അഖിൽ മാരാർക്ക് തൃപ്പൂണിത്തുറ സീറ്റ് വാഗ്ദാനം ചെയ്തിരുന്നുവെന്ന ആരോപണം തള്ളി ട്വന്റി20 അധ്യക്ഷൻ സാബു എം. ജേക്കബ്. അഖിൽ മാരാരുടെ ആവശ്യങ്ങൾ എഴുതി ഒപ്പിട്ട് വാങ്ങിയിരുന്നെന്നും അതിൽ പറഞ്ഞ കാര്യങ്ങളെല്ലാം പൂർണമായി നടപ്പാക്കിയെന്നും അദ്ദേഹം വ്യക്തമാക്കി.

കൊട്ടാരക്കരയിൽ സ്വതന്ത്രനായി മത്സരിക്കാൻ ആഗ്രഹിച്ചിരുന്ന അഖിൽ മാരാരെ എൻഡിഎയിലെ വിവിധ വിഭാഗങ്ങൾ സമീപിച്ചുവെന്ന വാദവും സാബു ജേക്കബ് നിഷേധിച്ചു. കൊട്ടാരക്കര സീറ്റിൽ അഖിലിന് താത്പര്യമുണ്ടെന്ന് അറിയിച്ച് മറ്റൊരാൾ തങ്ങളെ സമീപിക്കുകയായിരുന്നുവെന്നാണ് അദ്ദേഹത്തിന്റെ വിശദീകരണം.

കൊട്ടാരക്കര മണ്ഡലം ആദ്യം ട്വന്റി20യുടെ പട്ടികയിൽ ഉണ്ടായിരുന്നില്ല. മണ്ഡലത്തിൽ പാർട്ടിക്ക് കമ്മിറ്റികൾ ഇല്ലാത്തതിനാലായിരുന്നു ഇത്. പിന്നീട് എൻഡിഎ നേതൃത്വവുമായി നടത്തിയ ചർച്ചയിൽ സീറ്റ് ലഭിക്കുമെന്ന അറിയിപ്പ് ലഭിച്ചതിനെ തുടർന്നാണ് അഖിൽ മാരാരെ വിവരം അറിയിച്ചത്. എന്നാൽ കോൺഗ്രസിൽനിന്ന് ആർ. രശ്മി ബിജെപിയിൽ ചേർന്നതോടെ കൊട്ടാരക്കര സീറ്റ് എൻഡിഎ തിരിച്ചെടുത്തുവെന്നും സാബു ജേക്കബ് പറഞ്ഞു.

ഇതിനു പകരമായി അഖിലിന് തൃക്കാക്കര സീറ്റ് വാഗ്ദാനം ചെയ്തു. എന്നാൽ അഖിൽ തൃപ്പൂണിത്തുറ ആവശ്യപ്പെട്ടു. തൃപ്പൂണിത്തുറ ട്വന്റി20യ്ക്ക് അനുവദിച്ചിട്ടില്ലെന്ന് അദ്ദേഹത്തെ അറിയിച്ചിരുന്നു. അതിനാൽ ആ സീറ്റ് നൽകാമെന്ന് ഒരിക്കലും വാഗ്ദാനം ചെയ്തിട്ടില്ലെന്നും സാബു ജേക്കബ് വ്യക്തമാക്കി.

തൃക്കാക്കരയിലെ എൻഡിഎ ഓഫീസിൽവെച്ച് സ്ഥാനാർഥിത്വവുമായി ബന്ധപ്പെട്ട് തർക്കമുണ്ടായതായും അദ്ദേഹം പറഞ്ഞു. തർക്കം തന്നോടല്ല, എൻഡിഎ വൈസ് പ്രസിഡന്റുമായിട്ടായിരുന്നുവെന്നാണ് വിശദീകരണം.

“അഖിൽ മത്സരിക്കേണ്ടെന്നാണ് അപ്പോൾ ഞാൻ പറഞ്ഞത്. അത് എല്ലാവർക്കും നല്ലതാണെന്നും പറഞ്ഞു. അഞ്ച് മിനിറ്റ് കഴിഞ്ഞപ്പോൾ അദ്ദേഹത്തിന്റെ നിലപാട് മാറി. പിന്നീട് കരച്ചിലും കാലുപിടിത്തവുമായി. പറഞ്ഞത് തെറ്റായിപ്പോയെന്ന് അഖിൽ സമ്മതിച്ചു,” സാബു ജേക്കബ് അവകാശപ്പെട്ടു.

ഇതിനെത്തുടർന്നാണ് അഖിലിന്റെ ആവശ്യങ്ങളെല്ലാം എഴുതി ഒപ്പിട്ട് വാങ്ങിയതെന്നും മറ്റൊരു സ്ഥാനാർഥിയോടും അത്തരത്തിൽ ചെയ്തിട്ടില്ലെന്നും അദ്ദേഹം പറഞ്ഞു. അഖിൽ ആവശ്യപ്പെട്ട കാര്യങ്ങൾ പൂർണമായി നടപ്പാക്കിയെന്നും സ്ഥാനാർഥിത്വം ആരുടെമേലും നിർബന്ധിച്ച് അടിച്ചേൽപ്പിച്ചിട്ടില്ലെന്നും സാബു ജേക്കബ് വ്യക്തമാക്കി.

അഖിൽ കാര്യങ്ങൾ പഠിച്ച് നന്നായി ചെയ്യുന്ന കഴിവുള്ളയാളാണെങ്കിലും പെട്ടെന്ന് വികാരാധീനനാകുകയും പരിസരബോധമില്ലാതെ മറ്റുള്ളവരോട് മോശമായി സംസാരിക്കുകയും ചെയ്യാറുണ്ടെന്നും സാബു ജേക്കബ് ആരോപിച്ചു. ഇക്കാരണങ്ങളാലാണ് കൊല്ലം ജില്ലയുടെ സംഘടനാ ചുമതല നൽകാനുള്ള നീക്കം ഉപേക്ഷിച്ചതെന്നും അദ്ദേഹം പറഞ്ഞു.

സ്ഥാനാർഥികളുടെ തിരഞ്ഞെടുപ്പ് ചെലവും കെട്ടിവെക്കേണ്ട തുകയും ട്വന്റി20യാണ് വഹിക്കുന്നതെന്നും അഖിൽ മാരാരുടെ കാര്യത്തിലും ഇതിൽ മാറ്റമുണ്ടായിട്ടില്ലെന്നും സാബു ജേക്കബ് കൂട്ടിച്ചേർത്തു.

The post ‘അഞ്ച് മിനിറ്റിനുള്ളിൽ നിലപാട് മാറി; പിന്നീട് കരച്ചിലും കാലുപിടിത്തവും’: അഖിൽ മാരാർക്കെതിരെ സാബു ജേക്കബ് appeared first on Starvision News Malayalam.

ബിസിനസ് ലോകത്തിന് തീരാനഷ്ടം സമ്മാനിച്ച വാര്‍ത്തയാണ് കോണ്‍ഫിഡന്റ് ഗ്രൂപ്പ് ചെയര്‍മാന്‍ സി ജെ റോയിയുടെ വിയോഗം. സമൂഹികപ്രവര്‍ത്തനങ്ങളില്‍ മുന്നിലുണ്ടായിരുന്ന അദ്ദേഹത്തെ കുറിച്ചുള്ള ഓര്‍മകള്‍ പങ്കിട്ട് ഒട്ടനവധി പേരാണ് രംഗത്ത് എത്തുന്നത്. ഇപ്പോഴിതാ അറിഞ്ഞോ അറിയാതെയോ തന്നെ അനുഗ്രഹിച്ച റേയിയെ കുറിച്ച് സംസാരിക്കുകയാണ് ബിഗ് ബോസ് വിജയി അഖില്‍ മാരാര്‍. ബിഗ് ബോസ് മലയാളം സീസണ്‍ 5ന്‍റെ വിജയ കിരീടം ചൂടിയപ്പോള്‍ ഒന്നാം സമ്മാനമായ 50 ലക്ഷം രൂപ അഖിലിന് നൽകിയത് സി ജെ റോയി ആയിരുന്നു.

അഖിൽ മാരാരുടെ വാക്കുകൾ

നമുക്ക് ഉൾക്കൊള്ളാൻ സാധിക്കാത്ത യാഥാർത്ഥ്യങ്ങൾ സമ്മാനിക്കുകയാണ്. എത്രയൊക്കെ നമ്മൾ തള്ളിപ്പറഞ്ഞാലും മരണമെന്ന പരമമായ സത്യം നമ്മളെയും നമുക്ക് വേണ്ടപ്പെട്ടവരെയും തേടി വരും. പക്ഷേ നമുക്കത് ഒരിക്കലും ഉൾക്കൊള്ളാനോ ആ യാഥാർത്ഥ്യത്തെ അം​ഗീകരിക്കാനോ കഴിയില്ല. പല മരണങ്ങളും നമുക്ക് മുന്നിലൂടെ സംഭവിക്കുമ്പോൾ അതെല്ലാം നമ്മളെ ഞെട്ടിപ്പിക്കുകയാണ്. പല മരണങ്ങൾ കേൾക്കുമ്പോഴും നമ്മൾ പറയാറുണ്ട് ‘അയ്യോ സത്യത്തിൽ ഞെട്ടിപ്പോയി’ എന്നൊക്കെ. യഥാർത്ഥത്തിൽ കുറെയൊക്കെ നമ്മൾ അങ്ങനെ പറയുകയാണ്. പക്ഷേ അക്ഷരാർത്ഥത്തിൽ ഞെട്ടിപ്പോയ, ഷോക്കായി പോയ മരണമായിരുന്നു ഡോ. റോയ് സിജെ സാറിന്റെ ആത്മഹത്യ. മുൻപ് സുശാന്ത് സിങ്ങിന്റെ മരണം എന്നെ ഞെട്ടിച്ചിട്ടുണ്ട്. സ്വാഭാവികമായിരുന്നുവെങ്കിലും അബ്ദുൾ കലാം സാറിന്റെ മരണവും എന്നെ വേദനിപ്പിച്ചിട്ടുണ്ട്. ഇവരൊന്നും പ്രത്യക്ഷത്തിൽ നമ്മളുമായി യാതൊരു ബന്ധവും ഇല്ലാത്തവരാണ്. എവിടെ ഒക്കെയോ നമ്മൾ കണ്ട മുഖങ്ങൾ മാത്രമാണ്. പക്ഷേ അവരുടെ മരണങ്ങൾ നമുക്ക് വേദന സമ്മാനിക്കും.

റോയ് സി ജെ സാറിന്റെ മരണം എന്തുകൊണ്ട് ഞെട്ടിച്ചെന്ന് ചോ​ദിച്ചാൽ, പ്രത്യക്ഷത്തിൽ അദ്ദേഹത്തിന് ഞാനുമായി ബന്ധമില്ല. ബി​ഗ് ബോസിന്റെ ഫിനാലേയ്ക്ക് ശേഷം ഞാൻ അദ്ദേഹത്തെ കണ്ടിട്ടുമില്ല. പക്ഷേ.. ഒരുസമയത്ത് ഒന്നുമല്ലാതിരുന്ന ഒരുവന്റെ അക്കൗണ്ടിലേക്ക് 50 ലക്ഷം രൂപയുടെ സമ്മാനം നൽകിയൊരു മനുഷ്യൻ. കഴിഞ്ഞ 18 വർഷക്കാലമായി വിവിധ റിയാലിറ്റി ഷോകളിൽ സമ്മാനം നൽകിയ മനുഷ്യൻ. എന്നെ പോലുള്ള ഒരുപാട് മനുഷ്യരുടെ ജീവിതത്തിൽ സമ്മാനം കൊണ്ട് അനു​ഗ്രഹിച്ച്, അവരുടെ ജീവിതത്തിൽ വലിയൊരു മാറ്റം വരുത്തിയ മനുഷ്യൻ. പണ്ട് ഒരു ക്രെഡിറ്റ് കാർഡ് എടുത്തിട്ട് തിരിച്ചടക്കാൻ പറ്റാതെ ബാധ്യതയിൽ പെട്ടെ പോയൊരുവനാണ് ഞാൻ. ചെറിയ ലോൺ എടുത്തിട്ട് തിരിച്ചടക്കാൻ പറ്റാതെ, ഒരു വർഷത്തിൽ പതിനായിരം രൂപ പോലും അടക്കാൻ പറ്റാതെ ബാധ്യതയിൽപെട്ട് പോയവനാണ്. സാമ്പത്തികമായി വലിയ പ്രശ്നത്തിലായിരുന്നവൻ. അങ്ങനെ ഒരുവനായിരുന്ന എന്റെ അക്കൗണ്ടിലേക്ക് 50 ലക്ഷം രൂപയുടെ സമ്മാനം നൽകുകയും എന്നെ സാമ്പത്തികമായി അനു​ഗ്രഹിച്ച, ജീവിതത്തിൽ വലിയ മാറ്റങ്ങൾക്ക് കാരണമായ, ലക്ഷ്മി ദേവിയുടെ അനു​ഗ്രഹം ലഭിച്ച വലിയൊരു മനുഷ്യനാണ് അദ്ദേഹം. ഈ മനുഷ്യനല്ലേ എന്റെ ജീവിതത്തിൽ മാറ്റം ഉണ്ടാക്കിയത്. ചിലർ കൈ നീട്ടം നൽകി കഴിഞ്ഞാൽ വലിയ ഭാ​ഗ്യമെന്നാണ് പറയുന്നത്. അങ്ങനെ ഒരു മനുഷ്യൻ എന്ത് കാരണം കൊണ്ടാണ് മരിച്ചതെന്ന് അറിയാൻ പറ്റാത്ത അവസ്ഥ എല്ലാവർക്കുമുണ്ട്. ഉദ്യോ​ഗസ്ഥരുടെ പീഢനമാണോ, രാഷ്ട്രീയ സമ്മർദ്ദമാണോ, മറ്റെന്തെങ്കിലും കാരണമാണോ, എന്ത് കാരണമാകാം അദ്ദേഹത്തെ പോലൊരു മനുഷ്യന് ഒരുനിമിഷം താൻ ഇനി ഭൂമിയിൽ വേണ്ടെന്ന തീരുമാനം എടുപ്പിച്ചത്. വലിയൊരു നഷ്ടമാണ് ബിസിനസ് മേഖലയിലും കോൺഫിഡന്റ് ​ഗ്രൂപ്പിനും ഉണ്ടാക്കിയിരിക്കുന്നത്. കുടുംബാ​ഗങ്ങളുടെ വലിയ വേദനയിൽ ഞാനും പങ്കു ചേരുകയാണ്. ജീവിച്ചിരുന്നുവെങ്കിൽ ഒരുപാട് പേർക്ക് പ്രയോജനപ്പെടേണ്ട ആളായിരുന്നു.

The post ‘ഒന്നുമില്ലാത്തവന്‍റെ അക്കൗണ്ടിൽ 50 ലക്ഷമിട്ട മനുഷ്യൻ, ഞാനീ ഭൂമിയിൽ വേണ്ടെന്ന തീരുമാനത്തിന് കാരണമെന്ത്?’ appeared first on Starvision News Malayalam.