഖ്യ തിരഞ്ഞെടുപ്പ് കമ്മീഷണര്‍ രാജീവ് കുമാറിന് സുരക്ഷാ ഭീഷണി ; Z കാറ്റഗറി സുരക്ഷയൊരുക്കി appeared first on Starvision News Malayalam.