ഇസ്‌ലാമാബാദ്: കടുത്ത സാമ്പത്തിക പ്രതിസന്ധി നേരിടുന്ന പാകിസ്താൻ വിദേശനാണ്യ ശേഖരം ശക്തിപ്പെടുത്തുന്നതിനായി അമേരിക്കയോട് 10 ബില്യൺ ഡോളറിന്റെ കറൻസി സഹായം ആവശ്യപ്പെട്ടതായി റിപ്പോർട്ട്. വാർത്താ ഏജൻസിയായ റോയിട്ടേഴ്‌സാണ് ഇക്കാര്യം റിപ്പോർട്ട് ചെയ്തത്.

ഇറാൻ യുദ്ധവുമായി ബന്ധപ്പെട്ട ചർച്ചകളിൽ മധ്യസ്ഥത വഹിച്ചതിലൂടെ അന്താരാഷ്ട്രതലത്തിൽ കൈവരിച്ച നയതന്ത്ര പ്രാധാന്യം സാമ്പത്തിക നേട്ടമാക്കി മാറ്റാനാണ് ഇസ്‌ലാമാബാദിന്റെ നീക്കമെന്നാണ് റിപ്പോർട്ട്. അമേരിക്കയിൽനിന്നും മറ്റ് അന്താരാഷ്ട്ര പങ്കാളികളിൽനിന്നും കൂടുതൽ സാമ്പത്തിക പിന്തുണ നേടിയെടുക്കുകയാണ് ലക്ഷ്യം.

ഇതിന്റെ ഭാഗമായി യുഎസ് ട്രഷറി സെക്രട്ടറി സ്കോട്ട് ബെസന്റിനെ സമീപിച്ച് അഞ്ചുവർഷ കാലാവധിയുള്ള ‘ബൈലാറ്ററൽ എക്സ്ചേഞ്ച് സ്റ്റെബിലൈസേഷൻ സപ്പോർട്ട് ഫെസിലിറ്റി’ പാകിസ്താൻ ആവശ്യപ്പെട്ടതായാണ് വിവരം.

നിർദിഷ്ട സഹായം ലഭിച്ചാൽ പാകിസ്താന്റെ വിദേശനാണ്യ ശേഖരം വർധിപ്പിക്കാനും പാകിസ്താനി രൂപ നേരിടുന്ന സമ്മർദം കുറയ്ക്കാനും സാധിക്കുമെന്നാണ് പ്രതീക്ഷ. രാജ്യത്തിന്റെ ഇറക്കുമതി ആവശ്യങ്ങൾ നിറവേറ്റുന്നതിനും വിദേശ കടബാധ്യതകൾ കൈകാര്യം ചെയ്യുന്നതിനും ഇത് സഹായകരമായേക്കും.

അന്താരാഷ്ട്ര നാണയനിധിയിൽനിന്നുള്ള ഏഴ് ബില്യൺ ഡോളറിന്റെ വായ്പാ പദ്ധതിയുടെ ഭാഗമായി നികുതി വർധനയും കടുത്ത സാമ്പത്തിക നിയന്ത്രണങ്ങളും നടപ്പാക്കുന്നതിനിടെയാണ് പാകിസ്താൻ അമേരിക്കയുടെ സഹായം തേടിയിരിക്കുന്നത്. അതേസമയം, പാകിസ്താന്റെ ആവശ്യത്തോട് അമേരിക്ക ഔദ്യോഗികമായി പ്രതികരിച്ചതായി റിപ്പോർട്ടുകളില്ല.

The post ഇറാൻ യുദ്ധത്തിലെ മധ്യസ്ഥതയ്ക്ക് പിന്നാലെ അമേരിക്കയോട് 10 ബില്യൺ ഡോളറിന്റെ സഹായം തേടി പാകിസ്താൻ appeared first on Starvision News Malayalam.

ഡാളസ്: സ്പെയിൻ–ഫ്രാൻസ് ലോകകപ്പ് സെമി ഫൈനൽ പോരാട്ടം നേരിട്ട് കാണാൻ നടൻ മോഹൻലാൽ ഭാര്യ സുചിത്രയ്ക്കൊപ്പം ഡാളസ് സ്റ്റേഡിയത്തിലെത്തി. ആവേശകരമായ മത്സരത്തിൽ ഫ്രാൻസിനെ മറികടന്ന് സ്പെയിൻ ഫൈനലിലേക്ക് മുന്നേറുന്നതിന് ഇരുവരും ഗാലറിയിൽ നിന്ന് സാക്ഷിയായി.

70,000-ത്തിലധികം കാണികൾ നിറഞ്ഞ സ്റ്റേഡിയത്തിൽ മോഹൻലാലിന്റെയും സുചിത്രയുടെയും സാന്നിധ്യം മലയാളി ആരാധകരുടെ ശ്രദ്ധ നേടി. സ്പെയിനിന്റെ യുവതാരനിരയും ഫ്രാൻസിന്റെ ആക്രമണശൈലിയും നേർക്കുനേർ വന്ന മത്സരത്തിലെ ഓരോ നിമിഷവും മോഹൻലാൽ ആസ്വദിക്കുന്ന ചിത്രങ്ങളും വീഡിയോകളും സാമൂഹിക മാധ്യമങ്ങളിൽ വൈറലായി.

ഈ ലോകകപ്പിൽ മോഹൻലാൽ ഗാലറിയിലെത്തുന്നത് ഇതാദ്യമല്ല. കൻസാസ് സിറ്റിയിൽ നടന്ന അർജന്റീന–സ്വിറ്റ്സർലാൻഡ് ക്വാർട്ടർ ഫൈനൽ മത്സരവും അദ്ദേഹം നേരിട്ട് കണ്ടിരുന്നു.

അർജന്റീനയുടെ എവേ ജേഴ്സി ധരിച്ച് കറുത്ത കണ്ണടയും കൊമ്പൻ മീശയുമായി സ്റ്റേഡിയത്തിൽ ഇരിക്കുന്ന മോഹൻലാലിന്റെ ചിത്രങ്ങൾ അന്നും ആരാധകർ ഏറ്റെടുത്തിരുന്നു. മെസിയും സംഘവും വാം-അപ്പ് ചെയ്യുന്ന ദൃശ്യങ്ങൾ മൊബൈലിൽ പകർത്തുന്ന അദ്ദേഹത്തിന്റെ വീഡിയോകളും വലിയ ശ്രദ്ധ നേടിയിരുന്നു.

The post സ്പെയിൻ–ഫ്രാൻസ് ലോകകപ്പ് സെമി കാണാൻ സുചിത്രയ്ക്കൊപ്പം മോഹൻലാൽ ഡാളസ് സ്റ്റേഡിയത്തിൽ appeared first on Starvision News Malayalam.

വാഷിങ്ടൺ: ഇറാനെതിരെ നാവിക ഉപരോധം വീണ്ടും ഏർപ്പെടുത്തിയതായി യുഎസ് പ്രസിഡന്റ് ഡൊണാൾഡ് ട്രംപ് പ്രഖ്യാപിച്ചു. ഹോർമുസ് കടലിടുക്കിന്റെ സുരക്ഷയും നിയന്ത്രണവും ഇനി അമേരിക്ക ഏറ്റെടുക്കുമെന്നും അമേരിക്കയെ ഹോർമുസിന്റെ സംരക്ഷകനായി അറിയപ്പെടുമെന്നും ട്രംപ് ട്രൂത്ത് സോഷ്യലിൽ കുറിച്ചു.

ഹോർമുസിലൂടെ കടന്നുപോകുന്ന ചരക്കുകളുടെ മൂല്യത്തിന്റെ 20 ശതമാനം സുരക്ഷാ ചെലവായി ഈടാക്കുമെന്നും ട്രംപ് അവകാശപ്പെട്ടു. മേഖലയിൽ സുരക്ഷ ഉറപ്പാക്കുന്നതിനുള്ള ചെലവ് നികത്താനാണ് ഈ നടപടി സ്വീകരിക്കുന്നതെന്നാണ് അദ്ദേഹത്തിന്റെ വിശദീകരണം.

ഇറാനും അമേരിക്കയും തമ്മിലുള്ള സംഘർഷം വീണ്ടും രൂക്ഷമായ പശ്ചാത്തലത്തിൽ ഹോർമുസിന്റെ നിയന്ത്രണം യുഎസ് ഏറ്റെടുക്കുമെന്ന് ഫോക്സ് ന്യൂസിന് നൽകിയ അഭിമുഖത്തിലും ട്രംപ് പറഞ്ഞിരുന്നു. അഭിമുഖം പുറത്തുവന്ന് മണിക്കൂറുകൾക്കുള്ളിലാണ് ഔദ്യോഗിക പ്രഖ്യാപനം വന്നത്.

ഹോർമുസ് കടലിടുക്ക് തുറന്ന നിലയിൽ തുടരുമെന്നും ഇറാനിയൻ കപ്പലുകൾക്കും ഇറാനിലേക്ക് പോകുന്നതോ അവിടെനിന്ന് വരുന്നതോ ആയ കപ്പലുകൾക്കുമാണ് ഉപരോധം ബാധകമാകുകയെന്നും ട്രംപ് പറഞ്ഞു. മറ്റു രാജ്യങ്ങൾക്ക് കടലിടുക്ക് ഉപയോഗിക്കാമെന്നും അദ്ദേഹം വ്യക്തമാക്കി.

അതേസമയം, ട്രംപിന്റെ പ്രഖ്യാപനം ഇറാൻ തള്ളി. ഹോർമുസ് കടലിടുക്കിന്റെ നിയന്ത്രണത്തിൽ അമേരിക്കയ്ക്ക് യാതൊരു പങ്കും അനുവദിക്കില്ലെന്ന് ഇറാന്റെ ഉന്നത സൈനിക നേതൃത്വം വ്യക്തമാക്കി. മേഖലയിലേക്കുള്ള യുഎസ് ഇടപെടലിനെ ശക്തമായി നേരിടുമെന്നും ഇറാൻ മുന്നറിയിപ്പ് നൽകി.

The post ഹോർമുസിന്റെ നിയന്ത്രണം അമേരിക്ക ഏറ്റെടുക്കുമെന്ന് ട്രംപ്; ഇറാനെതിരെ നാവിക ഉപരോധം പുനഃസ്ഥാപിച്ചതായി പ്രഖ്യാപനം appeared first on Starvision News Malayalam.

വാഷിങ്ടൺ: ഇടവേളയ്ക്ക് ശേഷം യുഎസ്–ഇറാൻ സംഘർഷം വീണ്ടും രൂക്ഷമാകുന്നതിനിടെ പരസ്പര ഭീഷണികളുമായി ഇരുരാജ്യങ്ങളും രംഗത്ത്. തന്നെ വധിക്കാൻ ഇറാൻ ശ്രമിച്ചാൽ ശക്തമായ സൈനിക തിരിച്ചടി നേരിടേണ്ടിവരുമെന്ന് യുഎസ് പ്രസിഡന്റ് ഡൊണാൾഡ് ട്രംപ് മുന്നറിയിപ്പ് നൽകി.

ഇറാന്റെ ഭാഗത്തുനിന്ന് വധശ്രമമുണ്ടായാൽ പ്രയോഗിക്കാൻ 1000 മിസൈലുകൾ സജ്ജമാക്കിയിട്ടുണ്ടെന്നും ആവശ്യമായാൽ കൂടുതൽ മിസൈലുകൾ വിന്യസിക്കുമെന്നും ട്രംപ് അവകാശപ്പെട്ടു. തന്റെ ഔദ്യോഗിക സോഷ്യൽ മീഡിയ അക്കൗണ്ടിലൂടെയാണ് അദ്ദേഹം ഇറാനെതിരെ കടുത്ത ഭാഷയിൽ പ്രതികരിച്ചത്.

ഇറാന്റെ വധഭീഷണി നേരിടുന്നവരുടെ പട്ടികയിൽ താൻ ഏറെക്കാലമായി മുൻനിരയിലാണെന്ന് ട്രംപ് പറഞ്ഞു. എന്നാൽ ഉടൻ വധശ്രമമുണ്ടാകുമെന്ന തരത്തിലുള്ള രഹസ്യാന്വേഷണ വിവരം നിലവിലില്ലെന്നും അദ്ദേഹം വ്യക്തമാക്കി. ഇറാനെ ആണവായുധം വികസിപ്പിക്കാൻ അനുവദിക്കില്ലെന്നും ട്രംപ് ആവർത്തിച്ചു.

അതേസമയം, ഇറാനെതിരായ ഉപരോധ നടപടികൾ ശക്തമാക്കാനും അമേരിക്ക നീക്കം തുടങ്ങി. ഇറാനുമായി ബന്ധപ്പെട്ട സാമ്പത്തിക ഇടപാടുകൾ കൈകാര്യം ചെയ്യുന്ന വ്യക്തികൾക്കും വിവിധ എക്സ്ചേഞ്ച് കമ്പനികൾക്കുമെതിരെ നിയന്ത്രണങ്ങൾ ഏർപ്പെടുത്തിയതായാണ് റിപ്പോർട്ട്.

കഴിഞ്ഞ ദിവസങ്ങളിൽ മിഡിൽ ഈസ്റ്റിൽ യുഎസും ഇറാനും തമ്മിൽ ആക്രമണങ്ങളും പ്രത്യാക്രമണങ്ങളും നടന്ന സാഹചര്യത്തിലാണ് ട്രംപിന്റെ പുതിയ പ്രസ്താവന. ഇത് അന്താരാഷ്ട്ര തലത്തിൽ വലിയ ചർച്ചകൾക്ക് വഴിവെച്ചിട്ടുണ്ട്.

ട്രംപിന്റെ മുന്നറിയിപ്പിന് പിന്നാലെ അമേരിക്കയ്ക്കെതിരെ ഇറാനും പ്രതികരിച്ചു. ഏതെങ്കിലും ധാരണയിലെ വ്യവസ്ഥകൾ ലംഘിച്ചാൽ അതേ രീതിയിൽ തിരിച്ചടിക്കുമെന്ന് ഇറാൻ മുന്നറിയിപ്പ് നൽകി. ചർച്ചകൾ തുടരാൻ ഇറാൻ അഭ്യർഥിച്ചെന്ന ട്രംപിന്റെ അവകാശവാദവും തെഹ്‌റാൻ തള്ളി.

The post ‘എന്നെ വധിക്കാൻ ശ്രമിച്ചാൽ ഇറാനിലേക്ക് 1000 മിസൈലുകൾ പായും’; ട്രംപിന്റെ ഭീഷണിക്ക് തിരിച്ചടിയുമായി ഇറാൻ appeared first on Starvision News Malayalam.

വാഷിംഗ്ടൺ: ഇറാനുമായുള്ള വെടിനിർത്തൽ തന്റെ ഭാഗത്തുനിന്ന് അവസാനിച്ചതായി അമേരിക്കൻ പ്രസിഡന്റ് ഡോണൾഡ് ട്രംപ് വ്യക്തമാക്കി. ഇനി ഇറാനുമായി യാതൊരു തരത്തിലുള്ള ഇടപാടുകൾക്കും താൻ തയ്യാറല്ലെന്നും ട്രംപ് പറഞ്ഞു.

ഇറാനെതിരെ കടുത്ത വിമർശനവുമായി രംഗത്തെത്തിയ ട്രംപ്, ഇറാനികൾ കള്ളം പറയുന്നവരും ചതിയന്മാരുമാണെന്ന് ആരോപിച്ചു. കഴിഞ്ഞ രാത്രി ഇറാനിൽ നിന്നുള്ള അപകടകാരികളായ ചിലരെ ലക്ഷ്യമിട്ട് അമേരിക്ക ശക്തമായ ആക്രമണം നടത്തിയതായും അദ്ദേഹം വ്യക്തമാക്കി.

ഹോർമുസ് കടലിടുക്കിലൂടെ കടന്നുപോകുകയായിരുന്ന മൂന്ന് കപ്പലുകൾക്ക് നേരെയുണ്ടായ ആക്രമണത്തിന് പിന്നാലെയാണ് അമേരിക്കയുടെ തിരിച്ചടി. കപ്പലുകൾക്ക് നേരെയുണ്ടായ ആക്രമണത്തിന് പിന്നിൽ ഇറാൻ സൈന്യമാണെന്നാണ് യുഎസ് ആരോപണം.

“കഴിഞ്ഞ രാത്രി അപകടകാരികളായ ഇറാൻകാരെ ലക്ഷ്യമിട്ട് ഞങ്ങൾ ശക്തമായ ആക്രമണം നടത്തി,” എന്ന് ട്രംപ് പറഞ്ഞു. ഇറാനുമായി ഇനി വെടിനിർത്തലോ ചർച്ചകളോ തുടരാനുള്ള സാഹചര്യമില്ലെന്നും അദ്ദേഹം വ്യക്തമാക്കി.

ഹോർമുസ് കടലിടുക്കിലെ സംഘർഷാവസ്ഥ കൂടുതൽ രൂക്ഷമാകുന്നതിനിടെ അമേരിക്കയുടെ പുതിയ നീക്കം പശ്ചിമേഷ്യയിൽ വീണ്ടും ആശങ്ക ഉയർത്തുകയാണ്.

The post വെടിനിർത്തൽ അവസാനിച്ചു; ഇറാനുമായി ഇനി ഇടപാടില്ലെന്ന് ട്രംപ് appeared first on Starvision News Malayalam.

മനാമ: ക്രിസ്റ്റ്യാനോ റൊണാൾഡോയുടെ അവസാന ഫിഫ ലോകകപ്പ് യാത്ര ഹൃദയഭേദകമായി അവസാനിച്ചു. റൗണ്ട് ഓഫ് 16 മത്സരത്തിൽ പോർച്ചുഗൽ സ്പെയിനോട് അവസാന നിമിഷം 1-0 ന് തോറ്റതോടെയാണ് ഫുട്ബോൾ ലോകത്തെ ഇതിഹാസ താരത്തിന്റെ ലോകകപ്പ് സ്വപ്നം അവസാനിച്ചത്.

41-ാം വയസ്സിൽ കളത്തിലിറങ്ങിയ റൊണാൾഡോ, ഇത് തന്റെ അവസാന ലോകകപ്പായിരിക്കുമെന്ന് നേരത്തെ തന്നെ പ്രഖ്യാപിച്ചിരുന്നു. ആറു ലോകകപ്പുകളിൽ ഗോൾ നേടുന്ന ആദ്യ താരമെന്ന ചരിത്ര നേട്ടം കൈവരിച്ചെങ്കിലും, സ്പെയിനിനെതിരായ നിർണായക മത്സരത്തിൽ പോർച്ചുഗലിന് വിജയത്തിലേക്ക് എത്താനായില്ല.

സ്റ്റോപ്പേജ് ടൈമിൽ മികേൽ മെറിനോ നേടിയ ഗോൾ സ്പെയിനിന് ക്വാർട്ടർ ഫൈനൽ പ്രവേശനം ഉറപ്പിച്ചു. പരാജയത്തിനു പിന്നാലെ കണ്ണീരോടെ മൈതാനം വിട്ട റൊണാൾഡോയുടെ ചിത്രം ഫുട്ബോൾ ആരാധകർക്ക് വികാരഭരിത നിമിഷമായി.

ലോക ഫുട്ബോളിലെ ഏറ്റവും വലിയ താരങ്ങളിൽ ഒരാളായ റൊണാൾഡോയുടെ ലോകകപ്പ് യാത്ര ഇതോടെ അവസാനിക്കുമ്പോൾ, അദ്ദേഹത്തിന്റെ നേട്ടങ്ങളും പോരാട്ടങ്ങളും ഫുട്ബോൾ ചരിത്രത്തിൽ എന്നും ഓർമ്മിക്കപ്പെടും.

The post റൊണാൾഡോയുടെ അവസാന ലോകകപ്പ് യാത്ര കണ്ണീരോടെ അവസാനിച്ചു appeared first on Starvision News Malayalam.

ഡാലസ്: ലോകകപ്പ് രണ്ടാം റൗണ്ട് പോരാട്ടത്തിൽ ഓസ്ട്രേലിയയെ പെനാൽറ്റി ഷൂട്ടൗട്ടിൽ 4-2ന് തോൽപ്പിച്ച് ഈജിപ്ത് പ്രീക്വാർട്ടറിൽ പ്രവേശിച്ചു. ലോകകപ്പ് ചരിത്രത്തിൽ ആദ്യമായാണ് ഈജിപ്ത് പ്രീക്വാർട്ടറിൽ ഇടം നേടുന്നത്.

നിശ്ചിത സമയത്തും അധിക സമയത്തും ഇരു ടീമുകളും ഓരോ ഗോൾ വീതം നേടി സമനില പാലിച്ചതോടെയാണ് മത്സരം ഷൂട്ടൗട്ടിലേക്ക് നീങ്ങിയത്. ഷൂട്ടൗട്ടിൽ കൂടുതൽ കൃത്യതയോടെ കിക്കുകൾ പൂർത്തിയാക്കിയ ഈജിപ്ത് ചരിത്ര നേട്ടം സ്വന്തമാക്കി.

മത്സരത്തിന്റെ 13-ാം മിനിറ്റിൽ ഇമാം അഷൗറിലൂടെയാണ് ഈജിപ്ത് ലീഡ് നേടിയത്. ഈ ലോകകപ്പിലെ ആദ്യ മത്സരത്തിൽ ബെൽജിയത്തിനെതിരെയും ഈജിപ്തിനായി ആദ്യം ഗോൾ നേടിയതും ഇമാം അഷൗറായിരുന്നു.

രണ്ടാം പകുതിയിൽ ഓസ്ട്രേലിയ തിരിച്ചടിച്ചു. 55-ാം മിനിറ്റിൽ ഈജിപ്ഷ്യൻ ഡിഫൻഡർ മുഹമ്മദ് ഹാനിയുടെ സെൽഫ് ഗോളിലൂടെയാണ് ഓസീസ് സമനില പിടിച്ചത്.

ഹൈബാൾ തടയാനുള്ള ശ്രമത്തിനിടെ ഹാനിയുടെ തലയിൽ തട്ടി പന്ത് വലയിലെത്തുകയായിരുന്നു. ബെൽജിയത്തിനെതിരെയും ഹാനി സെൽഫ് ഗോൾ വഴങ്ങിയിരുന്നു.

ആവേശകരമായ പോരാട്ടത്തിനൊടുവിൽ ഷൂട്ടൗട്ടിൽ ഓസ്ട്രേലിയയെ മറികടന്ന ഈജിപ്ത് ലോകകപ്പ് വേദിയിൽ പുതിയ ചരിത്രം കുറിച്ചു.

The post ചരിത്രം കുറിച്ച് ഈജിപ്ത്; പെനാൽറ്റി ഷൂട്ടൗട്ടിൽ ഓസ്ട്രേലിയയെ വീഴ്ത്തി പ്രീക്വാർട്ടറിൽ appeared first on Starvision News Malayalam.

ടാമ്പാ: നോർത്ത് അമേരിക്കയിലെ ശ്രീനാരായണ പ്രസ്ഥാനങ്ങളുടെ സംയുക്ത കൂട്ടായ്മയായ ഫെഡറേഷൻ ഓഫ് ശ്രീനാരായണ ഓർഗനൈസേഷൻസ് ഓഫ് നോർത്ത് അമേരിക്ക (FSNONA)യുടെ ആറാമത് ആഗോള കൺവെൻഷന്, കേരളാ ഹിന്ദൂസ് ഓഫ് നോർത്ത് അമേരിക്ക (KHNA) പ്രസിഡന്റ് ടി. ഉണ്ണികൃഷ്ണൻ ഹൃദയം നിറഞ്ഞ വിജയാശംസകൾ അറിയിച്ചു. ബിനൂബ് ശ്രീധരൻ അധ്യക്ഷനായുള്ള FSNONAയുടെ ഇത്തവണത്തെ സമ്മേളനം ഫ്ലോറിഡയിലെ ടാമ്പയിൽ ജൂലൈ 2 മുതൽ 5 വരെയാണ് നടക്കുന്നത്.

കൺവെൻഷന് ആശംസകൾ നേർന്നുകൊണ്ട് കെ.എച്ച്.എൻ.എ പ്രസിഡന്റ് **ടി. ഉണ്ണികൃഷ്ണൻ**, ശ്രീനാരായണ ഗുരുവിന്റെ വിശ്വമാനവിക സന്ദേശം അനുസ്മരിച്ചു:**”ജാതി ഭേദം മതദ്വേഷം ഏതുമില്ലാതെ സർവ്വരും സോദരത്വേന വാഴുന്ന മാതൃകാ സ്ഥാനമാണിത്.”**ഗുരുദേവന്റെ ഈ മഹത്തായ സന്ദേശം ഉൾക്കൊണ്ട് അമേരിക്കൻ മലയാളി സമൂഹത്തെ കൂടുതൽ ഐക്യത്തോടെയും പരസ്പര സഹകരണത്തോടെയും മുന്നോട്ട് നയിക്കുന്ന വേദിയായി ഈ കൺവെൻഷൻ മാറട്ടെയെന്ന് അദ്ദേഹം ആശംസിച്ചു.

**”വിദ്യകൊണ്ട് പ്രബുദ്ധരാവുക, സംഘടനകൊണ്ട് ശക്തരാവുക”** എന്ന ഗുരുദേവന്റെ ആഹ്വാനം ഇന്നും പ്രസക്തമാണെന്ന് ചൂണ്ടിക്കാട്ടിയ ടി. ഉണ്ണികൃഷ്ണൻ, ആത്മീയവും സാംസ്കാരികവുമായ നമ്മുടെ പൈതൃകം വരുംതലമുറകളിലേക്ക് കൈമാറുന്നതിൽ പ്രവാസി സംഘടനകൾക്ക് വലിയ ഉത്തരവാദിത്വമുണ്ടെന്നും പറഞ്ഞു.ഉത്തര അമേരിക്കയിലെ വിവിധ സംസ്ഥാനങ്ങളിലുള്ള ഹിന്ദു സംഘടനകളെ ഒരുമിപ്പിച്ച് പരസ്പര സഹകരണത്തിന്റെയും സൗഹൃദത്തിന്റെയും ശക്തമായ വേദി സൃഷ്ടിക്കുക എന്നത് കെ.എച്ച്.എൻ.എയുടെ ദീർഘകാല ദർശനത്തിന്റെ ഭാഗമാണെന്ന് അദ്ദേഹം വ്യക്തമാക്കി. **”അതേ ലക്ഷ്യത്തോടെ പ്രവർത്തിക്കുന്ന FSNONAയുടെ പ്രവർത്തനങ്ങൾക്ക് പിന്തുണ നൽകാൻ കഴിയുന്നത് കെ.എച്ച്.എൻ.എയ്ക്ക് അഭിമാനവും സന്തോഷവുമാണ്,”** അദ്ദേഹം കൂട്ടിച്ചേർത്തു.

ഈ ഒത്തുചേരൽ ആത്മീയ വളർച്ചയ്ക്കും സാംസ്കാരിക പൈതൃക സംരക്ഷണത്തിനും സാമൂഹിക ഐക്യത്തിനും പുതിയ ദിശാബോധം നൽകുമെന്ന് ജനറൽ സെക്രട്ടറി **സിനു നായർ**, ട്രഷറർ **അശോക് മേനോൻ**, ട്രസ്റ്റി ബോർഡ് ചെയർപേഴ്സൺ **വനജ നായർ** എന്നിവർ ആശംസാസന്ദേശത്തിൽ അറിയിച്ചു.

ശ്രീനാരായണ ഗുരുവിന്റെ സർവ്വമാനവ ദർശനങ്ങൾ ഉയർത്തിപ്പിടിച്ച് സംഘടിപ്പിക്കുന്ന ഈ മഹാസമ്മേളനം ഐക്യം, സേവനം, സമത്വം, ഉൾക്കൊള്ളൽ എന്നീ മൂല്യങ്ങൾ കൂടുതൽ ശക്തിപ്പെടുത്തുകയും, ഉത്തര അമേരിക്കയിലെ മലയാളി സമൂഹത്തിന്റെ കൂട്ടായ മുന്നേറ്റത്തിന് പ്രചോദനമാകുകയും ചെയ്യുമെന്ന് കെ.എച്ച്.എൻ.എ പ്രത്യാശ പ്രകടിപ്പിച്ചു. എല്ലാ കെ.എച്ച്.എൻ.എ കുടുംബാംഗങ്ങളും സമ്മേളനത്തിൽ പങ്കെടുക്കണമെന്ന് ഭാരവാഹികൾ അഭ്യർത്ഥിച്ചു.

The post ശ്രീനാരായണ സമ്മേളനത്തിന് കെ.എച്ച്.എൻ.എയുടെ ഹൃദയം നിറഞ്ഞ ആശംസകളും പൂർണ പിന്തുണയും appeared first on Starvision News Malayalam.

ഹൂസ്റ്റൺ : ഹൂസ്റ്റൺ സ്റ്റേഡിയത്തിലെ പുൽമൈതാനത്ത് ആവേശത്തിന്റെ അലയൊലികൾ തീർത്ത മത്സരത്തിൽ ഏഷ്യൻ കരുത്തരായ ജപ്പാനെതിരെ ബ്രസീലിന് ‘അതിജീവന’ ജയം. ഓഫ്-വൈറ്റ് ജഴ്സി അണിഞ്ഞെത്തിയ ജാപ്പനീസ് പടയെ ഒന്നിനെതിരെ രണ്ടു ഗോളുകൾക്ക് മറികടന്ന് ബ്രസീൽ ലോകകപ്പിന്റെ ക്വാർട്ടർ ഫൈനലിലേക്ക് ടിക്കറ്റെടുത്തു.

ജപ്പാൻ താരം കൈഷു സാനോയിലൂടെ 29-ാം മിനിറ്റിൽ പിറന്ന ഗോളാണ് ബ്രസീലിനെ ഞെട്ടിച്ചത്. ജപ്പാൻ താരങ്ങളുടെ അക്രോബാറ്റിക് ഡൈവിംഗ് ടാക്കിളുകൾ നിറഞ്ഞ പ്രതിരോധം ഭേദിക്കാൻ ബ്രസീൽ മഞ്ഞപ്പടയ്ക്ക് 56-ാം മിനിറ്റ് വരെ കാത്തിരിക്കേണ്ടി വന്നു. ഒടുവിൽ കാസെമിറോയുടെ തകർപ്പൻ ഹെഡ്ഡറിലൂടെ ബ്രസീൽ മത്സരത്തിലേക്ക് തിരിച്ചുവന്നു.

മത്സരം എക്സ്ട്രാ ടൈമിലേക്ക് നീങ്ങുമെന്ന് കരുതിയ ഘട്ടത്തിലാണ് സ്റ്റേഡിയത്തെ ആവേശക്കടലിലാക്കിക്കൊണ്ട് ഗബ്രിയേൽ മാർട്ടിനെല്ലിയുടെ ഗോളെത്തിയത്. 90+6-ാം മിനിറ്റിൽ ജപ്പാൻ ഗോൾവല കുലുക്കി മാർട്ടിനെല്ലി ബ്രസീലിന് വിജയമധുരം സമ്മാനിച്ചു.

ഹൂസ്റ്റൺ സ്റ്റേഡിയം മത്സരത്തിനിടെ ആരാധകരുടെ ആവേശം കൊണ്ട് അക്ഷരാർത്ഥത്തിൽ നിറഞ്ഞുനിന്നു. മഞ്ഞ ജഴ്സി അണിഞ്ഞ ബ്രസീൽ ആരാധകരും ഓഫ്-വൈറ്റ് ജഴ്സിയും നീലയും  അണിഞ്ഞെത്തിയ  ജപ്പാൻ ആരാധകരും സ്റ്റേഡിയത്തെ അവിസ്മരണീയമായൊരു വേദിയാക്കി മാറ്റി.

അവസാന നിമിഷം ഗോൾ പിറന്നപ്പോൾ സ്റ്റേഡിയം ആകെ ആവേശക്കടലായി മാറി. ഹൂസ്റ്റണിലെ ഗാലറിയിൽ നിറഞ്ഞാടിയ മഞ്ഞപ്പടയുടെ ആവേശത്തിരകൾ കളിക്കളത്തിൽ ബ്രസീലിന് പകർന്നു നൽകിയത് വലിയൊരു കരുത്തായിരുന്നു.

ആരാധകരുടെ ആവേശം കൊണ്ട് ഹൂസ്റ്റൺ സ്റ്റേഡിയം അക്ഷരാർത്ഥത്തിൽ ഇളകിമറിയുകയായിരുന്നു. ഗാലറിയിൽ ബ്രസീൽ-ജപ്പാൻ പോരാട്ടത്തിന്റെ ആവേശം വാനോളം ഉയർത്താൻ മലയാളി ആരാധകരും മുന്നിലുണ്ടായിരുന്നു.

ബ്രസീലിന്റെ ഈ മുന്നേറ്റം ലോകകപ്പിൽ ഇനി വരാനിരിക്കുന്ന വലിയ പോരാട്ടങ്ങൾക്ക് വലിയ ആത്മവിശ്വാസമാണ് നൽകുന്നത്. ജൂലൈ 5-ന് നടക്കുന്ന ക്വാർട്ടർ ഫൈനലിൽ ഐവറി കോസ്റ്റ് – നോർവേ മത്സരത്തിലെ വിജയികളെ ബ്രസീൽ നേരിടും.

The post സാംബ താളം ഹൂസ്റ്റണിൽ; ജപ്പാന്റെ പ്രതിരോധം തകർത്ത് ബ്രസീൽ ക്വാർട്ടറിലേക്ക്! appeared first on Starvision News Malayalam.

മാർട്ടിൻ വിലങ്ങോലിൽ (ഡാലസിൽ നിന്ന്)

ആർലിംഗ്ടൺ, ടെക്സസ്: പ്ലാനോയിലെയും ഡാളസിലെയും തെരുവുകളിൽ കഴിഞ്ഞ ദിവസങ്ങളിൽ നീലക്കടലും മഞ്ഞക്കാറ്റും തീർത്ത ആരാധകർ ഒടുവിൽ ആർലിംഗ്ടണിലെ ഡാളസ് സ്റ്റേഡിയത്തിലേക്ക് ഒഴുകിയെത്തിയതോടെ, ഗ്രൂപ്പ് എഫിലെ നിർണായക മത്സരം അത്യന്തം ആവേശപ്പോരാട്ടമായി മാറി. മത്സരത്തിൽ ജപ്പാനും സ്വീഡനും സമനിലയിൽ പിരിഞ്ഞു. എൺപതിനായിരത്തിലധികം കാണികളെ സാക്ഷ്യം നിർത്തി ഇരുടീമുകളും ഓരോ ഗോൾ വീതം നേടി പിരിഞ്ഞതോടെ ഗ്രൂപ്പിൽ നിന്ന് ഇരുവർക്കും പ്രീ-ക്വാർട്ടർ ബർത്ത് ഉറപ്പായി. ഗ്രൂപ്പിലെ മറ്റ് മത്സരഫലങ്ങൾ കൂടി അനുകൂലമായതോടെയാണ് സമനില വഴങ്ങിയിട്ടും ഇരുടീമുകൾക്കും നോക്കൗട്ട് റൗണ്ടിലേക്ക് യോഗ്യത നേടാനായത്.

ഡാളസ് മെട്രോപ്ലക്സിനെ ഫുട്ബോൾ ലഹരിയിലാഴ്ത്തിയ കഴിഞ്ഞ ദിവസങ്ങളിലെ ഫാൻ ഷോകളുടെ തുടർച്ചയെന്നോണമാണ് ഇന്ന് സ്റ്റേഡിയത്തിലേക്ക് ആരാധകർ ഒഴുകിയെത്തിയത്. പ്ലാനോയിലെ ഫാൻ ഫെസ്റ്റിവലുകളിൽ നിന്നും ഡാളസ് ഡൗൺടൗണിൽ നിന്നും മെട്രോയും കാറുകളും വഴി ജാപ്പനീസ്-സ്വീഡിഷ് കാണികൾ ഉച്ചയ്ക്ക് മുൻപ് തന്നെ ആർലിംഗ്ടണിലേക്ക് എത്തിയിരുന്നു. സ്റ്റേഡിയത്തിന്റെ ഭൂരിഭാഗവും കൈയടക്കിയത് ജപ്പാന്റെ നീല ജേഴ്സി ധരിച്ച ആരാധകരായിരുന്നു. സ്റ്റേഡിയത്തിന് അകത്തും പുറത്തും ഒരുപോലെ അച്ചടക്കത്തോടെയും എന്നാൽ അത്യന്തം ആവേശത്തോടെയും ജാപ്പനീസ് ആരാധകർ തങ്ങളുടെ സാന്നിധ്യം അറിയിച്ചു. കളി കാണാൻ ഗാലറിയിലെത്തിയ വലിയൊരു വിഭാഗം മലയാളി പ്രവാസികൾക്കും ഈ അന്തരീക്ഷം മറക്കാനാകാത്ത അനുഭവമായി മാറി. കേരളത്തിൽ നിന്നെത്തിയ മാധ്യമ പ്രതിനിധികളും സ്റ്റേഡിയത്തിൽ തമ്പടിച്ചിരുന്നു.

ഗാലറിയെ മുഴുവൻ ഇളക്കിമറിച്ച കൂറ്റൻ ഡ്രംസിന്റെ അകമ്പടിയോടെയുള്ള ജപ്പാന്റെ ‘നിപ്പോൺ… നിപ്പോൺ…’ മ്യൂസിക്കും ചാന്റുകളുമായിരുന്നു സ്റ്റേഡിയത്തിലെ പ്രധാന ആകർഷണം. ഓരോ നിമിഷവും ഡ്രംസിന്റെ താളത്തിനൊത്ത് ജാപ്പനീസ് ആരാധകർ ഒരേസ്വരത്തിൽ ആർത്തുവിളിച്ചപ്പോൾ ടെക്സസിലെ കടുത്ത ചൂടിനെക്കാൾ വലിയ ആവേശമാണ് സ്റ്റേഡിയത്തിനകത്ത് ഉയർന്നത്. ഈ വൻ പിന്തുണയുടെ ഊർജ്ജത്തിലാണ് ജപ്പാൻ ആക്രമിച്ചു കളിച്ചത്.

മത്സരത്തിന്റെ ഒന്നാം പകുതി ഗോൾരഹിതമായിരുന്നെങ്കിലും രണ്ടാം പകുതിയിൽ തങ്ങളുടെ വേഗതയേറിയ പാസിങ് ഗെയിമിലൂടെ കളം നിറഞ്ഞ ജപ്പാനാണ് ആദ്യം ലീഡെടുത്തത്. അമ്പത്തിയാറാം മിനിറ്റിൽ ജപ്പാന്റെ സൂപ്പർ താരം ഡെയ്സെൻ മേയദയുടെ മിന്നൽ നീക്കത്തിനൊടുവിലാണ് ജപ്പാൻ ആദ്യ ഗോൾ കണ്ടെത്തിയത്. ബോക്സിനുള്ളിൽ നിന്ന് മേയദ തൊടുത്ത മനോഹരമായ ഷോട്ട് സ്വീഡിഷ് ഗോൾകീപ്പറെ കാഴ്ചക്കാരനാക്കി വലയിലെത്തിയതോടെ ഗാലറിയിലെ നീലക്കടൽ ഡ്രംസിന്റെ അകമ്പടിയോടെ വീണ്ടും ‘നിപ്പോൺ’ വിളികളാൽ ഇരമ്പി.

എന്നാൽ ഗോൾ വഴങ്ങിയതോടെ ശാരീരിക കരുത്ത് കൊണ്ട് തന്ത്രങ്ങൾ മാറ്റിയെഴുതിയ സ്വീഡൻ ശക്തമായി തിരിച്ചുവരുന്നതാണ് പിന്നീട് കണ്ടത്. ജപ്പാന്റെ ഗോൾ ആഘോഷം ആറിത്തണുക്കും മുൻപ് തന്നെ, അറുപത്തിരണ്ടാം മിനിറ്റിൽ ലഭിച്ച ഒരു കൗണ്ടർ അറ്റാക്കിലൂടെ സ്വീഡൻ മത്സരത്തിൽ സമനില ഗോൾ നേടി. സ്വീഡിഷ് മുന്നേറ്റ താരം ആന്റണി ഇലാംഗ തൊടുത്ത വെടിയുണ്ട കണക്കെയുള്ള ഷോട്ട് ജാപ്പനീസ് വല ചലിപ്പിച്ചതോടെ സ്റ്റേഡിയത്തിലെ മഞ്ഞക്കടൽ ആവേശത്തിലാഴ്ന്നു. പിന്നീട് ഇരുടീമുകളും വിജയഗോളിനായി കടുത്ത ആക്രമണങ്ങൾ അഴിച്ചുവിട്ടെങ്കിലും പ്രതിരോധ നിരകളുടെ കരുത്തിൽ കൂടുതൽ ഗോളുകൾ വഴങ്ങാതെ ഇരുപക്ഷവും സമനില പാലിക്കുകയായിരുന്നു.

ഈ സമനിലയോടെ ടൂർണമെന്റിലെ തങ്ങളുടെ ആയുസ്സ് നീട്ടിയെടുക്കാൻ സ്വീഡനും ജപ്പാനും സാധിച്ചു. പ്രീ-ക്വാർട്ടറിലേക്ക് കടന്നതോടെ നോക്കൗട്ടിൽ ശക്തരായ എതിരാളികളെയാകും ഇരുടീമുകൾക്കും ഇനി നേരിടേണ്ടി വരിക.

മത്സരം കഴിഞ്ഞും സ്റ്റേഡിയത്തിന്റെ ഗാലറികൾ പൂർണ്ണമായും വൃത്തിയാക്കാൻ ഒത്തുകൂടിയ ജാപ്പനീസ് ആരാധകരുടെ മാതൃകാപരമായ കാഴ്ചയോടെയാണ് ഡാളസ് സ്റ്റേഡിയത്തിലെ ഇന്നത്തെ ഫുട്ബോൾ പൂരം സമാപിച്ചത്. ഇനി ടെക്സസിന്റെ കായികപ്രേമികൾ കാത്തിരിക്കുന്നത് നോക്കൗട്ട് റൗണ്ടിലെ അതിശക്തമായ പോരാട്ടങ്ങൾക്കായാണ്.

ഇതോടൊപ്പം തന്നെ അടുത്ത ദിവസം ഇതേ സ്റ്റേഡിയത്തിൽ നടക്കാനിരിക്കുന്ന ജോർദാൻ – അർജന്റീന ഗ്രൂപ്പ് പോരാട്ടത്തിനായുള്ള ആവേശത്തിലാണ് ടെക്സസിലെ ഫുട്ബോൾ പ്രേമികൾ. സൂപ്പർ താരം ലയണൽ മെസ്സി വീണ്ടും ഗോളടിക്കുമെന്ന പ്രതീക്ഷയിൽ അർജന്റീന ആരാധകർ ഇതിനോടകം തന്നെ ഡാളസ് നഗരത്തെ നീലയും വെള്ളയും അണിയിച്ചു കഴിഞ്ഞു.

The post ഡാളസ് സ്റ്റേഡിയത്തിൽ ആവേശസമനില; ജപ്പാനും സ്വീഡനും പ്രീ-ക്വാർട്ടറിലേക്ക്, ഇനി ടെക്സസ് പൂരം നോക്കൗട്ടിലേക്ക്! appeared first on Starvision News Malayalam.