ശ്രീഹരിക്കോട്ട: ഐഎസ്ആര്‍ഒയുടെ ഏറ്റവും വിശ്വസ്‌ത ബഹിരാകാശ വിക്ഷേപണ വാഹനം എന്നറിയപ്പെടുന്ന പിഎസ്എൽവിയുടെ ചരിത്രത്തില്‍ ഇതാദ്യമായി തുടര്‍ച്ചയായ തിരിച്ചടി. ശ്രീഹരിക്കോട്ടയിലെ സതീഷ് ധവാന്‍ സ്പേസ് സെന്‍ററിലെ ഒന്നാം നമ്പര്‍ ലോഞ്ച് പാഡിൽ നിന്ന് ഇന്ന് രാവിലെ 10.17-ന് ബഹിരാകാശത്തേക്ക് കുതിച്ച പിഎസ്എല്‍വി-സി62 റോക്കറ്റ് വിക്ഷേപണം മൂന്നാംഘട്ടത്തില്‍ അനിശ്ചിതത്വത്തിലാവുകയായിരുന്നു. 2025 മേയ് മാസം നടന്ന പിഎസ്എല്‍വിയുടെ കഴിഞ്ഞ വിക്ഷേപണവും പരാജയമായിരുന്നു. ഇന്നത്തെ ദൗത്യത്തില്‍ ‘അന്വേഷ’ ഉപഗ്രഹം അടക്കമുള്ള 16 പേലോഡുകള്‍ വിജയകരമായി വിന്യസിക്കാന്‍ കഴിഞ്ഞോ എന്ന് ഇസ്രോ സ്ഥിരീകരിച്ചിട്ടില്ല. 

പിഎസ്എൽവിക്ക് തുടര്‍ പരാജയം

തുടര്‍ച്ചയായ രണ്ടാം വിക്ഷേപണത്തിലാണ് ഐഎസ്ആര്‍ഒയുടെ പിഎസ്എൽവി റോക്കറ്റ് തിരിച്ചടി നേരിടുന്നത്. ഇന്ന് ശ്രീഹരിക്കോട്ടയില്‍ നിന്ന് കുതിച്ചുയര്‍ന്നതിന് പിന്നാലെ റോക്കറ്റിന്‍റെ മൂന്നാം ഭാഗം വേര്‍പ്പെട്ട ശേഷമായിരുന്നു സാങ്കേതിക പ്രശ്‌നം ഉടലെടുത്തത്. ഇതോടെ റോക്കറ്റിന്‍റെ സഞ്ചാരപാത മാറിയെന്നും ഇസ്രോ ചെയര്‍മാന്‍ ഡോ. വി നാരായണന്‍ അറിയിച്ചു. റോക്കറ്റില്‍ നിന്നുള്ള ഡാറ്റ വിശകലനം ചെയ്യുകയാണെന്നും കൂടുതല്‍ വിവരങ്ങള്‍ പഠിച്ച ശേഷം പുറത്തുവിടുമെന്നും ഐഎസ്ആര്‍ഒ ചെയര്‍മാന്‍റെ വാക്കുകളിലുണ്ട്. കഴിഞ്ഞ വര്‍ഷം നടന്ന പിഎസ്എല്‍വി-സി61 വിക്ഷേപണത്തിലും സമാന പ്രശ്‌നമായിരുന്നു ഐഎസ്ആര്‍ഒ നേരിട്ടത്. പിഎസ്എല്‍വിയുടെ കഴിഞ്ഞ വിക്ഷേപണത്തില്‍ ഉപഗ്രഹം നഷ്‌ടമായിരുന്നെങ്കിലും അന്ന് എന്താണ് പിഎസ്എല്‍വി റോക്കറ്റിന് സംഭവിച്ച സാങ്കേതിക പ്രശ്‌നം എന്നുള്ള വിവരങ്ങള്‍ ഐഎസ്ആര്‍ഒ പുറത്തുവിട്ടിരുന്നില്ല. അതിനാല്‍തന്നെ, പിഎസ്എല്‍വിയുടെ തുടര്‍ച്ചയായ പരാജയം വലിയ ചോദ്യങ്ങള്‍ ഉയര്‍ത്തും.

The post തുടര്‍ തിരിച്ചടി ചരിത്രത്തിലാദ്യം; പിഎസ്എല്‍വി റോക്കറ്റ് വിക്ഷേപണം വീണ്ടും നിരാശ appeared first on Starvision News Malayalam.

തിരുവനന്തപുരം: പിഎസ്എൽവി സി 62 വിക്ഷേപണം നാളെ നടക്കും. രാവിലെ 10.17ന് ശ്രീഹരിക്കോട്ടയിലെ സതീഷ് ധവാൻ സ്പേസ് സെന്‍ററിലെ ഒന്നാം വിക്ഷേപണത്തറയിൽ നിന്നാണ് ദൗത്യം. 2026ലെ ആദ്യ വിക്ഷേപണ ദൗത്യത്തിനാണ് ഇസ്രോ സജ്ജമായിരിക്കുന്നത്. 2025 മേയിലെ പരാജയശേഷമുള്ള പിഎസ്എൽവിയുടെ തിരിച്ചുവരവാണിത്. ഇഒഎസ് എൻ വൺ അന്വേഷയടക്കം പതിനാറ് പേ ലോഡുകളാണ് ഈ ദൗത്യത്തിലൂടെ ബഹിരാകാശത്തേക്ക് അയക്കുന്നത്. ന്യൂസ്പേസ് ഇന്ത്യ ലിമിറ്റഡ് വഴിയുള്ള വാണിജ്യ വിക്ഷേപണമെന്ന് പറയുമ്പോഴും അന്വേഷ ഒരു തന്ത്രപ്രധാന ഉപഗ്രഹമാണ്. ഹൈപ്പർസ്പെക്ട്രൽ ഇമേജിങ്ങ് സാങ്കേതിക വിദ്യ ഉപയോഗിക്കുന്ന ഉപഗ്രഹം ഭൗമ നിരീക്ഷണത്തിൽ മുതൽക്കൂട്ടാകും. 

അന്വേഷയ്ക്ക് പുറമേയുള്ള പതിനഞ്ച് പേലോഡുകളിൽ യുകെ, ബ്രസീൽ, നേപ്പാൾ എന്നീ രാജ്യങ്ങളിൽ നിന്നുമുള്ള ചെറു ഉപഗ്രഹങ്ങളും, ഇന്ത്യൻ സ്റ്റാർട്ടപ്പുകളുടെ പരീക്ഷണങ്ങളുമുണ്ട്. ബഹിരാകാശത്ത് ചെന്ന ശേഷം തിരികെ ഭൂമിയിലേക്ക് വരുന്ന സ്പാനിഷ് സ്റ്റാർട്ടപ്പായ  ഓർബിറ്റൽ പാരഡൈമിന്‍റെ കിഡ് ആണ് മറ്റൊരു ശ്രദ്ധേയ പേലോഡ്. ഇന്ത്യൻ കമ്പനിയായ ഓർബിറ്റ് എയിഡിന്‍റെ ആയുൽസാറ്റ് എന്നൊരു ചെറു ഉപഗ്രഹവും ദൗത്യത്തിന്‍റെ ഭാഗമാണ്. ബഹിരാകാശത്ത് വെച്ച് ഉപഗ്രഹങ്ങളിൽ ഇന്ധനം നിറയ്ക്കുന്ന സാങ്കേതിക വിദ്യയുടെ പരീക്ഷണമാണ് ലക്ഷ്യം. ഇത് വിജയിച്ചാൽ അതും ചരിത്രമാകും. രാഹുൽ മൂന്ന ധ്രുവ സ്പേസ് എന്ന ഇന്ത്യൻ സ്റ്റാർട്ടപ്പിന്‍റെ അഞ്ച് ചെറു ഉപഗ്രഹങ്ങളും പിഎസ്എൽവി സി 62 ബഹിരാകാശത്ത് എത്തിക്കും. 2025 മേയ് പതിനെട്ടിനായിരുന്നു പരാജയപ്പെട്ട പിഎസ്എൽവി സി 61 വിക്ഷേപണം. റോക്കറ്റിന്‍റെ മൂന്നാംഘട്ടത്തിലെ സാങ്കേതിക പ്രശ്നമായിരുന്നു അന്ന് വില്ലൻ. ദൗത്യത്തിന്‍റെ പരാജയ പഠന റിപ്പോർട്ട് ഇതുവരെ പുറത്തുവിട്ടിട്ടില്ലെങ്കിലും, ഇനിയൊരിക്കലും സമാന പ്രശ്നമുണ്ടാകില്ലെന്നാണ് ഐഎസ്ആർഒ പറയുന്നത്.

The post പിഎസ്എൽവി റിട്ടേണ്‍സ്; 2026ലെ ആദ്യ വിക്ഷേപണത്തിന് സജ്ജമായി ഇസ്രോ, ‘അന്വേഷ’യുമായി പിഎസ്എൽവി സി 62 നാളെ കുതിച്ചുയരും appeared first on Starvision News Malayalam.

സോള്‍: ലോകത്തിലെ ഒന്നാം നമ്പർ സ്‍മാർട്ട്‌ഫോൺ നിർമ്മാതാവ് എന്ന നിലയിലുള്ള ദക്ഷിണ കൊറിയൻ ടെക് ഭീമനായ സാംസങ്ങിന്‍റെ ദീർഘകാല ആധിപത്യം ദുർബലമാകുന്നതായി റിപ്പോർട്ട്. 2025-ന്‍റെ അവസാനം ആവുമ്പോഴേക്കു ആഗോള സ്‍മാർട്ട്‌ഫോൺ കയറ്റുമതിയില്‍ ആപ്പിളിന് സാംസങ്ങിനെ മറികടന്ന് ഒന്നാം സ്ഥാനം നേടാൻ കഴിയുമെന്ന് കൗണ്ടർപോയിന്‍റ് റിസർച്ചിന്‍റെ പുതിയ റിപ്പോർട്ട് സൂചിപ്പിക്കുന്നു. ഐഫോൺ 17 സീരീസിനുള്ള റെക്കോർഡ് ഡിമാൻഡും അതിവേഗം വർധിച്ചുവരുന്ന അപ്‌ഗ്രേഡ് സൈക്കിളുമാണ് ഇതിന് പ്രധാന കാരണം എന്നാണ് റിപ്പോർട്ടുകൾ. 14 വര്‍ഷത്തിനിടെ ഇതാദ്യമായാണ് ഫോണ്‍ വില്‍പനയില്‍ സാംസങിനെ ആപ്പിള്‍ മറികടക്കാനൊരുങ്ങുന്നത്.

2025ല്‍ ആപ്പിള്‍ വിപണിയിലെത്തിച്ചത് 24 കോടിയിലധികം ഐഫോണുകള്‍

2025ല്‍ ആപ്പിള്‍ 243 ദശലക്ഷം (24 കോടി) ഐഫോണുകളും സാംസങ് 235 ദശലക്ഷം (23 കോടി) ഫോണുകളുമാണ് വിപണിയില്‍ എത്തിക്കുന്നത്. ആപ്പിള്‍ 2025 സെപ്റ്റംബറില്‍ പുറത്തിറക്കിയ ഐഫോൺ 17 സീരീസ് സ്‍മാർട്ട്‌ഫോൺ വിപണിയുടെ ഘടന തന്നെ മാറ്റിമറിച്ചെന്ന് റിപ്പോർട്ട് പറയുന്നു. അതേസമയം സാംസങ്ങിന്‍റെ കയറ്റുമതി പ്രതിവർഷം 4.6 ശതമാനം വളർച്ച കൈവരിക്കുമെന്നും ആഗോള വിഹിതം 18.7 ശതമാനത്തിൽ എത്തുമെന്നും പ്രതീക്ഷിക്കുന്നുണ്ട്. എങ്കിലും ഒരു ദശാബ്‍ദത്തിലേറെയായി കമ്പനി കൈവശം വച്ചിരുന്ന ഒന്നാം സ്ഥാനം നഷ്‍ടമാകുമെന്ന് കൗണ്ടര്‍പോയിന്‍റ് റിസര്‍ച്ച് റിപ്പോർട്ട് സൂചിപ്പിക്കുന്നു. 2025ലെ സ്‌മാര്‍ട്ട്‌ഫോണ്‍ വില്‍പനയില്‍ ആപ്പിളിന്‍റെ വിഹിതം 19.4 ശതമാനത്തിലേക്ക് ഉയരുമെന്നാണ് പ്രതീക്ഷ.

ആളുകള്‍ പഴയ ഐഫോണുകള്‍ അപ്‌ഗ്രേഡ് ചെയ്യുന്നു

2025-ൽ ആഗോള സ്‍മാർട്ട്‌ഫോൺ വില്‍പനയിൽ 3.3 ശതമാനം വാർഷിക വളർച്ച പ്രതീക്ഷിക്കുന്നതായി കൗണ്ടര്‍പോയിന്‍റ് റിസര്‍ച്ച് റിപ്പോർട്ട് പറയുന്നു. ഐഫോൺ 17 സീരീസിനുള്ള ഉയർന്ന പോസിറ്റീവ് മാർക്കറ്റിനൊപ്പം പുതിയ വിൽപ്പന പ്രതീക്ഷയ്ക്ക് പിന്നിലെ പ്രധാന ഘടകം പഴയ ഫോണുകൾ ആളുകള്‍ പുതുക്കുന്നതാണെന്ന് സീനിയർ അനലിസ്റ്റ് യാങ് വാങ് പറഞ്ഞു. കൊവിഡ് 19 തരംഗത്തിനിടെ സ്‍മാർട്ട്‌ഫോണുകൾ വാങ്ങിയ ഉപഭോക്താക്കൾ ഇപ്പോൾ അവരുടെ ഫോണുകളുടെ അപ്‌ഗ്രേഡ് ചെയ്യുകയാണെന്ന് അദേഹം വ്യക്തമാക്കി. 2023നും 2025ലെ രണ്ടാം പാദത്തിനും ഇടയിൽ 358 ദശലക്ഷം സെക്കൻഡ് ഹാൻഡ് ഐഫോണുകൾ വിറ്റഴിക്കപ്പെട്ടു എന്നും ഈ ഉപയോക്താക്കൾ വരും വർഷങ്ങളിൽ പുതിയ ഐഫോണിലേക്ക് അപ്‌ഗ്രേഡ് ചെയ്യാൻ സാധ്യതയുണ്ടെന്നും അദേഹം പറഞ്ഞു. ഈ ഘടകങ്ങൾ ഒരു വലിയ ഡിമാൻഡ് അടിത്തറ സൃഷ്‍ടിക്കുമെന്നും ഇത് വരും പാദങ്ങളിൽ ഐഫോൺ കയറ്റുമതി വളർച്ച നിലനിർത്തുമെന്ന് പ്രതീക്ഷിക്കുന്നുവെന്നും യാങ് വാങ് കൂട്ടിച്ചേർത്തു.

The post ഐഫോണുകള്‍ക്ക് വന്‍ ഡിമാന്‍ഡ്; സാംസങ്ങിന്‍റെ ഭാവി അപകടത്തിൽ, ആപ്പിൾ ഒന്നാം സ്ഥാനം തട്ടിയേക്കും! appeared first on Starvision News Malayalam.

കാലിഫോര്‍ണിയ: ബഹിരാകാശ ഡാറ്റാ സെന്‍ററുകള്‍! ഇതൊരു സയന്‍സ് ഫിക്ഷന്‍ സിനിമയൊന്നുമല്ല. സ്പേസ് ഡാറ്റാ സെന്‍ററുകള്‍ എന്ന സങ്കല്‍പ്പത്തെ കുറിച്ച് തലപുകയ്‌ക്കുകയാണ് ആമസോണും സ്‌പേസ് എക്‌സും ഗൂഗിളും പോലുള്ള ടെക് ഭീമന്‍മാര്‍. ബഹിരാകാശ ജിപിയു ഫാമുകളെ കുറിച്ച് എന്‍വിഡിയ പോലുള്ള കമ്പനികളും ചിന്തിക്കുന്നു. എഐ കാലത്ത് അനിവാര്യമായ, ഡാറ്റാ സെന്‍ററുകള്‍ സ്ഥാപിക്കാന്‍ അങ്ങ് ചന്ദ്രന്‍ വരെ പോകുന്നതിനെ കുറിച്ച് ടെക് ഭീമന്‍മാര്‍ക്ക് യാതൊരു ശങ്കയുമില്ല. സ്വാഗതം ടെക് ടോക്കിലേക്ക്.

ഡാറ്റാ സെന്‍ററുകള്‍ ബഹിരാകാശത്തേക്ക്

എഐ സാങ്കേതികവിദ്യ നമ്മുടെ ദൈനംദിന ജോലികൾ എളുപ്പമാക്കിയിരിക്കുന്നു. പക്ഷേ ഈ എഐ പ്രവർത്തിപ്പിക്കാൻ ടെക് കമ്പനികൾക്ക് ഭീമന്‍ ഡാറ്റാ സെന്‍ററുകൾ ആവശ്യമാണ്. ഇപ്പോള്‍ ഭൂമിയിൽ പരിമിതമായ വൈദ്യുതിയും വെള്ളവും മാത്രമേയുള്ളൂ. ഇത് ഭാവിയിലെ ഡാറ്റാ സെന്‍ററുകൾക്ക് അപര്യാപ്‍തമായിരിക്കും. ഇപ്പോള്‍ തന്നെ ഡാറ്റാ സെന്‍ററുകള്‍ക്കാവശ്യമായ വെള്ളവും വൈദ്യുതിയും ഇവിടെയില്ല എന്ന പ്രതിസന്ധി സജീവം. അതിനാൽ യുഎസ് ടെക് ഭീമന്മാർ ചന്ദ്രനിലും ബഹിരാകാശത്തുമൊക്കെ വരുംഭാവിയില്‍ തന്നെ ഡാറ്റാ സെന്‍ററുകൾ സ്ഥാപിക്കുന്നതിനെ കുറിച്ച് ആലോചിക്കുകയാണ്.

ഇലോൺ മസ്‌ക്, ജെഫ് ബെസോസ്, സുന്ദർ പിച്ചൈ തുടങ്ങിയ ടെക് ജീനിയസുകളാണ് ചന്ദ്രനിൽ വലിയ ഡാറ്റാ സെന്‍ററുകൾ നിർമ്മിക്കുന്നതിനെക്കുറിച്ച് ചിന്തിക്കുന്നവരിലെ പ്രമുഖര്‍. സ്പേസ് എക്‌സും ആമസോണും ഗൂഗിളും സ്പേസ് ഡാറ്റാ സെന്‍റര്‍ പദ്ധതികൾ നടപ്പിലാക്കുന്നതിലേക്ക് വേഗത്തിൽ നീങ്ങുകയാണ് എന്നാണ് റിപ്പോർട്ടുകൾ. ഭൂമിയിലെ വൈദ്യുതി ക്ഷാമത്തിന് പുറമെ, പുതിയ ഡാറ്റാ സെന്‍‍ററുകൾ നിർമ്മിക്കുന്നതിലെ നിയമപരമായ സങ്കീർണതകളുമാണ് ഇതിന് കാരണം. ഡാറ്റാ സെന്‍ററുകള്‍ തണുപ്പിക്കാന്‍ മില്യണ്‍ കണക്കിന് ലിറ്റര്‍ ജലം അനിവാര്യമാണെന്ന യാഥാര്‍ഥ്യവും ഈ ഗ്രഹാന്തര സ്വപ്‌നങ്ങള്‍ക്ക് പിന്നിലുണ്ട്.

ചന്ദ്രൻ നമുക്ക് പ്രപഞ്ചത്തിൽ നിന്നുള്ള ഒരു സമ്മാനമാണ് എന്നാണ് ആമസോണ്‍ സ്ഥാപകന്‍ ജെഫ് ബെസോസിന്‍റെ വാക്കുകള്‍. ബെസേസിന്‍റെ കമ്പനിയായ ബ്ലൂ ഒറിജിനും, ഇലോൺ മസ്‌കിന്‍റെ സ്‌പേസ് എക്‌സും ബഹിരാകാശ യാത്ര ചെലവ് കുറയ്‌ക്കുന്നതിനായി പ്രയത്നിക്കുന്നു. ചന്ദ്രനിൽ വലിയ എഐ ഡാറ്റാ സെന്‍ററുകൾ നിർമ്മിക്കുകയാണ് ബെസോസിന്‍റെ ഒരു സ്വപ്‌നം. ചാന്ദ്ര കമ്പ്യൂട്ടിംഗിനായി തയ്യാറെടുക്കുന്ന പ്രോജക്റ്റ് സൺകാച്ചർ ഗൂഗിൾ ആരംഭിച്ചുകഴിഞ്ഞു. സൗരോർജ്ജ സംവിധാനം ഘടിപ്പിച്ച സ്റ്റാർലിങ്ക് ഉപഗ്രഹങ്ങള്‍ ഉപയോഗിച്ച് പ്രവര്‍ത്തിക്കുന്ന എഐ സെർവറുകളുണ്ടാക്കുക എന്ന കാഞ്ഞ ബുദ്ധിയാണ് ഇലോൺ മസ്‌കിനുള്ളത്. ലേസർ വഴി പരസ്‍പരം വേഗത്തിൽ ഡാറ്റ അയയ്ക്കാൻ ഈ ഉപഗ്രഹങ്ങൾക്കാകുമെന്നാണ് മസ്‌കിന്‍റെ പ്രതീക്ഷ.

എഐയെ ചന്ദ്രനില്‍ പരിശീലിപ്പിക്കുമെന്ന് സുന്ദര്‍ പിച്ചൈ

അടുത്ത തലമുറയിലെ എഐയെ ചന്ദ്രനിൽ പരിശീലിപ്പിക്കുമെന്ന് ഗൂഗിൾ സിഇഒ സുന്ദർ പിച്ചൈയും തറപ്പിച്ചുപറയുന്നു. ബഹിരാകാശത്ത് മെഷീൻ ലേണിംഗ് ഘടകങ്ങൾ എങ്ങനെ പ്രവർത്തിക്കുന്നുവെന്ന് കാണാൻ 2027-ഓടെ തന്‍റെ കമ്പനി രണ്ട് പരീക്ഷണ ഉപഗ്രഹങ്ങൾ വിക്ഷേപിക്കുമെന്നും ഗൂഗിളിന്‍റെ മാതൃകമ്പനിയായ ആല്‍ഫബെറ്റിന്‍റെ തലവന്‍ കൂടിയായ സുന്ദര്‍ പിച്ചൈയുടെ വാക്കുകളിലുണ്ട്. എങ്കിലും ഇത് വളരെ ബുദ്ധിമുട്ടുള്ള കാര്യമാണെന്ന് പിച്ചൈ സമ്മതിക്കുന്നു. പക്ഷേ എഐയുടെ സുസ്ഥിരമായ ഭാവിക്ക് ഇത്തരം സാഹസിക പരീക്ഷണങ്ങള്‍ അത്യന്താപേക്ഷിതമാണെന്ന് സുന്ദര്‍ പിച്ചൈ അടിവരയിടുന്നു.

എഐ മോഡലുകൾ പ്രവർത്തിപ്പിക്കുന്നതിന് ധാരാളം വൈദ്യുതി ആവശ്യമാണ്. യുഎസ്, വൈദ്യുതി അടിയന്തരാവസ്ഥ പ്രഖ്യാപിച്ചിട്ടുണ്ട്. ഡാറ്റാ സെന്‍ററുകള്‍ക്കായി എല്ലാ വർഷവും 100 ജിഗാവാട്ട് പുതിയ വൈദ്യുതി ആവശ്യമാണെന്ന് ഓപ്പൺഎഐ പറയുന്നു. നിലവിൽ, എഐ മോഡലുകളുടെ പരിശീലനം നിലയ്ക്കുന്നില്ലെന്ന് ഉറപ്പാക്കാൻ കമ്പനികൾ ഗ്യാസ് ടർബൈനുകളാണ് പ്രവർത്തിപ്പിക്കുന്നത്.

ബഹിരാകാശത്ത് ഒരു ഡാറ്റാ സെന്‍റർ നിർമ്മിച്ചാൽ നിരവധി പ്രയോജനങ്ങളുണ്ട്. 24 മണിക്കൂറും സൂര്യപ്രകാശം ലഭിക്കും. മേഘങ്ങളുടെയോ മഴയുടെയോ തടസ്സവും ഇല്ല. ബഹിരാകാശത്ത് സോളാർ പാനലുകൾ എപ്പോഴും പൂർണ്ണ ശേഷിയിൽ പ്രവർത്തിക്കും. ഭൂമിയിലെ പോലെ ഡാറ്റാ സെന്‍ററുകൾ തണുപ്പിക്കാന്‍ വലിയ സംവിധാനങ്ങളോ ചിലവോ ആവശ്യമില്ല. ബഹിരാകാശത്തും ചന്ദ്രനിലുമൊന്നും സർക്കാർ നിയന്ത്രണമില്ലല്ലോ, കമ്പനികൾക്ക് ഇഷ്‌ടമുള്ളതുപോലെ പ്രവർത്തിക്കാം. വൈദ്യുതി, ജല ലഭ്യത മാത്രമല്ല, ഡാറ്റാ സെന്‍ററുകള്‍ ബഹിരാകാശത്തേക്ക് മാറ്റുന്നതിനായി ടെക് കമ്പനികളെ പ്രേരിപ്പിക്കുന്ന കാരണങ്ങളില്‍ ഇതെല്ലാമുണ്ട്. ഭാവിയില്‍ മനുഷ്യകുലം എഐയില്‍ ഭ്രമണം ചെയ്യുമ്പോള്‍ ഒരുപക്ഷേ അതിന്‍റെ അച്ചുതണ്ട് ചന്ദ്രനായിരിക്കാം.

The post അടുത്ത അങ്കത്തട്ട് ബഹിരാകാശം; എഐ ഡാറ്റാ സെന്‍ററുകള്‍ ചന്ദ്രനില്‍ സ്ഥാപിക്കാന്‍ ടെക് ഭീമന്മാരുടെ മത്സരം appeared first on Starvision News Malayalam.

വീഡിയോ സ്ട്രീമിംഗ് പ്ലാറ്റ്ഫോമായ യൂട്യൂബ് അതിന്‍റെ പ്ലാറ്റ്‌ഫോമിൽ ഉപഭോക്താക്കള്‍ കണ്ടന്‍റുകൾ കണ്ടെത്തുന്ന രീതിയിൽ വലിയ മാറ്റം വരുത്തുകയാണ്. ജൂലൈ 21 മുതൽ ട്രെൻഡിംഗ് പേജും ട്രെൻഡിംഗ് നൗ ലിസ്റ്റും നീക്കം ചെയ്യും. ഏകദേശം ഒരു പതിറ്റാണ്ട് മുമ്പ് 2015-ൽ ആദ്യമായി അവതരിപ്പിച്ച ഫീച്ചറാണ് ഇപ്പോൾ അവസാനിപ്പിക്കുന്നത്. അവയുടെ സ്ഥാനത്ത് പുതുതായി യൂട്യൂബ് കാറ്റഗറി ചാർട്ടുകൾ അവതരിപ്പിക്കും. വ്യത്യസ്ത വിഭാഗങ്ങളിലെ ഏറ്റവും ജനപ്രിയമായ ഉള്ളടക്കം ഈ ചാർട്ടുകൾ ഹൈലൈറ്റ് ചെയ്യും. കഴിഞ്ഞ അഞ്ച് വർഷത്തിനിടെ ട്രെൻഡിംഗ് പേജിലേക്കുള്ള സന്ദർശനങ്ങൾ വലിയ രീതിയിൽ കുറഞ്ഞുവെന്ന് കമ്പനി പറയുന്നു. ഉപയോക്താക്കൾ പ്ലാറ്റ്‌ഫോമിൽ മറ്റ് പല വഴികളിലൂടെയും കണ്ടെന്‍റ് കണ്ടെത്തുന്നു എന്നതാണ് ഇതിന് കാരണമായി യൂട്യൂബ് പറയുന്നത്.

2025 ജൂലൈ 21 മുതൽ തങ്ങളുടെ ട്രെൻഡിംഗ് പേജ് അവസാനിപ്പിക്കുമെന്ന് യൂട്യൂബ് അധികൃതര്‍ അറിയിച്ചു. പ്ലാറ്റ്‌ഫോമിൽ ഏറ്റവും കൂടുതൽ ട്രെൻഡിംഗ് വീഡിയോകൾ ഇവിടെയാണ് കാണിച്ചിരുന്നത്. എന്നാൽ ഇപ്പോൾ ഷോർട്ട്സ്, സെർച്ച് നിർദ്ദേശങ്ങൾ, കമന്‍റുകൾ, കമ്മ്യൂണിറ്റി പോസ്റ്റുകൾ തുടങ്ങിയ ഓപ്ഷനുകൾ വഴി ആളുകൾ ഇപ്പോൾ ട്രെൻഡിംഗ് വീഡിയോകൾ ആക്‌സസ് ചെയ്യാൻ തുടങ്ങിയിട്ടുണ്ടെന്ന് യൂട്യൂബ് അവരുടെ ബ്ലോഗ് പോസ്റ്റിൽ പറഞ്ഞു. ഇക്കാരണത്താൽ ട്രെൻഡിംഗ് പേജിന്‍റെ ഉപയോഗക്ഷമത ക്രമേണ കുറയാനും കമ്പനി അത് അടച്ചുപൂട്ടാനും തീരുമാനിച്ചതായാണ് റിപ്പോർട്ടുകൾ.

ട്രെൻഡിംഗ് വീഡിയോകൾ കാണാൻ ഇനി മുതൽ യൂട്യൂബ് ചാർട്ടുകൾ ഉപയോഗിക്കാമെന്ന് യൂട്യൂബ് അറിയിച്ചു. നിലവിൽ ഈ ചാർട്ടുകൾ യൂട്യൂബ് മ്യൂസിക്കിന് മാത്രമേ ലഭ്യമാകൂ. അവിടെ ഉപയോക്താക്കൾക്ക് ട്രെൻഡിംഗ് മ്യൂസിക് വീഡിയോകൾ, മികച്ച പോഡ്‌കാസ്റ്റ് ഷോകൾ, ട്രെൻഡിംഗ് മൂവി ട്രെയിലറുകൾ എന്നിവ കാണാൻ കഴിയും. ഭാവിയിൽ കൂടുതൽ വിഭാഗങ്ങൾ ഇതിലേക്ക് ചേർക്കും. ഗെയിമിംഗ് വീഡിയോകൾക്കായി, ഗെയിമിംഗ് എക്സ്പ്ലോർ പേജിൽ ഉപയോക്താക്കൾക്ക് ഇപ്പോഴും ട്രെൻഡിംഗ് വീഡിയോകൾ കാണാൻ കഴിയും.

നിരവധി കണ്ടന്‍റ് ക്രിയേറ്റേഴ്സ് തങ്ങളുടെ ജനപ്രീതി അളക്കുന്നതിനും പുതിയ ട്രെൻഡുകൾ മനസിലാക്കുന്നതിനും ട്രെൻഡിംഗ് പേജ് ഉപയോഗിച്ചിരുന്നു. അതേസമയം, യൂട്യൂബ് സ്റ്റുഡിയോയുടെ ഇൻസ്പിരേഷൻ ടാബിൽ കണ്ടന്‍റ് ക്രിയേറ്റേഴ്സ് ഇപ്പോൾ പേഴ്സണലൈസ് ആശയങ്ങൾ ലഭിക്കുമെന്നും ഇത് ഉള്ളടക്ക ആസൂത്രണത്തിൽ അവരെ സഹായിക്കുമെന്നും യൂട്യൂബ് അറിയിച്ചു.

The post യൂട്യൂബിൽ വന്‍ മാറ്റം; 10 വര്‍ഷത്തിനൊടുവില്‍ ട്രെന്‍ഡിംഗ് പേജ് നിര്‍ത്തലാക്കി appeared first on Starvision News Malayalam.

തിരുവനന്തപുരം: കെ എസ് ആർ ടി സി പുതിയ സൂപ്പർ ഫാസ്റ്റ് ബസുകളുടെ ട്രയൽ ഡ്രൈവ് നടത്തി ഗതാഗത മന്ത്രി കെ ബി ഗണേഷ് കുമാർ. കെ എസ് ആർ ടി സിക്കായി വാങ്ങിയ പുതിയ സൂപ്പർ ഫാസ്റ്റ്, ഫാസ്റ്റ് പാസഞ്ചർ ബസുകളാണ് മന്ത്രി ഓടിച്ച് നോക്കിയത്. ട്രയൽ നോക്കിയ ശേഷം ചില നിർദ്ദേശങ്ങൾ ബന്ധപ്പെട്ടവരെ അറിയിച്ചിട്ടുണ്ടെന്നും ചെറിയ ചെറിയ മാറ്റങ്ങൾ മാത്രം വരുത്തി ഉടൻതന്നെ ബാക്കി ബസുകൾ കൂടി എത്തിക്കുമെന്നും മന്ത്രി വ്യക്തമാക്കി. പുതിയ ടെക്‌നോളജിയും കൂടുതൽ സൗകര്യങ്ങളും ഒരുക്കിയാണ് ബസ് എത്തുന്നതെന്നും മന്ത്രി വിവരിച്ചു. ‘കാത്തിരിക്കാം സുഖയാത്രയ്ക്കായ്… ഒട്ടും വൈകില്ലാ…’ – എന്നും മന്ത്രി ഫേസ്ബുക്കിൽ കുറിച്ചു.

മന്ത്രിയുടെ കുറിപ്പ് ഇപ്രകാരം

പുതിയ ബസുകൾ വരുമെന്ന് പറഞ്ഞു… വന്നു…

കെ എസ് ആർ ടി സിയ്ക്കായി വാങ്ങിയ പുതിയ സൂപ്പർ ഫാസ്റ്റ്, ഫാസ്റ്റ് പാസഞ്ചർ ബസുകൾ ഓടിച്ചു ട്രയൽ നോക്കി… ചില നിർദ്ദേശങ്ങൾ ബന്ധപ്പെട്ടവരെ അറിയിച്ചിട്ടുണ്ട്, ചെറിയ ചെറിയ മാറ്റങ്ങൾ മാത്രം വരുത്തി ഉടൻതന്നെ ബാക്കി ബസുകൾ കൂടി എത്തും. പുതിയ ടെക്‌നോളജിയും കൂടുതൽ സൗകര്യങ്ങളും ഒരുക്കിയാണ് ബസ് എത്തുന്നത്…

അതേസമയം കെ എസ് ആർ ടി സിയിൽ നിന്നുള്ള മറ്റൊരു വാർത്ത എല്ലാ യൂണിറ്റിലും ലാൻഡ് ഫോൺ ഒഴിവാക്കി പകരം മൊബൈൽ ഫോൺ നൽകിത്തുടങ്ങിയിരിക്കുന്നു എന്നതാണ്. ഇതിന്‍റെ ഭാഗമായി ഇന്നുമുതൽ (01.07.2025) സംസ്ഥാനത്തെ നിരവധി കെ എസ് ആർ ടി സി ബസ്‌ സ്റ്റേഷനുകളിലെ ലാൻഡ് ഫോണുകൾ പ്രവർത്തിക്കില്ല. പകരം മൊബൈൽ ഫോണുകൾ നിലവിൽ വന്നു.

തിരുവനന്തപുരം സെൻട്രൽ: 9188933717

ആറ്റിങ്ങൽ: 9188933701

നെയ്യാറ്റിൻകര: 9188933708

വിഴിഞ്ഞം: 9188933725

കാട്ടാക്കട: 9188933705

വെള്ളറട: 9188933721

വിതുര: 9188933724

വെഞ്ഞാറമൂട്: 9188933722

പാപ്പനംകോട്: 9188933710

പാലക്കാട്‌: 9188933800

കണ്ണൂർ: 9188933822

മലപ്പുറം: 9188933803

പെരിന്തൽമണ്ണ: 9188933806

നിലമ്പൂർ: 9188933805

പൊന്നാനി: 9188933807

തിരൂർ: 9188933808

തിരുവമ്പാടി: 9188933812

തൊട്ടിൽപ്പാലം: 9188933813

താമരശ്ശേരി: 9188933811

സുൽത്താൻബത്തേരി: 9188933819

ബാംഗ്ലൂർ : 9188933820

മൈസൂർ: 9188933821

കാസർഗോഡ്: 9188933826

തൃശ്ശൂർ: 9188933797

ചാലക്കുടി: 9188933791

ആലുവ: 9188933776

കന്യാകുമാരി: 9188933711

ചെങ്ങന്നൂർ: 9188933750

ചങ്ങനാശ്ശേരി: 9188933757

ചേർത്തല: 9188933751

എടത്വാ: 9188933752

ഹരിപ്പാട്: 9188933753

കായംകുളം: 9188933754

വൈക്കം: 9188933765

ഗുരുവായൂർ: 9188933792

ആര്യങ്കാവ്: 919188933727

അടൂർ: 9188933740

ആലപ്പുഴ: 9188933748

കൊട്ടാരക്കര: 9188933732

കോന്നി: 9188933741

കുളത്തൂപ്പുഴ: 9188933734

മല്ലപ്പള്ളി: 9188933742

മൂന്നാർ: 9188933771

മൂലമറ്റം: 9188933770

പാലാ: 9188933762

പത്തനംതിട്ട: 9188933744

പത്തനാപുരം: 9188933735

പന്തളം: 9188933743

പുനലൂർ: 9188933736

റാന്നി: 9188933745

തിരുവല്ല: 9188933746

തൊടുപുഴ: 9188933775

തെങ്കാശി: 9188933739

മാവേലിക്കര: 9188933756

അടിമാലി: 9188933772

The post പുതിയ ടെക്നോളജിയിൽ കെഎസ്ആർടിസിയുടെ പുതിയ ബസ് എത്തി, ഓടിച്ച് നോക്കിയ മന്ത്രി പറഞ്ഞത്! ‘സുഖയാത്രയ്ക്കായ്… ഒട്ടും വൈകില്ലാ…’ appeared first on Starvision News Malayalam.

തിരുവനന്തപുരം: ദേശീയ തലത്തില്‍ ബ്രോഡ്ബാന്‍ഡ് ഇന്‍റര്‍നെറ്റ് നല്‍കാനുള്ള ഐഎസ്പിഎ (ഇന്‍ര്‍നെറ്റ് സര്‍വീസ് പ്രൊവൈഡര്‍ – കാറ്റഗറി എ) ലൈസന്‍സ് കരസ്ഥമാക്കി കെഫോണ്‍. ഇതോടെ കേരളത്തിന്‍റെ സ്വന്തം നെറ്റ്‍വര്‍ക്കായ കെഫോണിലൂടെ രാജ്യത്തെവിടെയും ഇന്‍റര്‍നെറ്റ് സര്‍വീസ് നല്‍കാനാകും. ദില്ലിയിൽ നടന്ന ചടന്ന ചടങ്ങില്‍ ഡിഒടി എഎസ് ഡിവിഷന്‍ അണ്ടര്‍ സെക്രട്ടറി ദിലീപ് സിങ്ങ് സങ്ഗാര്‍ കെ ഫോണ്‍ എംഡി ഡോ. സന്തോഷ് ബാബുവിന് സര്‍ട്ടിഫിക്കറ്റ് കൈമാറി.

കെഫോണ്‍ സിടിഒ മുരളി കിഷോര്‍, സിഎസ്ഒ ബില്‍സ്റ്റിന്‍ ഡി ജിയോ, സിഎഫ്ഒ പ്രേം കുമാര്‍ ജി, മാനേജര്‍ സൂരജ് എ തുടങ്ങിയവര്‍ പങ്കെടുത്തു. കേരളത്തിലുടനീളം സജ്ജീകരിച്ചിരിക്കുന്ന നെറ്റ്‍വര്‍ക്ക് സംവിധാനത്തിന് പുറമേ മറ്റ് സംസ്ഥാനങ്ങളില്‍ നെറ്റ്‍വർക്ക് സംവിധാനമൊരുക്കിയും പ്രധാനപ്പെട്ട ഇന്‍റര്‍നെറ്റ് സര്‍വീസ് പ്രൊവൈഡര്‍മാരുമായി സഹകരിച്ചും കെഫോണ്‍ രാജ്യവ്യാപകമായി ഇന്‍റര്‍നെറ്റ് സേവനം നല്‍കും

ഐഎസ്പി – എ ലൈസന്‍സ് നേട്ടം കെഫോണിന്‍റെ ജൈത്രയാത്രയിലെ ഒരു നാഴികക്കല്ലാണെന്നും കൂടുതല്‍ മികച്ച രീതിയില്‍ സേവനം നല്‍കാന്‍ ഈ നേട്ടം ഊര്‍ജ്ജം പകരുമെന്നും കെഫോണ്‍ മാനേജിങ്ങ് ഡയറക്ടര്‍ ഡോ. സന്തോഷ് ബാബു പറഞ്ഞു.

The post കേരളത്തിന്‍റെ കെ ഫോണിന് ദേശീയ തലത്തില്‍ ലൈസൻസ്; രാജ്യത്തെവിടെയും ഇന്‍റര്‍നെറ്റ് സര്‍വീസ് നല്‍കാനാകും appeared first on Starvision News Malayalam.

മനാമ: കിരീടാവകാശിയും പ്രധാനമന്ത്രിയുമായ സല്‍മാന്‍ ബിന്‍ ഹമദ് അല്‍ ഖലീഫ രാജകുമാരന്റെ രക്ഷാകര്‍തൃത്വത്തില്‍, അറബ് ഫെഡറേഷന്‍ ഓഫ് കാപിറ്റല്‍ മാര്‍ക്കറ്റ്സുമായി (എ.എഫ്.സി.എം) സഹകരിച്ച് നവംബര്‍ 20ന് ബഹ്റൈന്‍ ബോഴ്സ് ബി.എച്ച്.ബി. ദി മാര്‍ക്കറ്റ് 2.0 സമ്മേളനം സംഘടിപ്പിക്കും.

‘മൂലധന വിപണികളിലെ വിനാശകരമായ ഡിജിറ്റല്‍ പരിവര്‍ത്തനം’ എന്ന പ്രമേയത്തില്‍ നടക്കുന്ന സമ്മേളനം, ആഗോള ഇക്വിറ്റി വിപണികളുടെ ഭാവി രൂപപ്പെടുത്തുന്നതില്‍ സാങ്കേതികവിദ്യകളുടെയും അടിസ്ഥാന സൗകര്യ വികസനത്തിന്റെയും വര്‍ദ്ധിച്ചുവരുന്ന പങ്കിനെക്കുറിച്ച് ചര്‍ച്ച ചെയ്യും.
സാങ്കേതിക പുരോഗതി മൂലധന വിപണികളെ എങ്ങനെ ആധുനികവല്‍ക്കരിക്കുന്നുവെന്നും അവയുടെ കാര്യക്ഷമത, സുസ്ഥിരത, ഉള്‍പ്പെടുത്തല്‍ എന്നിവ എങ്ങനെ വര്‍ധിപ്പിക്കുന്നുവെന്നും പരിശോധിക്കുന്നതിനുള്ള ഒരു കേന്ദ്രീകൃത വേദിയായിരിക്കും സമ്മേളനമെന്ന് ബഹ്റൈന്‍ ബോഴ്സ് സി.ഇ.ഒ. ഷെയ്ഖ് ഖലീഫ ബിന്‍ ഇബ്രാഹിം അല്‍ ഖലീഫ പറഞ്ഞു. സമ്മേളനത്തെക്കുറിച്ചുള്ള കൂടുതല്‍ വിവരങ്ങള്‍ക്ക് കോണ്‍ഫറന്‍സ് പേജ് https://market.arab-exchanges.org/ സന്ദര്‍ശിക്കാവുന്നതാണ്.

The post ബഹ്‌റൈനില്‍ നവംബറില്‍ ദി മാര്‍ക്കറ്റ് 2.0 സമ്മേളനം appeared first on Starvision News Malayalam.

മനാമ: ഇന്ത്യൻ സ്‌കൂളിൽ വിവിധ പരിപാടികളോടെ ടെക്‌നോഫെസ്റ്റ് ആഘോഷിച്ചു. ഇസാ ടൗൺ കാമ്പസിൽ നടന്ന വാർഷിക ടെക്‌നോഫെസ്റ്റിൽ 4 മുതൽ 12 വരെ ക്ലാസുകളിലെ വിദ്യാർഥികൾ സജീവമായി പങ്കെടുത്തു. ഇന്ത്യൻ ദേശീയ ശാസ്ത്ര സാങ്കേതിക ദിനത്തോടനുബന്ധിച്ച് സയൻസ് വിഭാഗമാണ് വിദ്യാർത്ഥികളെ ശാസ്ത്ര പര്യവേക്ഷണം ചെയ്യാൻ പ്രോത്സാഹിപ്പിക്കുന്ന വിപുലമായ മത്സരങ്ങൾ സംഘടിപ്പിച്ചത്.

ശാസ്ത്ര വിഷയങ്ങളിൽ ശ്രദ്ധ കേന്ദ്രീകരിച്ചുള്ള മോഡൽ നിർമ്മാണം, പോസ്റ്റർ രൂപകൽപ്പന, ഡിസ്പ്ലേ ബോർഡ് അവതരണങ്ങൾ തുടങ്ങിയ വിവിധ പ്രവർത്തനങ്ങളിൽ വിദ്യാർത്ഥികൾ പങ്കെടുത്തു. നാലാം ക്ലാസിനായി പാഴ് വസ്തുക്കളിൽ നിന്നുള്ള മോഡൽ നിർമ്മാണ മത്സരമാണ് സംഘടിപ്പിച്ചത്.

മത്സരത്തിൽ അബിഗെയ്ൽ അരുൺ (4-Z), ഡെബോറ സാഷ എഡ്വിൻ (4-T), യൂസിഫ് ഖമിസ് സാദ് (4-M) എന്നിവർ ജേതാക്കളായി. നല്ല നാളേക്കുവേണ്ടി മണ്ണ് സംരക്ഷണം എന്ന വിഷയത്തിൽ പോസ്റ്റർ നിർമ്മാണ മത്സരത്തിൽ അഞ്ചാം ക്ലാസ് വിദ്യാർത്ഥികൾ അവരുടെ കലാപരമായ കഴിവുകൾ പ്രദർശിപ്പിച്ചു. ഹീർ ദീപക് ഭായ് കകാദിയ (5-H), സെറ കിഷോർ (5-J), പ്രത്യുഷ ഡേ (5-R) എന്നിവർ മികച്ച പ്രകടനം കാഴ്ചവച്ചു. ഉയർന്ന ക്ളാസുകൾക്കായി ഡിസ്പ്ലേ ബോർഡ് മത്സരങ്ങൾ നടത്തി.

ആറാം ക്ലാസിനായി ശുദ്ധജലവും ശുചിത്വവും കേന്ദ്രീകരിച്ചുള്ള ഡിസ്പ്ലേ ബോർഡ് മത്സരത്തിൽ 6-K, 6-P, 6-F എന്നീ ക്ലാസ്സുകൾ ആദ്യ മൂന്ന് സ്ഥാനങ്ങൾ നേടി. ഏഴാം ക്ലാസിനായി ആൾട്ടർനേറ്റ് എനർജി അടിസ്ഥാനമായ മത്സരത്തിൽ 7-C, 7-Q, 7-H എന്നിവ ജേതാക്കളായി. എട്ടാം ക്ലാസിന് ബഹിരാകാശ പര്യവേഷണങ്ങൾ ആയിരുന്നു ഡിസ്പ്ലേ ബോർഡ് മത്സര വിഷയം. അതിൽ 8-D, 8-K, 8-P എന്നീ ക്ലാസുകൾ ജേതാക്കളായി. ഡിജിറ്റൽ പോസ്റ്റർ നിർമ്മാണ മത്സരങ്ങൾ ശാസ്ത്രീയ അറിവും കലാമികവും ഉയർത്തിക്കാട്ടിയിരുന്നു. ഒമ്പതാം ക്ലാസ് വിദ്യാർത്ഥികൾ വാക്സിനുകളുടെ ശാസ്ത്രത്തിൽ ഡിജിറ്റൽ പോസ്റ്റർ നിർമ്മിച്ചു. 9-Q, 9-I, 9-P എന്നീ ക്ളാസുകൾ വിജയിച്ചു.

പത്താം ക്ലാസ് ശാസ്ത്രത്തിലെ വനിതകൾ: ഭൂതകാലവും വർത്തമാനവും എന്ന വിഷയത്തെക്കുറിച്ച് ഡിജിറ്റൽ പോസ്റ്റർ നിർമ്മിച്ചു. 10-H, 10-W, 10-U എന്നീ ക്ലാസുകൾ ജേതാക്കളായി. പതിനൊന്നാം ക്ലാസിനായി ഇന്റർനെറ്റ് ഓഫ് തിംഗ്‌സിൽ പോസ്റ്റർ ഡിസൈൻ മത്സരത്തിൽ 11-H, 11-N, 11-Q എന്നീ ക്ലാസുകൾ ജേതാക്കളായി. പന്ത്രണ്ടാം ക്ലാസിനുള്ള ആണവോർജ്ജ ഡിജിറ്റൽ പോസ്റ്റർ നിർമ്മാണ മത്സരത്തിൽ 12-H ഒന്നാം സ്ഥാനം നേടിയപ്പോൾ 12-N, 12-Q എന്നീ ഡിവിഷനുകൾ രണ്ടും മൂന്നും സ്ഥാനങ്ങൾ കരസ്ഥമാക്കി. സ്‌കൂൾ അസി. സെക്രട്ടറിയും അക്കാദമിക് അംഗവുമായ രഞ്ജിനി മോഹൻ വിജയികൾക്ക് സമ്മാനം വിതരണം ചെയ്തു.

പ്രിൻസിപ്പൽ വി.ആർ പളനിസ്വാമി, സീനിയർ സ്കൂൾ ആൻഡ് അക്കാദമിക് അഡ്മിനിസ്ട്രേഷൻ വൈസ് പ്രിൻസിപ്പൽ ജി. സതീഷ്, മിഡിൽ സെക്ഷൻ വൈസ് പ്രിൻസിപ്പൽ ജോസ് തോമസ്, വകുപ്പ് മേധാവികൾ, പ്രധാന അധ്യാപകർ എന്നിവർ തസവസരത്തിൽ സന്നിഹിതരായിരുന്നു. സ്‌കൂൾ ചെയർമാൻ അഡ്വ. ബിനു മണ്ണിൽ വറുഗീസ്, സെക്രട്ടറി വി. രാജപാണ്ഡ്യൻ, ഭരണസമിതി അംഗങ്ങൾ, പ്രിൻസിപ്പൽ വി.ആർ പളനിസ്വാമി എന്നിവർ ജേതാക്കളെയും അധ്യാപകരെയും അഭിനന്ദിച്ചു.

The post ശാസ്ത്ര സാങ്കേതിക ദിനത്തോടനുബന്ധിച്ച്ഇന്ത്യൻ സ്‌കൂൾ ടെക്‌നോഫെസ്റ്റ് ആഘോഷിച്ചു appeared first on Starvision News Malayalam.

കെയ്റോ: 2024ലെ ഗ്ലോബല്‍ സൈബര്‍ സുരക്ഷാ സൂചികയില്‍ (സി.എ.ഐ.സി.ഇ.സി 25) ആഗോളതലത്തില്‍ ഒന്നാം സ്ഥാനത്തെത്തിയ ബഹ്റൈനെ അറബ് ഇന്‍ഫര്‍മേഷന്‍ ആന്റ് കമ്മ്യൂണിക്കേഷന്‍ ടെക്നോളജീസ് ഓര്‍ഗനൈസേഷന്‍ ആദരിച്ചു.
മെയ് 25, 26 തീയതികളില്‍ കെയ്റോയില്‍ ഈജിപ്ത് പ്രധാനമന്ത്രി ഡോ. മുസ്തഫ മദ്ബൗലിയുടെ രക്ഷാകര്‍തൃത്വത്തില്‍ നടന്ന വിവര സുരക്ഷയും സൈബര്‍ സുരക്ഷയും സംബന്ധിച്ച നാലാമത് അന്താരാഷ്ട്ര സമ്മേളനത്തിന്റെ ഉദ്ഘാടന വേളയിലാണ് ഈ അംഗീകാരം ലഭിച്ചത്.
ബഹ്റൈനെ പ്രതിനിധീകരിച്ച് നാഷണല്‍ സൈബര്‍ സെക്യൂരിറ്റി സെന്ററിലെ സൈബര്‍ ഓപ്പറേഷന്‍സ് ഡെപ്യൂട്ടി പ്രസിഡന്റ് ഷെയ്ഖ് അബ്ദുല്ല ബിന്‍ മുഹമ്മദ് ബിന്‍ അബ്ദുല്‍ വഹാബ് അല്‍ ഖലീഫ അറബ് എക്സലന്‍സ് ഷീല്‍ഡ് സ്വീകരിച്ചു.
വിവര സുരക്ഷയും സൈബര്‍ സുരക്ഷയും സംബന്ധിച്ച നാലാമത് അന്താരാഷ്ട്ര സമ്മേളനത്തില്‍ 180ലധികം പ്രഭാഷകരും 5,000 പ്രതിനിധികളും പങ്കെടുത്തു. രാഷ്ട്രങ്ങളുടെയും സ്ഥാപനങ്ങളുടെയും സാങ്കേതിക പ്രതിരോധശേഷി വര്‍ദ്ധിപ്പിക്കുക, പൊതു-സ്വകാര്യ സഹകരണം വികസിപ്പിക്കുക, അറബ് ലോകത്ത് കൂടുതല്‍ സുരക്ഷിതവും സുസ്ഥിരവുമായ ഡിജിറ്റല്‍ ഭാവി കെട്ടിപ്പടുക്കുന്നതിന് സംഭാവന നല്‍കുക എന്നിവയാണ് ഇതിന്റെ ലക്ഷ്യം.

The post സൈബര്‍ സുരക്ഷാ സൂചികയില്‍ മികച്ച ആഗോള റാങ്കിംഗ് ബഹ്റൈന് ആദരം appeared first on Starvision News Malayalam.