മനാമ: ഷിഫ അല്‍ ജസീറ മെഡിക്കല്‍ കമ്പനിക്ക് നാഷണല്‍ ഹെല്‍ത്ത് റെഗുലേറ്ററി അതോറിറ്റിയുടെ (എന്‍എച്ച്ആര്‍എ) ഡയണ്ട് അക്രഡിറ്റേഷന്‍. എന്‍എച്ച്ആര്‍എ അക്രഡിറ്റേഷന്‍ സര്‍വേയിലാണ് ഡയമണ്ട് പദവി നേടി ആരോഗ്യ സംരക്ഷണ മികവില്‍ ഷിഫ അല്‍ ജസീറ പുതു ചരിത്രം രചിച്ചത്.
ബഹ്‌റൈനിലെ ആരോഗ്യ സേവന ദാതാക്കള്‍ക്ക് നേടാവുന്ന ഏറ്റവും ഉയര്‍ന്ന അംഗീകാരമാണ് ഡയമണ്ട് അക്രഡിറ്റേഷന്‍. ഗുണനിലവാരം, രോഗികളുടെ സുരക്ഷ, ക്ലിനിക്കല്‍ മികവ് എന്നിവയോടുള്ള ഷിഫ അല്‍ ജസീറയുടെ അചഞ്ചലമായ പ്രതിബദ്ധതയുടെ തെളിവാണ് പുതിയ നേട്ടം. രോഗികളുടെ സുരക്ഷ, പരിചരണത്തിന്റെ ഗുണനിലവാരം, ക്ലിനിക്കല്‍ മികവ്, ജീവനക്കാരുടെ കഴിവ്, സ്ഥാപന ഭരണം എന്നിവയുള്‍പ്പെടെ ആരോഗ്യ പരിപാലനത്തിന്റെ വിവിധ വശങ്ങളുടെ സൂക്ഷ്മമായ വിലയിരുത്തല്‍ ഉള്‍പ്പെടുന്നതാണ് എന്‍എച്ച്ആര്‍എ അക്രഡിറ്റേഷന്‍ പ്രക്രിയ. ഷിഫ അല്‍ ജസീറയുടെ നേട്ടം ഈ മേഖലകളിലെല്ലാം കൈവരിച്ച അതിന്റെ അസാധാരണമായ നേട്ടമാണ് പ്രകടമാക്കുന്നത്.

‘എന്‍എച്ച്ആര്‍എയില്‍ നിന്ന് ഈ അഭിമാനകരമായ ഡയമണ്ട് അക്രഡിറ്റേഷന്‍ ലഭിച്ചതില്‍ ഞങ്ങള്‍ക്ക് അതിയായ സന്തോഷവും അഭിമാനമുണ്ടെന്ന് കമ്പനി സിഇഒ ഹബീബ് റഹ്മാന്‍ പറഞ്ഞു. ഞങ്ങളുടെ മുഴുവന്‍ ടീമിന്റെയും സമര്‍പ്പണത്തിന്റെയും കഠിനാധ്വാനത്തിന്റെയും വൈദഗ്ധ്യത്തിന്റെയും തെളിവാണ് ഈ അംഗീകാരം. അനുകമ്പയും രോഗി കേന്ദ്രീകൃതവുമായ ഉയര്‍ന്ന നിലവാരമുള്ള ആരോഗ്യ സേവനങ്ങള്‍ നല്‍കുന്നതിനുള്ള ഞങ്ങളുടെ അചഞ്ചലമായ പ്രതിബദ്ധത ഈ ശ്രദ്ധേയമായ നാഴികക്കല്ല് കൈവരിക്കുന്നതില്‍ തങ്ങള്‍ക്ക് സഹായകരമായി- അദ്ദേഹം പറഞ്ഞു. ഷിഫ അല്‍ ജസീറയുടെ ഡയമണ്ട്, പ്ലാറ്റിനം അക്രഡിറ്റേഷനുകള്‍ ബഹ്‌റൈനിലെ ഒരു മുന്‍നിര ആരോഗ്യ പരിരക്ഷാ ദാതാവെന്ന നിലയിലുള്ള ഷിഫ അല്‍ ജസീറ ആശുപത്രിയുടെയും മെഡിക്കല്‍ സെന്ററിന്റെയും സ്ഥാനത്തെ സാധൂകരിക്കുന്നു. രോഗികളുടെ സുരക്ഷ, ഗുണമേന്മയുള്ള പരിചരണം, ക്ലിനിക്കല്‍ മികവ് എന്നിവയില്‍ ശ്രദ്ധ കേന്ദ്രീകരിക്കുന്ന ഷിഫ അല്‍ ജസീറ ആശുപത്രിയും മെഡിക്കല്‍ സെന്ററും രാജ്യത്ത് ആരോഗ്യ പരിരക്ഷാ നവീകരണത്തിന്റെ മുന്‍നിരയില്‍ നിലകൊള്ളുന്നുവെന്ന് ഉറപ്പാക്കുമെന്നും സിഇഒ കൂട്ടിച്ചേര്‍ത്തു.

ഷിഫ അല്‍ജസീറ ആശുപത്രിയില്‍ രോഗീ കേന്ദ്രീകൃതമായ ക്വാളിറ്റി, അണുബാധാ നിയന്ത്രണം, ഓപിഡി സേവനങ്ങള്‍, ഗുണമേന്‍മയുള്ള മെഡിക്കല്‍ ഉപകരണങ്ങളുടെ ഉപയോഗം, രോഗികളുടെ അവകാശം, സേവനങ്ങളുടെ പ്രാപ്യത, റേഡിയോളജി സേവനങ്ങള്‍ തുടങ്ങി 19 ചാപ്റ്ററുകള്‍ക്ക് ഡയമണ്ട് സ്‌കോര്‍ ലഭിച്ചു. തുടങ്ങി ഒരു വര്‍ഷമാകുമുമ്പാണ് ആശുപത്രി ഈ നേട്ടം കൈവരിച്ചത്. കഴിഞ്ഞ ദിവസം റിറ്റ്‌സ്‌കാള്‍ട്ടന്‍ ഹോട്ടലില്‍ നടന്ന ചടങ്ങില്‍ ഷിഫ അല്‍ ജസീറ ഹോസ്പിറ്റലിനും മെഡിക്കല്‍ സെന്ററിനുമുള്ള എന്‍എച്ച്ആര്‍എ ഡയമണ്ട്, പ്ലാറ്റിനം അക്രഡിറ്റേഷന്‍ അവാര്‍ഡുകള്‍ സുപ്രീം കൗണ്‍സില്‍ ഓഫ് ഹെല്‍ത്ത് ചെയര്‍മാന്‍ ലെഫ്റ്റനന്റ് ജനറല്‍ ഡോ. ഷെയ്ഖ് മുഹമ്മദ് ബിന്‍ അബ്ദുല്ല അല്‍ ഖലീഫയില്‍ നിന്നും സിഇഒ ഹബീബ് റഹ്മാന്‍ ഏറ്റുവാങ്ങി. ആരോഗ്യമന്ത്രി ഡോ. ജലീല ബിന്‍ത് അല്‍ സയ്യിദ് ജവാദ് ഹസന്‍, എന്‍എച്ച്ആര്‍എ സിഇഒ ഡോ. അഹമ്മദ് മുഹമ്മദ് അല്‍ അന്‍സാരി എന്നിവര്‍ സന്നിഹിതരായി.

The post ഷിഫ അല്‍ ജസീറക്ക് എന്‍എച്ച്ആര്‍എ ഡയമണ്ട് അക്രഡിറ്റേഷന്‍ appeared first on Starvision News Malayalam.